Ang Pag-ibig Ko (music now playing) Words and Music by Anthony Buenavista
Hindi ko maintindihan Ang aking nararamdaman Tuwing ika'y naaalala Ang iyong ngiti't ang iyong mukha At kabuuan ng iyong pagkatao Na umaapaw sa kagandahan at talino At kabutihan ng loob Na lumilitaw sa sansinukob Katwiran sa gitna ng gulo Sa di maintindihan kong mundo Katibayan ng nakatagong hiwaga Paalala sa aking pananampalataya Na ang lahat ay may landas At maipaliliwanag ang wakas Kung saan di makalihis Kung kailan ang marumi ay malilinis Kasing linis ng iyong kaluluwa at hinahangad Na sa iyong pakikitungo'y naisasaad
Ang kinabukasa'y naghihintay Nananawagan sa ating buhay Kung saan tayo'y mag-iisang dibdib At ipapahiwatig wika ng pag-ibig
Mga ibong umaawit Sa bubungan ng aking silid Paru-parong lumilipad Lumulutang at napapadpad Sa mga talulot ng mga bulaklak sa umaga Na sa tulong ng hamog sa hardi'y bumubunga At ang lahat ng mga ito Ang siyang nagkakalat ng bango At hanging ating natatamo Sadyang ganyan ang pag-ibig ko Katulad ng simoy na sumisipol sa bintana Na nagpapahinahon sa init niyaring pagnanasang Magtagumpay para sa iyo Upang mahaplos ang iyong puso O di kaya'y mapasaya Ka lamang sa iyong ginagawa Kung maaari lamang sa akin ay malipat Ang paghihirap mo ako'y magpapasalamat
At lulubusin ang pagtulong ko Bilang kahalili ng inialay mo Sa ating pakikipagkaibigan Na aking kailangan Magpasawalang-hanggan
Langit ng aking mundo Sagisag ng paraiso Karagatang umaalon Pinananggalingang talon Kung saan patungo ang batis niyaring buhay Ikaw ang nagpapahiwatig ng tunay Na pag-ibig at pag-asa Ginhawa sa pagdurusa Na umaakay sa puso Sadyang ganyan ang pag-ibig ko Ikaw lamang ang siyang sugo ng pangarap At aaruga sa akin sa aking mga hinaharap Na suliranin at hamon Na nagugunita ko na ngayon Mga gubat na tatahakin Mga ilog na lalanguyin Nawa'y giliw di ka mawalay sa aking piling Ito lamang sa iyo ang aking hinihiling
Itutuloy ko ang pagsuyo Pangangahalagaan ang inialay mo Sa ating pakikipagkaibigan Na sadyang kailangan Magpasawalang-hanggan!
copyright 1989 Anthony Buenavista
Email Anthony Buenavista Open the ZakSalamander site