29/9/2004 - Star2 Course

今日既Star2 course終於多d機會落艇玩啦... 兩個人一架艇... 不過呢, 教練姐姐就用左個好有趣既方法分組, 就係男仔一字排開, 跟住d女仔自己揀一個男仔做partner, 十足十選秀女(而家係仔)... 話可以有個男仔幫手搬野, 唔使咁辛苦喎... 但係搬艇就係咪都係男仔搬架啦... 我覺得係睇金枝玉孽睇到上腦呀... 不過都無所謂啦, 最緊要有得玩...

lunch去左禾輋食, d舊人勁勁大食呀... 痴線... 佢地話我地遲早都會咁 (如果玩落去的話...) 至於我地一班新人, 個樣就仲呆過land train之後...

收艇時... 我做左樣騎呢樣衰既事... 就係響度玩船仔... :P

攪掂, 出黃金買返個架黎上住個HD, 唔用個mobile rack啦~~ 有檔賣accessories既執笠... 佢d口號出位到... 開業"十九廿年", "買野送女sales上門, 不過只限年青女顧客..."

P.S.: 肥仔, 生日快樂 ~~ (雖然timing...)

28/9/2004 - 休息...

今日... 中秋佳節, 都係響屋企休息下算... 衝左兩日assignment, 聽日仲要划艇...

27/9/2004 - 爆肺日...

科大既新生都要上HTLH001既PE course, 我揀左攀石, 今日第一日上堂... 教左最基本既野, 即係點樣戴條安全帶, 點樣打結, etc... 相反無教到要點爬... 但係, 第一日依然有機會爬喎... 響臨落堂前, 一個做爬, 一個響下面做protect... 我stupid左... 我揀左做爬 0個個... 大家都係新人, 我上去會失足就正常, 預左... 但係如果下面 0個個失手, 我就真係訓街... 一爬, 發覺都唔難, 一路記住三點就ok~~ 最驚就係佢叫我做Fall - 即係放晒手彈出黎... 我真係驚下面拉我唔住, 尤其係我同佢地體重比例... 我會擰轉頭, 睇下佢地係咪真係準備好晒先囉~~ 好... 真係彈出去, 又幾過癮喎... 爬完, 到我做protect就輕鬆囉, 我既體重實拉得佢地住... 爬完兩個鐘, 好玩, 但係小弟側邊位置就好痛...

夜晚, 繼續Land train... 尋晚訓得兩個鐘, 而家要train兩個鐘... 真係暈咁濟... 我d喘氣聲, 大到跑我前面既人都聽到... 鬼咩, 用追巴士既速度跑二千, 但邊有人追巴士追二千架... 相反, 上半身既操練我就覺得小得濟... 似乎都係我心肺功能太差...

26/9/2004 - 唔好睇小...

我乜數都唔識計, 唯一最叻就係Probability... 但今次, 真係比COMP171既random problem玩死左... 救命...

25/9/2004 - 划艇...

入左划艇Soc, 今日終於去城門河上Star1 course啦... 個教練都係前科大人... 估唔到第一日都有得落艇... 爽~~~ 如果划水划得應, 輕輕一下都好去... 如果有機會操大隻d, 坐8人艇, 8個人既力加埋, 一定爽到爆... 不過講開8人艇, 我今日落水時轉彎失控, 攪到要同架8人艇紏纏... 佢叫我駛返入航道, 條航道佢又霸住左, 咁我駛去邊...

24/9/2004 - 直踩...

今日正正式式, 9點踩到6點, 中間得一個鐘早餐時間... 下晝主要都係做ELEC既lab, 入到個lab, 莫講識得, 連認得既人都無... 局住單挑... 但過左一陣, 有個小妹妹入左黎, 佢d frd又分晒組, 佢就被迫同我一組了... 辛苦晒...

P.S.: Rita... 生日快樂...