Dy Sul 3/3/02: Band henwys 'Treys Noeth' re waynyas an rannow Kernewek an kesstriv PanKeltek gans kan "Tus an kastell". Kan yn kever triga yn gwel an Garrek Loes y'n Koes. Skrifys veu gans kanores an band, Julie Elwyn, ha treylys dhe Gernewek gans Neil Kennedy. Synsys veu an kesstriv an gorthugher ma yn Tewynn Pleustri. Yth esa peswar band y'n rannow ma: Kescana; Ahanan, Skwardya ha Treys Noeth. Res vydh dhe Dreys Noeth mos dhe Iwerdhon nessa mis rag kesstriva erbynn Breten Vyghan, Iwerdhon, Kembra, Manow, hag Alban. Warlyna, Kernow a gemmeras nessa le pan waynyas Kembra, mes an vlydhen gyns, Kernow o an trygher gans an band 'Rachel ha Tir Kemmyn'. Kernow re waynyas ynwedh gans 'West' ha Philip Knight.  Dy Yow 29/2/02: Yma rol hir a hwarvosow hevlyna rag goel a'gan tas sans kenedhlek. Nos Wener y fydh troyll dhe Borthpyran dhe'n Ostel Ponsmeur. Kevarwoedhys vydh gans Troylloryon Melinji (19:30). Dy Sadorn y fydh koen Sen Piran dhe'n Ostel Great Western dhe Dewynn Pleustri (19:30). Dy Sul yma an kerdh a-hys an tewynnow dhe Borthpyran dhe'n Grows dell eus diskwedhys a-dheghowbarth. Diwettha y'n gorthugher y fydh an kesstriv Kernow-PanKeltek. Ena dewisys vydh an gan neb a dhe Iwerdhon dhe Bask mis Ebryll. Moy derivadow yn Sowsnek omma. Dy Sul wosa bush bras a dus dhe gerdhes a-hys an tewynnow, y fydh gwari Sen Piran yn mysk an tewynnow rag an tressa blydhen yn unn rew. Performys yw gans tus leel a Byran-yn-Tewas.

Kovskrifenn 10

<<<Delergh<<<

Dy Meurth 5/3/02: Dydh Sen Piran yw unnweyth arta hag yma meur a hwarvosow a-dro. Yma fleghes skol ow keskerdhes an myttin ma yn Bosvenegh hag yma kaskyrgh yn Truru herwydh usadow dhe'n Benneglos le may fydh areth gans an is-Bardh Meur, Rod Lyon (1 eur dohajydhweyth). Ymava ev yn unn wul an solemnyta hevlyna drefenn bos Bardh Meur Yowann Bolitho yn Awstrali y'n eur ma. Rod Lyon a vynn leverel dhe Gernow dhe herdhya war-rag gans projektys Amkan Onan ha herdhya an governans dhe ri dhe'n yeth aswonnvos laghyl. Dy Lun 4/3/02: Yma an PanKeltek yn Kernow yn unn wovynn skoedhyans arghansek rag kannasow an Ducheth hevlyna, Treys Noeth. An band a waynyas an kesstriv yn Kernow Dy Sul gans aga han 'Tus an Kastell', byttegyns, lemmyn res yw dhedha kavoes an mona rag aga hemmeres dhe Iwerdhon nessa mis. Nyns yw diger doen taboryow, ampow ha dafar ilow a-hys an mor Iwerdhonek po yn ayrenn po gorhel. Trist via gweles Kernow yn studh boghosek arta ytho res yw dhe beub hwilas y'ga fokketow rag peunsow. Mar kyllyn gul yn ta yn Kilkenny, Kernow a allsa gwaynya arta kepar dell wrug nans yw diw vlydhen. An skeusenn a-ugh a dhiskwa kaderyer Kernow PanKeltek, Paul Trevenna, ow ri dhe ganores Treys Noeth, Julie Elwyn, piwas rag gwaynya an kesstriv yn Kernow. A-gledhbarth y hwelir skeusenn a Dreys Noeth yn unn seni dhe Dewynn Pleustri nos Sul yw passys.

Dy Yow 7/3/02: Fylm nowydh 90 mynysenn der Gernewek neb a vynn ughelhe aswonnvos an taves hag yw menmildir gonisogethek a-vri a vydh diskwedhys rag an kynsa prys 12ves mis Meurth. An kynsa dh’y weles a vydh kuntelles yn Chi Kemmynyon yn Loundres hag y’ga mysk eseli and senedh Westminster Kernewek. ‘Hwerow Hweg’ yw settys yn tre Gernewek haval orth tre wir arnowydh le mayth eus drugyow yn le an tu gwelys gans havysi. Sterennow an fylm yw Robert Williams ha Helen Rule. I yw karoryon anfeusik yowynk. Jack Williams yw an den-ledya gans is-sterenn Becky Rule. An fylm yw askorrys gans Paul Farmer ha kevarwoedhys gans Antal Kovacs. ‘Hwerow Hweg’ veu gwrys gans gweres Cornwall Media Resource, Kollji Kammbronn-Poll-Rysrudh ha skoedhys gans Konsel Kernow. Dy Mergher 6/3/02: Myttinweyth yth esa keskerdh gans dew kans flogh skol dres Bosvenegh. Prys li o an keskerdh meur dydh Sen Piran. A-dro dhe dew kans den ha hanter kans a dhallathas dhiworth Fordh Sen Jori yn Truru ha keskerdhes war tu ha Stret Bosskawen hag ena dhe'n plen a-dherag an Benneglos. Ena yth arethas is-Bardh Meur Rod Lyon dhe'n bush. Dy Mergher 6/3/02: Argyans ynter an parti LibDem Pow Sows ha Kernow yn kever digresennans yw sortys. Yth esa an eseli senedh Westminster dhiworth Kernow yn omladh rag skoedhyans senedh rag Kernow. Dell hevel ha herwydh Matthew Taylor, an parti Pow Sows a's skoedh lemmyn.

Dy Meurth 12/3/02: Herwydh dyllans gwask Andrew George (esel an senedh Westminster rag Porthia) yma skoedhyans bras rag polisi neb a bareussa an fordh rag Senedh Kernow. An parti LibDem a brofyas amendyans dhe'n polisi dhe'n Keskusulyans Gwenton an parti Libdem yn Manchester, Pow Sows. Lywydhyon a vynnas skoedhya senedh Soth West, mes Andrew George, Matthew Taylor, Colin Breed, ha Paul Tyler re wrug dhe'ga farti treylya brys. Andrew George a leveris dhe'n keskusulyans nag yw hemma yn kever omserghyans mes yn kever dos ha bos rann a vro dhyvers. Soweth, hwath yma Lavur ow herdhya war-rag gans aga thowl rag senedhow bras ranndirek heb prederi yn kever Kernow, mes an Soth West. Dy Sul 10/3/02: Eseli an Senedh Westminster dhiworth an Parti LibDem yn Kernow re brofyas movyans yn unn elwel orth Chi Kemmynyon dhe solempnya Dydh Sen Pyran. Mar pe an movyans degemmerys yn ta, res via dhe Sen Pyran an keth savla hag asswonvos y'n Rywvaneth Unys a-vel Sen Jori, Sen Andrew ha Sen Patryk. Byttegyns nyns yw aswonnvos an kethsem tra a-vel skoedhyans ha dy-goel arghanti. Mes dhe'n lyha, dydh soedhogel a'n par ma a via kamm war-rag. Dy Yow 7/3/02: An kowethas Imerys neb yw an brassa pennfenton a ober yn ranndir Sen Ostell re droghas 250 soedh hedhyw. An lywydhyon a lever bos digerra palas pri yn Pow Brasil. Yma tus ow leverel bos hemma ensampel a omgemmeryans korforethek drog.

Dy Yow 14/3/02: Trethow a-dro dhe'n arvor Kernewek re waynyas piwasow hedhyw rag bos rewlys yn ta. An aswonnvos ma nyns yw rag aga bos marthus glan. An piwasow ma a dhiskwa bos lies tra res dhe usyoryon, kepar ha pysvaow, parkow kerri, ha derivadow. Byttegyns, yma moy a dus ow kortos rag an piwasow Baner Glas neb yw res gans Ewrop. Dy Yow 14/3/02: Ombrofyer sewenek rag pennsoedhek Konsel Kerrier neb a wrussa dendil gober a £70,000 an vlydhen re naghas an ober drefenn na ylli y deylu movya dhe Gernow. An soedh yw rydh awos bos Geoff Cox owth omdenna a-varr rag selwel arghans dhe'n konsel. Y omdennans yw rann a assayans treghi kostow a £270,000. Dy Yow 14/3/02: Yma set a stampow dyllys an seythun ma hag y'ga mysk dew stamp gans skeusennow a borthow Kernewek. An rol a eth lytherdoll a diskwa Lannwedhennek ha Tewynn Pleustri a-dhiworth an ayr, keffrys ha tylleryow yn Pow Sows, Alban ha Kembra. Dy Mergher 13/3/02: Hwiloryon karregonieth re gavas pibenn brenn goth yn odyt ogas dhe Lannyust. Dell hevel, an bibenn veu angudhys gans tonnow bras ha hager awel. An hwiloryon a grys hy bos rann an system pompya a Hwel Hermon dhe Benn An Veyn (Porth Nanven) hag usys nans yw moy es dew kans blydhen. Lemmyn yma gwithys yn salow y'n gwithti Hwel Keveur. Dy Meurth 12/3.02: Yma gwikor dhiworth Lannyust yn unn jalenjya dhe'n system awos lagha nowydh na yllir usya baner Sen Pyran war blatys riv kerri. Milo Perrin a byw 'Just Cornish' y'n dre hag a werth an platys-riv ma kynth yns anlaghyl lemmyn. Ev a leveris dhe'n wiasva ma ev dhe wertha moy platys lemmyn drefenn aga bos erbynn an lagha. Menyster karryans ha esel an senedh Aberplymm-Porth Dewnans a leveris dhe Andrew George (e.s Porthia) na yllir usya marnas an baner Sen Jori, Albanek, Kembrek ha Baner an Unyans. Mr Perrin a vynn orth an governans y gemmeres dhe'n lys ha ri dhodho chons diskwedhes ass yw hemma lagha gokki. Dy Meurth 12/3/02: An poblek a yll gweles lemmyn furv an senedh kynnigys rag Kernow yn-dann an Konvenshon Korf Lagha Kernewek. Senedh Kernow a via digresennys yn tien, dewisys dre fordhow demokratek ha gans nerthow gul lagha. Y fia a-dro dhe hanter kans esel an senedh. An gwershon leun an paper ma a vydh lanchys dy Meurth 19ves mis Meurth. Kaderyer an Konvenshon, Bert Biscoe a lever, "Digresennans Rag Onan Hag Oll a worr war-rag an tybyansow a-varr yn kever pandra via an senedh ha pandra wrussa. Ni a wayt bos gorthyb dhe lies govynn." Rag pella derivadow, mir orth gwiasva an Senedh.