16 ZBORLU A NOSTRU – 1/2001

Lao Tzâ - Tao tâ Cing

(Versiuni Armâneascâ

di Mihali al Prefti)

CARTEA A CALILJEI

11. Ad11. Adunãmu aradzâli di-arâcotaru

tu-unu tsercljiu, ama guva ditu mesi

minâ carotsa.

Plâsãmu tsarâ tu-unu pociu,

ama golju di nuntru

tsâni atsea tsi vremu.

Ancârfâsimu leamni ti casâ,

ama spatslu di nuntru

easti iu bânãmu.

Lucrãmu cu hirea,

ama nihirea ufilisimu.

* * *

12. Bueili urghescu ocljiulu.

Iholu surdzashti ureacljea.

Ñiurizmili vatâmâ gusturli.

Minduerli aslâghescu mintea.

Dorurli aushescu inima.

Mintimenlu veadi lumea

ama tu videarea a lui di nuntru ari pisti.

Elu alasâ lucrili s-yinâ shi-s fugâ.

Inima-lji easti dishcljisâ ca tserlu.

* * *

13. Anchirdhâsirea easti piriculoasâ ca câdearea.

Nâdia easti goalâ ca frica.

ZBORLU A NOSTRU – 1/2001 17

Tsi va s-dzâcâ câ anchirdhâsirea

easti piriculoasâ ca câdearea?

Icâ ti-aliñi pi scarâ, icâ dipuñi,

chindruita s-minâ.

Anda shedz cu dauli cicioari mpadi,

daima ai shideari sânâtoasâ.

Tsi va s-dzâcâ câ nâdia-i goalâ ca frica?

Nâdia sh-frica suntu aumbri

tsi s-fânârsecu ditu minduirea di sini.

Ma nu videmu sinea ca sini,

di tsi nâ easti fricâ?

S-vedz lumea unâ cu tini insuts.

S-ai pisti tu-aradha-a lucriloru.

S-vrei lumea cumu ti vrei tini,

sh-atumtsea va s-ai vreari ti tuti lucrili.

* * *

14. U mutreshtsâ, ma nu pots s-u vedz.

U-ascultsâ, ma nu pots s-u-avdzâ.

Tindzâ mâna câtrâ ea, ma nu pots s-u-acats.

Ndzeanâ, ea nu-i luñinoasâ.

Nghiosu, ea nu-i ascutidhoasâ.

Ea-i tuti, ma fârâ cusâturi.

Nu poati s-hibâ numâsitâ;

armâni tu dumeñea a tsivalui.

Câlupisitâ tu tuti câluchili,

caduru fârâ caduru,

chischinâ, sh-didindi di-amintari.

U-aprochi sh-easti fârâ-ahurhitâ.

Imñi dupâ ea sh-nu-ari bitisitâ.

Nu pots s-u cunoshtsâ, ama pots s-hii ea –

isihu tru bana-a ta insâshi.

Sh-va s-ducheshtsâ di-iu yiñi:

aestâ-i mâdua-a mintiminiiljei.

18 ZBORLU A NOSTRU – 1/2001

15. Mintimeñilji antits eara-lji ahândoshi sh-chischiñi tru minti.

Mintiminiea a loru eara ti nipitrundeari.

Nu-ari cumu sâ-u zuyrâpseshtsâ;

tutu tsi putemu s-zuyrâpsimu easti fânârsirea.

Elji eara-lji cu-angâtanu

ca unu tsi-astalji unu arâu pi gljetsu.

Câshtigoshi ca unu alumtâtoru tu pâtria a dushmanlui.

Evyenits ca unu oaspi.

Fluidz ca gljetslu tsi s-tucheashti.

Plâsoshi ca nâ cumatâ di lemnu.

Dishcljishi shi-apruchitori ca nâ vali.

Limbidz ca unu pâyuru cu apâ.

Ai arâvdari s-ashteptsâ

pânâ cându lãschea s-bagâ sh-apa limbidzashti?

Pots s-shedz niminatu

pânâ cându oara uidisitâ sh-yini singurâ?

Mintimenlu nu caftâ ancherdhu ti elu insushi.

Nu caftâ, nu-ashteaptâ.

Elu easti dipriunâ presentu, sh-aproachi tuti lucrili.

* * *

16. Gulea-ts mintea di tuti minduerli.

Isihisea-ts inima.

Aynânghipsea mintitura a yiitãtsloru,

ama fã-lâ siri anda s-toarnâ.

Cathi unâ yiitati ditu cozmu

sh-si toarnâ la izvurlu comunu.

Turnarea la izvuru easti sirinlu.

Ma nu ducheshtsâ izvurlu,

armâñi tu mintiturâ sh-tu câhâri.

Anda ducheshtsâ d-iu yiñi,

ti-adari dishcljisu sh-arâvdâtoru,

fârâ eryu, sh-hârâcopu,

bunu ca unâ mai,

tiñisitu ca unu vâsilje.

Afundusitu tu mistiryiulu a Caliljei,

pots s-ti-alumtsâ cu itsi va ts-aducâ bana.

Sh-anda moartea yini, hii etimu.