| 2002/09/01 |
各位朋友，我返嚟啦！今日已經係呢個九月一日啦，聽日就要返學啦。讀書的朋友仔準備好未呢？ 由於今次要更新的歌曲實在太多啦，所以逼於無耐，唯有去其他地方借歌啦。(因為空間有限嘛。)所以，今次有大部分的歌曲均來自boxup嘅。由於佢個server係有限制，所以同一時間同一IP可能唔可以登入多次。所以如果佢話俾你聽connect唔到，不妨試多次又或者稍後再試。不便之處，敬請原諒。 今次返大陸，原本都玩得幾好嘅。但係可惜係最後嗰幾日，病鬼咗，終於都要日日瞓係張床度啦。好慘！唉。 最唔扺嘅係，返去嘅頭幾日，日日都有人請食嘢。咁就無去食自己鐘意食嘅嘢，到無人請食嘢嗰陣啦，喉嚨又痛啦，之後又發燒啦，流鼻水啦等等一連串問題又嚟喎。唉！我最鐘意食嘅牛腩粉啊，牛雜啊，炒塘螺啊，全部都無得食啊。唉！好慘！好慘！尋日原本又約咗人去唱K架喎，點知病重，結果搞到大家都無得去。因為原本都無乜人去，再加上我都唔去埋，所以就無去囉。今日，終於有小小好轉啦，不過好似有啲痰。即係都係未好返啦！開學嗰日，即係聽日啦，祇係返兩個鐘，咁去唔去唱K好呢？ 係我返大陸嘅呢段期間，原本用緊嗰個計數器嘅公司唔再提供呢個服務，唉！搞到我依家都唔知有幾多人嚟過。唔知有冇人記得呢？我由零再計過好定係由四萬幾計起好呢？唉！大家俾下意見啦！不過最大嘅問題，係我依家都未搵返一個合適嘅計數器，各位有乜好推介呢？ 最近收到幾位網友的來信，先多謝佢哋嘅來信。其中一位網友提議將中文歌曲中的歌分開男女歌手，方便點播。但因為網頁寄存空間容量的問題，內裏的歌曲會作定期的閂除。所以，睇下日後嘅情況係點先啦！多謝呢位朋友的意見。 好啦！暫時都叫做完成咗一部份更新工作啦！餘下嘅有時間先搞啦。如果仲未有你想要嘅歌，不妨等下，又或者去留言版話多次俾我聽啊。 今日更新︰ 中文歌曲︰ 李克勤 - 花園街的流星 梁詠琪 - 我住七樓A 容祖兒 - 說真的 容祖兒 - 我的麻煩男友 容祖兒 - 四面台 容祖兒 - 早有預謀 陳慧琳 - 好時光 梁詠琪 - 漫畫女王 盧巧音 - 很想當媽媽 黃伊汶 - 鬧劇 Twins - Ichiban興奮 Twins - 人比人 陳奕迅 - 明年今日 陳文緩 - 天使情歌 李蘢怡 - 夜遊杜拜 林憶蓮 - 紙飛機 古天樂 - 男朋友 鄧麗君 - 我只在乎你 容祖兒/天使阿藍 - 落入凡間的天使 梁奕倫/范振鋒 - 喊濕枕頭 K歌更新︰ 梁詠琪 - 家有小熊 李蘢怡 - 夜遊杜拜 葉文輝 - I Believe 李克勤 - Victory Cookies - 心急人上 容祖兒 - 全身暑假 陳奕迅 - 明年今日 梅艷芳/鄭秀文 - 單身女子 容祖兒 - 隆重登場 楊千嬅 - 慳D |
| 2002/08/22 |
又再因為某一啲特別的原因，版主又再次係今日返咗大陸啦！都係嗰句啦，就算我唔係香港，大家都要多多支持啊！我返到嚟就即係作出一次重大的更新，將你哋要嘅嘢放晒上去。 請各位繼續多多支持本網站啦！ |
| 2002/08/16 | 各位喜歡Music
Dream Works音樂夢工場的朋友，我返咗嚟啦。今次大陸之旅，原本都買咗幾隻CD嘅，不過最後都係無攞返嚟。不過心情就好咗好多囉！HEHE ^.^ 今次返到去鄉下，有一樣小小的發現。事緣，我鄉下雖然唔話得係真係好偏僻，但係民風都算幾樸素嘅地方，基本上係無乜大型連鎖店，商場等等，祇有一啲做下街坊生意的士多仔。係鄉下的某一處地方，安裝了一個長方形的白色鐵盒(我唸都有好耐歷史下)，單從外型嚟睇，都幾似一個自動紙巾售賣機。基於佢係安係一個唔多人留意嘅地方(其實又唔可以咁講嘅，不過我唸都無乜人會好似我今次咁無聊去睇清楚佢係乜。)，所以一直以來，我都祇係以為佢係一個普通的爛鐵盒。(因為嗰度唔係公廁，無理由會有自動紙巾售賣機架。)但係今次走埋去睇下，哦！有一個投幣孔喎，嗰一刻，我真係以為佢係一部紙巾售買機，睇真啲字？嘩！真係出乎我意料之外囉！原來佢唔係紙巾售賣機，而係一部Condom售買機囉。噢！噢！我的家鄉唔再係我以前認識的家鄉啦！ 由於某些特別的原因，今日未能對歌曲作出新，所以想點歌的朋友，就記得快啲去點啦！好快就可以幫你放上去啦。 |
| 2002/08/09 |
今日終於都可以返大陸啦！近日來的一連串唔開心事，都要係呢幾日忘記晒佢。北上尋歡嘛，一定要盡歡而回啦。但係係我走左的呢段期間，你地都唔好唔記得嚟留言支持下。 呢走的前一刻，送返首莫札特的弦樂小夜曲俾大家欣賞下，不過唔知有冇人係鐘意欣賞呢啲古典音樂嘅呢？ 好啦！我哋大家稍後再見啦！ |
| 2002/08/04 |
係想update呢個網頁之前，有好多嘢想講。但係到咗真係要寫出嚟嗰陣，又唔知道點寫喎。 網頁內播的呢首歌，同樣都係點俾san san妹妹聽嘅。因為嗰日有太多太多嘅嘢壓逼係我身上啦，一時控制唔住，發咗佢難渣。如果首歌名係叫做妹妹，對不起，咁就更加好啦。 或者近期自己真係好煩惱。我唸都係時候要俾自己去泠靜一下啦。係呢個冷靜之中，尋找回昔日孤獨及Cool的自我。所以呢個網頁或許會閣置一段時間唔update啦！或者之前Ming Ming講得啱，應該將佢改做網主月刊。^.^ 係臨走的一刻，係呢度有一句話要講︰無論係友情或是愛情，當佢係你認為係最好的一刻，就唔好再貪心，去追求更好。因為，當呢段關係出現裂痕，想要回覆到往昔的哪一刻，唔係人人都做得到架。熱戀的朋友，知心的死黨，好好去珍惜你地依家所擁有嘅嘢啦！ 雖然暫時係唔作出更新(或者有日心情大好，都會update一下嘅。)，但係請各位支持開本站的朋友繼續多多支持，亦請多多留言。謝謝！ 今日更新︰ |
| 2002/07/30 | 一個月話都無咁快就過去啦。先前的打算到依家依然無一樣係實行咗嘅。唉！算啦！一切都係無望架啦。
San San妹妹近期又面對一啲煩惱。作為一個局外人的我，正如Ca Ca妹妹所講，係唔應該插入呢件事嘅。(雖然我一直都知呢件事的發展，但都係留返俾當事人去解決啦。)San San妹妹所講的感覺，佢話祇有Ca Ca妹妹一個人先會明白，所以，我都要搵日去研究一下。現在嘅我，就真係乜都做唔到啦！希望佢唔會好似以前咁啦！快啲咁去解決咗呢件事。因為近日已經好難再係佢面上搵到往昔燦爛的笑容。唔知係咪因為呢件事定係有其他事呢？嗯！見到妹妹咁，做哥哥嘅都好 唔開心架。係呢度，送一首歌俾妹妹聽，呢首就係各位進入網頁時聽到嗰首啦。知道係乜歌嗎？ 今晚就發生左一件幾奇怪嘅事囉。平時我幾唔得閑嗰陣，ICQ就有好多人搵我。但係當我今晚乜都做唔到嘅時候，(CDROM Upload緊嘢俾人，自己又download緊嘢，卡通同戲又睇完，乜都無得做。)係居然無人搵我架囉！真係有啲好寂寞的感覺。嗯！好耐都未試過有呢種感覺啦。唔通今日係乜大日子，所以………七月三十日？係乜大日子呢？完全唔知。 原本尋日就係返大陸嘅，但因為某啲原因，日期又改咗去呢個八月九號。(唔知到時會唔會再改呢？真係好難講啦，皆因某某人平時都好鐘意隨便講嘢架啦。)如果到時候日期真係再改，我地一唔一齊返去好呢？唉！真係一個好難的決定。 呢個暑假有好鬼死多戲想睇，真係睇到好鬼死窮。先前就睇咗呢個M II B，我左眼見到鬼，之後又想睇呢個狗狗震，同埋一家之鼠II喎，跟住有人又話呢個天脈傳奇都唔錯喎。嘩！真係有好多戲想去睇。不過都唔知搵乜人陪好，自己一個人睇戲，好鬼死悶架嘛。所以，假若閣下想去睇的話，不妨講聲，或者大家一齊去睇會開心啲呢！ 係啦！突然間唸起一件事，早前有個朋友話俾我聽，一個叫Ting Ting世界的網頁內，連結了我歌曲的Link。不過講真嗰句，我都唔知呢個Ting Ting係邊個啊！係要link都話聲俾我知啊，我要計算流量架。 我個留言版好少人去留言啦！如果各位係呢個Flash留言版畫畫高手，不妨去畫返幾幅啊。唔好成日都剩係得啲廣告啊。真係有啲無奈，搞到都無乜心情Update，再咁落去，遲啲真係會變咗做廣告版。 好啦！今次的update係純粹因為有啲悶，係悶到有啲傻咁。之後有個朋友叫我寫下日記，所以我就嚟寫咗以上嘅嘢啦！至於其他人所點嘅歌呢？下次先為你地送上啊。 |
| 2002/07/13 |
今日係暑假嘅第一日，各位唸住係呢個暑假入面做啲咩呢？做暑期工？讀書？定係好好咁去玩呢？如果你嘅決定係去玩，咁係去玩之餘，唔好唔記得嚟支持一下我哋個網站啊。 |
| 2002/07/07 |
今日係一個好朋友嘅生日，係呢度祝佢生日快樂先！ |
| 2002/06/29 |
事情都算告一段落。係呢幾日嚟，多謝大家嘅關心，真係好多謝晒。 |
本網站所提供的歌曲以及K歌音樂，祇供閑時娛樂，並不提供下載。
© 2001-2002 Music Dream Works. A member of OCYL
Workgroup.