隨心說

16/03/02   

第一章 - 死亡?!

人始終要死... 究竟是否長壽才叫有福呢?

上星期, 我有一個親戚過身, 令我一直在想, 如果一個人有不治之症, "安樂死"是否一種解脫呢?

我就最怕生離死別的場面,自從那天起, 在醫院所發生的情景, 在腦海一次又一次飄過...

前兩天, 在"明珠台"看了一個特輯, 說很多美國人死後希望留下自己的頭雪藏於極低溫之下, 希望科技有一天可以令他的頭再接駁在別一個身體上,之後重生!!

哈... 竟然每日在報紙上看見有人自殺, 放棄生命, 而另一方面, 又有人千辛萬苦希望有一日可以重生, 你看人類多矛盾!!

18/03/02 

第二章 - 鸚鵡

舅父買了一隻新鸚鵡, 又收養了一隻"愛情鳥", 兩隻大小鸚鵡極跟人, 喜歡企在人的手上, 什得人歡心!! 可是另一方面, 舅父的舊愛"非洲鸚鵡",便可憐了!! -- 失寵了...

人真的這樣貪新忘舊和善變嗎? 新的真的比舊的好嗎? 但最重要的是新的東西始終也會有變舊的一天, 被拋棄於是便是理所當然?

原來所有人也會貪新忘舊, 也不是女人才善變!! 幸好... 至今我依然固我, 念舊非常!!! 哈... 真的是個好優點

08/03/02 

第三章 - 小丑?!

今日唔開心...

但我發現原來我係唔可以係其他人面前表現出我唔開心, 當我阿媽今日放工返到屋企之後,見到我唔開心問我做乜事, 你知啦, 當一個人唔開心就緊係唔想人煩架啦, 點知竟然佢即刻嬲... 原來我只可以人前表現開心, 只可以對人歡笑背人愁...

原來我係小丑....

人一定會有七情六慾, 一定會有開心同唔開心既時候, 點解唔可以表現於人前呢? 真奇怪...

唉! 我唔想做小丑, 我只想做一個平凡人...

24/03/02 

第四章 - 心軟...

我從來都認為人係會心軟既動物... 但原來係錯架!

我承認自己係一個心軟既人, 我從來都經唔起人地既要求... 每次只要人地將自己既希望同我講, 可能講一次兩次我都唔應承, 但係到第三次我一定會心軟應承... 好似屋企人要求我陪佢地去某D地方, 就算我買左飛睇野都會唔去, 又好似朋友問我借錢, 如果我有既話, 我會好蠢咁借比佢, 又好似有人好希望得到一份好貴既禮物, 我諗都冇諗過就簽咭買左, 到收到月結單既時候先有苦自己知... 所以我以為自己咁做係一個正常人所做既事而已...

可惜依家我發現... 傻既只有我一個, 原來對人好人地唔係應份對番你好架, 又原來你付出左好多亦唔係一定可以收番咁多架, 什至乎係會一無所有...

原來對人自私D, 自我保護一D先唔會唔開心, 先至唔會比人蝦... 做到咁又有乜意思丫?

06/04/02 

第五章 - 北京... 放假!!

不經不覺我既"北京之旅"又完結左喇, 4日遊北京又的而且確唔係幾夠!! 有好多地方都因為唔夠時間而無去到... 下次啦!!

呢幾次去旅行去完返黎都病, 咁究竟我算唔算有放過假休息過呢?? 好邪呀!!

快樂既假期就咁就完結喇, 要等到5月頭先再有假放, 唯有... 等... 寂寞到夜深...

08/04/02 

第六章 - 長假期後後遺症

人始終要面對現實, 可惡既星期一又到喇....

唔知係唔係今個假期玩得太開心, 琴晚竟然搞到3點幾先訓得著呀!! 之後又係6點幾醒左.... 於是乎今個星期一我就染左呢個"長假期後後遺症"喇!!

呢個症狀係會手軟腳軟, 雙眼發光同腦一片空白, 不過唔緊要, 只要我今晚早D訓, 呢個病聽日就會好架喇!! 努力.... 訓呀!!  

10/04/02 

第七章 - 好友

今日同一個久別左好耐既朋友食飯, 佢已經好幾年冇返香港喇!! 今日餐飯食得真係開心...

可惜既係有2個朋友唔可以出值, 1個因為身處大陸工作, 另1個話因為要趕功課喎... 唉! 人地好日都唔返香港, 而飯你日日都要食架喇, 其實又阻你幾多時間丫!

由呢件事就知道究竟大家對呢份成10年既友誼既諗法, 自問對朋友好好, 好念舊... 但原來有人一D都唔珍惜架!! 可惜可惜...

21/04/02 

第八章 - 大日子

今日係小女子 2X 歲大壽, 竟然竟然D同事&舊同學唔記得, 實在太太太過份喇!!     ( 哈... 講笑乍, 邊有咁少氣!! )

已經2年冇切"壽飽"喇, 唔知今年有冇呢? 友人巳經送左隻我恨左好耐既"大頭洋娃娃"比我, 好開心呀!! 但係我又老1年喇, 過左今年去歐洲旅行已經唔當係youth喇...

今年希望可以儲夠錢再去歐洲, 個朋友仔快D還錢, 豬腩肉離"家"出走一去冇回頭, 同日日開開心心冇嗌交!!

11/05/02 

第九章 - 走佬?!!

小女子屋企原有1位工作超過4年既"外籍傭工", 上個月頭佢突然話屋企有急事要返菲律賓一轉, 之後一直音訊全無, 亦因我地冇佢電話, 所以一直聯絡唔到佢, 生死未卜...

我老媽子就厲害喇!! 竟然比佢亂打亂撞之下知道左佢屋企電話, 於是我地就急急打電話比佢, 第一日係依然聯絡唔上...

第二日再接再厲, morning call... 終於係佢走左1個月零3日之後聯絡到佢喇, 佢竟然話唔會返香港, 大佬呀... 唔做都通知聲丫, 等我地早D請過第二個人替你丫, 你話丫呢D人幾冇交帶, 激死!!

12/05/02 

第十章 - 下雨天

雖然覺得天氣好熱, 希望可以落下雨等天氣冇咁熱, 但洗唔洗又係星期日落呀!

原本今日約好友人下午行街街, 但因為呢個衰天氣令我友人出爾反爾, 於是各自在家"修行"... 可惜屋企烏蠅都唔多隻, 所以我悶到發霉... 好可憐而且非常唔開心!

唉... 近來我樣樣事都唔多順利, 工作啦戀愛啦... 莫非我今年牛一冇切壽飽許願所以令我咁?? 邪...

我真係好想養隻寵物去陪下我, 等我唔開心或者好悶既時候都唔洗孤伶伶一個面對丫!! 可惜我戰勝唔到屋企人令佢地可以贊成我咁做, 我會努力...

30/06/02 

* 回顧

不經不覺原來有成個月冇理個網, 太懶喇!!

呢個月發生左好多事, 我養既2隻雀仔不幸去世, 非常傷心! 原本安排好既泰國之旅,係臨出機票之前, 胎死腹中, 非常失望!! 原先一個美好假期就咁白白就冇左...

點解咁多唔順利? 之前原本計劃好7月頭放假, 點知比個同事一句唔該都冇就請左個幾日假, 仲同我地講"請4日放9日之嘛, 咁少去得邊!!", 真係激死!! 明明我一早已經同佢地講左我會7月頭放假, 佢竟然可以扮乜都冇講過? 真奇!!

算啦, 人生係咁多不如意架喇, 希望在明天啦!! 仲有希望個天生生性性, 唔好再咁熱喇, 我就快溶喇~~

04/07/02 

* 祝您愉快

我同阿妹最錫既心肝頂鸚鵡仔 - 小魔怪, 今日無端端咁離開左我地, 今次比上次更更更傷心!! 佢實在太可愛, 而我地實在太錫佢!! 點解就咁就離開丫?? 我地一齊唔係明明好開心好幸福架咩?? 點解個天要分開地丫??...

雀死不能復生... 希望你係天堂可以同公主, 久兵衛一齊永遠幸福快樂... 幾個寶貝記住要乖乖聽話, 祝您地一齊愉快...

16/07/02 

* 悶!!

原來放假冇野做係勁無聊!! 但d假期又唔可唔放(無理由益公司o者!!) 友人原先話今日同我上深圳玩, 可惜佢又突然有野做, 於是行程取消! 乜今次放假咁多阻滯?

屋企隻新成員 - 陳仔開始學飛! 佢始終都唔係幾跟我地, 一見到手就會"大逃亡", 究竟有乜方法可以令佢親我地多d呢?? 真係一個謎!!

雙眼既病好似好得七七八八喇, 求神拜佛希望唔會翻發! 食藥食到驚呀!!

28/07/02 

* 無發展

係呢間公司不經不覺已經做左2年幾, 對呢份工作開始失去興趣, 覺得做到無晒意義! 每日既工作千篇一律, 又唔可以放長假休息放鬆一下, 咁做法又有乜意義呢?

好想轉工! 但係呢個環境, 轉工又好似好冒險, 唔轉我勉強做落去我又唔開心, 究竟應該點做先正確呢?

陳仔依然唔跟我地, 算啦我放棄喇! 而且佢依家有隻老婆仔 - 豬豬, 大個仔唔要我地喇!