|
日記簿
記下一些發生過的事 不論是喜,還是悲…… <---- 這就是小黑 |
![]()
一至七月日記 舊日記
![]()
2004年 7 月 22 日 星期四 【陰】01:15pm 23_7_2004
唔記得係小六定初中既時候,家姐睇過一本書叫<太陽溶化了他那雙蠟造的翅膀>,係李敏寫既小說。
當時我俾個書名吸引住,但係又覺得呢D係女仔書男仔唔可以睇(咁幼稚既思想通常都係初中咁上下時間既事),所以當時我無睇到。直到今時今日,我終於睇左呢本書。而且睇呢本書之前我已經睇左呢個希臘神話。
完成好耐之前曾經想去做既事,呢種感覺好特別,一方面開心,另一方面又好似無左D野咁。怪怪的……
![]()
2004年 7 月 21 日 星期三 【陰】12:48pm 23_7_2004
最後一次為左雅典個節目去 TVB lu∼
響化妝間見到葉璇,原來佢返左黎呀∼∼可惜同唔到佢影相佢就要去拍野啦……呢次同我地做活動後訪問既有鄧健泓同許志安。許志安原來都真係幾寸,不過都唔多關我事。正式拍野既時間大約係由點半拍到六點。
拍完野我就跟 Toby、美儀、阿芬、Tony&阿遠一齊過銅鑼灣食野,食完野之後就上 rack 7 度玩。上到去,Ada、Pamela、Sonia同Alice 相繼上到黎。我地玩七級豬,之後傾計同睇片,玩到成兩點幾先返屋企,返到去已經三點幾,第二朝六點就要起身準備去開工。不過只要開心,咁就無所謂啦∼! ^^
![]()
2004年 7 月 19 日 星期一 【陰】06:57pm 19_7_2004
要記低今日同之前兩日既事。
上星期六,因為落左風球又無暴雨訊號,可以去青協個歷奇 camp,所以勁開心∼!
雖然係冒雨行赤徑,但係一路上大家都互相支持同關心,成個 camp 入面我地十幾人就好似一家人咁,0個種溫暖既感覺真係好好。而且響個 camp 入面我都了解自己多左,係另一個好既開始。真係好想同咁多位組員講聲多謝,因為大家都好信任我,而我亦都響大家身上我都學到好多唔同既野。
到星期日出左 camp 之後,我就同 Liana、阿衍、2汪、阿菜、阿聰、達華、豬雄、阿Sam、阿妍、Addy、Jackie、阿強 一齊去鑽石山 Pizza Hat 度食野。食完野我就過大坑道上 first- aid(不過就五點先過到去,六點鐘落堂)。之後行過皇仁舊生會度搵老豆同媽咪,見下佢地班朋友。六點九左右我就返屋企,on 左陣 line 九點就響老豆張床度訓左。
到今朝起身,見到媽咪訓左響隔離,初頭仲以為係夜晚媽咪眼訓訓先而老豆打緊機,到我起左身先知原來老豆訓左上我張床度,因為我訓左佢個位。當時一刻我覺得幾感動,因為老豆選擇以佢壯健既身型去體驗我訓張低闊度、枕頭邊放左D雜物既上格床,而唔係叫醒我返上自己張床度訓。咁既情況呢廿年黎都係第一次。自高考成績差老豆無怪我之後,我再一次感受到父愛既偉大。
同老豆&媽咪食完早餐,我地過左黃埔睇<哈利波特.阿茲卡班的逃犯>(我地選擇左睇粵語版)。套戲無人地講得咁悶,不過得意在完場走既時候,先見到原來除左我地之外,其餘所有觀眾都係大人帶住小朋友去睇(響老豆同媽咪眼中,我永遠都係小朋友∼!)。再行陣街,老豆同媽咪就去買餸,我就拎左D野返屋企先。
![]()
2004年 7 月 15 日 星期四 【陰】03:45pm 15_7_2004
勁開心呢∼!
十二點幾,約左 Sonia 姐姐去食 lunch,同行既有TOBY、美儀、阿遠同阿芬。我地去食泰國野,但係個FEEL 似晚餐囉,多野到呢……之後 Sonia 姐姐送左我地去地鐵站先返公司,阿遠又走先,我地就過北角搵 Alice 姐姐問佢拎D相黎睇∼∼睇完相大約三點九左右,同 Cathrine 返過紅磡 ICE FIRE 開倉度睇 0急,可惜睇唔 0岩。
夜晚七點過橫頭磡上歷奇導師訓練。今堂多左幾個新同學,都幾好玩。上呢個課程的而且確學到幾多野,了解自己都多左。今次都係遲走,十一點一先走。行到返屋企,老豆又叫返我落街同慈哥佢地霄夜,一直攪到點幾鐘先可以返屋企訓覺。
好期待星期六個 training camp 呀∼!
PS:Sorry ar Cathrine,我掛住睇相唔記得睇錶,累你要趕車…… /_\
![]()
2004年 7 月 12 日 星期一 【晴】02:43pm 13_7_2004
唔記得左五點前做過D咩啦∼
五點三搭車過會展開工,竟然塞車塞到五點九都仲未去到第二個站……無奈之餘我放棄左 $8.9,即刻落車去搭VAN 仔落旺角轉地鐵。過到會展已經六點半,好彩老細唔響度,佢地照幫我剔到。今次我要守既地方係7號貨笠,唔俾D人混入去睇 TWINS 既演唱會(而我都係有得聽無得睇架……)。其實呢個位都幾好架,齋坐幾個鐘就有糧出,仲可以聽歌添∼!(我終於明白睇同聽演唱會既分別,係在於齋聽會覺得自己好似響K房聽人唱K,因為 TWINS 同 BOY'Z 既水準的確係 -_-" 架……)
由於 TWINS 唔知攪乜鬼攪到差唔多十二點先肯走,結果我地就等到佢地走先有得走。臨收工見到老細個女,我諗大約十歲左右啦,仲有「氣勢」過老細(老細個樣已經好猛架啦),原來老細對住個女都好「慈父」FEEL 架∼! ^^
![]()
2004年 7 月 11 日 星期日 【晴】02:22pm 13_7_2004
都係夜晚活動,又係打邊爐!
今次好多人呀!有峰少、JIMMY、阿蕉、SOLUTION、GAP維、濠哥、APRIL、阿SA、關曦、tine tine、IDA、牛牛、苦榮、吹風、清清。我地響黃埔新星打邊爐,D野食同服務態度都幾好。最正係野飲(啤酒)免費任飲嘛∼!
本來一次過同唔個人攪生日架,可惜我既好徒兒笑笑唔出得夜街,所以就改為同四個壽星:峰少、苦榮、IDA & SOLUTION慶祝啦∼!好掛住我既好徒兒呀!!!!!!(聽聞佢地ENROLMENT 既時候係我既好徒兒播我段片,開心到暈呀!)
每次諗起呢班朋友仔,我就唔想長大啦……點解唔俾STAFF 同MEMBER 玩得埋喎∼?! >_<"
![]()
2004年 7 月 10 日 星期六 【晴】01:20pm 13_7_2004
上晝做過D咩就真係威 LU!仲好記得夜晚去玩同睇相∼!
今日D ENROLMENT 既時間真係好 FIT!9:00am - 12:00pm 就YU112 培正,2:00pm- 4:00pm就YU50 德雅(響油麻地攪),5:00pm- 7:00pm 就YU218 九龍塘真光。一日之內為104 位宣誓會員鼓掌(仲有兩位我懶無拍手),你試過未∼?
九點半鐘,同 K仔、ALICE姐姐、SONIA姐姐、阿遠、阿芬、美儀、TONY、康樂、TOBY、PAMELA 一齊去旺角德興打邊爐。我地淨係睇相都睇到手軟呀∼ ALICE 姐姐晒左卅幾筒菲林,可想而知有幾多本相簿啦∼∼∼ 我地玩下傾下,到十二點幾就轉移陣地。我地去過「巴黎」(COFFEE SHOP 黎既…)不過無位。本來打算唱K,但係又要等位,結果我地就過左仙跡岩度飲野。
響仙跡岩度大定繼續睇相傾計。SONIA 姐姐約我地七月廿五日上佢屋企一齊睇電視,係我地個比賽既第一集呀∼!好期待去SONIA 姐姐屋企玩呀∼!仲可以見下佢個仔仔添∼! ^^
我地玩到兩點幾就散水,同呢班朋友玩真係好開心呢∼! ^^
PS:多謝 TOBY 咁好心機,每人整左隻 DVD 俾我地∼! THX AR∼!!
![]()
2004年 7 月 9 日 星期五 【晴】12:18pm 13_7_2004
都係用口語黎寫日記生動D∼∼
應該由七月八日開始講起∼
七點鐘起身開始,先同阿 SA、JIMMY & 吹風去游水。游完食埋LUNCH就上公司拎埋件開工衫,之後返屋企執左陣野,七點就過樂富上堂。呢個歷奇導師訓練我覺得會幾好玩,一來阿SIR 個樣幾似梁家輝,又玩得,二來班同學都好玩得(又有靚女∼呵呵呵呵∼∼),三來識到個YU114 既MEMBER∼ ^^
上完堂行返屋企沖個涼食D野,本來諗住訓架啦,點知阿榮打黎叫我落街,原來佢地放榜前夕緊張得滯訓唔著,所以就叫左我去玩&傾計(但係我訓得著兼好想訓架囉…)。我同阿榮、阿淳、病蔡玩另類鋤DEE,玩到個人大隻左,因為一晚之內做左三百幾下掌上壓。阿榮仲勁,做左近四百下,由於我地四個人都無著上衫,所以好明顯見到佢個胸大左∼!玩到朝早,我地四個人一齊食早餐,然後返學校拎成績通知單。
返到學校,校長竟然因為我地無著校服而拒絕派張通知單俾我地。條友都白痴架!我地兩班人加埋得三個人有著校服返黎之嘛!而且學校又無通知,四圍間間學校都係著便服返去拎既!白痴仔見得多,好似余記校長咁白痴既都真係少見!結果我地撐到十二點幾佢都唔肯妥協,要我地寫原因俾佢先拎得,都痴線架,原因咪就係你傻仔又要爛叻囉校長!如果我唔係做左 YUT,要返學校做野既話,我實響校長室插到佢P呀!雖然最後都拎到張野,但係班同學已經 CALL 晒記者黎,又一次出現於傳媒……
呢單野害我預算既個幾鐘休息時間就咁無左,要直接過機場接機。同TOBY & ADA 一齊搭車過機場,等到三點幾見到由雅典返黎既一班朋友仔真係好開心!ALICE 同美儀講左好多攪笑野俾我地聽,仲一齊影相添∼!之後我同WOODY、康樂、阿芬、美儀、TOBY & ADA 車一齊走。響車度又聽美儀講左好多響雅典發生既事,好鬼攪野∼! 不過最神奇既都係個司機。四點左右開車,由機場出發經西灣、落旺角,最後去土瓜灣,竟然要七點鐘先去到……我應該七點鐘去到 HO 開同心同根個簡介會架囉……八點鐘過到 HO,聽到十點幾走人,十一點幾返到屋企,攪掂埋D手尾已經一點左右。經過連續42小時既活動,我真係好需要休息……
![]()
2004年 7 月 6 日 星期二 【陰】02:13am 7_7_2004
四時許,誠邀 Pamela 協助我選禮物。買女孩子的東西始終是女孩子的眼光比較好。Thanks Pamela∼!
買過了禮物便到新世紀去買了九張<蜘蛛俠2>的戲票。今晚約了 TOBY、ADA、MANDY、Pamela、蔡業、HAZEL、CATHY、ORLANDO 一起先看戲,後到芝士屋吃晚飯。
除了在戲院看著銀幕的時間外,其餘時間都在談希臘之旅發生過的事。雖然重複說了好幾次,但說起仍是挺開心的∼!
很掛念大家,希望有一天我們一行十八人加上 Sonia姐姐 和 新Monday姐姐 能再聚在一起,談談大家的近況。
really really hope for the day~!!!
![]()
2004年 7 月 5 日 星期一 【晴】03:47am 6_7_2004
留在家中,看了<見鬼2>和<雙雄>。<雙雄>也可算是一部不錯的電影。
晚上跟媽媽、雄舅父、雄舅母、家姐在蘇記吃晚餐,然後家姐回家來接她的手信回家。說老實的,在這麼緊密的行程間仍能買得到這少少的手信回來,真的要多謝 Sonia 姐姐那天早上帶我們溜了出去。
離港前,在街上隱約聽到一首歌,今天終於讓我找到了。它的歌詞簡直如羅賓漢的箭,一矢中的,完全說出了久久困擾著我的感覺。所以說,黃偉文的歌詞是很「到」的。這一刻,咳得肺也似要脫口而出的我,已聽了二十多次……
<耿耿於懷> - 麥浚龍
作曲 / 編曲 : 伍樂城 作詞 : 黃偉文 監製 : 伍樂城 RNLS
你 最近還好嗎? 尚愛看少女漫畫嗎?
最近 近乎沒露面 你有新對象嗎?
真想帶你見見 我剛識到的她
我想聽你意見 這算是病吧?
為何無論我 願意怎樣試 怎樣也
不可一樣愛慕她?
(沒令自己戀上她?)
難道沒練習太耐 感覺都追不回來
試圖再 努力愛 也顯得不自在
不懂得如何談戀愛
還是我太愛你 對過去太放不開
難道是寂寞太耐 生�蛌甄磥ㄞ銃}
鑰匙也 折斷了 留在舊患所在
懷內 放滿對你的愛 難怪跟誰也 再沒法戀愛
我 有時仍很怕 路過你那從前的家
往事 若然未落幕 再揭起有害嗎?
難道沒練習太耐 感覺都追不回來
試圖再 努力愛 也顯得不自在
耿耿於懷從前的愛
從沒有 振作過 痛了再痛也應該
難道是寂寞太耐 生�蛌甄磥ㄞ銃}
往事卻 似斷箭 還剩下在體內
若懷內 放滿對你的愛 害怕一直也 再沒法戀愛
![]()
2004年 7 月 4 日 星期日 【晴】02:55am 5_7_2004
昨晚回到香港,感覺好得很!很掛念香港的一切:朋友、家人、美食……
整個行程都很愉快。雖然是第一隊輸了,但學到的與見識到的也真的不少。而且有很多難忘的事!
記得葉璇真的又美又好人,一個人買了廿多支水走上路程不短的巴特隆神殿給我們和其他工作人員;而且她也很看好我們這一隊,聽 Toby 說當我們輸了的時候,她哭了……
記得在車上,Sonia 姐姐叫我唱歌,我便唱了鄧健泓的歌。他聽了後先是跟我們開玩笑,然後教我們唱歌,這個人真的很趣怪!
記得袁彩雲在我們看完 playback 後互訴心聲時哭了出來,讓我感到她也有很真摰的一面。
記得 Bobo 在跟我們合作後那一句「加油!」。
記得黎諾懿那句口頭蟬「斜晒」,聽得 Toby、Pamela 和我三個人都「斜晒」…… -_-"
記得希臘那些如樹皮的肉食、讓我覺得自己像在吃草的沙拉、和很咸很多味精的中國菜……
記得「靚女老師wxy xy」(是代數式罷∼ 例如:靚女老師教唱歌 唱歌∼∼)
記得早上六時多,康樂到我們房來問我們:「現在是一時多嗎?嚇死我了!」(振振跟他同房卻又不問他…)
記得 Pamela 那個重拍得獎一幕的樣子……真的很浮誇呀∼!!哈哈哈哈∼∼∼
記得 Sonia 姐姐在「雅典蘭桂坊」請我們食雪糕。記得輸了那一晚霸佔了 Sonia 姐姐的房間睡了兩個多小時。我覺得她絕對會是個好媽媽,因為我仍記得朦朧間她替我除下眼鏡、給我蓋被子、還放了個毛公仔在我的枕邊。而當我們阿波羅隊輸了時,我見到她流淚了…… Sonia 姐姐,你是個好好好好好好的人,我永遠不會忘記你!
記得自己泡進愛琴海時的興奮、把所有不滿都大叫了出來後的舒暢,以及在愛琴海一泡再泡的那種不捨的心情(所以冷到了氣管,回到香港仍在咳……)
還有許多許多……善忘的我,可能到了某天我會忘記了這一切,但我會努力去保存這段行程的記憶!有些事與記憶,是不可以讓它隨年月消逝的!
再說今天,第一天與媽媽上 St.John 的急救班。可能是我太倦的關係,上課時不住的打瞌睡,幸好今天教的我都會。
晚上跟慈哥、鄭Sir 吃晚飯,吃了一半便離席。由銅鑼灣走到灣仔的玩具街,選了好一陣子才找到合適的東西給峰少當生日禮物。我自己也買了一盒 HE-MAN 系列的獸人。回想在雅典機場見到那一盒 9.9 歐羅的 HE-MAN 公仔,真的很慶幸自己生於香港!
![]()
2004年 6 月 25 日 星期五 【晴】03:56am 26_6_2004
回家感覺真好……
上一次凌晨三時後才回到家裡,已是數個月前的事。
早上跟家父及家母食早餐前買了一本 新 Monday 周刊,因為今期開始有關於我們雅典前哨戰的報導。
到了下午一時許,咱們大伙相約於黃埔吉之島的食堂,吃了些東西後便一起走到加洲健身中心去「上課」。而事實上,那只不過是讓記者跟藝員拍照,及拍一小段讓電視播放的片斷罷了。
難忘的卻是之後的行程。先是到了無線電視城後,導演說我們所有人帶錯制服,接著派專車送我們回家去取合適的新制服回將軍澳電視城;然後是晚上八時半開始拍攝咱們一行九位入圍者的開場「變身」片斷。相信這片斷在電視中最多只有五秒時間,但我們卻拍了五個多小時,也就是凌晨一時五十五分才能乘車到旺角。而到了旺角時,已經是凌晨的二時三十五分……
走了約半小時的路程,回到家裡時已三時多一點。難怪那些藝員說工作很辛苦了。
相信明晚之前我也不會離開土瓜灣區。如今最需要的,是讓自己好好休息……
![]()
2004年 6 月 24 日 星期四 【晴】12:26am 25_6_2004
準備離港前作了個決定:再次用白話文寫日記!
不希望再只是於傷心時用白話文寫日記,這似乎是在浪費自己的中文書寫能力。
再一次剪頭髮,仍是短短的,但去年那個最愛的髮型始終回復不了……
四時許,乘巴士往鰂魚涌地鐵站。可惜三輛巴士像是連卡車廂般一同往前慢慢駛進,害我遲了一點
接著是跟 Toby 在溝通上出了誤會,加上「設計奇特」的鰂魚涌地鐵站,害我跑了一身汗後還要遲到……
到了可口可樂公司的辦公室,由 Sonia 負責接待我們一行七人(Toby、Pamela、Tony、阿遠、阿芬、美儀、我)。
無疑,贊助商是慷慨的!(非慷他人之慨可比)不妨看看各贊助商的贊助品:
可口可樂:BONAQUA 水三支、即將推出換購的大背囊、手錶及水壺各一
adidas:短褲四條、短袖上衣三件、風褸一件、袜三對、毛巾一條
GIORDANO:內衣兩件
揹著這麼一袋物資回家,跟阿芬一同乘車回土瓜灣,不知何故又一次塞車。
車內的話題,離不開如何潛逃出外活動及回港日期的早與遲。
因為今天收到消息,為了我們參加者的人身安全,似乎全程也不會有自由活動時間去買手信或逛夜市。
另一方面,第一隊在比賽中輸了的隊伍,將會跟攝製隊一同於七月三日乘機回港,所以阿芬氣憤外亦很怕要提早回港。
而我,除了認為即使要擔心也無需這麼早外,還覺得有點睏……
到婆婆家跟婆婆寒暄了幾句,拿了些荔枝後才回家。
接近十一時,逆天山長水遠的來找我,所以到了樓下跟他談了一會。
知道他找了份喜歡的工作,而且快升職,我也替他感到高興!
今天沒有告訴你,其實我看這個故事的時候也差點流出淚來。
周淑屏所寫的故事最吸引我之處,正是在於它能牽動我的情感與回憶……
最近很喜歡這首較舊的歌,可能是因為部份歌詞說中了我心中所想吧。
的確,許多時候裝傻都只是為了想令別人開心。自己的感覺?誰有空來管!
<傻大哥 > - 鄭中基
傻也許為營造氣氛 傻得起都很有心
紋眉弄眼不過立心想你開開心 別要緊
若我有失體統不太像男人 罰我多一晚
傻也許就如為你死 看不起都可記起
胡鬧大概不過為掩飾我的可悲 沒法比
但就算鬱鬱不得志又自卑 還有膽追你
寧願記不起誰是我 你喜歡的我
勤力進取 謙虛勇睿 我只得幾多
我只得馴良無比一個心 你恨我的人
仍會愛這好心地 你去自問
不成材 如果可以等 發誓決心立志再做人
正經得仿似校訓 才和你合襯
傻也許因你扮跌低 你怎忍心踩到底
如能為你不顧自尊可算好東西 若過矮
代我挺起胸襟走我後樓梯 沒有攻心計
![]()
2004年 6 月 23 日 星期三 【晴】02:12am 23_6_2004
十二點幾,終於返到屋企∼
講返尋晚先,可能同貓貓玩得太埋,吸到佢唔少毛入氣管,結果成晚咳之餘,呼吸仲有D困難……
(你果然犀利呢!記得我氣管唔好。今次我無飲啤酒呀,不過飲啤酒又唔會咁辛苦…… ^^")
到今日同貓貓玩左成日,盒紙巾都係同我形影不離架…
朝早同家姐、拜倫哥&佢地D朋友仔去飲早茶,撩左幾個BB玩,有個BB個樣仲好似周杰倫添∼!(咁係好可憐架…)
然後過P仔買野食俾貓貓,仲買左盒做緊特價既 LEGO,好抵∼
之後返左家姐屋企,同家姐、拜倫哥&Anna 姐姐玩地毯飛行棋,又玩波子棋,貓貓就響專門負責影響骰仔既點數!
玩到四點幾,Anna 姐姐載我地去兜風&過跳蚤市場行左一轉,不過今日無咩野睇,因為好多鋪都無開
送返我地返去,Anna 姐姐就走先,我就返去繼續同貓貓玩,玩到夜晚九點幾先返∼
而玩既同時,我係無忘記做返好聯絡人既角色,打電話通知聽日去唱K既朋友仔個時間地點架∼!
學識多樣野,響天水圍可以搭 69B 返紅磡∼
咁可以響車訓覺都唔驚過站之餘,仲可以慳一程轉車錢(旺角搭車返屋企唔平架)
不過響呢一個鐘頭多少少既車程裡面,雖然我闔埋雙眼,但係全程都訓唔著
響呢程車諗左好多野,可以諗足個幾鐘其實都唔會少野架啦…
有時間諗野,代表又有機會令自己心煩。如果唔係對眼因為敏感痛既話,我會選擇睇書……
![]()
2004年 6 月 22 日 星期二 【晴】01:34am 23_6_2004
好好地教左電話個鬧鐘,點知扎醒既時候發現個電話響枕頭底,相信個幾鐘前佢響過……
朝早同 Cathrine 過左金鐘UA 睇<明日之後>
正如大家所講,套戲真係包括左:特技幾好、場面幾震撼、有幾幕好嘈、冷氣幾凍、睇完有幾多啟發……
總括而言的確係幾好睇既一部電影。當然響屋企睇就一定無響戲院睇咁正架啦!
睇完戲,同 Cathrine 一齊去食 lunch。之後 ca 姐過到黎同 Cathrine 上總部開會,我就去搭地鐵過佐敦搵家姐
同家姐行左陣街&食左少少野,三點九又去搭地鐵,過城大 interview∼!
過到去,有D緊張,表現亦都唔多好,好多野都係事後先諗到可以再講得好D
interview 完,帶住一副渙散既精神響又一城兜兜轉轉,魂不附體咁「行」左好耐
行到差唔多時間,我又再一次搭地鐵,過尖沙咀同媽咪&佢D朋友唱K
對於會唱K既長輩而言,我無疑係一件恩物!
一來我係個識唱佢地年代歌曲既「小朋友」,二來我唱得幾好(相比起佢地黎講)
所以十點鐘當我要早走既時候,佢地都好似唔多捨得我咁(事後媽咪話有個 UNCLE 因為無我 PART 所以成晚無再唱歌)
由尖東過去柏麗大道,同拜倫哥搭巴士返入天水圍,因為我要去同家姐新養既貓貓玩∼!
同貓貓玩左陣,對有毛動物有敏感既我開始流鼻水、眼紅、對手臂又有D痕
明知有敏感都去玩,呢D就叫攞苦黎辛啦∼!不過同呢隻BB貓玩得咁開心,少少辛苦都無咩所謂既∼
但係一點左右,因為敏感而帶黎既倦意令我忍唔住,要去訓啦……
![]()
2004年 6 月 20 日 星期日 【晴】12:27am 21_6_2004
今晚響婆婆屋企做節!係做端午節,唔係做父親節∼!
同家姐&媽咪落旺角行街買衫,買左D俾自己又買左兩件俾老豆做禮物咁啦∼
and then 過友誠大廈,因為同家姐買相機,用黎幫貓貓影相∼
買完相機就上新世紀食 tea,原來大快活D特飲都唔錯架,不過野食始終都係差左D
食完 tea 就過 body shop 度搵老豆,行左陣街就上阿婆度做節∼
今次個日記夠簡單啦掛∼?!
經過左幾日,係時候出最新既手信名單:
紅 記:Sandy、Idy、細V、港島總辦事處、西九龍總部、烈鋒、峰少、傻鴨、璟媽媽、阿SA、牛牛、苦榮、Gini、Cathy、
阿Ling、Heidi、崔峰、叡叡、三名愛徒(阿成、阿峰、笑笑)、Jeffery、Orlando、阿梁 、Pauly、Lily(乖乖靚侍女)
聖 記:慈哥、鄭 sir、Bonnie、Mandy、Hazel、Cathrine
家 人:老豆、媽咪、家姐、(以家庭計:)大姑姐、二姑姐、伯父、婆婆、姨媽
聖公會:Currie同好可愛既咖哩囡囡、ELS、中心同事、阿嫻
朋 友:清清、Suki (JPC)、聶迪雅、家霖、曦、湧、世傑、阿雞
(外加可樂三支、鎖匙扣一個、美女一群(成班咸濕佬既需求…)、零食少許……)
![]()
2004年 6 月 19 日 星期六 【晴】11:37pm 19_6_2004
自考試過後,都好似無試過早過七點鐘起身……
今日九點鐘要過到曹公潭個康樂營聽簡介&簽約,但係我早左半個鐘到左,所以有時間開本新書睇下∼
其實本書都唔係新架啦,不過未睇過就當新書睇。書名叫<遺失記憶的守護天使>,係李敏既作品∼
講返今日做過既野先∼ 其實我都覺得幾攪笑,因為我係玩左一日……
玩既包括:射箭、打哥爾夫球、做手工(整襟章同收縮膠匙扣)等等,都可以當係實習黎既∼
呢度D職員個個都好 NICE 同好開心,我覺得會係一個理想既工作地方∼
五點鐘簽完約攪掂晒所有野搭車走,六點半先返到屋企,真係好倦
除左係因為今日環山行左好多轉之外,仲因為我尋晚太早訓,訓左四個鐘都唔夠…… ^^"
但係由旺角行返屋企既沿途,見到今日個天D雲好靚,當時真係覺得個人好似輕鬆左
*∼KG5 門口的確係一個睇靚雲既好地方∼*
夜晚就真係正啦∼!今晚我地開冷氣,同老豆&媽咪響廳度煎牛扒同打邊爐(其實得勝瓜、芋絲、鮮魷同雞鎚)
之後又有西瓜同涼粉,夠晒清熱,同最近熱氣非常既我簡直係絕配呀∼!
![]()
2004年 6 月 18 日 星期五 【晴】01:52am 19_6_2004
好晒又落雨,玩野呀……?!
朝早過左浸大 interview,同組有成十個人,個個都有返咁上下。不過浸大 social 系班姐姐幾好人就真既∼
完左 interview,同同組 in 既 Alex 一齊過荷里活廣場行左陣街,一點半左右由 Jeffery 接力,因為要俾條旗 belt 佢∼
到兩點四,我落到鑽石山地鐵站恆生銀行,好快就人齊:阿sa、牛牛、叡叡、阿Dick∼
我地過左斧山道個泳池度游水,非常之咁好玩呀∼!
尤其係牛牛玩滑梯穿過佢個新幹線水泡,真係好鬼難忘呀∼!!
游完水,同阿SA 過左譽麵坊食左少少野,之後就送左佢去搭車∼
諗通左D野,有D野如果同自己既生活方式有衝突,而自己又包容唔到既話,就要決絕咁排斥
自己知心軟係自己既致命傷,所以係時候要學識堅決去拒絕人!!
![]()
2004年 6 月 17 日 星期四 【晴】01:21am 19_6_2004
太差啦,成個星期無寫日記,攪到今日要後補……
幾早起身,溫左一陣書,同媽咪食個早餐,然後搭車過西灣M記睇左陣書,響屋企書櫃拎既<如果鸚鵡會流淚>
我幾鍾意周淑屏寫既故事,尤其係<甚麼時候你再為我唱歌>,真係好正∼∼
等到 Cathrine 黎到,我就同佢溫返D佢唔多清楚既地理
大約到兩點半左右,Cathrine 就繼續溫書,而我就繼續睇埋本<如果鸚鵡會流淚>
睇完已經係三點二既事。我放低左本書之後就去左搭車落灣仔會展開工……
第一日開工,我覺得自己都算係咁啦,表現唔錯∼
因為係 linkan park 既演唱會,所以有唔少來自唔同國家既人黎睇,其中有好多係西洋人
有個台灣黎既女仔當過黎我個崗位放低部相機既時候,用普通話同我講左句:「你好帥啊!」當堂成個人醒神晒∼∼
(咁證明我呢種 out look 都仲有市場架∼∼ ^^")
當晚仲見到商台既 Marco、藍奕邦同好耐無見過既孫耀威。雖然有D肚餓,不過幾好玩呀∼!
![]()
2004年 6 月 13 日 星期日 【晴】01:57am 14_6_2004
今日同媽咪&家姐去又一城行街街,勁開心呀∼!!
買左D野,第一樣係錯手買左盒 for BB 但係幾難食既糖……
第二樣係響玩具反斗城買左個鎖匙扣,形狀係鐵同膠製既扭香口膠機,幾型∼∼
第三樣係家姐送既,一條響 MAC LOOK 買既變色水晶頸鏈,勁靚呀∼!要多謝家姐呢∼! ^^
五點幾返屋企溫左陣書&訓左陣,然後過婆婆屋企食飯(今晚真係有食飯)
十一點幾返屋企又再溫多陣書,溫到十二點幾俾老豆問完書之後,我先知原來我都溫得幾熟∼
仲有五日,我就要去 BU interview、又有貓考完試,加油呀∼!!
PS:今日響又一城既P仔買左盒泰國黑虎蝦,試食既時候覺得好鮮甜,一盒都有唔少隻,值得推介∼∼
![]()
2004年 6 月 12 日 星期六 【晴】01:25am 13_6_2004
三點幾落左旺角,同 Cathrine &佢既朋友仔行左陣新世紀,然後落步昇買鞋
四點幾,我地搭車過 Cathrine 阿哥屋企,睇左陣電視,五點幾就走 lu
結果有貓係無溫書架…… 俾D心機啦懶貓∼! >_<"
六點七左右落到尖咀,又撞到今年響街撞過幾次既表姐 YOYO∼原來佢今日都係去遊船河囉∼
我同烈鋒、峰少、崔峰一齊等埋其他人,七點左右先上船
上船玩 UNO、打牌、鋤 DEE……最正都係玩「潛烏龜加 cum 棉胎」∼!
哈哈∼∼ 目標係打到崔峰好彈手既 patpat 大一吋呀∼!
十一點幾返左上岸之後,我跟烈鋒、峰少、崔峰、馮錦凌、小敏、爆肺(好彩佢唔知我有寫日記)落麥記食雪糕∼
食埋就帶住D新吸收既脂肪返屋企∼∼
![]()
2004年 6 月 11 日 星期五 【晴】12:13pm 12_6_2004
係一個值得高興既日子:grad din~
四點左右,過到去海運既玩具反斗城同阿SA 行左陣,因為我要去買野
五點幾關曦都黎埋,我地響迪士尼又行左一轉
本來想買隻巴斯光年既杯,係有飲管既膠杯,一飲水中間個牌會轉0個種。不過已經無咩錢剩,所以最後都係無買到∼
又見到新出既透明膠啤牌,幾得意,不過好似好易爛咁,所以最後都係無買到∼
行到六點幾,阿SA 同關曦送左我去 MARCO POLO 之後就走,我就響裡面無無謂謂咁食到九點幾
之後先係玩既時間∼!我同阿曦、阿湧、鳩淳、BRIAN、阿榮、唐唐、麥當、明仔一齊落左天幕飲酒∼
連落BAR 都要走返去學校附近,都唔知攪乜鬼野…
明仔俾我地叫做長老,唔係教家政,係教家務∼∼ 真係無想像過會同校工落BAR 飲酒∼
不過條友真係好鬼咸濕,全場三個姐姐都俾佢捉過去玩骰,對眼又發晒光咁,可能就係做男校校工心理不平衡所致啦…
我就同佢地玩左轉大話骰&幸運骰,然後就自己顧自己出去唱K,始終唔多想望住明仔個狼胎樣∼
我地玩到點幾鐘就走,每人都唔駛 $100,不過就未有錢找住
同阿曦俾埋先,咁就無左 $200,又要慳住駛 lu∼
![]()
2004年 6 月 10 日 星期四 【晴】02:23am 11_6_2004
媽咪本來話今朝去食早餐,點知因為老豆早左要返工而取消行程
最大既問題係,結果我十二點半先起身,但係大家係約左一點半響灣仔整 passport 架……
最終我都響一點半過到去入境大樓,都唔算遲到,仲早過兩個媽媽到呢∼(雖然我唔駛造證∼)
兩點正我走先,去左7仔食飯&去玩具街行左一陣。
再一次買左架紅記既鐵皮車仔,兩點九左右就搭地鐵過金鐘 joint 埋 Cathrine 過港台 interview
響大堂同個死唔斷氣既肥仔傾左陣電話、睇左陣書,好快就到四點,璟媽媽都已經過到黎準備 interview∼
辛苦 Cathrine 陪我行過港台電台部交低舊年太陽計劃D相之後,我地就過左又一城
行左陣玩具反斗城同迪士尼,仲因為又一城間迪士尼清貨而買左兩套毛巾
可惜屋企無咩空間,唔係既話我一定會買埋隻彭彭公仔!佢實在太可愛啦∼!
行完迪士尼,我地搭地鐵過金鐘,因為佢今晚要開會,而我就響金鐘行左陣街,然後就返屋企睇電視加沉睡左陣∼
mark 定張 list 先,咁買手信都易D,不過窮苦既我無咩錢,唯有揀人黎買手信啦∼
一個唔好意思呢度無名既,可能係因為我覺得呢D人都唔會介懷有無手信架啦
如果真係想要而我個 list 度又無既話,咁就不妨響星期日(13/6)之前話我知,等我再兌多少少錢過去∼
名單如下:
紅 記:Sandy、Idy、細V、慕絲、朱小姐、城南國王&王后、Diana、小白、峰少、傻鴨、璟媽媽、阿SA、牛牛、苦榮、
阿Ling、Heidi、崔峰、叡叡、三名愛徒(阿成、阿峰、笑笑)、Jeffery、Orlando
聖 記:慈哥、鄭 sir、Bonnie、Mandy、Hazel、Cathrine
家 人:老豆、媽咪、家姐、大姑姐、靜儀、靜雯、二姑姐、佩文、Wendy、阿爺、阿嫲
ELS:Currie、Annie、琪琪、巧婷、小蓓、家裕、Suki、Ivy、剛剛
朋 友:Jessica、聶迪雅、家霖、曦、湧
![]()
2004年 6 月 9 日 星期三 【晴】01:44am 11_6_2004
今日同阿SA、峰少、關曦、BETTY 姐、SKY、HEI HEI 一齊去唱K∼
好耐無見過BETTY 姐啦,見返佢真係好開心∼!唱完我地就去左大良八記食糖水,食完我就返屋企∼
夜晚準時入到將軍澳電視城。今晚係第三晚比賽,心情真係好緊張!
呢次真係好多謝阿SA、峰少、璟媽媽、富富、SANDY、媽咪、家姐……大家黎捧場∼! ^^
如果無你地,我首輪出線既機會又無咁大架啦∼!
出到線既時候第一時間打電話,幾驚佢訓左覺呀,好彩仲未訓∼!
好彩佢唔在場,唔係既話我可能真係會攬埋佢,所以唔黎都係一個明智既決定∼
我會記得買手信架啦∼!
雖然最後我地紅會人三隊都出到線,但係HAZEL 佢地出唔到線,又好似有D唔知點咁,BILLY 既球技係唔錯架……
不過HAZEL 真係好犀利!真係好冷靜,好似一D都無唔開心咁,但係咁樣我反而仲驚,抑壓情緒會令一個人唔開心……
比賽完,我地同錢嘉樂一齊影相,佢真係好好人呀!!
錄影完已經係十一點九既事,再加埋我地影埋相換埋衫,結果係搭十二點一班車出旺角∼
我地紅記班出線既朋友仔加埋 JEFFERY&ORLANDO 一齊食野吹水∼
之後再同聖記既朋友仔聚一聚,跟住正式就鳥獸散
今晚,係第三晚一個人由旺角行返屋企……

![]()
2004年 6 月 8 日 星期二 【陰】01:46am 9_6_2004
正呀∼!今日同媽咪&老豆飲早茶,飲完茶走既時候見到大姑姐同阿爺坐響出面飲緊茶∼
見到阿爺無事出院,仲咁好精神有講有笑,我都覺得好開心∼!
下晝入將軍澳,見到阿遠手腳都傷晒,大家都好擔心佢有無事,問起先知原來佢尋晚炒左單車……
今日食 dinner 既時候,我終於鼓起勇氣去同郭可盈、陶大宇、陳豪、陳鍵鋒&林寶怡影相∼∼
不過D相響 TOBY 部相機度,要睇相就要等壽星仔 TOBY send 返比我啦∼
響第一個比賽撲波既時候,TOBY 明明掂到個波,可惜同尋日一樣「又係無人睇到」……
到我地玩第二個比賽既時候,心情真係有D緊張,好彩我地都贏到∼!
TOBY 真係嚇親我,無理由佢會中得廿六個波咁少架嘛∼!
PAMELA 就好叻女啦,緊張得黎都表現得好好∼!
比賽完之後同阿SA &富富去左旺角食麵,食完又行返屋企∼
聽晚絕對不容有失,我一定要協助我既隊友 TOBY 同 PAMELA 嬴到今次既比賽,出線去雅典∼!!
![]()
2004年 6 月 7 日 星期一 【陰】03:12am 8_6_2004
好緊張呀∼!今日懷住荊軻刺秦皇既心情搭過將軍澳電視城……
點知一過到去,我就玩到傻左啦……
識左好多個(17個)新朋友仔,其中七個紅會既、五個聖記既,陣容都有返咁上下∼∼
比賽之前兩度見到郭可盈,可惜唔敢同佢影相……
但係我地自己圍內,再加埋新 MONDAY 既記者就影左唔少相∼!
諗出場前既動作都已經有D煩惱,點知比賽仲惡攪,因為D關於奧運既問題我都真係唔多識……
好彩 TOBY 真係夠醒,咩都識;PAMELA 又夠精靈,白組有佢地兩個真係好夠煞∼!
出到線,真係要感激 TOBY 同 PAMELA∼!可惜既係 JEFFERY 出左局……
聽晚,一定要加倍努力∼!!
走既時候成班人一齊搭地鐵,響車度傾左陣計,真係好開心∼
出到旺角,同阿SA&濠哥食野,食完野我就同濠哥一齊行返屋企∼
要多謝 KITTY、SANDY、慕絲、凱盈、阿SA、濠哥、媽咪、家姐……既支持∼!
四哥,我幫你同郭可盈講左你好鍾意睇佢做戲啦∼!算有個交代啦掛∼?!
![]()
2004年 6 月 6 日 星期日 【雨】01:27pm 7_6_2004
一點鐘,同ELS既義工們一齊去探 CURRIE&佢個囡囡
我地買左D BB玩具&用品上去,BB訓緊覺唔得閒理我地∼
我地就睇 CURRIE D結婚相,又睇下BB出世D相∼
等BB醒左,我地就睇BB飲奶,等BB飲完奶又抱住佢影相,佢真係好可愛呀∼!
之後 CURRIE 同佢老公帶BB去行公園,我地就離開,佢地既下一場係去打牌,而我就入屯門∼
搭左一個鐘頭多D既車程入去,響商場行左陣,竟然俾我發現左好耐無響市面見過既:
--「捉鬼敢死隊」第一代卡通玩具!!
唔駛講我就梗係冒住無錢駛既危險買左返黎啦∼!呢D咁珍貴既野真係買少見少架啦∼!
然後就上左 JESSICA 個朋友仔屋企玩,勁開心呀∼!
我都係第一次玩呢一款既 KILLER 架咋∼!
最攪笑係玩講左故事頭尾,估返個過程個GAME。講條屍「無手無腳」,變左做「舞手舞腳」,第一次玩呢題玩到笑∼!
玩到十二點左右我地就走,我跟個姐姐搭 VAN仔出返旺角,俾$15搭咁長途真係唔錯,不過等車就耐左D∼
睇左<這個阿爸真爆炸>。初初以為又係D無聊片,點知原來幾好睇∼
想帶出黎既訊息表達得幾好,有時間我諗我會睇左次∼! ^^
![]()
2004年 6 月 5 日 星期六 【陰】11:39pm 3_6_2004
今日同崔峰&烈鋒出左深水埗行街&拎鞋,行到六點左右我就走,因為要去探阿爺
返到屋企放低對鞋就同媽咪飛的過聯合醫院,事關返黎既時候塞車
過到去,見到阿爺都幾好精神,不過就肚餓想食野,醫院晚餐唔夠食呢∼ ^^
佢隔離床係一個可能係思覺失調既病人,我地由去到到走,佢都不斷同空氣傾計,但係內容又有紋有路架喎…
八點幾我就跟老豆&媽咪落觀塘,同大姑姐&二姑姐食晚餐,之後二姑姐走先,我地就去伊利莎伯探阿嫲
佢就應該係扭計啦,因為聯合話佢無事佢先走過黎,過到黎仲要俾人set左糖尿餐,唔俾食咁多野
結果呢兩個性格好唔同既老人家都係個心唔舒服&入到醫院覺得肚餓,呢個世界真係好玄妙∼!
自己忙都會得罪人,呢個世界真係好奇怪……唔通真係有人以為呢個世界既所有野係為佢地而存在既∼?
![]()
2004年 6 月 4 日 星期五 【陰】01:43am 5_6_2004
第二日上堂,上到四點就考左試走先,因為要入將軍奧電視城簽參加者同意書∼
走之前楊小姐幫我睇過下份卷,佢話做得幾好,咁都放心D∼ ^^
過去電視城簽完張野&聽D工作人員講解完,七點幾就直接返屋企食飯,今晚家姐都有返黎∼
九點九飛奔過三一中心,因為俾人呃左所以咁趕囉……(係唔係呢麗文姐∼?)
買左幾支牛奶公司新出既雪之戀過去齊齊食,我就覺得幾好食啦∼∼
![]()
2004年 6 月 3 日 星期四 【晴】11:39pm 3_6_2004
今朝七點就起左身,同崔峰一齊出去,因為要上總部交低張支票,然後落旺角搭車過葵涌上堂∼
過到去食完早餐,兩條友一齊去上個保安課程,聽日就考試。
梁 Sir 實在太好啦∼ 講野夠中 point 之餘又夠攪笑,仲話我地係幾年來第一班答到佢咁多問題,太好啦∼∼
夜晚返到屋企食完飯之後開左支香檳同老豆&媽咪飲,事關我入到十八強,星期一可以去無線比賽∼!
我要贏∼!去雅典∼!買手信∼!
飲飲下,麗文姐就打黎 call 我半個鐘後去跑步……食飽晒唔跑得,唯有落去拉下筋&練下臂啦∼
點知……坐低拉筋我個頭竟然掂得返對腳尖呀∼∼∼正呀∼∼∼好耐無試過啦∼!!
可惜條筋仲係好緊呢……
考保安、考車牌、考FIRST AID……我會努力溫書架啦!(當然包括 GEOG. 啦∼ ^^")
![]()
2004年 6 月 2 日 星期三 【晴】00:36am 3_6_2004
WU~~~~~
今日朝早過左瑪利亞書院幫手做模擬會考放榜,D人好鬼攪笑∼∼
十二點四趕住走,一點半返到學校彩排畢業典禮,兩點幾過到高山劇場
好可惜原定三點半開始既典禮竟然提早左十五分鐘開始,攪到有家長響出面等,太差啦……
五點幾完左畢業典禮就返屋企沖涼換衫,七點幾同崔峰&April一齊去何文田泳池游水
游到八點八,再換埋衫,九點鐘就一齊落旺角搵 Jimmy 去廟街食煲仔飯∼
實在太好啦∼∼
![]()
2004年 6 月 1 日 星期二 【晴】01:43am 2_6_2004
今day 係昨day 既延續∼
一樣係坐響房睇戲,不過就少D,睇得兩套:<忘不了>同<瘋狂初戀>,兩套都係睇到喊既好野!
夜晚就同崔峰出去跑返步,發現體能差左好多,睇黎真係要練返下啦∼!
聽朝早要過三一幫手,下晝又要攪畢業典禮(麻Q煩…),都係而家去啦…
有D人有種可以令人覺得開心既能力,今日就收到呢個人既電話啦∼
而且仲帶黎一個好消息,實在太好啦∼∼∼ ^^
![]()
2004年 5 月 31 日 星期一 【晴】09:53pm 31_5_2004
響屋企坐左成日,係家庭電影院放映日。
睇左四套戲:<鬼咁多大屋>、<飛龍再生>、<黑俠2>同<戀上你的床>∼!
另外,收到電話,總辦事處打黎話我已經通過初步面試,可能有機會過無線比賽去雅典∼!! ^^
可惜既係,今日陽光普照無出街∼
不過睇戲悟出新道理,都係一件好事∼!
![]()
2004年 5 月 30 日 星期日 【晴】10:37am 30_5_2004
尋晚峰少、崔峰、濠哥、關曦、關曦細佬、阿sa、christine、Ida、Jessica上左黎屋企玩
我地打邊爐&玩UNO,由七點幾上到屋企開始玩到十二點幾,好多朋友仔都要走先
我就同崔峰、濠哥&峰少響度先打牌,後吹水到天光
直到十點三左右先走,我就係時候稍為休息一下啦……
![]()
2004年 5 月 28 日 星期五 【雨】02:31am 29_5_2004
今夜家中無人,獨自在家煞是感到份外孤單。
獨坐在電腦前想了一整晚,到底我是怎麼了?
明明已經在放著令人羨慕的假期,何以仍感到不開心……
一連串說過要做的事,結果全都未完成。我的文章、我的畫、我的一切一切,都提不起勁去做。
很想找到一個令人開心的配方,只是半天也好,至少讓我樂個半天就已足夠。
真正開懷歡笑半天的滋味,已經許久沒有嘗過了……
![]()
2004年 5 月 26 日 星期二 【晴】02:26am 27_5_2004
今日留響屋企,睇左「自己要睇既電影名單」裡面既<七年很痕>
或者我係時候去了解、參透一下呢句說話:「to have , but not to hold!」
好多人,包括我在內,都係唔想為某D事而執著,但係結果都係無可避免
可能當我明白左呢個道理之後,個人會過得開心D
起碼,我唔需要為過去既事而心痛,為未知既事而煩惱……
![]()
2004年 5 月 25 日 星期一 【晴】03:16am 26_5_2004
朝早同老豆&媽咪去食早餐,跟住去剪埋頭髮就返屋企沖涼
兩點過到 NEWAY CITY 同 CWYNETH & 峰少唱K,五點十就同崔峰過總辦事處比賽
今晚既比賽真係好正,好多野玩,又要去金鐘巴士站做宣傳、又要去跑圈、爬貨櫃&表演,不過真係好好玩∼
玩完個比賽已經成十一點,足足攪左四個幾鐘∼ ^^"
之後同蘇生、五加皮、聰聰&崔峰落廟街食煲仔飯,吹吹水,好開心呀∼!!
十二點幾搭小巴返屋企,響樓下蘇記撞正老豆同佢班朋友宵夜,於是……
又俾班 uncle 灌酒,一直飲到兩點先走,好彩今晚既話題都幾 0岩我聽∼∼ ^^
![]()
2004年 5 月 24 日 星期日 【晴】02:49am 26_5_2004
又黎一次大傷風,真係病到呆呆滯滯……
響D精神狀態咁差既日子,我竟然出左好耐街
兩點幾崔峰陪我去長沙灣政府合署既運輸署報期考筆試,6月14號朝早十點就去考(要俾 $1058,肉赤……)
攪掂左就搭車上總部,又係報名,不過今次係報「可口可樂雅典狂賞狂熱鬥」,聽晚就去總辦事處比賽
HEA 到六點左右,我地就落旺角,我就買糖果子,崔峰就買褲
返到屋企食完飯,十點我就已經去左訓覺,因為我實在覺得好辛苦……
![]()
2004年 5 月 23 日 星期日 【晴】11:46pm 23_5_2004
今日既情緒持續低落。唔知道原因,只知道好唔開心……
朝早八點半過到三一中心,因為今日係中心既暑期活動報名日,所以就過去幫手
我負責接待同諮詢工作,主要都係答下家長D問題咁。
做到十一點七左右,CY 叫我帶兩個義工同一個新同事嘉穎過九龍城派活動通訊,派到十二點幾就返去中心
做左陣野到十二點七,我就過去德信對面同老豆、媽咪&家姐食 lunch
食完野,老豆要上堂,我就同媽咪&家姐行左陣,之後就自己返左屋企坐
坐左好耐、諗左好耐,始終諗唔明我為咩事唔開心……
人呢種生物的確好奇怪,有好多野都唔知點解會發生,好多時可以幫人解決到,但係自己偏偏就攪唔掂自己既事……
又或者係我仲未學識點去操作呢個屬於我自己既腦……
![]()
2004年 5 月 22 日 星期六 【陰】11:49pm 22_5_2004
一朝早八點三起左身,點知坐低諗左陣野又恰返著……醒返既時候,已經係九點三……
極速落旺角同崔峰&蘇凱怡飛的過奧海城,上到去百老匯已經十點一,買飛既時候已經開左場
五個人,五個都遲左去睇<無痛失戀>……
終於等到占基利另一套賣演技而唔係誇張既戲。套戲既 meaning 幾好,而且好 touch,正中心臟……
睇完戲,過旺角行左陣同打左陣機,然後就返左屋企沖涼換衫
等崔峰幫我 print 左份履歷表,三點鐘就搭車過荃灣,搵左好耐先搵到個51號巴士站等車上曹公潭見工。
原來今日係小組 interview,驍D講句我覺得全組裡面我表現得最好∼!
之後搭返車落旺角,再響旺角行返過九龍城,可惜過到去就覺得俾蘇凱怡呃左……
同崔峰由九龍城行返屋企,返到去九點左右,打左陣機,感覺依然差……
![]()
2004年 5 月 20 日 星期四 【晴】01:47am 21_5_2004
得閒既日子,最好既活動就係執屋∼!
由一起身開始,我就執好左電腦檯、keyboard 櫃、同兩個拉櫃。
執下又玩下,到四點幾先攪掂∼!然後又開始玩連環新接龍,因為我未諗到點寫個新故事好。
到七點半食飯,七點八就去沖涼,八點就去搭車,我都覺得自己有返咁上下快手∼∼
八點八過到M記,同李林峰傾左好耐電話,因為佢話聽日會開E,但係咩都未攪掂,呢件死仔真係攪到我死咁滯……
咁 Cathrine 溫書到十點幾就走,今日我既職任變左做書僮,不過係廚師既書僮,仲做左陣等中央屠宰既豬……
返到土瓜灣,經過蘇記門口既時候見到慈哥就入左去,之後媽咪打電話黎話我知老豆訓左,於是我就代父飲酒
慈哥今晚講左好多「以前」響 St. John 當更既開心野俾我聽,鄭 SIR 就邊聽邊灌我
一個鐘頭裡面,叫左十支金威,著左有五支半都係灌我既……
好彩 Jessica 姐姐打黎,佢地以為係媽咪打俾我,於是叫我返屋企先∼
約左 Jessica 姐姐聽日去食飯,食完先過去同 Cathrine 溫書,因為我都好想同 Jessica 姐姐傾下計,同佢傾計真係好開心∼!
返到屋企,見埋小寶,今集歸鍾死左……好慘呀…… ::/_\::
聽日要剃鬆、帶 cert.,完全記得晒啦廚師∼!! ^^
好暈呀…… 都係訓先啦…… 今晚都係唔玩接龍啦……
![]()
2004年 5 月 19 日 星期三 【晴】02:13am 20_5_2004
今日,係勁開心既一日∼!
下晝既時間,我上網 check 到我今年可以參加同心同根上北京玩,而且同行既西九朋友都係識既,即時開心到震∼!
然後再晏D康文署既人打電話黎叫我星期六過去曹公潭見工,再加埋尋日報到個歷奇導師訓練課程,勁開心∼!
再睇下同心同根個日期,可能唔會撞我過 St. John 上 First Aid,又再開心多一樣∼!
夜晚六點幾過海同 Cathrine 溫書,到十點幾先走,又好鬼開心喎∼∼
十一點幾返到屋企,老豆整左隻燒豬頭返黎俾我食,以前都未食過,個樣核突之餘都幾膩,不過食落又唔錯 bor∼!
一生人之中又試多樣新野,又係好開心∼!
再破埋我同媽咪玩連環新接龍既紀錄(移動 96 次),再多樣開心∼!
睇埋韋小寶,阿珂終於接受左小寶,極度開心∼!
總之今日就好好好好好開心啦∼!!!!!!!!!!!
![]()
2004年 5 月 17 日 星期一 【晴】12:58am 19_5_2004
無學返既日子,都有返咁上下遊手好閒,呢D對我黎講絕對唔係好日子……
本來打算呢個星期頭幾日係用黎執電腦檯、書櫃&寫文既,結果頭一日就已經響呆坐中度過,睇黎四點前都係唔好ONLINE 啦∼
出去FAX 左份FORM 之後,一直等到七點睇<星期一檔案>,今集講唐氏綜合症既人,其實佢地都幾叻架∼!
八點幾同老豆、媽咪、家姐&拜倫哥去九龍城竹園(唔係黃大仙)食海鮮大餐,拜倫哥請∼
呢餐真係好正,有龍蝦、鮑魚仔、聖子、帶子、蟹、一斤既斑……最正既都係瀨尿蝦,隻蝦頭仲大過我隻腳趾公∼!
免費任飲啤酒&橙汁,有埋甜品&果盤,加埋晒都係$1100 埋單,我就覺得都算抵啦,因為真係好好味∼!
食完正餐就過去金滿堂食甜品,我覺得好唔抵食,有材料既話可能我仲整得好過佢,又收得貴,個老闆又自吹自擂喎
都係大梁八記好,我地再過去食多碗糖水,平D又好食D,最緊要今次係到老豆請∼ ^^
今晚,實在食得太過癮啦∼! ^^
![]()
2004年 5 月 16 日 星期日 【晴】11:08pm 17_5_2004
一朝早八點鐘起左身,本來想坐響櫈度訓多十五分鐘左右,點知醒既時候已經八點九……
九點正過到三一中心(時間0岩0岩好∼!)見到阿欣同阿嫻呢兩個好好人既姐姐,於是又傾左陣∼∼ ^^
十點鐘,幫 CY 抽完籤之後就將D人名入電腦&對資料,然後又係傾計時間∼∼
十二點幾就幫手執野,執完就開E,開埋E一點幾,同阿欣姐姐睇左陣電視,跟住兩點鐘就過到幸福樓
烈鋒約左我同我最錫(or 最錫我)既 May 姐去食野&傾D手工藝上既問題,傾完我就同媽咪返左屋企
到四點幾返到去,我地就睇<獅子王3>∼!好正呀∼!所講既正正係我學緊既生活態度「Hakuna Matata」∼!
睇完之後就搭車過海拎叠 notes 俾 Cathrine &Cathrine 拎份 form 俾我……
Cathrine 姐,實在太感激你啦∼!再唔搵份野做既話我就快變自閉仔架啦……
![]()
2004年 5 月 15 日 星期六 【晴】01:33am 17_5_2004
同心同根既面試日子終於來臨啦∼!
三點幾同峰少過到去夏愨道總辦事處,原本我地係四點 interview 既,不過最後都要四點八左右先開始面試
雖然今日既對手實力相約,但係我都覺得自己表現唔錯,可以去到同心同根既機會率偏高∼!
五點幾,同峰少& Jimmy 一齊走,我遊左圈地鐵河然後返去金鐘搭巴士搵 Cathrine∼
我地一齊搭 10 號巴士過銅鑼灣,響無印行左陣,然後 Cathrine 就去做 MC,我就去左行銅鑼灣中心、商務&玩具反斗城
行到十點幾,Cathrine 完成佢艱鉅既任務之後,我地就去食糖水
食完糖水,送左佢返屋企,然後我就返屋企食超正既東江雞,係媽咪同老豆專登響大埔帶返黎架∼∼太好啦∼∼
![]()
2004年 5 月 14 日 星期五 【晴】01:57pm 15_5_2004
今日勁正呀∼!十一點半同峰少&崔峰去睇<VAN HELSING>(狙魔人),恨左睇好耐啦∼
真係好正呀∼!狼人變人狼,不過安娜公主就真係死得唔抵啦……(咁靚女都要死,即係就算拍第二集都無佢份啦……)
某程度上都係為左睇佢去睇呢套戲,因為佢響<妖夜尋狼>裡面既演技真係幾好∼
美中不是既係,我最鍾意既妖怪吸血鬼王德古拉伯爵(DRACULA)呢個角色太唔夠靚仔又唔夠型啦……(好失望)
睇完之後佔全日開心指數2分∼∼
四點幾,我同崔峰一齊上總部,先同峰少食個吉野家既飯先,然後玩到差唔多六點就去搭車∼
過去到馬場先知中左招……山頂位……斷糧……衰格既總IC……結果只係一個著住U聽歌傾計既場合……
好彩響口淡淡得水飲既時候,Cathrine 請左塊朱古力餅俾我食
就我呢個仲未脫離口腔期既人而言,響著住U唔俾咬香口膠既情況之下,俾塊餅我咬同救左我一命無咩分別∼!
呢一刻佔全日開心指數3分∼∼
本來想同Cathrine 影相架,但係到最後都係影唔到…… >_<"
不過走既時候都見到佢,咁多人響度都見到&傾左幾句,佔全日開心指數2分∼∼
返到總部換左件衫,然後同峰少、崔峰、烈鋒、Jimmy 一齊落旺角「樂園」度打冷
D野食一般,但係比較貴,不過就傾得幾開心,佔全日開心指數既2分∼∼
加加埋埋得九分,因為今日始終美中不足∼∼
![]()
2004年 5 月 12 日 星期三 【晴】11:43pm 13_5_2004
兩點幾就上總部,因為今日KRC(II) 同 YBT 都有兩班要考試,所以就上去幫崔峰手監考
一睇就睇到五點幾,攪掂晒同APRIL& YU52 班朋友仔玩左陣,六點幾就搭 17 號過三一中心
過到三一,上到去麗文姐已經到左。同D職員傾左陣計之後 Brian 同佢既同事就到左
今次我地四個傾到八點幾,到 Brian 佢地走左之後,麗文姐又拉住 CY 傾到九點幾,仲講左好多我既野…… -_-"
好彩,我仲有D秘密無講,唔係既話一定死梗……
最近聽左一首幾好既歌,本來印象都唔多深,不過今日傾起D感情問題既時候又無啦啦諗返起
<思覺失調> 劉浩龍
仍好嗎 仲會每天失眠到天光嗎
大頭蝦 沒帶門匙也許很勞氣吧
仍關心妳願每天問 最後也明白角色時已不相襯
還由他去代我為妳緊
問太多根本不會講 束縛不來如人馬座
亦因愛妳令妳不安 才離開不再講
願明天 能不再為妳痴纏 明白改不變 妳亦離開很遠
就算花光心機守每一個諾言 最後誰又會可憐
極危險 連思覺像也失調
無辦法接受現實 自製假想能延續故事
妳的聲線還仍言猶在耳 已分不清楚我位置
問太多根本不會講 束縛不來如人馬座
亦因愛妳令妳不安 才離開不再講
願明天 能不再為妳痴纏 明白改不變 妳亦離開很遠
就算花光心機守每一個諾言 最後誰又會可憐
極危險 連思覺像也失調
還是我太犯賤 或是我太介意 太過膚淺
百篇短訊留言徒然又試 始終得不到妳在意
留低即使很多的透支 如今已做錯記下了只有缺點
太心痛是我的一手包辦令妳心變酸 彌補如何還是太遲
若然妳 如果有日說婚期
我這生福氣 也用來祝福妳
仍收起曾同渡過每一齣戲飛
而這票尾 還應否捨棄
![]()
2004年 5 月 11 日 星期二 【晴】11:27pm 13_5_2004
十二點幾同媽咪一齊過石峽尾搵家姐食 lunch,跟手拎埋D正野(家姐送既史迪仔公仔&楊采妮做封面既雜誌∼!)
食完野送左媽咪去搭車,一點幾我就到我旺角,可惜麗文姐竟然唔記得左我趕時間,兩點幾先落到黎
結果我講低響邊間鋪有佢想買既野之後,就衝返學校俾份 form 校長簽,然後又拎上總部交俾 LALA∼
交完 form 又走返過五記,因為佢地今日攪訪團,我要去睇下佢地攪成點,等開E既時候可以俾D改善既建議佢地∼
慘既係我部相機無啦啦神左,影出黎既野好似鬼相……
![]()
2004年 5 月 10 日 星期一 【晴】03:28am 11_5_2004
已經記唔起幾時響 ICQ 識到 Jessica,但係今日就約左佢去銅鑼灣食 tea
佢介紹我去既地方,係我想去好耐,但係一直都未有機會去既「阿貓地攤」
D野都OK好食,不過班貓貓就好懶,唔多願郁,可能冷氣凍掛∼
同 Jessica 姐姐傾左大約一個鐘,佢係個好犀利既人,又 nice,而且個樣仲有D似 Helen
真係好想同佢再出去傾下計、等佢介紹下D食野好地方呢∼∼ ^^
食完 tea 本來應該落旺角,但係麗文姐今日放早又自己返左屋企
所以 Jessica 送左我過地鐵站之後,我就一個人響銅鑼灣行下D橫街∼
今日,我開始發覺我愛上左佢,可惜我知道呢份愛唔會長久
因為愛佢既唔止我一個,而且我唔可以成日都見到佢,每次見佢所要付出既車費接近 $20,太高昂啦……
不過我可以肯定,我一定會再去搵佢架……
等我再黎睇書呀,我最愛既香港中央圖書館∼!!(見到好多本想借既書,但係圖書証得返一個位,失策……)
![]()
2004年 5 月 9 日 星期日 【晴】12:02pm 10_5_2004
世界紅十字日,阿爺生日既大日子;同時係媽媽節,形成左兩難既局面……
之前一晚本來向 TRACY 提出過十二點幾出一出去同家姐&媽咪食飯既要求,因為家姐得呢段時間得閒
可惜,意見不被接納……第一次過一個唔係兩姐弟同媽咪一齊慶祝既媽媽節……
講返紅十字日,我十點半前上到總部,不過響朝早先知原來套U唔齊:腰帶同宣誓章都借左出去無回頭……
上到去當然搵救兵幫我齊返套U啦,好彩開工前都齊到(雖然我套未齊既U都呃得下人……)
響愛民商場 SET 場,要由總部抬兩張新買無得摺既大檯落去,好Q惡攪呀∼!
TRACY 派俾我既崗位真係好0岩我,因為係同小朋友接觸既工作:同佢地玩份問答卷
但係到食完 lunch,我替 Jimmy 做健康檢查「見客部」之後,就一直做到五點完場
因為原來呢個崗位仲0岩我,可以同D老人家傾幾句,等佢地開心下
途中有個個樣唔錯既女仔陪媽咪&婆婆飲完茶過黎玩,護士姐姐竟然笑我:「恨到啦,咁正,益晒你啦!」
我係專業架!點會公圖私利架!雖然平均黎計我同佢講野既時間比其他人長,但係都係佢問我野之嘛……(狡辯中)
完工大合照,上總部換好衫&吹左陣水就走。同烈鋒、崔峰、明明、April 一齊飛的過黃埔打左陣機,之後我又去買禮物……
夜晚上左婆婆屋企食飯,因為姨媽出左黎,雄舅父又上左黎,計計埋埋九個人一齊食飯
到十點三,我就跟媽咪落美華搵慈哥,因為佢地開左兩圍檯食飯,勁多人……
坐左陣,大家都差唔多要走,淨返慈哥、老豆、媽咪同我響度傾計,老闆娘有時都會同我地傾幾句
有一個唔知好定壞既消息,就係慈哥話我知七月 St. John 會有個急救班,不過唔係佢教,上四個星期日,最後一堂考試
但係如果我入到同心同根既話就上唔到堂(考唔到試)……
現實,點可以咁殘酷架…… -_-"
![]()
2004年 5 月 8 日 星期六 【雨】11:54am 10_5_2004
由起身食完早餐開始,就一直執屋執到差唔多五點
到我執好晒預期要執既 area 之後,就開始同媽咪砌 April 送既立體砌圖,果然係有D難度……
五點幾同崔峰過九龍灣搵 Candy姐同拜倫去 KFC 食野,然後七點幾等齊人就去玩 WAR-GAME∼!
計埋家姐班朋友,一行有成廿九人!我地分左三隊,我入左藍組
玩到最後,一直只有一分既黃組由於有職員教路同通水既關係,結果我地以廿一比廿二既分數輸左比紅組……
雖然輸左分數,不過我地嬴左氣勢∼!! 遲下一定要再黎玩過∼!!
![]()
2004年 5 月 7 日 星期五 【陰】11:46am 10_5_2004
差唔多半個星期掛住做其他野無寫日記,太差啦……
7A足球同樂日,同我地班好耐無一齊玩過既同學踢波
我地 BOOK 左樂富個場,由三點踢到五點幾
令大家最放心既係:我開始識踢波,唔係踢腳……
接近六點我同崔峰行到去九龍城廣場,家姐又夠鐘放工,於是就約埋一齊上去扭蛋
Candy 姐果然犀利,憑住無比既毅力終於又扭齊一套第一輯既迪士尼圖騰公仔,前後加埋兩輯齊晒∼!
七點鐘先返到屋企,拿拿臨沖個涼過三一中心,0岩0岩好七點半前兩分鐘上到中心
上到去同麗文姐一齊搵CY,然後就入會客室同港台既 Brian 傾計傾到九點幾,因為佢要睇下我地D資料係咪適合佢拍個節目
我地傾左幾多野,不過多數都係感情問題,佢話遲下會再透過CY 聯絡我地
PS:麗文姐,唔好用我既感情生活歷史要脅我好喎∼!! >_<"
![]()
2004年 5 月 4 日 星期二 【晴】10:54pm 5_5_2004
四點前既野唔提,七點後既野唔講
今日又上 head,本來係為左交 form,可惜不負責任既校長未夠鐘放學已經著左草,所以最後交唔成…
上到去,除左多左峰少同 tine tine 之外,班朋友仔同尋日無咩分別……
最開心都係走既時候又過愛民買野,老細今次真係認得我啦∼!!(感動……)
唔單止糖果子買三送一(本來已經平過街價),有份最後一件既玩具又計平左我,最後條數又收齊頭
結果加埋起碼平左 $18,夠我食餐飯∼
同峰少分左套Q版高達駕駛員,佢又買到佢想要既公仔,我又有多幾個 target 俾我影相,一舉兩得∼∼ ^^
![]()
2004年 5 月 3 日 星期一 【晴】10:37pm 5_5_2004
十一點幾,同崔峰一齊陪好耐無見既傻牛過灣仔考試局辦事處做少少野
之後因為我同傻牛都想行下,於是三個人就過左去行玩具街(又買左唔少野…)∼
行完街街,我同崔峰送左牛牛搭車,然後我就返左學校攪埋封委任信簽名
攪掂左就上 head,拎左份form 之後就同崔峰、Jimmy、Solution、April…… 一齊玩左陣
走既時候又過左愛民買野,買份玩具街而家無晒既貨……
![]()
2004年 4 月 30 日 星期五 【晴】02:43am 1_5_2004
下晝約左學校社工阮姑娘去食 lunch,傾左陣計,都係老問題:感情同生活
感情上,雖然已經寫左封信,兩個人差唔多一個月無聯絡,但係有時無意間都會諗起佢,可能呢一年實在太漫長……
自知響呢方面我係比較蠢同弱既人,因為我唔識去表達自己,亦唔識去睇人地點諗
就正如而家已經有個自己鍾意既人,雖然試過同佢傾電話,但係成日都唔敢打電話俾佢
鼓起勇氣打左一次電話,但係無人聽。到佢覆返個電話,又唔知有咩可以講,佢又好似好倦咁,所以好快就收左線……
生活上,好想多聽多D唔同人既意見,因為我都知自己無咩機會入到U
如果讀唔到社工(甚至係HD)既話,睇黎唔係報 IVE 既老人服務/玩具設計,就係去做PA/朋輩輔導
再唔係如果好彩既話,可能都有機會做下青協既歷奇活動導師(如果讀得到佢個課程&表現好既話…)
補完課,返屋企沖個涼換件衫,過左華英睇佢地既音樂晚會
因為April 有份表演,所以我就同Solution & Jimmy 去捧場∼
華英D人真係好勁,D樂器演奏聽到我都真係唔捨得走,不過結果都係要走,事關今日係GAP 維生日嘛∼!
過到去漁人碼頭,大師姐同阿才咁橋要走,好耐無見過佢地啦……
同GAP 維、阿維、峰少、Solution、Jimmy、濠哥&April 一齊邊打邊爐邊吹水
果然小朋友係唔適合坐響呢個「成人檯」,成晚有太多成人話題啦,雖然真係講得好開心∼∼
十一點幾人地收鋪,有D似俾人趕。
同Solution 送 Jimmy、濠哥&April 去搭車之後,我又係自己一個人行返屋企……
呢期成日聽張學友新專輯<Life is Like a Dream >既歌
除左<講你知>同<搖搖>之外,<給朋友>係另一首聽得最多既歌,個FEEL真係聽到……
<給朋友 >
歌手:張學友 | 作曲:張學友
填詞:古倩敏 | 編曲:吳慶隆
(2003年12月 0係朋友口中知道你已經離開
心裡面痛左一痛
面上搵唔到適合既表情去表達我自己
做完野之後 我自己揸車返屋企
覺得特別凍 啊 原來冬天已經黎左啦)
飛出生死峽谷 輕卸身軀的包袱
如閒來沉睡了 一覺甦醒多舒服
唯求旁人別哭 加重不必的傷痛
讓我輕輕鬆鬆 活到這一分鐘
像到異地另做美夢
#北風開始急促 緊記多加添衣服
如能全明白我 總會將哀傷征服
神遊無涯時空 千里可一刻飛縱
沒世間的擠迫 讓我偷些空隙
今天可好好的休息#
*靈魂仍然在飛 想找青蔥的一片地
停下再看兩眼 便會安心高飛
就算一生是極美傳奇
如逢嚴寒天氣 亦有一番風光細味
瀟灑再見世界 在這方的知己
每一天都深深祝福你 即使遠離*
(一路上 我見唔到一個人或者一架車
特別覺得孤獨 打開收音機
只係重覆聽到報導你離開既消息
我望出車外邊覺得天色好黑 真係好黑 )
REPEAT*
(今日返屋企既路好似特別長咁
終於我都返到屋企啦 你呢? )
REPEAT#
![]()
2004年 4 月 29 日 星期四 【陰】11:42pm 29_4_2004
晨咁早返到學校拎個獎,眼訓到死呀……
參加左三次卡通人物描繪比賽,今年終於拎到個亞軍,係實力既肯定∼!!
今次畫既「軒轅劍」有獎,第一次畫既「阿鼻劍」無獎但係俾 MISS 拎左去做教材
劍呢家野似乎幾旺我∼∼
雖然呢幾年拎左好幾次十大活動同服務,但係感覺好唔同
我覺得活動服務只係鬥用得多時間同鬥造數,但係畫既比賽絕對係一種認同
又多樣野令我死而無憾啦∼!
下晝補課補到四點幾,然後過左去培正,因為班衰仔今日攪訪團,所以去睇睇有咩要跟
見到李林峰,又開始掛住我兩個師弟……一諗到我教出黎既兩個交際兼活動人,再睇下佢,相差太遠……
忍唔住既情況下,我又同佢企埋一邊傾左好多帶活動既技巧,希望佢下次佢可以攪得好D啦……
(死人頭寸我又咁叻,對住其他人帶活動又口啞啞,真係想兜佢一腳∼!)
![]()
2004年 4 月 28 日 星期三 【雨】11:57pm 28_4_2004
今次終於係五點幾,唔係四點幾出去啦……
五點半過到樂富,六點三響樂富地鐵站 joint 麗文姐去青年空間報個歷奇導師訓練課程
過到去先知,原來5月16先開始可以報名,於是我就登記左做會員先
攪掂晒D野就同麗文姐搭車返土瓜灣,上左海悅間譽麵坊食野
有個衰人話我寫日記好悶囉,我就係要寫到咁悶喎∼! 個日記我寫黎自己睇架之嘛∼! >_<"
今日同麗文姐傾開CY,忽然記返起兩件開心事,一件係CY 話我知我篇文響明報登左(又完成多樣死前要做既事)
另一件係5月6號會去見人,因為CY 推薦我同麗文姐同港台拍野,又可以體驗下唔同既野∼∼
仲記得上次上港台電視節目已經係讀緊幼稚園既時候(唔計同心同根)……電台就唔記得係中四定中五……
![]()
2004年 4 月 27 日 星期二 【晴】01:34am 28_4_2004
四點半鐘落左圖書館諗住睇返一個鐘頭書先出旺角,點知拎起兩本書成個鐘都無睇到
事源係我拎左兩本書過兒童圖書館睇,點知一坐低,同隔離位個小朋友笑左下,跟住佢就開始同我講野
呢個小朋友話我知佢叫天穎,讀緊幼稚園,佢叫我講故事俾佢聽、問左我好多野同講左好多野我知,真係好攪笑∼
到五點半我要去搭車,天穎就拉埋賓賓姐姐跟住我走,不過佢要借埋D書所以慢左一步∼
夜晚同崔峰過新世紀同April 慶祝生日∼
同行既有Solution、Jimmy、同兩個April 既同學仔,可惜我既囡囡今日唔出得黎…
我地過左越南灣食野,又去扭蛋,玩到傻晒∼
最正既係我第一次試過扭蛋因為食左錢,負責個姨姨就打開左部機俾我自己拎,我堅持唔揀,要抽一個出黎
結果都俾我抽中左我最想要既巴斯光年∼∼ 實在太好啦∼!!
之後我地過左許留山食埋糖水,玩廿五三十&學摺野,玩到十一點左右先散∼
PS:April,大個女啦,要生活得更加開開心心呀∼!
![]()
2004年 4 月 26 日 星期一 【晴】04:01pm 27_4_2004
四點幾,同JIMMY、APRIL一齊接囡囡放學,然後一齊落旺角唱K∼
過左幾個字崔峰就過埋黎,阿LING 因為六點要補習所以走先,差唔多七點就到崔峰走,我地就唱到八點∼
可能因為太耐無唱過K啦,所以好開心,咩壓力都發洩晒∼∼
唱完K就返屋企食飯,等到十一點三崔峰就打黎叫我過紅磡碼頭
過到去同崔峰、烈鋒吹水,傾到四點幾先返屋企∼∼
![]()
2004年 4 月 25 日 星期日 【陰】03:23am 26_4_2004
星期日,family day∼!油旺一日遊∼∼
兩點幾同媽咪、家姐過左新世紀食 tea 行街,行到五點幾就 joint 埋老豆& 拜倫過油麻地
中途又過左玩具開倉,因為佢又有減價
我又買多左個FIGURE、一個辣手13 既扭蛋(抵喎,日本定價$11.X,而家賣$5…)仲有……
我地行左陣廟街,然後去湘菜館食野。D野幾好食,不過野飲就真係好麻麻地……
食完野我地過左商務,因為老豆要買書。我同家姐行行下見到本叫<死前要做的99件事>(大約係咁啦個名)
我地兩姐弟發現原來死之前未做既野得返好少,我仲有十幾樣,家姐就仲差六樣……
行多轉廟街,又買左條有士多啤梨既紮頭髮橡筋俾家姐(加加埋埋,今日好似買左唔少野俾家姐,唔怪得駛凸左咁多啦……)
行完廟街就過左鵞記食糖水,食完糖水家姐同拜倫就返屋企,我同老豆&媽咪就返左屋企樓下間7仔行左轉
買左件M又M既 T-shirt,佢地兩個大細路就買左幾枝啤酒返屋企繼續餘興節目……吹水∼! ^^"
![]()
2004年 4 月 24 日 星期六 【陰】02:54am 26_4_2004
大喜日子∼!唔係識人結婚,而係我有份教既 JU59 今日攪成立&第一屆宣誓啦∼!!
一朝易返學校補課既時候因為無著校服而被人驅趕返屋企真係好唔順氣
之前明明有訪客制度可以貼紙入去,而且讀左咁多年,星期六一向都唔駛著校服返學校架嘛!
而家改左制度要著校服返去都唔係話咩,但係都應該通知一下我地掛?!態度又差喎,呢間學校真係愈攪愈差!
返去換件校服再返學校補GPA,補到 2:00 立即趕去買左幾包KISS 朱古力,然後飛的過塘尾道小學
交低幾包朱古力俾MISS,我一睇完佢地宣誓就撩佢地玩
佢地真係好可愛呀,一話影相就成班走晒過黎。野人就尤其得意,又圓又鍾意笑,見到佢地真係好開心∼!!
之後我將無俾到MISS 盒薄荷朱古力拎出黎請佢地食,佢班衰野又響度搶,一粒都唔留返俾我,激死!>.<"
好彩有幾個都好乖咁留左包餅俾我∼∼ ^^
完左個宣誓典禮,我就過旺角 joint 返JIMMY & APRIL。
我地上潮特行左陣,等我既囡囡阿LING過埋黎之後,我地就上左JIMMY 屋企
我地叫外賣PIZZA,邊食邊睇<血戰軒轅>大結局,睇到一半APRIL 要去同媽咪食飯,JIMMY 同阿LING 就睇<受難曲>(IN COMPUTER)
可惜,個大結局實在太馬虎啦……萬般期待既結局竟然係咁,有D俾人呃左既感覺……
之後我都入左房睇埋下半套<受難曲>,睇完已經十一點幾,於是就同囡囡返土瓜灣 lu∼∼
![]()
2004年 4 月 21 日 星期三 【晴】10:37pm 21_4_2004
一點半返到學校補 GPA,估唔到成年無見既阿強竟然都有返,掂呀∼!
我地六個人(周仔、阿雞、家曦、阿強、家霖、我)一邊補課一邊玩到癲晒,攪到MISS 簡都笑埋一份
話咁快就補到四點,勁開心∼!
補完落到一樓,見到文明返左黎,幾年無見,見返佢實在太開心啦∼!!
同佢傾左陣,我就行返屋企,途中又撞到我既好阿妹小窗,同佢邊傾邊行返土瓜灣
雖然同佢好少見,不過佢都好似好了解我咁,犀利∼!
返到屋企沖左個涼又走落自修室溫書,真係唔想再溫地理啦,個腦爆咁滯……
八點又返屋企,因為<血薦軒轅>今個星期大結局,絕對唔可以再錯過∼!!
![]()
2004年 4 月 20 日 星期二 【晴】10:25pm 21_4_2004
四點幾,同Jimmy、阿ling 過左去新世紀睇<天作之盒>∼
套戲都幾感人,唔覺唔覺睇到喊都唔知……好記得一句「味道有D怪,不過我鍾意」
睇完之後,忽然間覺得暫時唔想再搵對象拍拖
雖然套戲既主角幾浪漫,但係我同時體會到失去既感覺,真係好痛苦……
與其將時間放響照顧一個人身上,倒不如將D時間用黎令更加多人開心∼∼
睇完戲我地去左行金輝,囡囡買左把橡筋槍,好似幾好玩咁∼∼
八點幾我地過左潮流中心買左個日本仔既FIGURE,然後JOINT 埋 APRIL 過左芝士屋食飯,真係幾好味喎∼
十點一,趕過去土瓜灣室內運動場搵崔峰,因為佢話白姐姐想學拉筋,點解呢兩晚都同拉筋有關??
![]()
2004年 4 月 19 日 星期一 【晴】09:59pm 21_4_2004
世史考試,亞洲史,死左……
今日過蔡功譜考世史,兩場考試之前都見到檸樂,個樣同講野都大個女左∼∼
lunch 同班同學去大排檔,返試場之前拎左新年上阿爺度食飯D相俾靜雯
考完亞洲史,個個都唔識,不過聽完家霖一句「求學不是求分數」之後,即刻忍唔住笑左出黎∼
行左上總部,見到崔峰,幫手貼總部大門既單面反光紙,仲同兩個YU55 既 member 玩左陣 IQ 題
好彩小白借左個MONCHICHI 俾我攬,唔係既話我一定仲好忐忑不安
之後就落左九龍中央溫書,同峰少吹左陣水,又郁手郁腳左一陣,哥頓仲教埋我拉筋,原來平時拉筋既方法用途唔大
十點,同峰少、叡叡一齊行返去土瓜灣,沿途唱歌吹水,成個人鬆左唔少∼∼
![]()
2004年 4 月 17 日 星期六 【雨】10:48pm 17_4_2004
我好耐無見過 ELS 既一班朋友仔,加埋 Currie 就黎放產假,所以今朝十一點過左去三一中心開會,見下大家∼!
開完會,我地一班義工過左去翠湖飲茶,全程大約半個鐘,不過等點心都差唔多等左一個鐘…
今返一班好耐無見既朋友,真係好開心∼!
最緊要係多謝Annie 送左份禮物俾我,係一對藍色、鉛筆形既筷子,型到震呀∼∼
我真係好鍾意呢份禮物,果然係知我心既好阿妹呢∼!
食完野落自修室溫書,點知落雨,又無帶遮,結果成身濕晒……
上去溫到五點三,之後因為個身濕住好唔舒服,所以返左屋企沖涼,諗住沖完再去溫書
點知沖完涼出面落勁大雨,最後都係逼住響屋企,溫唔到幾多……
唯今之計,就係而家去訓,夜D再起身溫書,到時就無電視聲、收音機聲、傾計聲之類既野騷擾到我∼!!
![]()
2004年 4 月 16 日 星期五 【陰】11:57pm 16_4_2004
我既鞋呀,終於攪掂左啦∼ 暑假可以著出街 lu∼ 定係星期一著去考試好呢∼?!都係留返考完試先著∼∼
上半日都係陪老豆,響屋企傾下計睇下書上上網咁∼∼
四點左右就落旺角拎鞋,再同施寧&比比去石磨坊食野∼
食完野差唔多五點,當然係上氣氛好好既自修室溫書啦∼
不過今日有單核凸野,就係由側門出左去聽完媽咪個電話之後,度門個門鎖竟然虧左,開唔到
結果我要由巷尾行返去巷頭,由正門入返自修室,再行返去最入面……
本來約左崔峰今晚跑步,但係落雨∼ 天意如此呢∼∼
一封半個月前寫既信,今日收件人終於睇左
到底你點諗,我似乎好快就會有答案……
真係好希望做得到「紅是你愛的 就當做常識」,只當是常識,不是回憶……
![]()
2004年 4 月 15 日 星期四 【陰】03:38am 16_4_2004
終於相信,對弱小生命無理既殺戮係源自無知同年紀細
夜晚接近十二點既時候,有隻蜻蜓飛左入屋。細個既時候好期待呢D時刻,因為可以捉蜻蜓玩
但係而家,一來唔想殺生(雖然知道佢聽朝都會死,但唔係死響我手嘛)
二來好唔鍾意清理遺骸既感覺,好有罪惡感
三來我好驚捉佢會整傷佢,所以我唔會去捉佢
可惜,我都好驚佢會響我訓著覺既時候飛埋我度,因為佢響支光管度飛緊,同我張床好近……
結果等到呢一刻,我又眼訓又頭痛之下,終於用計引左佢入廚房,不過聽朝都係要幫佢收屍……
今日加入左中五時期既好同學「陸陸」既秋風論壇,之後 ICQ 無啦啦有人add 我
我以為係佢個論壇既朋友仔所以就同佢chat 左陣
點知……我都係第一次試過俾人響 ICQ 性騷擾架咋……嚇到我唔敢再同佢chat 呢……
好彩經過幾個佢叫我而我無覆佢既message之後,佢終於都無再send message過黎
而我亦証明左用 ICQ delete 一個人既 acc 係無咩用架……
![]()
2004年 4 月 14 日 星期三 【陰】11:58pm 14_4_2004
早幾日都好好天,但係一決定左今日出街之後,就唔好天啦……無奈……
行程係咁既,首先去拎訂左既鞋先,但係去到,佢地又一次攪錯,結果係星期五再去……煩……
之後就去捐血,好開心因為CAROL 姐姐今日有返∼!雖然傾唔到幾句,不過又有野俾我啦∼∼ ^^
捐完血就去仙跡岩同成年無見既懷懷飲野傾計。雖然佢個樣無咩點變,但係似乎開始識去為自己諗下
睇黎真係大個女啦,識得煩埋男朋友仔D事啦∼
雖然成日因為好多事唔開心,不過咁係証明佢真係大個女,體會多左,咁都未嘗唔係一年好事丫∼
四點幾送左佢去搭車之後,我就過左金輝行左陣
唔知係自己身體弱左,定係捐完血之後周圍走,行行下竟然個頭暈一暈,以前都未試過……
五點幾返自修室溫書,日子就係咁樣過左∼∼
返到屋企搣左塊膠布睇下,竟然有個正方型邊既瘀印,好似電制,都係以前未試過∼∼
如果有相機既話,我一定會影低佢,可惜部機響家姐度……
![]()
2004年 4 月 12 日 星期一 【晴】11:49pm 12_4_2004
俄國人托爾斯泰說過,愛能使數學法則失去平衡。但我今天體會到,不快亦然……
預期中的聚會沒有了、跟星星鬧翻了、想見的人見不了、收到了不想收到的短訊、遇不著想發生的事情發生、該知道但不知道的事情太多、書也記不了……
一切一切都似是在向我擠壓
縱然看了多少逗笑的短片、MIC 仔SEND 來的笑話,始終都提不起興趣來
為什麼不開心的事,總不能以開心的事來平衡?
從前她不開心的時候總是不分晝夜打電話來跟我說,可是我又能跟誰說?
很想到外面去走一趟,不管是哪裡都好,只要能給我了無牽掛的待上一會,哪怕只有十數分鐘我也願意……
每天不是對著家中的四面牆,就是自修室那四面牆,那種感覺很難受!
要是讀書的路註定了要孤獨,我就只好承認,我孤獨不起……
<最後的歌>
看 那麼多嘴角在微笑 是為何
有 那麼多聲線在合唱 愉快的歌
誰都比我爛漫 笑聲若然沒結果
這天 這些開心的人怎麼過
我 我記得跟你在何處唱遊
聽 每首歌終結便輪到下一首
時光 總會落後 美好事情沒永久
只好怪貪心人 無論滿足多麼久也未夠
假使這歌到明年還在播 假若世界永遠都快樂
假使可跟你重頭開始過 何須將這鋼琴都敲破
最後一刻 仍然還屬於我
最後的歌 還想聽到甚麼
最後想聽 聽你說願我未來如何語調熟練仍然像最初
最後一刻 提琴還剩一個
最後的歌 還可珍惜甚麼
最後想講 無忘我
可惜我 我懂得當那鋼琴要靜下時
你 會記得給我動搖過便要休止
旋律比我幸運 我的下場沒法知
比不起 最後的歌 可以給我翻唱千次
縱使只得一次 稱心滿意 至少半次
![]()
2004年 4 月 11 日 星期日 【晴】02:06pm 11_4_2004
做左樣好耐無做過既事--追夢!
途中有兩個電話打黎都中斷唔到我追夢既決心,結果當個夢就快去到ENDING(我覺得係)既時侯
媽咪用好溫柔但係連綿不斷既說話呼喚我返到黎現實世界
雖然追夢失敗,但係我無怪佢,因為佢驚我訓得耐條腰骨會唔舒服
萬能既媽咪永遠都係嬲佢唔落既∼∼
![]()
2004年 4 月 10 日 星期六 【晴】09:58pm 10_4_2004
一點幾,JIMMY 打電話黎叫醒我過清水灣燒野食,於是第一時間沖涼換衫搭車過去
去到清水灣,見到好多UG界既朋友(多數都係紅記人)
我地燒野食、玩啤牌、捉蟹仔(不過途中俾舊石砸親隻手指)……
玩到七點半左右就同CHRISTY 走先,因為我真係好唔夠精神……
出到坑口,一上到巴士就訓,訓到過左站,好彩都醒左識落車∼
返到屋企,竟然做緊多啦A夢大電影,一於睇埋先訓∼
今朝照鏡已經見到右眼既紅筋好勁,訓醒之後都唔散
頭先再望望,睇黎係隻眼既微絲血管爆左,呢幾日都係唔戴 con 啦∼∼
今朝寫漏左D野,就係尋晚牛牛又有生日金句
繼峰少生日既「俾你奸一次」之後,尋晚我生日又出現一句「你係咪想入呀,我俾你入嘞」
好彩我地都唔係D咁隨便既人∼∼ 激死你隻傻牛∼!! ^^
![]()
2004年 4 月 9 日 星期五 【陰】06:02am 10_4_2004
一年一度既大喜日子,感覺比舊年更加開心∼!
今日一點到五點三之前既時間我都響自修室度過,直到六點五先搭車上愛民∼
上到雅景,平日坐開張檯俾人坐左,結果我地自己拍埋左三張檯一齊坐
今日黎既朋友仔好似有二十個,大致上記下有咩人:崔峰、阿 ling、牛牛、苦榮、峰少、濠哥、濠哥個學生、gap維、叡叡、阿蕉、jimmy、阿dick、關邦、林輝、蘇凱怡、阿sa、關曦、Ida、Jessie、tine tine……係咁多掛,唔記得啦∼∼
打邊爐期間老豆打左個電話黎同我講生日快樂,真係好開心,呢一刻先覺得原來老豆做既野都可以咁touch…
十一點左右,我就同崔峰、牛牛、峰少、濠哥、叡叡、阿蕉、jimmy、阿dick、關邦、蘇凱怡、&Jessie 落左BAR PACIFIC 飲啤酒&玩大話骰。本來想唱K,但係俾個連我都頂唔順佢把聲既異物(OR 叫做異性)霸住部機,結果我唱得一首…… >.<"
之後牛牛、叡叡、阿蕉、jimmy、阿dick、關邦、蘇凱怡、&Jessie 相繼返屋企
生日落BAR 都有好野發生,就係侍應生姐姐BOBO 問我拎左個電話NO. / 俾左個電話NO. 我
下次落去之前一定要打個電話睇下BOBO 響唔響度先∼ ^^
我地玩到三點左右就送左峰少返去,然後三個麻甩就落左我屋企樓下個公園吹水,到五點半左右先返屋企
多謝峰少、叡叡、DICK LO、阿SA、蘇凱怡個巴斯光年公仔,個樣真係好似我∼
多謝崔峰、牛牛、苦榮、清清&JIMMY 既一大盒糖果子,真係夢寐以求,恨左好耐都未有錢買∼
多謝濠哥既二十包雀巢朱古力,睇黎又會肥一排呢∼
多謝阿LING、關曦&IDA 、TINE TINE、仲有……唔知邊份係邊個送啦∼ ^^"
個軍人場境FIGURE,真係好靚∼ 個小飛俠阿童目公仔都好得意呀∼ 本萬年曆都好0岩我∼
仲要多謝所有打過電話同SEND 過SMS / ICQ MESSAGE同我講生日快樂 / HAPPY BIRTHDAY 既朋友仔∼
PS:SORRY 呀星星,溝通上既問題攪到你黎唔到……最多小黑哥哥下次買D好野俾你補返數啦∼∼ ^^
![]()
2004年 4 月 8 日 星期四 【陰】12:23am 9_4_2004
可能尋晚吹親,所以今日有D傷風,個鼻同對眼好辛苦呢……
落左旺角換鞋,點知無我個碼,要預訂,下星期先再拎過∼
同我估計既一樣,同家姐去左食TEA 同行街
夜晚返到屋企訓左兩次,一次係食飯前,一次就食飯後,訓到十一點幾先起身,好似好返好多∼
接近十二點既時候,開始有好多朋友仔響ICQ同我講HAPPY BIRTHDAY
多謝你地呀∼! ^^
我諗聽日我應該病好架啦∼∼ ^^
![]()
2004年 4 月 7 日 星期三 【陰】01:58am 8_4_2004
今日同老豆過左紅磡行街&食lunch,難得一次我請佢。雖然俾想俾返錢我,但係我都無收到∼
行adidas 睇唔0岩,再同佢行下紅磡廣場。我想買盒figure 但係帶唔夠錢,結果佢就送左俾我
自小學打後,無再收過老豆買既玩具。呢種感覺,真係好warm∼!!
夜晚成家人一齊落左尖沙咀,響美麗華門口見到曾江,真人好型呀∼!!
可惜掛住望唔記得問佢可唔可以同我影張相,失策……
之後去 shooter 52 度食野,家姐請客∼
間野D野食好鬼貴,飲野既話算係個幾好既選擇,不過食野我就唔會同朋友黎啦∼
每年夏天一到就一定會買對涼鞋或者拖鞋著一季,之後多數都唔會留低
但係今年家姐買左對好正既拖鞋俾我做生日禮物,個款0岩晒我,睇黎可以著幾年呢∼
為左我又要你駛多左咁多錢,多謝晒呀靚靚既 CANDY 姐∼∼
不過對拖鞋就買細左少少,所以聽日要拎落旺角換∼∼
![]()
2004年 4 月 6 日 星期二 【陰】11:28pm 6_4_2004
好耐無運動過,今日終於可以流返一身汗啦∼!同王晶、卿卿&佢地班朋友去珠江球場度踢波,爽呀∼!
三點幾過到去,有幾隊人在場所以要跟隊踢。我總共打左兩場,一頭一尾。
中間既時間,因為麗文姐響對面既海悅廣場買野,所以叫左我過去食 tea
反正我都係等波踢,加埋佢請客,無咩所謂啦∼
打算去買埋尋日買漏左既野,結果買左之後都好似仲有野漏咁……下次都係寫定張 list 先去買啦……
聽日老豆放假,上次聽佢講話想買件釣魚款既背心,一於陪佢去行下adidas,上次見到D款都唔錯
家姐話夜晚過尖沙咀DINNER,唔知食咩呢??
好期待呀∼∼∼∼∼∼∼
![]()
2004年 4 月 5 日 星期一 【晴】01:15am 6_4_2004
犧牲左聽<瘋show 快活人>既時間去食早餐&剪頭髮
一如以往,都係剷短晒D頭髮,始終唔多鍾意個頭上面有咁大堆要打理野∼
之後過左海悅既美國冒險樂園換左呢期既五十幾個代幣玩晒,為既只係玩一部出面無既海盜船推銀機……
行下街,響附近幾間精品店消耗左唔少時間,結果仲未搵晒我想搵既野
咩都好,聽日先算LU∼
![]()
2004年 4 月 4 日 星期日 【晴】08:48pm 4_4_2004
明明係兒童節,點解今日既活動係去拜山架……
尋晚過左Cathrine 屋企同阿谷&Jennes 四個人打邊爐,玩左一晚,好倦但係好開心∼
今朝一早就要起身去拜山,對眼乾到差D睜唔開,連去到拜阿公既時候俾煙燻都燻唔出眼水,幾辛苦
比較起舊年,今年真係少左好多人。三個孫女、四個孫仔無去,得返我同三表兩個男孫
拜完山、食完野之後,已經好想返屋企,但係婆婆、姨媽同媽咪都想去行街,結果我都係陪佢地行左成日……
不過見到婆婆今日咁開心,咁咩都無所謂啦∼∼
![]()
2004年 4 月 2 日 星期五 【陰】10:27pm 2_4_2004
一個電話,一下子將我打殘……
聽日要考既係要最專注既一科,但係上天偏要令我分神
電話,一個每日都好想聽到,另一個就每日都好驚會聽到
結果今日兩個都俾我聽到,咁算係好事定壞事?
作為朋友,應該要好多謝你既關心
但係作為一個有心病仲未解決既人,我真係唔希望再傾呢類話題……
![]()
2004年 4 月 2 日 星期五 【陰】10:14pm 2_4_2004
今日份 Section E 真係炒粉炒得好應……
呢幾日響屋企朝朝都飲一杯咖啡先出門口,今日放lunch 返屋企食野既時候又整多杯
尋日朝早媽咪同我講:「0靚仔,開始好呢家野啦喎∼」
我答左佢一句:「為兩餐0者∼」
的而且確,咖啡對於我黎講係無咩提神既實際作用
因為我既體質好似唔受咖啡因影響咁,飲幾多杯都唔見得會精神左,只會比無飲過任何野既時候更想放水…
不過心理上覺得做多樣野好似比咩都唔做好D咁解∼
考試,一個唔鍾意既字,但係偏偏又要去考
人生真係矛盾……
不過無理由要因為考試唔掂就唔開心既,考得唔好而唔駛死既∼
![]()