g019

今期加咗料大家記得睇埋落去呀～～

真‧BISHAMON出現了！！！
當上期小弟仲喺度話緊唔知《VAMPIRE SAVIOR》個所謂真‧BISHAMON係堅定流，日本方面已經放咗料，話哩單嘢係堅嘅。啲出現條件實在太過苛刻嘞。大佬，香港係玩LEVEL 8㗎嘛～～不過好彩，多得君少同各位朋友嘅支持（多謝啊～～），小弟同天草終於不負所托，見到哩個可惡嘅真‧BISHAMON嘞。佢啲招比起BISHAMON無疑係強咗，所以都要經過一番苦戰先至可以打敗佢。但係贏咗佢之後，個ENDING又冇唔同到，只係喺出完字幕之後多咗一小段Q版片……WELL，哩個世界上，不可思（COPYRIGHT：1996 KAN. ALL RIGHTS RESERVED.）……

就嚟得拳皇九十七（PART III）
哩個《KOF'97》就嚟出，據說今個月月尾左右就會見街，大家等吓啦（小弟近排條頸就長咗唔少……）。今次又有新人物，但小弟自己就唔係太鍾意。不過點都好，玩就一定玩㗎嘞。不過小弟反而想知道哩個呀雪（草薙京個女友）會唔會真係好似小弟諗咁，係一個過場人物呢？不過小弟好懷念《KOF'94》嘅美國隊，唔知SNK（同大家）仲記唔記得佢哋？

俾返憲磨呂我呀～～
大家都知到哩個《MARVEL SUPER HEROS VS STREET FIGHTER》就嚟到啦。據說最遲會喺今個月月尾到。而個試版就喺深水埗某機鋪做緊，反應都唔錯。之但係，小弟有樣嘢唔係咁鍾意嘅，就係哩隻GAME只係日本版先至有呀憲磨呂先生用，海外版係冇
嘅，可惡呀！OH NO～～不過小弟相信，香港會有機會出現日本版嘅，不過唔知個數量有幾多同埋幾時先會出現（真係有人入日本版先算啦！）。

唔知算唔算秘聞呢？
話時話，小弟哩排似乎少講咗啲街機業內「秘聞」（←乜以前有講過咩？），好似有
啲對唔住一直支持小弟嘅讀友。於是乎，今期小弟就講少少關於街機業界嘅料啦！嗱，唔知大家知唔知喺灣仔有間叫GAME WORLD嘅機鋪？有機友話哩間機鋪近年有啲疲弱嘅跡像，好似話啲機種唔夠新呀咁。但係據小弟所知，近排哩間GAME WORLD已經易咗手，而家嘅老闆係街機界老大哥之一嘅威利電子遊戲機有限公司。以威利嘅實力，GAME WORLD嘅未來相信會係一片好景。加上好多時啲新GAME試版都會放喺威利
嘅場，咁講法，以後大家咪可以會喺深水埗同灣仔玩到新到試版GAME？哩件絕對係一件好事呀！

齊人啦嘛？？
唔覺唔覺，哩個《鐵拳3》嘅隱藏人物都出得八八九九，連個大佬嘅最終型態都出埋，而家陣小弟仲等緊哩個TIGER嘅出現，不過相信出書之日都應該有得用嘞。唔知係咪因為多咗啲隱藏人物，近排見多咗人玩《鐵拳3》，尤其是係大佬嘅最終型態。不過話時話，唔知大家知唔知佢係識得噴火嘅呢？

有乜好新GAME？
喺出書之日，已經有兩隻正GAME到咗港。佢哋就係哩個《VIRTUA STRIKER 2》（足球GAME）同《G DARIUS》（射擊GAME）嘞。哩兩隻GAME，我哋哩兩期都有介紹過，至於「實戰」嘅情況會係點？小就問過啲機鋪老細。先講隻足球，開首兩日就唔係咁踴躍，但之後唔知點解又有好多人玩喎。可能因為今集真係做得好過上集啦。而哩個《G DARIUS》，今次轉咗立體畫面，真係令《DARIUS》系列嘅機友十分雀躍，就算只係普通嘅飛機迷，都會深深咁受佢嘅吸引呀。好GAME嚟㗎哩兩隻！

CAPCOM夏日有搞作
如果大家有睇開本地嘅GAME書，都會知道CAPCOM會喺嚟緊嘅8月2日至3日假座銅鑼灣崇光21樓嘅展覽廳舉行一個名為《CAPCOM '97全接觸》嘅展覽。到時除咗有好多新GAME試玩同展覽之外，仲有哩個《街霸III》比賽（呀天草又話要同呀蜘蛛☆一齊參加喎。不過話時話，小弟睇過美國某遊戲雜誌所刊出嘅《街霸III》人物能力排行表，頭二三名嘅人物分別係阿隆、DUDDLY同ORO。但哩個只不過係美國方面嘅排行啫），而我哋《遊戲誌》同我哋個「妹」《遊樂誌》到時都會到場「擺檔」，大家到時記得多多捧場啊～～

大家都有SHOW
講開展覽，早兩期小弟咪講過SNK都會有個SHOW嘅？佢哋會喺7月27日喺九龍灣國際展貿中心舉行哩個SNK ASIA LIVE TOUR '97，到時又係有展覽同新GAME試玩，（仲會有一個叫「拳皇'97終極大賽」嘅比賽添），同埋有歌星嚟表演助興添。唔……到時一定好熱鬧嘞。

報導！SNK PRIVATE SHOW '97
喺哩個97年7月1日，SNK喺日本嘅大阪舉行咗一個PRIVATE SHOW。其性質同嚟緊嘅SNK ASIA LIVE TOUR '97相似，都可以話係SNK嘅新作發報會。我哋當然有去到睇啦。好嘞，廢話少講，家陣就過啲料俾大家啦！

新底板新表現
SNK話出咗好耐嘅新底板終於有新消息。哩塊底板叫做HYPER NEO GEO 64，係64 BIT底板嚟。佢嘅特點係可以用每秒60格嚟表現2D或者3D動畫、遊戲嘅替換係以插拔ROM帶嘅方式嚟進行（與現行嘅MVS底板類似），以及可以根據隻GAME嘅特式嚟擴張機能。喺PRIVATE SHOW當日，SNK更發表咗兩個以哩塊HYPER NEO GEO 64嚟開發嘅GAME，分別係《侍魂～SAMURAI SPIRIT～》（立體侍魂）同《ROUND TRIP RV》（SNK第一個賽車GAME），而且仲有得試玩添。《侍魂～SAMURAI SPIRIT～》共有11個人物，包括霸王丸、牙神幻十郎、奈戶流留、梨舞流留、服部半藏、加魯福特、風間火月、風間蒼月、橘右京、柳生磐馬同埋色。其中磐馬同色都係新人物，而其他人物都係經由日本機友們選出嚟嘅。玩法好簡單，只係有兩個攻擊掣同兩個動作掣。大家可以喺個GAME入面四圍走（爬牆、入屋都得），如果打爛地板又可以入地下室，都真係幾搞嘢。至於哩個《ROUND TRIP RV》，大家所揸嘅車仔就係RV，即係所謂嘅越野車（有ROVER仔揸呀），而玩法有兩種：要喺指定時間內完成賽事嘅CHAMPIONSHIP MODE同埋可以自行選賽道，最多可以四個人一齊對戰嘅TRAIL MODE。至於哩兩隻GAME嘅詳情，就要留意我哋嘅報導嘞。

唔只剩係得GAME
當日除咗有新GAME發報之外，仲有好多好有趣嘅產品發表咗。例如喺日本大受歡迎
嘅《電流IRAIRA棒》嘅新一代《電流IRAIRA棒迷宮》；NEO GEO手錶系列；《KOF'97》嘅鎖匙扣、SINGLE CD（收錄咗啲人物介紹、迷你話劇同背景音樂）、旗仔同布公仔；《侍魂》掛毯；新系列嘅「貼得靚」（即係「影相機」），大家可以同安室奈美惠、SPEED、MAX、甚至萬里長城合照！！

BY：ZAC
鳴謝：遊戲機城
﹙1997年7月17日﹚

BACK
NEXT
HOME