今期小弟就想同大家分享一下當日（7月1日）喺大阪SNK總壇處所舉行嘅《SNK PRIVATE SHOW》嘅情景，同埋同大家分享一下小弟喺玩過《拳皇'98》之後嘅一啲「心得」，唔知啱唔啱閣下嘅口胃呢？
地點
地點就喺大阪嘅SNK總壇，個處就位於大阪入面嘅江坂（ESAKA）。哩地方都可以話係「SNK鎮」呀，因為除咗有SNK總壇外，仲有3大間NEO
GEO LAND。就算喺酒店房都見到SNK嘅招牌，都咪話唔邪門釘。
會場
講返正題，嗰日小弟就晨早走咗上去SNK總壇8樓搵SNK
ASIA LIMITED 嘅 芳井先生，受到熱情嘅招待（好感動……），之後就由佢帶領小弟到10樓嘅會場嘞……一去到會場，實在嚇咗一跳。乜得咁少賓客嘅？原來個SHOW仲未正式開始，到咗下晝就會人多到你唔信㗎嘞。喺個場除咗有成19部《拳皇'98》之外，仲有兩部《BEAST
BUSTER∼SECOND NIGHTMARE》（鎗GAME，80%完成度，預計9月出），一部《NEO LASER》及幾部景品機同幾部「影相機」。
玩嘢
喺咁嘅情況下，小弟就梗係走去玩《拳皇'98》啦！仲要連爆佢兩次機先心息（不過係「CON爆」嘅……）。今期就冇乜故事咁，個個個爆機都係播返同一段片，但係如果係成隊爆（例如用日本隊），就會喺爆機播完片之後俾多一張「全員合照」過你睇。點解會咁？冇計啦，據開發人員透露，因為OROCHI故事已經完咗，所以佢哋就搵返以前有參加過KOF嘅人物出嚟，實行當哩集係「SPECIAL
EDITION（特別版）」，當係一個「ENCORE」咁話。至於今期大佬嘛……暫時唔講得住，但係可以話俾你知，佢以前都做過吓「大佬輩」，而且今期你都可以用都佢，不過啲招會有些少出入……自己估啦！至於話玩後感嘛……如果「死咗」之後「CON機」，係會有啲好得意嘅嘢俾你揀，哩樣真係一絕，比《REAL
BOUT 2》更絕；而美國隊呀、MATURE、VICE、RUGAL大人、「阿叔隊」等人嘅歸來就實在令人興奮，好多試玩嘅朋友都係用佢哋。但係「阿叔隊」3個人同RUGAL大人都「有波放」，都似乎勁咗少少咁喎。而至於上一集嗰啲隱藏人嘛……講就唔講得住，但係嗰日就已經見到有朋友用緊啲「就咁揀就揀唔到」嘅人物……我就走去問佢哋究竟要入啲乜嘢指令先可以用到哩啲人？佢哋就話唔使。咁即係點？唔通……（各位聰明嘅讀友，自己估啦，你實估到嘅）。如果大家有去到7月15號香港嘅SNK
PRIVATE SHOW嘅話，相信閣下就會解開哩個「謎」㗎嘞。咁香港幾時有得玩？應該就會喺7月22號之前就有。但係小弟收到料，話喺哩個7月15號晚黑，灣仔天落里「油器機成」好似會有得玩嘞……想去嘅朋友好快啲落去嘞！！
BY：ZAC
鳴謝：芳井澤人先生／胡先生／SNK開發部仝人
﹙1998年7月18日﹚