又有得玩口香糖
哩個「孖寶掃把唏嚎鬥街霸」（《MARVEL
SUPER HEROS VS STREET FIGHTER》）據講7月會出，咁即係話如果大家好彩嘅話，出書之日就已經到咗。今次嘅玩法同《X-MEN
VS STREET FIGHTER》差唔多（又可以將對手打到似香口膠狀物體嘞，嘿嘿……）。而今次每人都加咗新招，實在令人期待。出場人物各位都應該知㗎嘞，但係小弟都口水多咁講多次。MARVEL
SUPER HEROS方面有：蜘蛛俠、美國隊長、變型俠醫、狼人、BLACK HEART、OMEGA
RED（終於出返嚟嘞！）、獨眼天王同SHUMA CORATH（隻死「八爪魚」又出返嚟……）；而街霸方面，有阿隆、KEN、春麗、印度佬、司令、豪鬼、三姑奶（SAKURA）、火引彈（噢，我的至愛啊……）同阿蘇（蘇聯佬）。之外，仲有一個小弟都好想用嘅人，就係憲磨呂先生嘞。剩睇佢外型咁正，再見佢啲必殺技咁厲害，就令小弟好想用佢同呀火引彈先生組成一隊，向對手造成極大心理打擊……
仲有好多人…
上次咪話哩個《鐵拳3》有好多人用嘅？家陣喺好多機鋪，如果喺選NINA姐時撳START掣，就會有ANNA用（佢啲招同NINA差唔多），而另一個隱藏人物BRYAN都已經出埋，之後就會有平八叔同大佬兩個型態用嘞。而哩個TIGER，暫時仲未有得用。
射射射射牠吧！
唔知大家早兩年有冇玩過哩個《侏羅紀公園》嘅街機呢？當年小弟同呀丁丁君一齊玩到嗌救命。今年嚟緊會有一隻《THE
LOST WORLD》嘅街機，又係射擊，又係射恐龍， 啲恐龍又係多到你唔信。玩法雖然同其他射擊GAME差唔多，但係計分法又會有好多種，詳情請睇返今期介紹（又係廣告）。今次用咗MODEL
3底板嚟開發，睇畫面就已經值回票價，希望可以快啲到啦。
人獸大戰
嚟緊又會有一隻格鬥GAME出，叫《BLOODY
ROAR》，係立體格鬥GAME。隻GAME最特別之處，就係每個人物都可以變成人獸，例如兔仔人、狐狸人等，玩落就真係有D似睇緊動物奇趣錄，就快到港，大家等多一陣啦。
大家鬥扭「史忽花」（COPYRIGHT：ARES
1996.ALL RIGHTS RESERVED.）
哩個《TOP SKATERS》已經到咗，喺「舊0機」有得玩，八個大洋一局。小弟都想玩，但係嗰日有兩位哥仔喺度輪流玩緊。佢兩位玩得好熟，小弟同呀黃昏哥哥都好樂意咁企喺度睇佢哋表演。但係見佢哋扭「史忽花」扭得咁開心，小弟真係好唔抵得。唔係啦，出咗書一於拉埋呀黃昏哥哥去扭吓先得……
點玩都得
拳王九十七
萬眾期待嘅《KOF'97》會大約喺7月尾到港，大家係咪等得好心急呢（至少小弟就係）？今次有哩個「94
MODE」同「96 MODE」，真係點玩都得呀。有機友話「94 MODE」幾搵笨，但係小弟又唔係咁睇。嗱，「94
MODE」只係得迴避，仲得返大細跳，如果對住個用「96 MODE」嘅對手，講真就真係難玩咗㗎大佬。至於詳情會係點，咁大家就一定要留意我哋以後嘅介紹嘞（←乜咁官腔？）。
真定假呀老友？
上期我哋咪講過哩個《VAMPIRE
SAVIOR》有個「真BISHAMON」嘅？到底係真定假呢？我哋編輯部戰隊經過一夜嘅測試，發覺一直冇輸到任何一ROUND，再以三個EX或DARK
FORCE做低對手，都只係出現咗電腦挑戰者（用人狼會見到小紅帽，用蝙蝠佬會見到BISHAMON），到最後都冇人見過「真BISHAMON」。咁究竟係乜嘢嘅一回事？哩個真係世紀大謎團……
新到甩手GAME……
嗰日發現咗哩間卓任又有新GAME出，今次係玩運動會（總共10個GAME）。小弟玩到手都軟埋。點解？大佬，哩隻GAME玩賽跑唔係要連打啲掣，而係要不停轉枝控捍，嘩，真係轉到手都甩。之後小弟介紹
咗 俾小國國，佢玩完之後都大叫「吔咩爹」。哩隻嘢真係難玩過以前啲運動GAME㗎，唔信大家可以去試吓，隻GAME叫《BC
STORY》……
BY：ZAC
鳴謝：遊戲機城
﹙1997年7月3日﹚