九九繼續滾 20/2/99
牛池灣文娛中心劇院
Tears----首先…我未出過show, 我唔知出show有咩心情, 但係我一定睇唔過眼Tears o既表現…一有人"楂"住個camera就猛咁對住個cam慌死影得唔靚對唔到鏡頭...我唔明囉,點解出show上台會有咁多o野好傾…有o野傾唔該返band房先, 我o地o係下面o既…又冇得聽又冇得笑…好鬼冇癮…!!! 我唔係話無線Jack唔好…不過有o左無線Jack都唔駛o係個台上面不停咁打圈借o的椅大大聲話俾人聽"喂! 睇o下! 我冇Jack線o架, 幾型!!"……有朋友講"嘩! 佢o地個結他手o的結他好勁喎!"我知呀…但係既然佢o地都唔係show緊佢o地玩o既o野, 我做乜要讚佢o地結他勁喎!! 仲有, 聽佢o地o的歌我好自然會諗起十年前o既B記, 佢o地o的歌詞佢o地o的曲依然停留o係十年前B記玩"永遠等待"、"亞拉百跳舞女郎"o既時代, 呢o的歌只有B記再番玩先會令人驚喜令人尖叫o架咋…又有人話" 喂!! 佢o地好X型喎!!"或許5-10年前拗腰向後45度角"楂"結他紮行馬會好型, 但係家o下公元2000年都o黎緊, 歌要update唔該台風都update o下得唔得…我想講……台上面一舉手一投足做觀眾o既會睇得好清楚…如果你要show-off o既話唔該show-off你o地o既音樂, 我冇興趣睇你o地所謂好型o既show-off!!!
Apostrophe----記得上一年又係CITY搞o既show睇過Apostrophe o既演出, 當時覺得佢o地好怕羞好細路女, 事隔一年之後…情況好o左, 不過技術就繼續生硬……咩唔o岩拍子…甩beat…手指離條neck成條街咁遠…佢o地通通都犯上(當然…當然比起我呢隻懶鬼, 佢o地好我好多啦!!)但值得一提係佢o地一o黎玩o左兩首unplugged, 好舒服好清新好適合佢o地!!
我真係未出過show, 不過我估到佢o地應該會好緊張好怯場, 可以o既話能夠撐得幾多咪幾多囉, 扮o下o野唔駛死嘛, 唔好一出場未講o野個樣就話晒俾人聽…好驚呀…好驚呀…救命呀亞媽…Cover----Cover個vocal除o左動靜"楂"viewcam似亞Jan之外, 連個樣都有三分似…再加上另外一個vocal o既八婆手勢, 搞到台下面o既人都好鬼high, 個個都叫到V嘩鬼震咁聲...仲有, 我自己就好鍾意佢o地rap住o黎介紹自己o的隊員, 好盞鬼好搞o野!!!...論技術佢o地唔係當晚新band中最好, 但係論合作性, 我就覺得佢o地最合拍…有時候唔係話一味識show-off自己就得, 每一個人緊守自己崗位, 做好自己本份已經o黎得叫好叫座, 一隊好o既band每個成員演出都同樣重要同樣精彩, 缺少o左任何一個都會略有所失, 咁先叫正嘛!!!(唔想講Anodize, 不過真係搵唔到一個更加好o既例子, 假設性去諗…A記少o左任何一個都唔係A記…就正如B記一樣…)
NT----唔知係咪大家等得太耐, NT一出場大家都只係互相問候數言就收手, 以為有插水有大場面全部都冇發生, 連有人"fing"水o既時候都嫌身邊太少人o的水o黎得有點過份有點洶湧…
…好耐都未聽過NT玩新歌, 今次一連幾首大贈送…睇到有下過心機有夾過o野, 聽到一點點o既改變一點點o既進步…唔係一定要跳要叫先叫做好, 喜見各人技術上都花o左心機落o左本, 尤其亞斌o既Bass拍線o黎得自然純熟!!!
其實我覺得NT當晚玩得唔差o架, 只不過o的觀眾目訓晒覺之嘛, 唔駛唔開心喎!!!
Anodize----感動o既係A記足之有新歌加新元素…感動o既係佢o地仍然有o個份熱誠繼續創作…有時候我會覺得A記改變o左, 但係今次o既改變的確令我刮目相看, 有時候唔係死硬派Matel就可以過一世, A記佢o地(o係音樂上)好清楚一世唔變就等於Out, 台風如是, 潮流如是, 音樂亦都如是…新歌加上o左Drum loop加o左o的programming…切合到音樂潮流o既轉變…雖則轉變o左但係仍然保留番各人獨有o既音樂聲……其實最終佢o地都冇改變過一切…換句說話講…佢o地只係o係自己本來o既音樂風格中不斷演變不斷改進…我相信呢o的就係A記一直屹立不倒令大家唔失望o既原因…(說真的…我唔係幫緊佢o地, 我只係被佢o地o既音樂影響到……好多人都只會受B記o既音樂影響…但我奇怪o的…A記先係我聽band sound o既啟蒙老師…這是後話, 有機會有時間再同大家分享o下!!)
照A記數首新歌作估計, 新碟大有可能有好多新元素新聲音出現… 你睇到我o係上面能夠咁冷靜…一開口唔鬧到佢o地狗血淋頭, 你就會知道我已經下o左火…3首歌本來我會叫佢o地去pk…會鬧到佢o地一文不值…但係有好多o野唔係你同我同佢o地可以控制到! 總之我知道A記有盡力有準備無愧於心啦..!!! 返到屋企萬七個ICQ朋友原來都有去到呢個Show, 仲有萬六個朋友知道我係邊個, 認得我o既咪走埋o黎打個招呼say聲hi囉, 我唔係你o地想像中咁cool咁串, 的而且確我唔笑個樣又真係有o的惡, 但係我唔會一開口就問候你屋企人o架!! 話唔定我心情好o既時候仲會嘴你兩啖添!!哈!哈! 今次會係我最後一次寫show後感… 我知道自己太主觀且主觀得o黎有點過份, 睇完guestbook寫o既o野再加上朋友一席話…令我更加有決心停寫"show後感"…其實停寫最主要o既原因唔係因為我覺得我態度觀點有錯, 只不過係因為唔想再交"行"貨再迫自己, 有時候明明冇野想寫都要硬食嘔o的o野出o黎…咁樣有違我當初寫"show後感"o既出發點, 我相信大家都唔想睇到o的咁假o既o野出現…但請放心…我有feel有o野想講o既話一定會再重出江湖, 正如今次一樣, 差o的寫到收唔到筆, 打字打到pk!! 之前有所得罪的, 在此講一聲"抱歉", 你覺得我講得唔o岩聽o既就當冇聽過啦, 你覺得o岩o既就努力改善一o下啦…bb!!
<HOME><樂隊資料庫><大碟資料夾><演唱會資源中心><問答題>
<樂勢力><廣告時間><新聞提要><歌詞集中營><寵物勝地>
<GUEST BOOK><VIEW GUEST BOOK><作者小傳><亞龍大保護罩>
<COOL LINKS><靚靚小相集><六線譜><正SHOW大鑑賞>