ZBORLU A NOSTRU –
3/2000
43
Muri,
diunapandica, tu ishitâ di Agustu, sotslu-a nostu bunu, nicuchirlu ali
profesoari Matilda Caragiu-Marioteanu.
Nâ liga
di elu, di anji di dzâli, unâ musheatâ sutsatâ tsi-avea-nchisitâ cu furnjia câ
nâ fu oaspi, deadunu cu Matilda, tu Ghirmânie ... Tu turnatâ ditu Americhii,
dupu uspetslu la hiljia loru Brândusha, dânâsirâ ti-ndoauâ dzâli tu hoara
Gross-Gerau, iu bânamu atumtsea ...
Atseali
dzâli armasirâ trâ daimâ tu suflitlu-a nostu, ca semnu di unâ aleaptâ sutsatâ.
Di-atumtsea, ali tinjisiti profesoari Matilda Caragiu-Mariotseanu ahurhimu
sâ-lji dzâtsemu "Mati" shi-a nicuchirlui a elji, "Coti".
Di la
geamea a udălui a nostu di Gross-Gerau s-videa unu musheatu câmpu veardi iu
pâshtea unâ cupii albâ di oi! S-pârea câ easti unu caduru nidealihea trâ lumea
tu cari bânamu! S-vidzu câ suflitlu-alu papu mi-avea aflatâ tru xeani sh-nji-a vea pitricutâ aestâ
ciudii tsi mi-agiută trei anji sâ-nji yitripsescu suflitlu lândzitu di multi
doruri...
Mati
shi Coti s-hârsirâ di haraua mea shi Coti ti-ahâtâ oarâ adră unâ
"poezii" tsi va u-adusimu aminti tuts anjljii tsi nâ vidzumu, câti ori
lâ fumu oaspits Bucureshti, tu casa loru daima dishcljisâ trâ sots:
"Gross-Gerau, Gross-Gerau,
Easti hoara mea;
Oili-a meali, oili-a meali
Suntu shi-eali-aoa!"
Atselu
uspetsu nâ ligă trâ daima; nâ hârsimu câ nâ cunuscumu ma ghini; arâsimu ca
ficiurits shi nâ deadimu "pârnonji": Mati lu "pâtidză"
Yiani - "Dulcicul" ("Dultsili") sh-mini "Kirauă".
Tuti cărtsâli tsi li pitritseamu câtâ elji ahurhea: "Vrutsljii-a noshtsâ.
Mati shi Coti" ... Va-nji hibâ greu tora cându va-lji anyrâpsescu ali
Matildâ s-nu mata trecu sh-numa alu Coti!
Aestâ
musheatâ sutsatâ a noastâ s-teasi shi tu fumealjia mea: Mati sh-Coti tritsea
ghini cu pârintsâlji a melji: Sima shi Marushea. Va nâ hibâ greu s-u
videmu Mati singurâ! Cafelu-alu Coti eara naima bunlu shi-atselu
"ritualu" ditu casa loru nu mata va lu bânămu!
Vidzuiu unu caduru di tinireatsâ ali Mati cu
Coti: elu, unu tiniru cu perlu galbinu ca "fluiria" (de-aoa sh-numa
tsi lji-u-avea datâ Mati - "Pailjiu"), analtu, cu njiatâ di cari
s-andrupa unâ featâ analtâ, cu perlu
laiu sh-cu ocljii mplinji di-antribâri fârâ isihie ...
Coti eara mashi
bunâtati, isihie, mushuteatsâ ... Njiata lji-avea armasâ pânâ tu ausheaticu!
Lu vidzumu cu unu mesu nâinti s-moarâ;
biumu deadunu naima bunlu cafe, tu dzua di-amintaticu ali Mati shi nu shtiamu
câ Harlu lu mutrea!
Cu doilji meshi ninti di moarti avu
putearea sh-vrearea s-facâ cu Mati atsea ma musheata (shi ditu soni) cali a
loru deadunu: tu locurili armâneshtsâ ditu Gârtsie! Cadurili ditu aestâ cali
aspunu unâ pâreaclji tsi s-pari câ dzâtsi: "tsiva nu nâ disparti!"
Lu-arisea multu căljiurili ma shtiu câ
aestâ cali nu vru s-u facâ! I, poati,
elu acâtsă unâ cali musheatâ, nicunuscutâ di noi!
Arâpasu isihu,
vrute sotsu, Coti!
Kira
Mantsu