Di cuant che o vin tacât a fâ lis presentazions de "La Sclese Nere", di ducj i incuintris al è vignût fûr un "comun denominatôr", venastai un aspiet, fuart e sintût di ducj, dal significât dal sfuei e de iniziative stesse: la voie di metisi adun e fâ alc di impuartant pe comunitât di Udin. In pocjis peraulis, fâ "fieste" ducj insieme! I plui maliziôs a pensaràn subite a la peraule "fieste" tal so aspiet plui materiâl (che, parcè no, cjapât te maniere juste al è un bon "carburant"!), chei altris, ancje se a son pôcs (!) a san a ce che mi riferìs. Cuant che o butìn lì la propueste di instituî la "Fieste dai Udinês" pai 29 di Setembar dal an che al ven, no dome e à un bon acet, ma tancj a tachin a fâ subite propuestis e progjets! E no o scugnìn butâ aghe sul fuc, parvie che la robe e vâ pensade ben, ma la aghe no la strassìn ? L'entusiasim che o ai let tai vôi di tancj di lôr, mi à fat pensâ che la strade e je chê juste. Provait a sierâ i vuestris vôi e a pensâ a cemût che e podarès jessi la "Fieste dai Udinês"! I borcs, lis associazions, i ambients, i politics, i anarchics, i vielis, i frutins ?, intune Udin magari cence machinis, dute par nô, par une dì! E magari tornâ a clamâ il "Renc" tal domo di Udin, ancjemò par une volte! Dut chest nol restarà dome une idee, se il spirt che al lee chei de Academie al è ancje il to, che tu stâs leint. Un piçul contribût de bande di ducj, par une "grande" Udin! Fasìn fieste, la "FIESTE DAI UDINÊS"!

VICTOR TOSORAT