十二月 DECEMBER







十二月卅一日 星期二     

今日係今年o既最好一日,當然要做返d特別o野喇...我選擇o左去做義工!今日主要o既義工工作就係幫手清潔獨居老人o既屋企.由於人手不足o既關係,康爺臨時"班馬"叫埋納爺同大象幫手,但由於我地BOB 的會長唔知佢地o既稱呼,於是乎就用o左Ronald A 同 Ronald B作識別,就係咁, 我今日就有兩個影子喇~~XDXD

下午做完義工就去o左左敦搵業仔,去到Poly時又要再去左敦"高升"搵佢地,幸好都冇白行...因為我o係"高升"玩o左鋪高達,重去到第四版呢!hehee~~ 之後就再次會合康爺,再去北京道玩"打拳",一睇之下先知原來已經轉o左做"打拳2",不過我今日勁呀,打一拳就有170.5kg... 只可惜我重係見唔到阿基o既"拳風".(雖則佢已經用o左業仔作真係示範...=P)

夜晚去o左尖咀倒數,倒數前去o左間冇飯食o既茶餐廳食o野... 而且重見到隻好大o既小強喇,不過佢已經伏誅於伙記o既腳下.倒數完畢就同阿華, Fanny等人去返旺角搵o野食... PS:今日行程之一切相片將於後日上市.各位朋友,下年再見,請呀!




十二月卅日 星期一     互惠互利

估唔到今年o既最後一日都有好事發生!話說昨日陪康爺去o左買數碼相機,凌晨佢竟然"回贈"返d好o野俾我,簡直只可以用一個字o黎形容--正!希望我地o黎緊呢年都重可以互相幫助,達到1 + 1 = 3 呢個互惠互利o既效果~~~~^^




十二月卅日 星期一     

今日下午同康爺出街,做佢o既"初級顧問"... 睇o左好一陣,最後都決定買o左佢心目中想要o既o野喇~~ 不過講真,自問我對數碼相機真係唔熟,我最多就係做我頭先o個d講o下價,呃o下禮物咁多...哈哈~~~~(阿牛,我係咪講得好o岩呢?)

下午行信和o既時候撞到阿基,先知原來業仔大人已經返o左香港,只可惜我前排一連幾晚出o左街,搞到你搞唔到我... anyway, 好高興可以見到你返香港,welcome back!!

今日要回顧o既係今年所食過o既美食.最令我印象深刻o既係Dan Ryan,因為第一次去呢個地方係我鍾意o既人帶我去o架!而且我去親呢個地方都係同女仔去...(直至現時為止)當然,最重要係食物,佢個Lasagna(千層麵)真係好正,而且重有好好味o既garlic bread食~~ 第二間就係位於香港o既沾仔記,佢雖然只賣十蚊碗o既雲吞麵,但係就次次都會吸引到好多人排隊去食.可想而知佢o既麵係有幾吸引!講起美食當然要講o下左敦o既澳洲牛奶公司,佢o既燉蛋真係令我再三回味!加上佢厚而鬆化o既多士,再鋪上一層完美o既炒蛋,簡直係完美無瑕!最後就係數到位於九龍城o既黃明記粉麵喇,佢地d墨魚丸又係一絕... 想當年我屋企打邊爐都要特登走去九龍城買喇~~~




十二月廿九日 星期日     

今日下午同Eric去深水"土步"買o野,見到某間食蛇類o既"XX蛇王X",門口有一大群人企o係到,原來係有人飲即割蛇血喇... 場面極到恐怖嘔心~~唯獨飲血者飲得津津樂道(有味)~~

今日已整理好我昨日義工開心一日遊o既相片,大家可以去睇o下我去o左邊,順便睇o下d大自然景物喇~~尤其鍾意呢張海天灰色o既相片!

下午做o左一樣我好想做但係我一直都冇機會做o既o野--- 就係打波.打幾個鍾,同o左好多唔同o既人玩過... 然而打完之後發覺雙腿酸痛,一定係長期冇運動o既後果喇!

夜晚同好多人傾偈,coz'我又o係"適當"o既時候玩ICQ,同大家講到"31號晚有乜做"o既問題時,發覺原來冇o野做係好慘喇... 不過事實上我當晚真係將會冇o野做喎... 唔通連續幾年出街慶祝之後,我今年要留o係屋企過?天呀~~~~欲知後事如何,還看兩日後,31晚,亦即係本年度最後一次o既日記喇!

不如回顧o下今年我見過/做過o既特別事喇... 除o左上面呢個新鮮熱辣o既見聞外,其實我今年二月初又去過camp,(雖然係做義工),不過都同o左一班好朋友一齊去;而暑假都嘗試到"長期"打工o既滋味;另外,八月尾又試過去朋友屋企玩+食飯&打邊爐;而十月又首次認真開始幫人補習.呢d都係我帶給好多好多美好o既回憶!




十二月廿八日 星期六     

寫於早上七時卅分 嘩嘩...大獲!由昨晚凌晨兩時至今,我都係冇乜點訓過... 唔通係我從前幾日o既日子�堣w習慣o左遲訓,所以今日兩點訓o既我竟然訓唔著,搞搞o下直到凌晨五時我重可以"清醒地"咁睇住屋企人起身呢...點算好喇?一陣重要去做義工照顧d老人家喇,重要去流浮山咁遠添,真係唔敢想像一陣會點...>.<

今日要回顧o既係我o既別名,小學時代o既我係冇別名o架... 直至初中o既我,我先有"hippo"呢個別名,直至上年先再有"阿Ron."呢個簡稱,而近期d就聽到有"狼~佬~"...諗諗o下"狼~佬~"呢個名我就諗起<阿"Ron" da "佬">呢個怪名...哈哈~ 當然,其實我重有好多別名,不過o個d係花名,係不勘入耳的! 其實名只係一個稱呼,我個人就唔太介意人地點叫我,因為就算大家叫返我Ronald,冇誠意始終都係冇誠意...有誠意的話我一定會知道o架!就好似當初Felix叫我做"hippo"咁...=)

去完流浮山一日遊之後,見都好多大自然花草樹木,心境舒暢好多... 點知一心諗住返屋企擺低o個bag bag先出去食晚飯,就係呢個時候,又再一次出現唔愉快o既事情...天呀,唔通,俾我開開心心咁過一日係一年好難o既事嗎??

夜晚怒氣沖沖咁走o左出街食飯,幸好同Eric的一班朋友出街食飯...終於都食到蠔餅喇,yummy~~ 咁先令我o既情緒好返d咋~




十二月廿七日 星期五     

一早收到個好得意o既url,叫做Icon Story,大家一定要去睇睇,好正~

今日無無聊聊咁出o左兩次街,不過兩次都係為o左一個目的--- 買禮拜.其實呢件咁簡單o既工作已經搞o左成幾日,不過由於為o左買到最新鮮o既蛋糕,唯有等今日買喇~~以確保新鮮呀嘛~~

昨午睇新聞,睇到播導o既又係一年一度, 繁華節日過後o既"恐怖場面"!!十三噸垃圾...足足十三噸垃圾呀!再一次証明我地香港人係幾咁有公德呢... 最唔明o既係點解檢控人員只係口頭警告就算呢... 心諗,若照已立法的亂拋垃圾罰款$600計,政府分分鍾可以大大減少財赤,甚至有可能轉虧為盈呢!(講笑~)

夜晚終於睇晒少女漫畫<貧窮貴公子>,呢本我我唯一一本睇o既少女漫畫,原因係可能佢唔係集中於童話故事式愛情故事,而且佢係以男仔(山田太郎&御村託也)為主線...當然最重要係佢夠搞笑,呵呵~~今期所睇o既係結局編,雖然好似無喇喇就埋尾,但係結局竟然係推到二次o既角色"四子"身上...而且最後個結局重係柔合了浪漫+搞笑成分.o係愛情故事中,我最鍾意就係呢種方式o既結局,簡直有種"甜密密"o既感覺呢!

夜晚得閒又upload一大埋相上網,而且重開多一個朋友仔o既相庫,其實呢個我諗o左好耐先公開我d朋友仔d相俾大家睇,因為話都底都係涉及人地d相,都唔知相中人肯唔肯出鏡呢...=P

既然今日冇乜特別o野講,就一於整個"大事回顧"喇!忽然間想講o既就係今年體驗更多"感覺":先有五月中代表我媽出席Texcare展覽,感覺近似做"生意o既大人";年中有A-Level失敗,心如止水o既感覺;亦有暑假返工,做成買賣o既興奮;重有最令人鼓舞的感覺就係,同有生意來往o既客人有傾有講,甚至連客人個仔o係街到都識得叫我o既成功感~~而且又有上大學食飯冇人陪o既孤獨感(<~~我最憎的>.<).當然,重有好多好多唔同o既"新感覺",不能盡錄......




十二月廿六日 星期四     Happy Boxing Day!

今日行程都好緊湊,下午出街主要係去買義工禮物,點知大部份食物仍然好快就過期,唯有等多一日先買...(拖多一日,d公公婆婆就可以擺d食物耐d~~)

安排o左聽日o既工作後,就決定往澳海城出發~~去到澳海城,我先發覺原來打機都可以咁平... 各式遊戲都只係$2,就算DM7th Mix都係$3,超抵玩!於是狂玩~~玩o左BM The Final Expert course的 NYC 同 DJ Nagureo,(<~~勁鍾意呢兩個course入面d歌~)如是者我就同"康友人"+"祐爺"&"納爺"玩到近晚上九時才醫肚,去o左澳海城o既"金牌坊"(即food court)食o野.叫o左一個上海套餐定食,雖然話係午飯後開始冇食o野,但係我都食唔晒...因為個份量實在太多喇...有五白牛肉麵 + 上湯餃子 + 脆皮春捲 + 香蔥餅 + 豆漿兩杯,實在係一個豐富o既晚餐呢!(不過祐爺食完重話唔飽,好驚~~~=P)

夜晚見到條街重落雨,不禁令我諗返我近幾次夜晚出街著親對Reebok Pump Fury都係落雨...即刻被人話我呢對係"求雨鞋",哈哈~夜晚宵夜時重勁,竟然有人話我對係似X-Box,一笑.

食完晚飯後就走出去旺角join Felix哥哥,佢話去食宵夜喎(?!)不過橫掂都成班人,唯有捨命陪君子喇...之後等Eric哥哥出車之後就去o左紅磡"芝麻綠豆"附近食,不過都冇去食"芝麻綠豆",因為今次係要醫肚,唔係食甜品喇. 食完甜品我地一干人又去o左附近"7仔"飲o野吹水,雖然同今晚除了同Felix 及Eric外重有好耐冇見o既Theodore,不過我今次同Theodore在談論"一聽到長洲諗起乜"o既時候有共鳴,而且更首次大家一班人一齊不停咁講... 當然,咁就難免有人要"犧牲"喇,Felix...=P

由於長時間留機鋪o既關係,今日原定o既睇戲又不了了之,又冇得睇,幸好代替o既"節目"都唔太悶...=) 買食物又延遲,睇戲又改期,唔通今日係... 乜o野都做唔到?講時講,今日本來約o左話同班莊記朋友食飯,但最後都因大家都就唔到時間而取消...唉~

PS:今日下午唔小心講o左d唔應該講o既說話添,大獲...XDXD




十二月廿五日 星期三     一年豪一次之二

今日一早起身就upload返昨晚d相落新相薄入面喇,大家可能去睇o下我昨晚所食o既名貴平安夜晚餐喇~~~~XDXD

今日要去幫人補習,幸好最後關頭都將模擬卷出妥~~冇事...~.~

夜晚同朋友仔去食呢個聖誕大餐.見面第一句竟然係:"你好殘呀!",乜我真係好殘咩?呢兩日已經冇出去"砍酒"喇,不過可能係我晚晚夜訓先搞到咁"殘"喇...T_T 話時話,因為被昨天的"豪洗"影響,因而繼續食貴o野~~~不過貴就真係貴喇,但係相比起昨晚的就差少少.說到底昨晚的有五道菜喎~~~幸然今晚個主菜好過昨晚o個個"碳燒牛肉",加上又有我好想食o既Lasagna,正!(可惜今晚我頻頻唔記得影相,可惡!)

凌晨一點忽然肚餓,可能係今晚太早食飯o既關係,即刻令我諗起今晚有人話"少食多餐"呢番話.本來想叫埋妳出o黎食宵夜喇,不過由於地理上o既關係,最後都係放棄o左呢個念頭.所以話呢,有個朋友住我隔離幾好呢!=P

夜晚食飯講起我d MD碟,其實分我o既MD碟好易喇,因為我所有MD碟都會將MD碟修面d歌寫晒入去兼貼label,所以見到我d咁"核突"o既字體就可以肯定o個d MD碟係我o架喇...=)




十二月廿四日 星期二     一年豪一次之一

下午同阿牛去o左行海港城,一路行一路影相,行到近天星碼頭時見剛剛夕陽西下,黃昏o既開始,於是乎我同佢就不停利用大家o既數碼相機捕捉紅霞漸變的一刻,我覺得o個一刻真係好正,十分之開心~~~XDXD

話說今日係慶祝Felix哥哥回歸香港,我地下午等埋Eric哥哥放工就約埋o係"新港"豪o左我地今年o既第一次-- 煲新game 煲到爆為止~~~(講真,呢兩個哥哥唔o係香港o既時候,我真係唔打機咁滯!) 之後我地就商量去邊到食飯喇,亂打亂撞又去o左一間廚窗以$78精選晚餐兼可嘗到五款不同食物的介紹,點知入到見到個menu見到真係有五款不同的dishes,不過價錢係"平安夜價".如是者,我地又再話一年一之豪一次呢番話!PS:其實今日我所食o既食物都有影到相喇,不過聽日我先upload返上去喇~

唔知我係咪一向俾日o既感覺都係"夜鬼"呢?今晚凌晨後我竟然收到兩個電話,分別係凌晨一時正及凌晨三時卅五分.其實我都好開心有人搵我,不過我怕o既係今夜打電話會嘈醒我屋企人喇... 唉,不過事實係已經嘈醒o左兩次喇... (筆者註:我寫呢段o既時候又出現第三個人打o黎,搞到我要飛去聽電話... 心中出現無限o既無奈~~~.~")




十二月廿三日 星期一     

今日下午去o左藍田某社區中心開會,開會o既內容都係圍繞住遲d同老人家一齊去流浮山食海鮮... 令我不期然咁諗返起以前中四時做義工又係同老人家一齊到大埔食齋... 更令我諗返起以前o個日義工o既"不愉快事件"-- 大同幾個同學仔激嬲o左某某學校o既人.諗返起,我終於明白點解康爺昨日話我被"極速"杯葛...因為佢都係讀某某學校o既學生喇... 這証明o左我同呢間學校冇緣,竟連佢地學校o既鐵校章我儲o左成幾年都儲唔到喇...=P

對唔住呀大象!估唔到今次o既受害者係你... 不過我都估唔到原來大家都唔得閒,似乎把大家講過o既說話都忘記了~~~唉,在此對26號晚活動之取消表示感嘆!




十二月廿二日 星期日     做冬,冬大過年!

22-DEC-2002
今日去o左約晒朋友去Asia Game Show,點知大家個個都唔知醒,(其實我知醒o架,不過都要等埋朋友仔)唯有遲多一個鍾先入會場... 今日都算大豐收喇,我入o左會場只不過短短兩個鍾,竟然影o左近50張相,足足係我平時影成十日o既總數量呢!不過好多靚女,大家不防去睇睇喎~~~XDXD






下午去了花園街買禮物準備義工會動,搞o黎搞去制o左成條花園成三次,最後幸好都買o左我地要o既o野.




十二月廿一日 星期六     Exams are over!

終於都考完試喇!不過咁唔代表我可以休息喎... 因為原來我都重有好多o野做,包括出數學測驗卷, 幫人燒CD & 錄MD, 幫手買o野準備做義工等等工作~ 但係開心o既節目都有好多:好似要睇<無間道>(今晚已睇了~), 去Asia game show, 同朋友仔食街食飯聚o下, 去流浮山食海鮮(義工~~XDXD)等... 總之就有好多精彩絕倫o既節目等住我喇!~呵呵~

今晚睇去o左睇<無間道>,(幾驚今晚睇唔到,搞到大家都冇o野做,o係到無聊!) 不過睇戲途中有個女仔"boom"的一聲o係走廊位到仆親,咁就將所有人o既視線轉移到呢位小女子身上喇... 我諗大部份人都會錯過剛才o個一幕喇~~我係話套戲呀!

夜晚行返屋企o既時候,有兩個說國語o既人叫我俾錢佢搭巴士到機場... 我當場呆o左~.~一個成$34,兩個咪成$68?!家o下原來問陌生人拎錢係可以咁直接o架喎...>.< 我當然話冇喇,(重要我用我"最叻"o既普通話交代我冇錢 & 教埋佢搭車) 大家可能話我衰(無惻隱之心),又可能話我醒(冇被人呃錢).不過事實上我今晚身上又真係冇晒錢喎... 只係得返d散銀,不過人地嫌少唔要.算,重好,省回呢!




十二月廿日 星期五     

今日諗住"借卡入lab"讀書喇... 點知可恨o既係Lab被人lock晒... 搞到我有卡都冇得入! 無奈地唯有到退而其次的CSC開XP溫書,點知原來CSC的WindowXP係唔可以開ICQ喇.我唯有睇返notes + examples就算.因為冇得入lab,想做實驗都唔得!(實際上係可以用出面d機做Java,不過本人我又懶得咁做,加上又麻煩,唯有放棄~) 最後只係用o左三個鍾已經溫晒~~ 重做o左一條好難o既"練習"呢!(THZ, Claudia~~)

下午返到屋企睇<火鳳燎原>#8.嘩...不得了,實在太好睇喇!不枉我對住部電腦幾個鍾(溫書)後都要睇~真係好耐都冇一本書叫我一睇完就即刻想繼續睇下一本,呢本漫畫實在十分鬥智喇,佢不但係計中有計,簡直係"計中計中計".上newsgroup都見好多人讚呢本書"好計"... 可見作者的智慧是何等駭人!忽然間我慶幸陳某只是一個漫畫家,而不是什麼壞人或軍事家,若果佢用佢o既聰明才智o係壞o既方面,世界又可能將會多一個拉登o既人喇...>.<"

今日忽然間"興起"整o左一月份o既分頁,今次重特登整o左隻mp3歌做background music, 唔知有冇人估到呢首係咩o野歌呢?^^

開心... 今晚係六合彩之聖誕金多寶開彩日子.一向甚少落注的我昨日被康爺一提,咁就走o左去買o左一張玩玩,今晚一對竟然中o左五個字,不過散落在四條不同的投注上...=P 幸好最後都打個和,冇贏冇輸.再一次証明我覺得唔賭係好o架!(唔知康爺及其他人又有冇斬獲呢?)




十二月十九日 星期四     

今日考o左我最有信心o既一科--Management. 不過我考完之後就覺得呢科好有信心... re-take. 點解會咁o架?話晒我都好鍾意商科呀,我都一直好俾心機讀呢科... 但係原來考試都好睇心情喇,今日就咁o岩撞正我考試時竟然冇乜心機,可以用"完全唔係狀態"o黎形容今日o既考試.(唔通係今日訓得太足夠o既關係?>.<")

哈哈... 又話我點都唔會成功,今日我咪又係從你黎大人身上借了張ID card... 嘻嘻~奸笑~果然不枉我走o黎觀塘幾個鍾,重可以玩返"Ez2Dj"添~~最抵死係你又知道我有"進步"喎~~只可惜被你讚完就即刻過唔到Starwarz... 只係差三粒掣就玩完o架喇~

夜晚收到鄧生一個好"精景"o既msg...今時呢一刻收刑真係好...冇得掟!


積積復積積, 唔識就唔識, 
測驗夠刺激, 居然無題識, 
上堂聽唔識, 搗亂多款式, 
自修一樣識, 睬佢都生積.

夜晚同朋友仔傾偈(其實今晚同o左好多人傾偈,好開心~~因為好耐都冇開ICQ玩咁耐喇!) 其中有個講到聖誕假做乜,之後聽到話開P.一聽到開P就勁又愛又恨... 因為我一直都想搵個地方可以開P,因為成日出街洗費都好"甘"o下,不過恨就係因為縱有無限想法o既我都係搵唔到有人肯願意借出地方開P,所以我只有一直的空想...




十二月十八日 星期三     冇天理呀!

冇天理呀... 點解我一考試就咁緊張喇,今日已經係第二科考試喇,不過我可以詰俾大家聽我係幾乎冇訓過喇... 一點上床訓,呆o左好一陣先訓到,點知訓到三,四點又無喇喇訓唔著--醒o左,之後就開始訓o下殲o下...如是者,到o左早上八點幾又被我屋企人叫醒,之後就開始地獄式o既精神+疲勞轟炸--->不停咁被人叫醒, 嘈醒...>.< 唯有一氣之下走返學校讀書... 不過奇蹟就o係呢個時間發生o左喇.我竟然可以用短短兩個多小時就讀完我今日要考o既o野... 神奇神奇!

冇天理呀... 點解今日考呢科會咁o架??試卷中竟有一題同上年份卷一模一樣,而且阿sir之前重俾過份卷我地添... 點解會咁o架?咁咪即係全世界都起碼有成25分做底分,咁重成天理?!(咁o既錯都可以犯,真係好懷疑d lecturers之間有冇溝通喇!)




十二月十七日 星期二     

~是日無題~因冇特別事發生.




十二月十六日 星期一     

今日考Econ.,考得麻麻...可能係輕敵之過喇!因為我一開始做MC只用o左十多分鍾,因而減慢了做essay的速度.就係咁,所以我就搞到愈做愈慢... 忽然間諗起某黎姓人的口頭禪"抵死!" 考試後先發覺原來仕我前面o既人係我以前o既同學呢...

好o野,我而家已經其有111隻MD喇!計起上o黎有近2500首歌... 實在太開心喇,呢兩日好似挑起條癮咁不停驪返d自己o既舊作(自己錄o既MD),有時重覺得自己錄MD o既鋪排唔錯呢,(呵呵~)不過始終都覺得其中一隻碟"張震嶽X陶吉吉"呢個match up唔錯~~~

新相薄經已成立,而且今日又再增加o左幾張新相...(雖然都係係以景為主>.<")... 但係就係有香港最新燈飾+夜景~~

謝主龍恩呀!大象哥今晚為我解決o左一個煩惱.話說本人正煩著考完試的各聚會之安排,然而各個聚會的招集進度都只是一般,每班都只係叫到4-6個.縱然我個人認為最理想的聚會係應該大約有6個人,但大大班人又有大大班人o既好處及氣氛... 所以而家就諗緊點好喇...其實呢一刻我係應該努力溫書,而唔係諗埋d咁o既o野~.~




十二月十五日 星期日     已瘋狂沉醉於數碼攝影的我

凌晨繼續搞我個新相薄,不停咁起勢upload上去... 現昤為止已upload了33張相上去,雖然中多數係以景為主,因為我實在想同大家分享o下d靚景/得意o既相.其實我想upload返大家都好想睇o既人物相,不過由於本人考試在即,唯有等到考完試再上存過~~~呵呵~~~

凌晨二時零五分:<廢話一則> 屈指一算,今日(由14號開始至今)已經反反覆覆更新了共七次!!真係有d過份... 不過唔知點解呢,今日好似特別多o野講(縱使我冇乜點出街~).可能係我今日收到朋友仔o既電郵及同好多net-frds傾偈喇~ 講返先,我忽然間諗起好多以前o既o野,覺得好多o野/人都好假... 其實某程度上我都好贊成做人有時要假,好聽d咪即係面面面俱圓喇!不過有時假得o黎都唔好咁易被人睇到呀唔該... 一眼就被人睇出講假話係咪好cheap呢... 唉~ 計我話呢:"一係唔假(以真我做人),一假就唔該呃晒所有人,絕對唔容許有破綻出現!"咁先係最勁o既人呀嘛~

好o野,今日終於都搵到小春o既"失戀王"同"至高無上",而家只欠閞心研o既"你有心",咁我今年度o既歌就搞掂晒~~~可以好安心咁欣賞各大頒獎禮及等到下年先再搵新歌喇~~

夜晚去o左銅鑼灣食飯,趁有時間去o左商務印書局睇書,又係睇李某人o既<做人系列>(呢本唔係教點樣生仔"做人"o既書,而係教黠樣去做一個正常人o既心理學書~).不過今次睇o既唔係<做人大忌>的<痴>同<怨>,而係剛剛相反o既<做人好易>之<智慧>遍... 不過可惜的係我又係只睇o左第一章"所羅門.黃的智慧",好正~~既幽默,又好睇~~

嘩嘩... 原來香港銅鑼灣o個邊一早飲茶可以平到只係$10咋!一碗粥都係$3,而大飽更賣$1個,聽講好多上o左年紀o既人都日日去o架,而且只係$10(粥$3 + 大飽$1 + 茶錢$5再加一都係$9.9~)就可以坐到中午十二點正先走~~




十二月十四日 星期六

凌晨決定開始寫信(依貓)俾我好耐冇聯絡o既朋友仔,希望可以藉著我考完試後而聖誕假前寫晒俾咁多位...報告一下我近排o既生活先~

好快好快... 今日凌晨寄出o既電郵,正午已經收到reply喇!!其中一封講到以前的一個演唱會,諗返起真係好懷念...不過可惜呀,今年冇飛,冇得去喇...=( 不過唔緊要,冇飛咪買o羅.其實,我已經訂o左一個演唱會o既飛喇(可以順便試o下部digi.cam.^o^)... 係邊個o既演唱會??哈哈,暫時賣個關子先喇~~到時等我影o左相再俾大家睇呀o下~~~XDXD 好,講返E-mail先,我今次寄電郵o既結論係:女仔比男仔reply得快好多喇!=P (<--睇到而收到信o既仔仔識做喇~)

公告:
由於本人自有數碼相機後經常影相,而呢個網頁的容量又極為有限(家因這網頁已內存了幾首MP3之故)... 所以我將會把我日後的一般相張貼於此相薄,大定不防睇睇~~當然,(我認為)重要及有意義的相都會再o係到貼上~在此多謝Diana介紹呢個存相的地方~

下午有位姓黎o既人兄send o左一個我一直等緊o既網頁俾呀... 搞到我以後都唔洗再特登落聯合喇,就此謝落!縱然黎大人send o左個KOF2002隻game俾我,冇joy-pad始終係難玩d,(其實可能用joy-pad都係咁渣!)夜晚玩時我始終都出唔到一招"動畫超必"...可惜可惜~不過我一定唔會因此而買joy-pad!!

是晚被我o係某某姓黎o既人o既FTP到搵到首新Midi,而呢首Midi就係近期大熱樓盤泓景臺廣告歌---Great View,即係大家而家所聽到的歌~~ 廣告版係加上一垣天真的兒童一起合唱,令呢隻歌o既感覺更正~~而家我正式同大家講,我向姓黎o既康康借呢首歌©(<-- 俾返個copyright你又點話呀...=P)




十二月十三日 星期五

昨晚臨訓前聽收音機,調調o下台聽到張學友的<李香蘭>.o係咁凍o既天氣(其實係張被太薄),再聽到呢首歌好似特別凍咁...~.~

飲恨呀...下午約見Ian哥哥,好開心見到佢(佢手拎d漫畫),但係唔記得提佢買 #15添!不過最後都有本<遊戲王>#29睇~~聽佢講而家已經唔會再到聯合玩喇,因為連佢唯一目標"Guitar Freak"都冇得玩... 都唔知佢點過呢幾個星期呢...=P

下午收到一個好正而且要用腦o既網頁遊戲.不過可惜呢個遊戲只得五關,冇乜挑戰性...

夜晚再收到一個遊戲url,不過今次呢個game係關於哈姆太郎.實o岩女仔玩喇,咁cutie~~~XDXD

今日終於講o左,決定玩一個"一星期之約定",唔知可唔可以得到我想要o既效果/結果呢...=)




十二月十二日 星期四

是夜凌晨四時,收到一個外國好友的電郵,本想留待明天才回覆此涵...但本人實在忍不住,最後都決定回覆才去睡,如是者...今天的日記將留待明天補上~在此僅向各讀者致歉

嘩嘩...原來今個聖誕假都好似好唔得閒喎... 23, 28&31號就做義工,26號(暫定)就將會同莊記班朋友聚會,21號就同St.Joe班朋友聚會,再加上補習同與個別朋友見面...呢個X'mas假都好似排得好密~~~(起碼比我以往的聖誕假密) 約我o既人要趁手呀...呵呵~~講笑~~

今日返o左學校溫書,圖書館入面竟然幾乎全爆...與其話係全爆,應該話係"全霸"!何為"全霸",就是人不在,而只有書本在也.好過份!好多人為o左自己方便,就將一個人的物品霸成三個位,令其左右的地方空置以使有更大更多的空間...唉~ 同埋我發現o左一個好怪o既現象,就係我班同學仔係唔入圖書館溫書o既... 全部留o係OA出面就算...

Welcome Back!! 夜晚收到Ian哥的電話,得知佢已經返港...我呢半年的漫畫可以睇得返喇...哈哈~(不過我下星期要考試,就算有得睇都要等到21號以後先睇得...T_T) 雖然同佢唔係超熟,不過我竟然係佢第一批打電話o既人.心中有莫名其妙的興奮.




十二月十一日 星期三

前幾晚聽到一首幾好聽o既合唱歌,因為呢首合唱歌都好難配合得好,但當然唱歌o個兩個人做到喇... 後來先知原來係小雪同"啤梨"葉文暉合唱.而歌名則係<方寸大亂>.真係估唔到係葉文暉唱...因為我對呢個歌手冇乜好感,佢本來由好地地一個DJ,無喇喇又去唱歌...(全靠都係拎o左首大熱韓劇主題曲"I Believe"先可以出一頭做歌手) 反而我覺得小雪原來唱合唱歌都唔錯,前排有一首同漢洋合唱的<其實我介意>,而家就有呢首<方寸大亂>,唔錯唔錯...認真唔錯,只可惜佢呢d合唱歌唔係一聽即hit,係屬於慢熱形.再加上佢本身獨唱o既歌都唔係太好... 唉~冇法~(不過都好過歌手梁浩賢咁,佢把聲好正,好靚,只可惜佢簽約華星後出得一張EP就倒閉,而家重人間蒸發o左呢!有時做o野真係要睇天時,地利,人和呢~真係戥佢唔抵呢!)

下午一口氣錄o左三大隻MD,好爽,好開心,我聽歌o既trend終於keep返住最新呢一刻喇~講返對上o個隻MD已經係半年前o既事喇...快慰快慰^o^ (點解我要錄咁多MD??因為咁樣好讓我聽日返CityU溫書作好準備~)

下午同人傾偈講到發夢,重講講o下講到"喪屍",最好笑係講到"獅王之王"(屍王之王 <--由常演龍婆的羅蘭飾).講到尾d咁"恐怖"(其實係搞笑)o既夢都係睇戲之後所影成.不過講起戲,今個聖誕一定要睇"無間道"!四個影帝+多名女星+2位新人,真係好期待!不過都係Eric講o個句:"看是必然的,只是和誰看罷了!"




十二月十日 星期二

昨晚睇報紙時見到一個"上樓派對"的東西.細看之下原來係屋主出租/借出房間作派對之用,十分適合聖誕節呢d過時過節時開party玩~~ 其實好多會所,食肆都有"包場"呢個玩法o架喇,之不過費用就有點兒吃不消>.< 而家竟然有人識得出租自己的樓上鋪作"party"場地,一來可以令本來空置的樓上鋪有利用價值(explicit cost),二來亦可以賺返d租金以減輕負擔(implicit cost),而且重可以俾消費者多個選擇.此舉可謂一舉兩得(應該係三得先o岩!).真係佩服現今d人咁有腦!講講o下都唔知我聖誕假時可唔可以搵到個地方,可以俾我同班朋友一齊歡度聖誕呢...

今日下午睇電視睇返一套劇集叫"卡拉屋企",呢套係我以前細過好鍾意睇o既劇集之一.佢o既性質就好似而家o既"真情","皆大歡喜"咁,都係屬於長線劇集.記得除o左呢套"卡拉屋企"之外,重有一套叫"我愛玫瑰園",同樣係咁好睇...而且呢套重係由天王張學友唱主題曲呢!

好o野!今日又被我搵到個新網頁,有面有好多好齊o既舊歌(其實都有好多新歌o架!)... 另外又被我搵到前排我要搵o既一首歌,基本上我都唔知o個首歌係邊個人唱,不過我相信我自己o既聽歌直覺,再加上頭先我download落o黎一聽,就肯定係呢首歌喇!係咪好叻呢...=P(低B,又o係到自己讚自己!)而我今次所搵o既歌就係黃凱芹o既<雨中的戀人們>,都唔錯,值得一聽呢~~

夜晚同人傾偈,聽到好多"歪理"... 不過其實人就係咁衰,明知係歪理又如何,只要俾自己的心魔攻佔,就會諗到無限咁多個藉口說服自己o黎信呢套"歪理"... 人呀,我們是多麼的可悲呢~~

PS: 康爺,今日去聯合真係見唔到"中國隊",而且戰局好悶,唯一深刻就係見到有個"成日扭頭的怪人"~




十二月九日 星期一

今日被康爺"徵召"出街,行到聯合廣場見到有個癲佬拉住我地狂講o野,而講o既內容多數圍繞住學校做訓導主任的工作... 唉,最後重聽到商店它閭講o左句:"政府害o左佢." 原來做先生真係有咁大壓力,大到可以迫傻人.真係見到都可悲!

同康爺行旺角,再一次覺得同唔同人係有唔同o既地方,若然硬要行一d特別o既地方會令到我好唔舒服,又冇癮呢.之後會合納爺&朋友甲(因為我重未知佢大名),又行商場,最後我今日行o左兩次聯合廣場&信和中心...>.< 返屋企時又見到"中國隊"挑戰緊~~(<--康爺一定知邊隊係"中國隊"喇~)




十二月八日 星期日

前晚我行到某某商場,見到已經有好多聖誕o既佈置,於是又忍唔住拎部"死人爛鬼數碼機"(<--某某人的口頭禪=P)影o左幾張相,大家睇o下呢"袋有小熊"係咪好得意呢...=)

好鬼驚... 今日幫人錄MD O既時間,CD d歌竟然錄唔到落MD到,霎時間我重以為係我部機o既磁頭已經壽命已盡.嚇得半死時即刻搵第二隻MD再試,後來先知原來某某人d MD係有問題,而唔係我部機有問題...咁先冇咁驚咋!




十二月七日 星期六

零晨近一時,有朋友我做緊咩o野,我話我正o係到寫緊日記...於是佢就話:日記不是已寫好了嗎?其實我之前已說過,由於我記性不好,所以當我想到什麼重要而值得寫的東西我便會立即記錄下來...因此,我每分每都有可能會更新日記的呢~而不是每天只更新一次,所以各讀者可以趁得閒就進來看看...=)

哈哈... 話說今日下午我幫屋企人買午餐,去買了兩碟齋菜,誠惠$49.點知我經過茶樓時,見到"盅盅飯"都只係賣$8咋!不禁令我諗起古時做和尚食齋的人大多數是些窮苦大眾,為了生存才出家做和尚食齋,點知而家食齋重貴過食肉呢!

昨晚同Eric去了食飯,覺得幾抵... 最重係食得好好好...好飽!點解?因為去o左食呢樣o野喇~ o下?唔知係乜o野... 俾多次機會你估喇!

所以話,朋友都有好多種,數到Eric就一定係我best friend之一喇,at least 我可以o係佢面前暢所欲言~經過今晚o既"傾偈",我又好返好多喇...可以繼續搏殺~~~




十二月六日 星期五    一個心情差的晚上

經過八個小時的苦戰,我終於將今個semester最後一份功課都交埋喇,感情真係唔錯!不過完成呢份功課o既代價都唔輕喇... 因為我又要放棄我o既午餐時間!(即使難得有人約我去食飯都冇時間去!>.<) 同埋做assignment時好得意,我地其中一個組員用親邊部電腦都"當機",如是者,今日足足"當"了買次機,我地要重複又重複咁打返d資料落去(我地叫封佢做"輕(hang)機王"...=P).最後更足足print o左成100張紙先可以交功課... 都唔知浪費了幾多株樹木呢,罪過罪過~~

可怒也!夜晚同人發生"些少磨擦"... 被人鬧o左一大堆好難聽o既說話,好唔開心!不過我心諗... 我玩我衰我賤我死,都係搞到我自己;但係你玩你做功課o既時候,就要影響(應該係騷擾!)到其他人!為o左個人利益/方便就要身邊o既人就晒你,連累埋其他人,你話邊個衰d呀??好心諗o下喇!!

傍晚時分睇漫畫睇到一本新漫畫名為<戀上他>,基本上我對一般愛情漫畫唔太在意,不過廣告其中有一段講到此作係漫畫/電影<百分百感覺>編劇陳慶嘉先生的作品,又忽然間對呢本新作有了興趣,好想去睇一睇~~唔知有冇朋友仔會買呢,有o既借我睇睇呀...=P




十二月五日 星期四 

本來諗住過埋今日呢個semester o既所有project + assignment就會完結,點知到最後始終重有一科BST未搞掂... 唉!重要捱埋聽日~~

今日有少少自己搵o野o黎搞,是關我為了食我想食o既午餐,而死等爛等... 最後由於趕住準時去補習,搞到連午餐都冇食!所以搞到今日只食得一餐,就係晚餐~~ 所以夜晚就決定去"麗都"食任食火鍋...雖然最後都係要成$70位,不過最重要係佢有超好味o既脆肉鯇魚任食!!食到我地停唔到手~~(不過可惜呀,有人叫o左d o野又食唔晒...=P)

夜晚去o左"商務"睇書... 好快咁睇o左幾本心理學書,一本叫<相人高手>,<人生大忌--痴>及做人甚艱難系列之<做人朋友甚艱難>,呢幾本書都幾好睇o架~只可惜昨晚我"捱緊肚餓",冇乜心情睇落去...所以每本只係睇o左一個小節就算~




十二月四日 星期三 

今日又影o左幾張相,其中一張係雨雲,香港最高的聖誕樹同埋我今日o既午餐:

以下就係我用手動及自動的分別~

下午好開心,同納爺,康爺一行人去o左旺角玩~重食埋好想食o既魷魚鬚(本枇叫埋Eric一齊去食喇,不過原來佢要到七點先放工>.<)~~最正係聽到納爺講"笑話"!

話說下午由CityU走,行經CityU通往又一城短短的一條通道時,我竟然撞到三個人... 三個人都係唔同階段識o架... 忽然間o既感覺就好似漫畫"怪醫秦博士"大結局(單行本第18期)的<命運列車>咁... 人生所有識得o既人物逐個出現...唔通我o既結局就同漫畫o既一樣?!




十二月三日 星期二 

今日一早有人打長途電話俾我,由於我剛剛訓醒o既關係,我竟然誤會o左係第二個人...重有d失言添,到後來第二次佢再打o黎我先知係佢...sorry呀Felix!>.<

今日約o左同學去沙田作實地考察做BST project... 由於早到我就到新城市廣場行o下,期間影o左幾張相...其中一張係影雲,其實係捲層雲o黎o架!而另一張係另一種雲.十分之開心,因為我終於都可以自己影到呢d雲喇~~~

話說去沙田搵資料,點知去到沙田政府合署時見到各部門的人都是投閒置散,有的不停傾電話講笑,有的敷衍了事.只有少數人係認真工作...唉,唔怪得之我同學都不禁講句:"唔怪之得有財赤喇!"因為實在太多傭員o既出現喇...>.<

下午返屋企o既時候,由於已時黃昏時段,o個天出現了晚霞,又係一隻好靚o既相...哈哈~越o黎越鍾意呢部digi.cam.,因為可以去到邊影到邊...=)

夜晚聽歌(基本上本人我日日都一定要聽歌先可以生存呢!)聽到張震嶽唱o既一首歌,名為"只是朋友".其實我一直都好鍾意呢個歌手唱d歌架喇,今晚再睇埋呢首歌o既歌詞,忽然間覺得佢好"應景"添,一時間有d感觸......




十二月二日 星期一  

今日發CityU聽到話有好多人"請槍"交assignment... 忽然間覺得其實讀大學計GPA即係玩緊"鬥人面"o既遊戲...因為好多時大家都擔心緊o既assignment原來係有人幫你做o架!只要你人面夠廣,夠勁,一個唔該就已經不費吹灰之力咁完成所有assignment,何其容易!但相反,若閣下人緣奇差又加上閣下d朋友唔勁,睇怕每逢交assignment的日子就係閣下的死期呢!(即要嘔心瀝血先至做到或甚至做幾日都做唔晒) 多麼的唔公平呢...~.~

下午去幫人補習,其間有人返屋企,原來帶o左個可愛o既BB仔返o黎.(勁cute~)睇住佢天真無邪咁行o黎行去,細細粒粒咁,原來BB仔得歲半咋!搞到我都忍唔住要抱一抱佢,我只要輕輕用力就可以抱起佢喇,太得意喇~~ 只可惜今日冇癟digi.cam.,唔係一定影佢幾張相呢...=P

可能呢排有大多"短暫空閒"出現,(註:即大約15-30分)基於有太多呢d尷尬時間,搵朋友出o黎又唔夠,一個人行街又太悶... 所以我又經常出現於各機鋪.但我仍然冇玩任何遊戲,只係"睇"人玩罷了.講開又講,KOF2002出o左一個月,已經由最貴的$6跌到落現今的$2-$3,果然吸引返好多人排隊打機!(其實我都想玩呢隻game,不過冇理由而家先去學喇,因為咁樣同任人魚肉冇分別,即掉錢落海!)講返呢隻game,今次呢隻game多o左d"舊人"外,重有一種類似動畫的"超必".呢隻"動畫超必"好正,好好睇...(<--唔知幾時起我愛上了睇人地出"超必")現時我已睇到YASHIRO(七枷社),SHERMIE(莎?米),KYO(草薙京),KIM(金加潘),CHOI(蔡?健),IROI(八神庵),YAMAZAKI(山崎?二),成功出呢O下動畫超必,呢到其中有幾個d"動畫超必"好靚o架!~所以第日見到我o係機鋪睇KOF咪以為我係跟隊呀,我只係"觀光"o架咋...=P




十二月一日 星期日  

聽日就要交assignment喇!不過直到下午為止,我仍然係未做過喇...諗起真係有d驚呢!不過我當然唔會眼白白咁坐以待斃喇... o係呢個危險關頭,又再一次証明到我人緣唔錯.一句就有好幾個朋友幫手~最後我只花了一個下午就完成今學期最後呢份功課...=)

是晚又有人話請我食飯o黎利誘我出街... 只可惜那人打o黎的時間太差,竟是我吃飽後,剛剛連飯後果都吃完電話才到.不過都好,又有杯凍奶茶飲...=P (發覺近排成日都飲凍奶茶,唔知會唔會因此而上癮呢>.<)

夜晚十二點又睇到國際台播"魔幻王朝"(The 10th Kingdom),呢次已經係我第三次睇o架喇... 點解重要睇?因為好簡單---好睇!原來呢套"魔幻王朝"同埋"神話西遊"都係出自Hallmark Channel 架!佢地d作品科幻得o黎又好有劇情... 所以呢,大家下次有機會記住要去睇o下喇~

凌晨再睇到一套由無記播影o既"邪教檔案之末日風暴",基本上呢套唔係太好睇o既戲,不過我又係第二次睇喇!主要原因係我已經唔記得呢套o野講乜先睇返... 不過睇完晒套o野我好記得一句,就係:"當人救濟頻臨崩潰o既人就係神,當人殺害一般正常o既人就係撒旦!"我覺得呢句講得幾o岩~~(有信教o既人唔好打我...=P)











         <---back 我的資料  簽個大名啦 !