Bikar2_umfjollun

Umfjöllun um leiki í 8 liða úrslitum.
TR-a - Hrókurinn:
Þetta verður án efa mjög spennandi viðureign.. Þar sem A lið Tr er skipað eldri mönnum þá held ég að mjög jafnt lið Hróksins vinni nauman sigur !
-Davíð Kjartansson

Hefur alla möguleika á að verða spennandi. Ljóst er að Hrókurinn hefur sterkum mönnum á að skipa og trúlega verða TR ingar ekki með sitt allra sterkasta lið. Ef Hrókurinn nær að manna liðið einhverjum útlendingum tel ég sigurinn þeirra en spái að svo verði ekki og TR hafi þetta á seiglunni. Benni Jónasar virðist td. í feikna formi þessa dagana. Þetta er lengjuvænn leikur og gæti boðið upp á óvænt úrslit, en mér skilst að ekki sé víst að leikurinn detti þar inn vegna tregðu manna á að koma sér saman um leikdag.
-Páll Sigurðsson

TK - TR b
Hérna held ég að heimavöllurinn skipti litlu máli þar sem geta liðanna er of mikil. Ungu strákarnir í TR eiga eftir að vinna nokkuð örugglega þó að TK eigi eftir að klóra í bakkana og veita þeim harða keppni.
-Davíð Kjartansson

TV - SA
Norðanmenn hafa á að skipa gríðarlega jafnri sveit, vinna góðan útisigur á skemmtilegu liði TV sem hefur á að skipa dyggum stuðningsmönnum eins og ávallt í bikarleikjum!
-Davíð Kjartansson

Hellir - TG
Án efa leikur umferðarinnar. Hellismenn hafa á að skipa 4. stórmeisturum og eru til alls líklegir í keppninni en TG ingar eru keppnismenn miklir og gefast ekki upp fyrr en í fulla hnefanna. Ég spái því að þetta verði tvísýnt og fari í framlengingu þar sem Hellismenn merja sigur!
-Davíð Kjartansson

Umfjöllun um leiki 16 liða úrslitanna auk forkeppni:
KR - TR b:
KRingarnir:
Eru gamlir jaxlar sem ekki ber að vanmeta. Þar innan um eru menn á borð við Gunna Gunn sem getur unnið hvern sem er í B-liði TR þegar sá gállinn er á honum. Enda fyrrverandi Íslandsmeistari á ferðinni. Sumir í sveitinni eru með langa reynslu að baki
og geta náð punktum með einhverjum gömlum heimabruggum sem ungu mennirnir þekkja ekki enda sumir ekki fæddir þegar bruggið kom til sögunnar.
TR B-sveit:
Sennilega verða þetta Jón Viktor, Arnar Gunnars, Bragi Þorfinns o.fl., eða hinir svokölluðu ungum skákmenn. Staðreyndin er sú að þeir eru engin börn lengur og algjörlega hoknir af reynslu. Þeir eru flestir í dúndur formi. Svo er aldurinn oftast í liði með þeim yngri þegar tímamörk eru styttri.
Ég spái 8 - 4 fyrir TR-B.
-Kristján Ólafur Eðvarðsson.

Eru TR b ungu strákarnir líkt og í fyrra eða fá þeir að vera a liði núna þar sem þeir unnu keppnina í fyrra? (Rúlluðu TR a upp í undanúrslitunum með 9-3). Hvort sem er þá eiga KRingarnir erfitt uppdráttar þar sem reglur um leikmenn eru ekki jafn frjálslegar og í hraðskákskeppninni. TR-b ætti því að komast örugglega áfram úr 16 liða úrslitunum. TR b vinnur.
-Baldvin Gíslason.

S.Reykjanesbæjar a - TK:
Skákfélag Reykjanesbæjar er dálitið óskrifað blað. Þó er ljóst að þeir hafa misst amk. einn mann. Það veikir sveitina vissulega en skiptir þó ekki sköpum. Enn eru þar eldharðir naglar og þeir stóðu sig vel í fyrra og slógu þá meðal annars óvænt út Kópavogsbúa.
Kópavogur lenti í því að falla úr fyrstu deild síðast og geri ég ráð fyrir að þeir stefni á að vera þar ekki lengi. Þeir eiga marga sterka menn en spurningin er hvort það dugi þeim. Ekki hefur heldur alltaf gengið vel hjá þeim að stilla upp sterku liði. Með sterkasta liðið eiga þeir að vinna en ég held að svo verði ekki nú. Leikurinn fer fram á heimavelli þeirra Reyknesinga í Reykjanesbæ og ég spái því að þeir njóti þess og sigri TK aftur í ár en með minnsta mun 6,5 - 5,5 fyrir Skákfélag Reykjanesbæjar gegn Taflfélagi Kópavogs.
-Páll Sigurðsson.

Reyknesingar hafa afar þétt lið (eina liðið fyrir utan stórliðin sem sendir bæði a- og b sveit) og þegar við bætist að þeir hafa heimavöll verða þeir að teljast líklegir til að komast áfram úr forkeppninni. Kópavogsbúar hafa þó marga jaxla í sinum röðum sem ásamt ungu ljónum hafa góða reynslu úr harðri baráttu í efstu deild.
Jafnt eftir venjulega skákafjölda. Reykjanes vinnur í framlenginguna.
-Baldvin Gíslason.

Hellir b - SA:
Miðað við liðsuppstillingu frá síðasta ári þar sem Kristján Eðvarðsson, Bragi Halldórsson, Andri Áss Grétarsson, Baldur A. Kristinsson, Gunnar Björnsson og Daði Örn Jónsson telfdu fyrir Helli b, en Jóhann Hjartarsson, Jón Garðar Viðarsson, Arnar Þorsteinsson, Áskell Örn Kárason, Rúnar Sigurpálsson og Gylfi Þórhallsson telfdt fyrir SA, verð ég að telja SA sigurstranglegri. Í SA liðið í ár má sjálfsagt bæta Guðmundi Gíslasyni og Í helli b Sæbergi Sigurðssyni og jafnvel Ingvari Ásmundssyni, sem færi þá væntanlega á fyrsa borð.
Þannig gæti borðum verið raðað saman:
Jóhann Hjartarsson - Kristján Eðvarðsson - Þó Jói sé kannski ekki í mikilli æfingu hefur hann gífurlega reynslu og virðist geta telft vel hvenærog hvar sem er. Kristján er sterkur skákmaður en Jóhann snillingur: 2 - 0 fyrir Jóhanni.
Jón Garðar Viðarsson verður hugsanlega á 2 borði gegn Braga Halldórssyni. Báðir kapparnir eru mjög sterkir í atskák, en ég held að Jón Garðar hafi yfirhöndina. Hann er í góðri æfingu og byrjunarþekking hans er mjög góð. Ég spái 1,5 - 0,5 fyrir Jóni Garðari.
Guðmundur Gíslason mun sjálfsagt tefla á 3. borði fyrir SA enda 19 stigahæsti skákmaður landsins, og ef hann teflir gegn Andra Áss Grétarssyni getur farið á hvaða veg sem er. Báðir skákmennirnir eru baneitraðir, en báðir skákmennirnir tefla miklu minna en þeir ættu að gera, miðað við getu. Ég spái því að báðar skákirnar verð mjög spennandi og vinnist báðar á svart. 1 - 1.
Á fjórða borði gætu SA stillt upp Arnari Þorsteinssyni gegn Baldri A. Kristinssyni. Báðir eru þeir heimspekingar og djúpt hugsandi menn. Af skákum þeirra sýnist mér Arnar vera mjög nákvæmur skákmaður, en Baldur aftur á móti mjög frumlegur. Arnar hefur þó ástundað skákina meira en Baldur og mun því uppskera sigur: 2- 0.
Áskell Örn Kárason, fyrrum forseti Skáksambandsins og Gunnar Björnsson, ritstjóri skak.is gætu hugsanlega mæst á 5. borði. Báðir eru þeir skemmtilegir persónuleikar við skákborðið og má búast við mikilli flugeldasýningu þegar þeir mætast. Eftir hörkuspennandi skákir spái ég 1 - 1 og að báðar skákirnar vinnist með hvítu.
Samkvæmt þessu væri Rúnar Sigurpálsson á 6. borði, en mér þætti þó líklegt að hann telfdi tvær skákir og Áskell og Gylfi eina hvor, enda Rúnar alltaf heitur fyrir að tefla. Hann gæti telft gegn Sæbergi Sigurðssyni eða Daða Erni Jónssyni. Rúnar er nokkuð traustur en bæði Sæberg og Daði geta verið stórhættulegir, sérstaklega Sæberg með svörtu ef hann fær að tefla Alekhine. Samt spái ég Rúnari sigri hérna 1,5 - 0,5.
Þess má geta að ef Ingvar Ásmundsson teflir fyrir B-sveit Helli, mun hann ná punkti eða tveimur, sama á hvaða borði hann teflir.
Ég spáisem sagt stórum sigri SA, 9-3 en ef Ingvar teflir fyrir Helli, verður þetta 8-4 eða 7-5.
-Hrannar Baldursson.

Þessi barátta verður alveg rosaleg! Hellir a sló SA út í 16 liða úrslitunum í fyrra með 7,5 vinningum gegn 4,5 og eiga því akureyringarnir harma að hefna. Þeir koma því eflasut grífarlega einbeittir til leiks. Þór Valtýs sér til þess að hans menn klári þetta dæmi strax í fyrri hálfleik og sendi Helli b úr keppninni. SA vinnur.
-Baldvin Gíslason.

TV - Unglingalandsliðið:
TV gegn unglingalandsliðinu verður án efa ein mest spennandi viðureign í þessari í umferð Bikarkeppni ÍAV og erfitt að spá í úrslit. TV mætir eflaust með svipað lið og þeir mættu með gegn TG í hraðskákskeppninni (þ.e Einar K., Björn Ívar, Rúnar Berg, Stefán Sigurjónsson, Sverri og Sigurjón) en lið unglingalandsliðsins er ekki eins ljóst. Líklegt má þó telja að Halldór, Dagur, Gummi, Guðjón Heiðar, Guðni Stefán og Stefán Bergs verði í því. Þrátt fyrir að unglingalandsliðið teljist sterkara á pappírnum (og sé stigahærra) þá ætla ég að veðja á að TV vinni og byggi ég þá spá á góðum árangri TV gegn TR í hraðskákskeppninni en þrátt fyrir að þeir töpuðu nokkuð þá var ég hrifinn af baráttuanda þeirra og tel að hann muni tryggja þeim sigur í þessu einvígi.. TV vinnur með minnsta mun 6,5 - 5,5.
-Sigurður Daði Sigfússon.

Það er erfitt að vita hvernig unglingalandsliðið verður skipað, en víst er að það verði sterkt. Eina vandamál þeirra verður að rata á heimavöll Vestmannaeyinga á Þorlákshöfn. Taksit þeim það er sigurinn vís. Unglingalandsliðið vinnur.
-Baldvin Gíslason.

Kvennalandsliðið - TR a:
Þarna mætir kvennalandsliðið algjörum ofjörlum sínum en ég spái því þó að Harpa og Guðfríður Lilja muni ná sitthvorum punktinum gegn reynsluboltunum og 10-2 verði niðurstaðan. Verði Guðlaug Þorsteins hins vegar með spái ég því hins vegar að hún vinni Sævar Bjarnason 2-0 og skemmtileg 8-4 viðureign verði niðurstaðan.
-Halldór B. Halldórsson.

Það er mikil uppsveifla hjá dömunum en gömlu gaurarnir í TR (eru ekki öll börnin í b liðinu líkt og í fyrra?) verða sennilega of stór biti að kyngja fyrir þær. Sævar og co taka þetta á rútinunni. TR a vinnur.
-Baldvin Gíslason.

Hellir a - Bolungarvík:
Aftur má búast við nokkuð ójafnri viðureign þó að ólíklegt verði að teljast að Hellir stilli upp öllum sínum fallbyssum. Niðurstaðan verður 9-3 sigur Hellis þar sem Gísli Gunnlaugsson sópar að sér punktunum á sjötta borði fyrir Bolungarvík.
-Halldór B. Halldórsson.

Bolvíkingar hafa marga góða skákmenn í sínum röðum, en hvernig er með mætinguna á þeim bænum. Er Gummi Gísla í Barentshafinu? Er Jón Torfa í Torfalæknum? Það skiptir kannski ekki máli ef að Hellir mætir með stórmeistarana sína. Hellir a vinnur.
-Baldvin Gíslason. ps. Var að frétta að Gummi Gísla væri kominn úr Barentshafinu og farinn í SA:

TG b - S.Reykjanesbær a/TK:
Skiptir engu hvort liðið TG b fær.Tígrísdýrin klára þetta.
-Baldvin Gíslson.

TG a - S. Reykjanesbær b:
Meistaraflokksliðið hefur hleypt nýju blóði í TGingana sem að auki hafa jálkana Ásgeir Þór, Dr. Kristján og Jónas Pétur semátti frábæra endurkomu um daginn í Hraðskákskeppnii taflfélaga. Ég spái að Jesper Hall mæti og TG vinni stærsta sigurinn í 16 liða úrslitunum. TG a vinnur.
-Baldvin Gíslaon.

Haukar - Hrókurinn:
Þó svo að Hrókurinn mæti varla með átján útlendinga í þessa viðureign þá ætti þetta að vera létt viðureign fyrir Grand rokk gengið. Það er grífarlega gaman að sjá nýtt lið frá Hafnarfirði með í keppninni en ég verð að viðurkenna að ég hef ekki hugmynd um hverjir keppa fyrir þá. Ef Hrókararnir gæta sín á að mæta ekki og sigurvissir og mæta með sína sterkustu menn þá ætti þetta að verða einstefna. Hrókurinn vinnur.
-Baldvin Gíslason.

Bikarkeppni
ÍAV
Umfjöllun um leiki

Til baka.