| Gioacă, cântă, s-dupăescu Gionjlji-a hoarăiei la hane; Stau aushili sh-lji mutrescu Sh-cupe-mpline cicutescu Cu-arash yin ca di mirgeane. Saltă gionjilji dipriună, Gionjilji-mplinji di sănătate; Violinile asună hoara tută di se-adună Cu fârtatsi shi cu surate. Cu ciubuchile tru mână Stau bărbatsilji ningă gardu: -„Totsi tu cor! Să nu-shi armână Vâr armân shi vâră armână Că-alor case adzî lă ardu!“ Dzâtse Ticlu ambitatlu, Ticlu, -ntânjiu tu biutură... Gioacă moashe, gioacă sh-matlu, Cathe-nveastă cu bărbatlu_ Sh-carlu meardze limădură. -„Hei, nu-avdzâtsi?“ de-aclotse greashte Un aush cu sarca lae: „Hoara tută huhuteashte Shi protoirlu zghileashte Din trustari, că-i dzuă lae! |
| Se-arucară furilji-n hoară! Tra-s nă calcă shi s-nă-mpradă!“ Carlu tot se aspardze tr-oară, Gionji tufechile ljia, azboara, Shi tufechile-acatsă s-cadă! ........................................... ........................................... Amănat. Mutritsi tse luna Shi tse noapte albă carte! Violinile asună, Njic shi mare iar se-adună Sh-gioacă tinirlji shi niveaste: Că la hane-i sărbătoare Sh-corlu diplu se-anvârteashte: -„Ia, nu-s calcă-a noastre hoare Că armânlu frică nu-are!“ Un aush din cohe greashte. Shi totsi gionjilji-saltă shi gioacă Di ahântă hilărie.... La sutira-ndzeană toacă, Luna-ascapetă tu coacă Shi-andzămeadză dzîua-n yie! |
| ZBORLU A NOSTRU - 3/2000 21 NUSHI TULLIU* La Hane |