ZBORLU A NOSTRU –1/2001
21
Him unlu dit căntătorilj dit soni
a aishtui paradhis aspart,
a aishtui paradhis nicăftat.
Tu aestă patrie
mashi aumbrili adară cuvendă.
Cupiili di oi arăiti tu ciiri
si-agărshiră s-pască,
shi featsiră minduiri:
fineri aplicati
pristi somnul ahăndos
a muntilui!
Si-aproache njedzlu di noapti.
Iar va acljem zboarăli
la cuvendă.
Niscănti di eali’va yină cu dorlu pri
budză.
Alti va yină cu heavră tu arpi,
alti shcljoapi.
Atseali dip agărshiti
necă nu-s ved ...
Cama ayonja li-anjurdzeashti.
Fum avinat dit vatră
alagă, alagă
după un căpitănj.
Io va li-adun tu ună acoală
ashi cum paplu
aduna oili tu cutar.
Cathi ună noapti
adavgă istoria-a suflitlui
cu ună curbani.