12 ZBORLU
A NOSTRU – 3/2000
Eara tsi nu-sh eara.
Eara nă oară nă soacră sh-nă noră.
Nă dzuă nora arnji cupriili sh-li arcă tu groapa de-arăzboiu. Aclo lâ deadi
focu shi-s mută fumlu în sus până la ocljiu al Dumnidză.
Tu oara atsea Dumnidză-l durea ocljiu. Una agiumtă fumlu shi-lj si vindecă
ocljiu cu totalui. Nâs acâtsă shi strigă:
- Cari nji-l featsi bunlu aestu? Cari nji-l featsi bunlu aestu?
Nora aurlă nă oară vârtos până la Dumnidzău shi-lj dzâse:
- Io tsi-u feciu bunătatsea aestă, io tsi-u feciu bunătatsea aestă!
- Tsi caftsâ di la mini, njică nivistică?, u ntribă Dumnidză.
- S-nji spui cumu moru lumea.
Atumtsea Dumnidză âlji dzâsi:
-Va tsâ spunu, ma s-nu aspunji la
vârnă: mărlji moru cu tăpoarili, njitslji moru cu lăludzli sh-cu trandafili.
Lemnul a crutsiljiei*
Eara unu furu cari vâtâmă noauă dzăts shi noauă di
oaminj. Dupu tsi featsi ahâti lăietsi, lji s-aurâ di bana tsi u adutsea shi
s-dusi la un călugăr sâ sh-aspună picatilj tsi li-avea faptă shi s-lja ânvitsături
di la nâs, tsi lipseashti s-facă tra-s lji si ljiarta.
Călugărlu cându-l vidzu
cumu eara armătusitu shi lirusitu s-aspâre di nâs. Ma dupu tsi-lu ascultă âlji
dzâse:
-Lja tuchinli aeshti shi duti di lj bagă tu loc;
fă bunătetsi la tută lumea shi cându va-s vedzi că elji va-s ascoată vlăstari,
atumtsea picatile a tali va s-hibă ljiertate.
Furlu lo tuchinli shi-s dusi t-unu locu ningă nâ cali pri iu tritsea lumi
multă.El sh-featsi ningă cali nâ călivă shi divărliga plântă ayinj. Nângă
călivă el îngrupă shi tuchinli. Tută lumea tsi tritsea pre-aclotsi shi-lj câfta
auă, elu lâ dădea. Ună dzuă elu
stătea la usha di călivă shi mutrea tufeche-a lui. Tu oara atsea videa că yini
di diparti un omu câvală pri cal; câtu agiumse la ayinj, discălică di pri calu,
intră tu ayinj sh-ahurhi ca s-adună auă fără ca-s antreabă vârnu. Furlu l-veadi
di la câlivă shi atumtsea âlji strigă tră tse nu antreabă; am elu sh-mutrea
gustul.
Furlu atumtsea nu ma putu tra s-aravdă. Lo tufechea shi dzâse:
-Vâtâmai noauădzătsishinoauă shi ninga unu sâ-s facă nă sută! Trapse piste
nâs shi-l culcă mpade.
Tu oara atsea sh-turnă caplu câtră iu avea
tuchinli sh-armase mărmărisitu di harauă, cându-lj vidzu, că scoasiră vlăstari
shi ashitse lji si ljrtară picatile. Sibepea cari featse si-lj si ljartă
picatile fu, că omlu atsel tsi-l vâtămă el, s-dutsea cu mintea tra-s vatămă cu
multu cama multsâ oaminj di câtsi avea vâtâmată nâs. Ashi că vâtâmânda-lu,
ascâpă bana multor oaminj, di atsea Dumnidză âlji ljirtă picatilj.
*(Ditu cartea “Basme aromâne”
di P. Papahagi. 1905)
* * *