koth5

Dy Lun 29/10/01: Yma Karlo, Duk Kernow, y'n Ducheth rag dew dhydh. Hedhyw, yth esa ev war Hal Dart (rann an Ducheth) rag 50ves pennbloedh an park kenedhlek.
Dy Gwener 26/10/01: Korf den re beu kevys dhe'n Park Havysi Roskaradok ogas dhe Lyskerrys. Derivadow nyns yw sertan y'n eur ma mes an kreslu a dhrehedhas orth an Park 2:15 dohajydhweyth de wosa galow. Kemmerys dhe Glavji Derriford yw an korf rag hwithrans-wosa-mernans (post mortem). Nyns yw hwithoryon sur hwath mars yw po moldrans po heb gogrys. An skeusenn a-barth kledh a dhiskwa an park.

Dy Meurth 30/10/01: An benseythen us passyes Agan Tavas a synsys aga 11ves Penseythen Gernewek dhe Lan Ust. Grondyes a ve yn Ostel Wellington Lan Ust gans gol menestrouthy an nos Sadorn yn club Lyjyon Bretennek Ryal. Yth esa adro dhe 30 person ena. Lyes wharfos a ve restrys yn aga mysk; Helgh Tresor an dre hembrynkyes gans Craig Weatherhill, areth yn kever an Caskergh rag Cuntellva Kernow gans Andrew Climo, gwary byghan George ha Samantha gans Rod Lyon ha Deborah Bennetts ha de Sul yth esa copyans an gwary Radyo "Saw Un Mynysen". Bernie Braidley adhworth class Kernewek yn Ker Vrystol o an gwaynyer. Oll warbarth an Benseythen o sowyn dres eghen hag yma ysylly Agan Tavas ow predery adro dhe dhewheles dhe Lan Ust yn nessa bledhen. (meur ras dhe Ray Chubb rag an derivas)
Dy Lun 29/10/01: Yth esa yn lys lagha Miami hedhyw an den yn-dann wogrys a voldra Caroline Dickinson. Yth esa Francisco Arce Montes ena erbynn charjys erell. Mars yw rekordys plegyans ha'n kas resolvys, y fia chons a glerhe an fordh ragdho dhe vos dannvenys dhe Bow Frynk rag morldrans an vowes skol dhiworth Lannstefan. An servyas Spaynek, 51 bloedh y oes, yw toellys rag omladh ha ravnans Caroline yn ostel yn Breten Vyghan nans yw pymp blydhen. Hwithroryon y'n S.U.A a gevis bos kevrenn poran ynter y DNA ha DNA kevys y'n ostel.

Dy Meurth 30/10/01: Pennsevik Karlo, Duk Kernow, eth dhe Gernow hedhyw a-vel rann y dro an Ducheth. Yth esa ev yn Dinas rag dalleth a brojekt yowynkneth ena. Wosa henna, ev eth dhe Lannwedhennek rag kuntellyans a byskadoryon. Yth esens i yn Skol Vordrig yn-dann alow Rick Stein. Karlo a woslowas orth omserryans hag own a byskadoryon rag aga thenkys. Keffrys ha mos di, Karlo eth dhe'n Dhineythva Genedhlek Legesti. De, an pennsevik eth dhe Dhewnans rag tro Hal Dart. Yma rewloryon rann an Ducheth dres an Tamer ma ow solempnya 50ves pennbloedh an hal.

Dy Yow 1/11/01: Da lowr, ytho an nowodhow yw nebes diwedhes, mes yma skila. 21a mis Gwynngala 2001, kesva an PanKeltek a dhewisas a-dhiworth sonskrifow rag an kesstrif kan arnowydh. Nyns o possybyl y wul yn fyw hevlyna drefenn nag esa Goel PanKeltek awos kleves karn ha min. Kynsa o Kembra, nessa o Kernow, tressa o Iwerdhon ha peswara o Alban. An gan rag Kernow o "Ow mos tre" skrifys gans Rachel ha Tir Kemmyn. Warlyna, i a waynyas an kesstrif, hag arta an vlydhen ma, kesstrif Kan Rag Kernow dhe Pirate FM102 a dhewisas Rachel ha Tir Kemmyn rag unn vlydhen moy. Byttegyns, kesva an PanKeltek yn Kernow a vynn govynn rag daservirans an gwaynyer drefenn bos an sywyans mar ogas ha kudynnow gwirbryntyans.
Dy Mergher 31/10/01: An bennseythun yw passys yth esa synsys hwarvos-sayber. A-vel rann an hwarvos ma, bandow dhiworth Kernow a veu gwelys der an kesroesweyth a-hys an bys. Yma towlennow dhe wul moy. Red pella omma.

Dy Meurth 6/11/01: Konsel Kernow Gogledh re erviras iselhe charjow parkya y'n ranndir. Konseloryon a wrug an dewis drefenn bos hwans ri nerth dhe negysyow kresenn an dre ha havysi. Kynth bos prisyow tokynyow treghys, hwath, i a vynn ughelhe arghans dhiworth parkow kerri dre Ł130,000.
Dy Lun 5/11/01: Yma an kreslu ha'n tanlu yn unn hwithra dhe Skol Vowysi Truru wosa tan an bennseythun ma. An drehevyans nowydh rag dyski Sowsnek a veu distruys yn-tien. An wythysi gres a grys y vos dallethys gans drogoberysi. An tan a dhallathas dy Sadorn hag a loskas an lyverva hag oll esa ynni. An tanlu a dhiskudhas rann an leur leskys yn feur. Awos hemma, i a grys bos petrol deverys ena ha tan gorrys ynno.
Dy Lun 5/11/01: Kyns senedher Europ rag Kernow, Robin Teverson, a lanch 'Finance Cornwall' hedhyw. An projekt a vynn skoedhya negysyow byghan yn Kernow gans arghans Amkan Onan. Bri an projekt ma yw Ł20 milvil. Amkan Onan re worras rann vras an mona war-rag.
Dy Sadorn 3/11/01: Senedher rag Cambron hag Aberfal, Candy Atherton, a dherivas yn kever pandr'a hwer gans gwasonieth pystigow byghan y'n ranndir hedhyw. Y'n eur ma, nyns eus klynyk a'n par na yn na Cambron na Rysrudh. Ms Atherton a leveris bos kaskyrgh kavoes Ł100,000 rag drehevel unyt pystigow byghan dhe'n klavji leel yn Rysrudh.

Dy Gwener 9/11/01: Yma Konsel Kernow ow synsi kesstrif rag kavoes sin arwoedh nowydh rag arwoedhyow gell havysi. An sywyans ma a syw kaskyrgh hir a dus ow peyntya dhe-ves rosennow Dewdarek gans nammow du. Res vydh dhe dus dannvon aga thybansow dhe'n konsel erbynn dalleth nessa blydhen. Unnvereth Kernewek re leveris bos hemma kamm dha war-rag hag a wayt bos an baner Sen Piran dewisys avel an arwoedh nowydh y'n le a neppyth gokki kepar ha pasti!
Dy Yow 8/11/01: Dowr Soth West (sic) re ughelhas aga charjow der unn gans-rann hedhyw. Henn a wra yskynnans a-dro dhe dri hans peuns an vlydhen rag devnydhoryon gemmyn. Herwydh aga dyllans gwask, res o y wul awos laghys nowydh ha kostow a dreylya tus dhe vusurellow dowr. Kyn nag yw yskynnans mar vras es prederys, hwath yma sorr drefenn bos charjow dowr yn Kernow an ughella yn Breten Veur.
Dy Meurth 6/11/01: Yma Ertach Sowsnek ow profya tybyans gorra an Gorsav Norvys Goenhelghi war an rol a dhrehevyansow gwithys. I a vynn y wul awos gnas istorek ha pennsernethel an gresenn geskomunyansow. An dewis a vydh gwrys gans Pennskrifer an Gonisogeth. Devnydhys veu rag keskomunya rag an kynsa prys gans 'Telstar'. Goenhelghi yw perghennys gans BT.

Dy Sul 11/11/01: Hwithransow nowydh a dhiskwa bos marnas 21% an argh Amkan Onan settys a-denewan rag projektys. Henn yw Ł67 milvil yn unnik. Nans yw diw vlydhen, Kernow a waynyas moy es Ł300 milvil rag gwelhe studh an Ducheth, byttegyns, nyns yw marnas Ł5 milvil spenys hwath. Ordenoryon an fond a lever bos meur an argans spenys kyns es pell gans nebes projektys pur vras. Mes, yma own dhe bennow negys bos an arghans kellys mar nyns yw gorrys a-denewan yn skon, ha'n argh gesys a vydh dastannvenys dhe Brussels.
Dy Sul 11/11/01: An kaskyrgh rag kov dhe Dhavydh Balhatchet a bes, mes lemmyn yma lies tu dhe'n argyans ow tos ha bos apert. Y hevel bos unn skila rag nagha gorra kador war an als yn kov Davydh yw hwans gwitha an alsyow na glan a daklow gwrys dre dhorn mabden. Moy omma.