無尚魔法
拳皇九十八 （PART I）
（COPYRIGHT：1998
千里ALL RIGHTS
RESERVED.）
相信大家都有去到今年書展啦！相信大都有幫襯到啦！實在多謝大家啊（←講乜呀又？）！嗱，哩個《拳皇'98》就到咗啦，相信大家都有好落力咁去操㗎？唔知大家操成點呢？有冇發現咗啲乜嘢有趣嘅事呀？而唔知大家搵到自己嘅「隊友」未呢？小弟就搵咗「重啲（HEAVY
D！）」同「大力啲（BRIAN）」組隊，但係就仲未搵到第三個啱小弟用嘅「隊友」，實在頭痕呀哩鑊……講開又講，唔知大家知唔知道哩個所謂「相性」哩家嘢呢？所謂「相性」，就係當閣下揀完人物之後，喺揀次序嘅時候撳住個START掣，咁大家就會見到各個人物側邊出現個一個「人樣」。而哩個「人樣」就總共有成三款咁多。哩三款就係「嬲樣」（紅色）、「平常樣」（白色）同埋「開心樣」（橙紅色）。咁哩三個樣又代表乜呢？原來如果嗰個人物係有「嬲樣」嘅話，咁如果佢輸咗就唔會留任何一粒超必珠俾下一個「隊友」、如果係「平常樣」嘅話，佢喺輸咗之後就會將自己剩返落嚟嘅所有超必珠留俾下一個「隊友」；而若果嗰個人物係「開心樣」咁閣下就發嘞，因為佢會喺輸咗之後，除咗會留返自己所有嘅超必珠俾下一個隊友之外，仲會「私人醒」多一粒添。即係話，如果有「開心樣」嘅人物喺輸嘅時候有2粒超必珠，咁下一個「隊友」出嚟嘅時候，就會有成3粒超必珠咁多㗎嘞！雖然同上一集好似一樣，但係其實係有少少唔同嘅。原來，啲人物嘅心情係日日唔同㗎！即係話，如果今日用草薙京係「開心樣」嘅話，咁過兩日佢可能會變咗做「嬲樣」或者係「平常樣」㗎！咁就真係「鑊鑊高潮鑊鑊甘」囉！至於應該點對付哩啲會變樣嘅人呢？方法就有兩個：一係就唔鬼理佢哋嘅心情，死都照自己鍾意嘅陣式嚟排；一係就將個「嬲樣人」擺最尾，咁就萬無一失嘞。至於啲隱藏人嗰方面哩……相信大家都知得七七八八啦？但係家陣仲未俾講住，下期啦，下期就可以透露少少嘅小弟相信。如果大家到嗰陣時都仲未知嘅話，咁小弟都唔知講乜好咯……話時話，唔知大家見到今期個大佬未呢？小弟就見到有機友爆到機嘞（小弟都話咗晨早爆咗咯喺日本嗰陣），唔知大家覺得今期大佬點呢？型唔型仔就唔講，但係就真係好鬼死霸道呀佢啲招……你話如果人用到而且又攞佢嚟叉你機都真係唔知點算好咯……不過好彩唔（←唔講得……）……
BY：ZAC
﹙1998年8月1日﹚