* * *
Mesaj pitricutu di prezidentlu ULCA la aniversarea di 10 anj (1991 –2001) di cându mintimenlu director di la Radio România International, Vasile Doru Ionescu, la propunerea ali ULCA, lo apofasea s-bagă thimelju bunu sh-trâ unâ redactsie aromână.
" ... La aestu protu jubileu di 10 anj, pareia di la "redactsia
armânească" ari trâ tsi si
s-mărească.
Di adunu cu hâbărili di cathi
dzuă, voi pitricutu tu tută lumea armânească sh-grailu părintescu. Il frimtatu
dzuă di dzuă, cu arăvdari sh-cu axii. Nu mash ca elu s-nu cheară, ma, cama
criscutu, s-armână trâ totna tu avearea culturală europeană ca atsea ma unitară
limbă latinofonă achicâsită lishor di tută armânamea.
Voiu s-adavgu un lucru cari vârnu
nu-l aduchi ma ghini ca mini. Voi, redactsia de la Radio Bucureshti shi atselj
di la Radio Scopje, amintatu alumta ditu sone tu polimlu ti Dimândarea
Europeană 1333. Cu voi ULCA di Freiburg cândâsi până tu sone Parlamentul di
Strassburg câ armânamea nu zburashti turlii turlii di idiomuri i dialecti; ea
are ună limbă cultă unitară, soră
bună cu româna ma, cu mushuteatsea sh-cu axia a ljei ahoryea. Sh-tra-s nu
cheară ditu pareia a limbilor cari mushuteadză cultura europeană, Parlamentul
shi Consiliulu ali Europii u luară sumu aripa a loru.
Oru a redactsiljiei s-agiungă ma
mari, ma anvârtushată tra-s ducă sh-di aua nâinti tu tută lumea, deadunu cu
grailu armânescu, hâbărli di cathi dzuă dit marea sh-mushata Românie, iu ună
parti a Armânamiljei află apanghiu frătsescu, tra-sâ-sh tsână ma ghini limba
sh-tinjisitili a ljei arădzi.
A voauă, a redactorilor tsi-avui
tiha sh-haraua s-vâ cunoscu shi s-vâ ascultu, vâ oru anj multsâ cu sănătate
bună shi-s vă hârâsitsi la multi alti jubileuri.
Inj pari arău câ nu va-s himu di-adun la
aestu jubileu. Ma, cu mintea sh-cu inima va-s escu cu voi.
V. G. Barba