LIVE MOMENT AT HKU 15/10/98
今次寫 show 後感o既立場好唔同, 係就係坐響到做觀眾, 但係我知道o既o野又唔似係一個正常觀眾會知、會睇到、會感受到! 如果大家有留意的話, 你會唔難發現我 HP 大大隻字為今次個 show 做頭版廣告, 配額有限, 只此一次下不違例, 可見我同搞手關係非比常尋, 別有內情!!!!!
如果你知道你朋友搞 show 事無大小都要一腳踢, 設計海報、門票、場刊, 搵燈光音響, 租場, 不下數十次聯絡各大 band 友, 搵 sponsor, 開各類沉悶會議, 催促各大 band 友交齊資料……小至借凳, 影印, cut 飛, 掃地, book 車位, book board, 仲要擔驚受怕驚整爛o野, 怕賣唔晒o的飛, 怕o的 band 玩得唔開心, 做完之後仲要向各方交代清楚, 每年人手交接壯觀時刻又要俾人狂插……假如你知道的話, 你會唔會仲怪有咩唔妥有咩出錯……? 如果你知道你朋友為搞呢個 show , o係兩個禮拜之前已經開始緊張到坐唔安食唔落, 呵、嘔、頭痛、頭暈、發燒、標冷汗樣樣都出齊的話, 你只會識得心痛同擔心, 有得揀的話甚至乎想佢唔再搞個 show …… 今次搞 show 實在覺得我朋友處事太仁慈, (o的 band 話要XXXXXXX, 要幾多X就XX)--此句慘被重要人物刪剪, 明知要蝕到 PK 都仲堅持只收 $30 (請你o地唔好以為 $30大晒, $30 連半個 MARSHALL AMP 都租唔到), 就連宣傳都唔敢搞咁大驚o的 PRESS 會一窩蜂o黎晒, 怕搞到o的 band 玩得唔開心……唔知你知道呢o的內情之後, 對於今次個 show 有不滿o既地方會唔會減少o左, 不過希望你o地下次睇 show 之餘, 亦請多多體諒……原來每個故事背後都會有一個可歌可泣、賺人熱淚o既動人場面!!! 相信對於佢o黎講會係一個不可多得、難能可貴o既經驗, 同樣地對於我自己o黎講亦都上o左寶貴o既一課…… 我知道o既o野太多啦…細至連影印小趣事…大至連開會搵 sponsor…連後台邊個食飯盒邊個最早走我都八晒番o黎, 要我冷靜、客觀分析個 show o既好與壞, 看似十級難度大測試…容我係度幫朋友"羅"番個公道、解釋一下得嘛? 不過朋友還朋友, 有錯就要認, 打就要企定!!! 企定被打例子:1.) 等o左 1 個鐘先入得場…係咪有o的過份? 雖則有人遲到累事影響大局, 但係初初決定開 show 時間係咪可以計劃周詳o的?
2.) 本來玩第1 、2首歌o既時候, 覺得o的燈光好係正、好係新鮮, 不過越睇就越唔對路…除o左o的燈閃得太勁不在話下, 連打燈o既方向都搞唔清就真係有點兒那個, 邊邊係台邊邊係觀眾都分唔清, o的燈打落觀眾度都仲多過打上台, 搞到我o地個個都好似被差人拉審緊犯一樣……
Icq friend Manslaughte wrote that :"放毒霧仲過分,好似'大衛高柏飛'o甘!!! 成日形住係魔術表演, o的霧一散就會唔見晒o的人o甘!!
3.) o的 MARSHALL AMP 係就係好靚.......但係點解唔係好夠聲....??
根本今次我睇 show 就完全冇晒心機, 一個禮拜之前就日日追問賣飛進展, 排隊o既時候又擔心o的飛賣唔晒, 入到場又驚o的觀眾整爛凳, 見到o的實 Q 又覺得佢o地好慘...o既行為簡直就唔係一個正常觀眾所為, 原來當你易地而處o既時候, 你會學得更多、體諒多o左、諗得更清楚…CHARISMA----亞焜o既一席說話唔知撩動起幾多人o既心深處....o的掌聲係代表認同, 還是係別有用心?
Metropolis----喜見我身邊所有朋友原來都好識聽歌, 收集番o黎對 Metropolis o既意見都大獲好評:例子1.) 佢o地個 Voice 真係唱得好勁, 差就差在佢冇叫o的人起身跳咋!!
2.) 如果你細心溶入音樂當中, 你會覺得每一首歌都玩得好精彩好有神韻!!
3.) 嘩! 佢o地個個的技術都好勁, 有佢o地一半就好…
(本故事乃真人真事演繹, 絕無任何刪剪及虛言)
一次一次o既進步一次又一次o既驚喜, 熱切祈望11月中o既演出!!Tat Flip----no comment!
NT bonus track----刪除o左上次只唱o左 6 分幾十秒o既紅館事件, 默然發覺原來 NT 已經好耐好耐冇出過 show, 不過今次只玩 2 首歌, 好似唔係好夠喉......
(原來一直以為o既都係錯誤, 經過今次事件之後, 驚嘆 NT 原來可以咁成熟!!)
LMF----最感安慰o既都應該係各人充份合作, 幫手又幫口叫o的人唔好企凳, 亞仁仲好鬼錫住o的 Mic stand, 續枝續枝幫手搬埋一邊……假如每個人都做多一點點, 呢個遊戲應該可以好玩多一點點……唔知係咪因為各人都要番工而趕唔切換會服, 定係因為上次著完懶到都仲未洗, 收起了整潔o既會服, 但係幸好冇收起到精彩o既演出, 今次比起上一次玩 MCB show 更為興奮, 可能係因為同o的觀眾近o左, 隔膜少o左, 大家都好盡情跳盡情叫盡慶而歸!!!!
P.S: 做好人原來真係可以冇好報!!
<HOME><樂隊資料庫><大碟資料夾><演唱會資源中心><問答題>
<樂勢力><廣告時間><新聞提要><歌詞集中營><寵物勝地>
<GUEST BOOK><VIEW GUEST BOOK><作者小傳><亞龍大保護罩>
<COOL LINKS><靚靚小相集><六線譜><正SHOW大鑑賞>