20 ZBORLU
A NOSTRU – 1/2001
Nushi Tulliu
Limba arumânească*
Limba noastră-arumânească
Di părintsilji vrutsi lăsată
Easte faptă tra-lutsească
Ca yamanda-atsea curată.
Piste lume nu-are-ahtare
Limbă dultse ca di njiare,
Când o-ascultu nji se pare
Că-i de-amalamă yisteare.
Ca un cântic nâsă-asună
tră cari shtie tra-s u grească
Că-i mushată sh-multu bună
Limba noastră arumânească.
Nâsă easte graiu tse are
Ca tru marmură săpată
A tricutlui-ntreg yisteare
Di giuneatsă alăvdată.
Di tru leagăn pân’ la moarte
Tsara noastră shirpitată
Di-a ljiei limbă nu-s disparte
Di străushi c-ashi-i scriată.
Njilji di anji pân-adzi tricură
Sh-limba noastră multu vrută
Ca un izvur limpid cură
Di nu-s miră lumea tută.
S-miră lumea cum si poate
Ună limbă nilucrată
Mushutetsile i le-aibă toate
Cându ghine e scriată.
Ea-i lunjină multu yie,
Shi-i amalamă curată
Arumânlu cu cari-sh scrie
Jalea sh-lacrima curată.
Noi cu nâsă ne-avem faptă
Sh-va-s murim cu nâsă-n gură
Că e limbă-ahât aleaptă
Shi ca cântic dultse-asună.
Nâsă-i suflet, nâsă-i bană,
Nâsă easte-a noastră vreare
Sh-când u cântu cu-a mea peană
Disfund canda nâ yisteare
Di briliante mult mushate
Cum tru lume alti nu-are,
Aushi, moashe, ficiori, feate,
Limba noastră-i limbă soare:
Di tr-atsea s-u grim dipriună
Naflu tot s-nu s-agârshească
Că mushat shi dultse asună
Limba noastră arumânească.
* Inedită. Manuscris ditu arhiva di
Freiburg