九龍灣國際展貿中心
雖則概念上係好值得支持, 但有o的o野好想主辦單位多加留意:
例子1.)個場太大, 較後排o既地方音響硬係差o左少少!!
2.)收集o左好多朋友o既企位資料, 無論企前企後, 前至5、6、7行, 後至 Panel 附近都大叫"睇唔到睇唔到", 我諗在場起碼都有千幾二千人, 要照顧o既唔係淨得第1、2行o既人, 請凡事以大局為重, 常試參考o下外國o的大型 Band Show 啦, 最起碼個台都要高過一個人, 好似<拉闊>咁就差唔多啦,(你知啦!!唔係個個都有7尺高o架, 由其係我o地呢o的發育未完全o既怪胎, 生得仲特別矮過人o忝!!)
3.)唔知點解呢o的咁大型o既 show 就成鬼日都大細超到出晒面, o的細 Band 玩 3 首就話要收皮, o的大粒o野玩極都仲未完......
4.)有名曲作為過場音樂本身構思應該係好好, 千人大合唱"Come as you are", 場面非常壯觀, 但時間長短、配合與否, 先係過場音樂首要兼顧的!!
同朋友計過啦, 今次個 show 咁多人買飛, 加上口碑又唔錯, 希望商台睇住有錢賺份上, 每年都搞一次咁 free o既 Band show(o下o下衝台都俾實Q用電筒照好鬼無癮o架!!)當做o下宣傳又好, 賺o下錢又好, 咩都好啦, 我諗除o左商台肯出錢又出力之外, 都冇咩咁大o既機構會咁傻搞o的咁大規模o既 Band Show 啦......
DNA--我都未企好一個有利位置佢o地就開始o左啦, 到我揀好正位佢o地就收工啦, 我真係一o的都睇唔到一o的都冇留意到, 只係覺得佢o地搞到o的人好 high 囉......係一個好o既 opening!!!
Metropolis--好多朋友同我自己都覺得佢o地個 Vocal 改善o左好多, 比起個次o係灣仔 show 度有明顯o既進步, 希望呢o的唔係剎那光輝, 一舜即逝啦!!~
麥田守望者--又係犯上一個嚴重通病, 識放唔識收, 本來o的人都好 high 好投入, 不過見佢o地一浪接一浪, 黃河崩缺一樣, 差o的俾佢o地浸死呀!!
ICE stone II--聽講佢o地o的歌番炒又番炒, 亞龍大佢o地都知自己悶到發瘋, 轉玩 LMF 啦, 請唔好每一隊 Band 都重複又重複啦!!
Survivor--雖然佢o地得唔到在場觀眾熱烈反應, 但佢o地係我當晚最欣賞o既一隊, 可能係我自已o既偏愛, 又或者係冇睇佢o地好耐, 但佢o地的而且確做得好好(假如相比起 Virus 的話, 佢o地應該係出色過 Virus, 最低限度我能夠清楚聽到亞 Ben 唱緊中文定英文<雖則聽歌唔係要o野o野都清清楚楚, 但係連中定英都搞唔清, 未免太離譜!!>)亞 Ben 唱歌技巧獨特, 氣氛營造得不錯, 成隊Band 都已經漸有台型, 請亞 Ben以後唔好再講"唔再阻住你o地啦", 每隊 Band 都有唔同人支持、唔同o既知音人, 俾o的信心自己, 俾o的機會人o地(觀眾)!!
LMF--N.T+Screw個首歌週不時隱隱約約都會聽到粗口泛濫, 最清楚最大回響都應該係個句"x你個咀呀", 但我唔知點解成個 show 咁多o野寫, o的記者硬係要寫 LMF 唱粗口歌 ; 眼見o的水樽左穿右插, o的鏡頭就追住o黎閃 , 係咪咁先叫做 talking point? 的確係o既, 呢個叫娛樂圈唔係叫音樂圈嘛, 有o的o野的確係唔可以混為一談o既...!!
唱<紀念日>係諷刺定係真係咁想玩o架, 請 inti 係俾面定係佢真係唱得咁好先?
偶爾聽到佢o地o既歌詞部份諷刺緊一o的o野, 真係好期望 LMF 會快o的出碟, 能夠聽真o的會意多一o的!!
Beyond--我諗大部份o既朋友都係o黎捧 Beyond 場, 相信當晚佢o地o既演出應該冇叫大家失望, 家強突然唱番<麻醉>...簡直驚天地泣鬼神!! 不過我就建議佢出場前多飲幾杯開聲茶, 效果應該會更加好!!
......慘!慘!慘! 當晚個 show 完o左之後我已經"那那臨"仆番屋企...但一番到去就被人鬧 "成日都點幾兩點先番"......被迫今個星期六要取消去蒲窩睇 show...關我咩事喎...鬼叫我住屯門咩!!!
<HOME><樂隊資料庫><大碟資料夾><演唱會資源中心><問答題>
<樂勢力><廣告時間><新聞提要><歌詞集中營><寵物勝地>
<GUEST BOOK><VIEW GUEST BOOK><作者小傳><亞龍大保護罩>
<COOL LINKS><靚靚小相集><六線譜><正SHOW大鑑賞>