koth7

Dy Meurth 11/12/01: Konselloryon Kernow re wovynnas rag moy alowans arghansek. Bys y'n eur ma, yth esens i ow kemmeres Ł6402 pub blydhen rag aga ober a-barth an konsel. Byttegyns, an mona nowydh a vydh Ł9251. Herwydh kannas an konsel, res yw tylli arghans an par na rag kavoes tus abel lowr a-vel konselloryon.
Dy Lun 10/12/01: Den a vri Aberfal, kaskyrghor ha bardh Kernewek re verwis. Ron Williams a verwis dy Yow yw passys. Ron Williams o aswonnys yn ta y'n dre rag y ober abarth Klub Yowynkneth Aberfal, mes ev a oberi rag kemmys kowethasow leel, Kernewek ha treuswlasek ynwedh. Ev a vydh kovhes rag degblydhynyow a ober diwysek ha lel. Ev a skoedhya bagasow leel kepar ha'n Gowethas Polyteknek Kernow Ryal, Gwarioryon Mummer Myghtern Karlo, Klub Gwerin Aberfal, An Gowethas Gwitha Troe'lerghow... ha lies erell keffrys. Ev a oberi yn lel ynwedh rag lies kowethas Kernewek politek, gonisogethek dre dhyski an taves, oberi rag Mebyon Kernow ha mos dhe goelyow ilow ha dons yn powyow Keltek erell. Yn y yowynkneth, ev o donsyer splann dres eghenn gans les-hanow 'Whizzo Williams'. Nevra ny wrug an konnykter na y asa ha pur a-vri dhe Lowender Pyran gans bagasow donsyer kepar ha Ros Keltek and Cam Kernewek. Kynth o prowt a'y Gernewekter, pur dhe-les dhe Ron o hwarvosow a'n bys. Y vywnans dres Nessa Bresel an Bys a ros dhodho aswonnvos ha kerensa tynn rag an dus a Balestin. Kekeffrys ha henna, esel CND ova ha skoedhyer Amnesty International. Wosa dioberans a'n negys drehevel, ev a spenas meur a dermyn gans y deylu methrek Bretonek. Mis Me hevlyna, lies koweth Kernewek ha Bretonek a omguntellas rag kevywi sowthanek rag y bennbloedh 80ves. Y gorf a vydh leskys dy Meurth 18ves dhe 14:00 dhe Ji Leski Pennmenydh, Truru.

Dy Mergher 19/12/01: Porthynys yn Kernow West a borthas kov an droglamm skath sawya Pennlegh hedhyw. Nans yw ugens blydhen, 16 den a'n dre veu kellys yn unn assaya selwel kriw a'n Union Star.
Dy Lun 17/12/01: Tri den re beu kemmerys dhe Glavji Trelysk wosa pychyans yn Truru. Herwydh derivasow, yth esa an hwarvos ma yn Fordh an Gorsav dhe unn eur dohajydhweyth hedhyw. Unn den yw yn studh pur dhrog y'n klavji. Yma'n dhew erell yn-dann dhyghtyans an vedhygyon ynwedh. Unn den re beu kemmerys gans an kreslu.
Dy Sul 16/12/01: Benyn 20 bloedh hy oes re verwis yn droglamm war an A38 dhe Vosvenegh nos Sadorn. Yth esa an venyn dhiworth Sen Ostell a'y esedh y'n gador dhelergh. Dew dhen arall ha'n lywyer veu kemmerys dhe Glavji Trelysk yn Truru gans pystigow byghan.
Dy Sul 16/12/10: Kescana ha Pyba re dhellos sidi a garollow Nadelik, henwys "Nadelik" gans kanow yn Kernewek ha Sowsnek, ha menystrouthi gans telyn Geltek, tollgorn ha pibow. Gwiw yw rag ro diwettha mynysenn hag y hyllir y gavoes dhiworth www.cmp.kernow.eu.org.

Dy Gwener 14/12/01: Yma esel an senedh rag Truru ha Sen Ostell, Matthew Taylor, yn unn ynnia dhe Dony Blair ri piwas kolonnekter wosa-mernansek dhe Rick Rescorla. An gwithyas salowder ma a ganas kanow Kernewek hag ev o selwel milyow a dus yn Kresenn Genwerthek an Bys mis Gortheren. Mr Taylor a leveris: "kolonnekter Rick Rescorla a weresas meur a dus hag i ow tiank an drehevyans." Y'n eur ma, yma tus yn Heyl ow prederi yn kever sevel kovmen dhodho yn y dre enesik y honan.
Dy Gwener 14/12/01: An goelgi dowr re ros dhe Dhowr Soth West (sic.) kummyas ughelhe prisyow dowr. An gowethas a vynn y wul awos bos meur a dus owth usya musurellow.
Dy Mergher 12/12/01: Nans yw kans blydhen hedhyw, Kernow a gemmeras le yn istori teknolojieth. An jydh ma, 1901, Guglielmo Marconi a davethlas an kynsa sinel radyo a-hys an Atlantek dhiworth Polldu war an Lysardh dhe Newfoundland. Solemnyta yw synsys hedhyw dhe Bolldu, le may fydh an kethsem messaj dannvenys dhiworth Kernow dhe Ganada. Rann an messaj a vydh negys dhiworth myghternes Pow Sows. Yma Pirate FM102 ow tavethli hedhyw dhiworth Polldu. Ewgh omma rag moy skeusennow a Varconi ha Polldu.

Dy Yow 20/12/01: Nans yw ogas ha 3 blydhen, ober a dhallathas rag ledanhe an pons neb a dhre a-ji ha doen dhe-ves a Gernow 40 mil karr pub dydh. Ł34 milvil peuns veu spenys war an projekt ma. Res o gul an krevheans ha ledanheans ma avos niver a gerri owth ynkressya ha rewlys nowydh dhiworth Ewrop rag kertow bras. Lemmyn, an pons a yll perthi lorri a 40 tonnas. Kynth esa an pons gwithys yn igor ogas hag oll an prys, hwath yth esa lies daromdag. An oberysi a berthas meur a galetter keffrys awos hager awel an kynyav yw passys. Kynth yw igor yn tien an pons lemmyn, yma moy kudynnow ow tos. Dhe benn 2002, ober a dhalleth war grevheans ha nowydhans kowfordh Essa. An hwel na a wra pesya rag hanter blydhen.
Dy Yow 20/12/01: Daswel an RAF re leveris na vydh RAF Sen Mawgan degeys. An nowodhow ma a vydh ro Nadelik da rag negysyow a'n ranndir neb yw skoedhys gans an selva ma. Byttegyns, hwath nyns yw salow an gwasonieth Hwil ha Selwel neb yw selys ena.
Dy Mergher 19/12/01: Towlow dhe gesya Awtoritys Yeghes Dewnans ha Kernow yw yn-dann omsettyans hedhyw gans esel an senedh Truru ha Sen Ostell, Matthew Taylor. Ev a leveris aga bos sham hag a gemmer an nerth ervira dhiworth an wodhevysi. An tybyans yw rann a bolisi Breten Veurek neb a wra gweles Dorset yn unn gesya gans Gwlas an Hav ynwedh. Byttegyns, dell grys Konsel Yeghes Kemmyniethek Kernow, an dasfurvyans a wra dhe'n gwasonieth moy akontadow.

Dy Sul 6/01/02: Selwyans an gorhel "Willy" a dhallathas hedhyw, mes an ober a ylli kemmeres deg dydh dh'y wul. An tanker ma eth ha bos stagys war dreth ogas dhe Borthmyghtern yn Kernow Est Dy' Hala Blydhen. An droglamm ma dhe 22:45 1a mis Genver a worras own y'n dus trigys yn ogas awos bos possibyl an tanker dhe dardha. Pymthek den ha tri ugens a asas aga chiow an nos na, ha kriw an Willy, 12 anedha, veu kemmerys dhe-ves. Yth esa own a dardh kyn nag esa meur a oyl disel gesys ynno. An diwettha 80 tonnas a vydh removys ha sygerans dowr kevys kyns bos possibyl dasneuvella an gorhel.
Dy Meurth 1/01/02: Rag termyn hir marners an Tamer re borthas own a dhos ha bos stagys war dommennow tewas y'n avon ma. Yth esa owv bras y hallsa hwarvos dhe is-skath nuklerek. Byttegyns, an droglamm ma yw hwarvedhys lemmyn dhe danker. Difolans owyl yn Tamer yma ow lesa unn gilometer dhe-ves. Gwynn agan bys nag o an 'Willy' leun a oyl. Diskargys veu marnas dew dhydh kyns an droglamm. Heb mar y fydh lies govynn lemmyn yn kever salowder a worholyon y'n avon ma ha fordhow dhe wul taklow moy saw y'n termyn a dheu.

Dy Meurth 8/1/02: Esel senedh Loundres rag Porthia, Andrew George, a synsas dadhelva hedhyw yn Chi an Gemmynyon yn kever karryans ha hyns horn yn Kernow. Ev a lever nyns o ev pes da gans gorthyb an governans a-dro dhe dhegea pons hyns horn war an Tamer an Pask ma. Keffrys ha henna, Mr George a vynn kavoes moy arghans rag an hyns horn dhiworth Amkan Onan.
Dy Meurth 8/1/02: Yma an gowethas neb usi ow trehevel an Marks ha Spencers nowydh yn Truru yn unn assaya diskudha prag y koedhas pannel-men, 8 tonnas y boester, dhiworth an drehevyans dy Lun. Nyns esa denvydh shyndys. Soedhogyon Yeghes ha Salowder a wra hwithra an kas.
Dy Meurth 8/1/02: Studhyans nowydh a lever bos spas rag seyth milvil chi nowydh yn Kernow war barkow gell. An derivas ma veu gwrys yn unn assaya selwel parkow glas dhiworth drehevyoryon chiow. An kethsem studhyans a lever bos spas rag hwetek kans chi moy war barkow gell dres an nessa pymthek blydhen.