| ZBORLU A NOSTRU – 1-2/2000 19 NUSHI TULLIU H Ă N G I L U |
| Sta hângilu pri pizulju Cu frâmtea mintuită Shi-ascultă cumu âlj cântă-un pulju Di turtură jilită. Armase hanea fâră omu Cârvane că nu-shi treatse, Hângilu-armase ca-arsul pomu Tse sfulgu greu shi-l treatse. Văr chipru-ascultă se-avdă nâsu Di mulă culauză Sh-ca-n yis lutseashte-amar arâsu Pri-nvirinata-lj budză. Ma nu-are chipre, ni cârvănj, Ni cârvănar nu are Mashi vimtul suflă prin fidănj Cu dultse ciuciurare. Hângilu, hanea sh-lailu fumu Mutreashte shi uhteadză, Ciubuchea-shi scutură di scrumu Shi ocljul lăcrimeadză. Shi-adutse-aminte di tricutu Când plinu eara tsilarlu Di yinu muscal, yinu nintricutu Tse scântiljia ca jarlu. |
| Tra-s bea yinea giunarilj furi Tu-ascăpetatu di lună_ Cându ardu steale sti păljuri Ca di yiamăndz curună. Bea capitanjlji, cingăshea Shi cântitse fureshti Cu is de jale ma dzâtsea Pute s-nu le-agărsheshti ! Ma-atseali dzâle-apusiră Sh-hângilu mult jileashte Câ furilj tutsi si dusiră Shi dorlu nji-l tucheashte! Ah, iu-s cârvănjli tse tritsea Sum treamurlu di lună Shi iu-s cântitsile tsi plândzea Cu vimtlu dimpriună...! Chirură Armânjlji, averile-a lor Shi bana lă-i lăită.... Hângilu suschiră di dor La hanea-apărnisită! Shi frâmt di jale, pri pizulju Cu frâmtea-ntunicată Ascultă cum ilj cânt-unu pulju Di turtură mărată! |
| * Ineditâ. Manuscris arhivat la biblioteca armâneascâ di Freiburg |