點玩都得
拳皇九十七（PART II）
喺7月28號，哩個《拳皇97》就已經到咗各大機鋪，唔知大家有冇去玩吓咁呢？好彩小弟喺截稿之前就有幸玩過吓。今次個氣氛做得好正，十足十一個全球性嘅格鬥大會咁，令小弟嘅「拔甩」都不期然咁燃燒起嚟，實在太正呀！！！至於嗰日小弟同友人講開哩隻GAME，佢話今次用返94同96嘅系統，好似冇乜改進咁話。但係以小弟嘅愚見就覺得，97嘅新系統就係有得用94同96嘅系統（嘩，乜咁玄妙呀又？）。而經小弟嘅觀察，好多機友都好喜歡用94
MODE，可能佢哋覺得用96 MODE就同玩返96差唔多啦。但係又經小弟同「隱居咗」嘅指令魔人研究之後，我哋發覺哩個矢吹真吾都幾好用，差啲好用過草薙京添。點解咁講？因為佢出招冇火，所以可以睇得好清楚，冇話一出招就一堆一堆火，唔清又唔楚（押韻……）。但真吾有一個幾致命嘅弱點，就係出招好慢，都幾惡搞。另外，據老總米奇向有關方面攞嘅料表示，哩隻GAME仲有好多隱藏嘢，但係家陣唔講得住，留意下期啦！
乜嘢先叫做真正嘅AIR
COMBO？
哩個《MARVEL SUPER HEROES
VS STREET FIGHTER》就都咗一排，大家有冇去玩？有冇玩鞭屍？有冇打到對手變口香糖？有冇玩AIR
COMBO？小弟除咗好痛恨冇得用憲磨呂先生之外，就係覺得呀火引彈先生弱咗好多。不過火引彈先生個爆機又幾過隱。話說某日小弟見到個高手用火引彈爆咗機，於是小弟就企定定睇嘢。個ENDING話呀火引彈先生揪住俾佢打到死吓死吓嘅大佬，正想將佢就地正法嘅時候，忽然有一個著校服
嘅女子走出嚟大叫：「呀哥，唔好呀！佢……佢係……佢係我哋嘅……」跟住就出STAFF
ROLL……有玩過「聾苦支拳」嘅讀友們都應該諗到個情景會係點啦……真係救命。不過話時話，嗰日小弟又同「隱居
咗」嘅 指令魔人研究之後，佢教咗小弟一招「好玩過玩雜技中者無不想快啲死但係又唔係話出就出要經過專業人仕從旁指導小朋友唔好亂試成日用就會引發對手怨念」嘅AIR
COMBO，係呀KEN嘅：蹲下輕腳→蹲下重拳→大跳→輕拳→中拳→重龍卷旋風腳→（對手未落地，但自己已經落咗地）神龍拳，都有十幾二十HIT㗎。如果用呀隆同豪鬼都出到哩招，但最後冇得駁神龍拳（←廢話）。嗰日呀指令魔人仲親身示範，睇到小弟同他機友都冇嘢好講，除咗強烈指責佢對啲電腦對手太過殘忍之外。哩啲先係真正嘅AIR
COMBO啊。講開又講，小弟順便補返呀KEN同呀隆第三招超必嘅指令啦（雖然應該好多人都知）。呀KEN嘅疾風迅雷腳：→↘↓↙←＋兩隻腳掣；而呀隆嘅真•昇龍拳嘅指令就係：→↓↘＋兩隻拳掣。大家明白未？
射魚捉魚打飛機
近來小弟最鍾意嘅打飛機GAME，就真係非哩個《G
DARIUS》莫屬。先唔好講佢轉
咗用立體畫面，令《DARIUS》系列嘅機友十分雀躍，就算只係普通嘅飛機迷，都會深深咁受佢嘅吸引呀。而且又有得玩捉敵機做自己嘅OPTION，真係好過隱呀。個難度又一啲都唔低，連赤目黑龍先生都玩都嗌救命，正嘢嚟㗎哩隻GAME，大家快啲玩吓啦（代編按：收咗人哋幾多錢呢哩個死人ZAC）……
呀KEN加入拳皇系列？！
梗係唔係，你唔係信呀嘛？如果大家有睇過早兩期我哋個「妹」（遊樂誌）嘅報導，都應該知道CAPCOM除咗會喺大約9月推出《街頭霸王III》嘅加強版之外，仲會推出一隻Q版嘅格鬥GAME，叫《POCKET
FIGHTER》。哩隻GAME入面嘅人物，全部都係CAPCOM以往受歡迎嘅格鬥GAME人物，包括《魔域戰士》系列嘅中國女疆屍、貓女同MORRIGAN；《少年街霸》系列嘅呀KEN、呀隆、春麗、三姑奶（SAKURA）同蘇聯佬；仲有哩個《街頭霸王III》嘅伊吹同《RED
EARTH》嘅女魔法師。有咁多人物，在令人諗起《拳皇》系列呀。不過哩隻GAME嘅操作法簡化咗，只係需要一支控捍、一個拳掣、一個腳掣同一個SPECIAL掣；簡單嘅操作加上愛嘅Q版人物，CAPCOM係咪想吸引啲年紀較細嘅小朋友、唔係咁打開格鬥GAME嘅機友同女孩子？唔，小弟都好有興趣，好似話就出，係就好囉。
BY：ZAC
﹙1997年7月17日﹚