FEBRUARY2003

　　　　　　　　　　　　　　　　　　　　　　　　　　二月　FEBRUARY

二月廿八日　星期五　　　　當F-100遇上F-100

"當F-100遇上F-100，330會點呢？" 大家可能睇唔明呢句說話．即使聰明的你知道以上的代號是數碼相機的型號也是沒用的... hohoo~ 說到底今天又到了一個月的最後一天了，當然要"搞鬼一番"喇~~ 話說今日同我的同學仔一齊遊歷石硤尾，由城大開始出發，沿途經過很多地方，如到南山村吃個下午茶... 最後更加走到上石硤尾山頂影相~~哈哈~~　結識新朋友的感覺唔錯，可能大家都有共同嗜好喇-- 影相~~ 今日收獲十分豐富呢！(見到人地有拖拍真係唔錯喎~~哈哈~~=P)

講起嗜好，就當然要講返我另一個嗜好喇-- 聚會．晚上相約了老牛一起吃飯，兼且暢談一番．但最後主要都是在"機鋪"度過...~.~ 不過都給我們發現了一些好點子，就是長沙灣區也有"一拳．ＫＯ"的打拳遊戲．多好呢！這晚我三拳打出533.17kg呢~~ (可能是將我近期一直抑壓而無法宣洩的煩悶一次過釋放出來呢~)

話說今天我為了找到"聖誕老人"，"僵屍"及"嫦娥"而到多間圖書館搜索... 由於我只想到兒童童話才有造些人物的圖像，所以我便重點地在兒童圖書館大肆搜查... 感覺就好像"同細路仔爭o野玩咁"，多麼的不知所謂呢！然而可惜我怎樣努力，最後我還是不能把"僵屍"找出來．"僵屍先生"，你在那兒呀？

二月廿七日　星期四　　　　

正式玩完！　pbase會正式收費，以後又少了一個可供上載的相薄．現我已開始轉移陣地，希望今次可以捱耐d喇~ 唔係將來我所影到的作品就無緣與大家一起分享了...

今日去同BB仔補習，就是有d驚喜喎~~ 佢終於都拎到高分喇... 佢開心之餘我亦有成功感！實在太好喇~~

Yeah!!由於近幾晚我都捱到成凌晨3, 4 點先訓... 所以搞到我一到凌晨兩點就好鬼肚餓．幸好今晚有點心食~~~係阿媽特登買俾我食o架~~~yummy~~~ 開心o既原因唔單止有得食媽咪買o既宵夜，而係有鵪鶉蛋燒賣喇~~ 呢個我一直都好恨食到喇！(起碼已經有成五, 六年冇食過喇~~)

唉... 睇睇o下自己的schedule, 原來我o黎緊一個月都會有排忙喇！一於唔理咁多，以後玩得就玩，做得就做，以後一於寓工作於娛樂喇~~聽日就一於去玩o下先~~

今日下午趁得閒去了Page One書局睇書，原來Page One做緊clearence sale，好多書都係由$10--$50低價出售喇，此舉的確引來一大批買平價書的人光顧~~　話說我又去睇書理學書，今次係去睇一本名叫<100心理測驗．玩到底> 記得其中有一章是測試怎樣向人示愛的．而分析結果有三．其一提及怎樣由朋友變成戀人時，竟提議直接向心中對象施予突襲--吻下去．書中是這樣說的："你可向心中的對象直接吻下去，當然也要有換來一記耳光的準備．" 我本人覺得呢個分析好無聊... 就好似賭博中的大小一樣，不是開大就開細！若然你的心儀對象也喜歡你，那麼你突然吻下去當然是沒問題；但倘若你的心儀對象對你根本沒甚興趣，那麼一吻之下換來一記耳光也是可以預見的... 問題本身是假設示愛者是不知道成功與否的(我看實際情況也是)，但分析的"答案"卻已根據接受與否作起點分析．那麼，這個所謂的分析便等於廢話罷了！

二月廿六日　星期三　　　　

昨晚幫朋友搵html code, 原來我o既直覺都唔錯喎，一估就估中... 不過講到尾，始終都係要靠我o既強行 -- "抄o野" 再加下我o既改良先整到喇... 呵呵~又收多一招為己用~

唉... 原來自己想像同現實係有好多出入o架... 實在有太大差距喇，簡直係完全兩回事！本已一心安排好的，現在只好打掉了，放棄或再另想辦法~~~別在夢遊，寄情工作吧！

今日終於都叫做搞掂今個星期o既presentations... 但下星期又有功課要交>.< 不過難得要去圖書館搵書，一於苦中作樂一番．借返本心理學書睇，睇睇o下覺得有一個好嚴重o既問題，原來我一直都唔知鍾意睇"行為心理學" 抑或係 "人格心理學"... 不過冇所謂喇，因為我對兩者都鍾意，只要於我作"研究"有用的我都想睇，想學~~=P

二月廿五日　星期二　　　　難題...

最難係乜？有人可能會話解答問題咪最難o羅．不過對我而言，解答問題反而可能係最易o既一環，因為要找出問題/發問問題係更難的... 但無論諗問題難或是發問問題較難，最難的莫過於發問問題及解決問題同時進行(因為一般的情況下，人若然懂得解決某問題時便不會發表出來的)... 而昨晚我除了要繼續努力於我的presentation之外，就正正面對住呢個"問題"，多煩人呢~~~~~x_x

補回昨天的：除了壞之餘，近日亦常聽到女孩們常說她們的直覺是十分準繩的！真的是這麼萬害嗎？不過，這次算妳們猜對了~~>一笑<~~

慘喇！夜晚上pbase upload相時，竟然發覺爆o左acc... 唉，終於都爆喇！成160MB，不過even我開多一個acc都upload唔到相上去，唔同pbase已經唔再俾人upload？？ or 已經密謀收費呢？

哈哈~~ 估唔到上兩段o既一些"小補回"，竟然可以惹來咁大回響，好o野！(我果然對生事呢方面好有天份...=P) 不過都好，at least我知道我呢個diary原來又多了捧場客~~~^^　謝謝~！

今日下午同朋友講開去花卉展影相... 講講o下又話要組隊去影~~ 呢個諗頭係我講o架！一王人拎住部digi. cam有講有笑，唔錯呀！夜晚又被我睇到區陽祇霽之<四九三十六>展覽show... 一於決定星期日(暫定)去睇先~~~有興趣o既朋友仔一於約埋o個日去遊山玩水，大玩一番！！

二月廿四日　星期一　　　　空槍上陣

曾經何時聽過友人說"空槍上陣"，點知呢四字詞今日竟然應用o係我身上．話說今日係我o既presentation o既日子，但係由於我要交application form的關係，我地o個組就o係準備不足o既情況下present了... 可幸的是整個presentation都總算過得去~~ 不過咁就被我發現原來我有準備同冇準備之下present都係冇大分別...=(

發覺近排太多人話我"壞"喇，短短三日已經聽到成十幾次壞喇... 唔通我真係咁壞？哈哈~~

今日被人利用了兩次... 我重發現我有個"新代號"叫做"F-100" o羅...~.~ 哈哈~ 唔知第日大家d名都變成代號好似"330"咁...呵呵！

夜晚睇到一個劇集中講及做阿媽o既唔見o左對子女，最終找回後竟各自出一部手提電話俾佢地，之後有一句對白"隨身攜帶，唔俾唔帶"，覺得超抵死~~

夜晚做DSS powerpoint時超級頭痛，正確位置係左後腦．好痛，亦都好辛苦... 而家o個頭o既感覺就好似紙一樣咁薄，被風吹一吹都好似裂o左一樣．好辛苦，但又要趕ppt，有冇人可以幫到我喇...... >.<

二月廿三日　星期日　　　　

我對夜晚果然特別有靈感，興起又寫多遍後悔新見解，呵呵~~又係廢話o黎o架~~

凌晨竟然訓唔著... 聽聽o下收音機發覺原來星期六o既凌晨節目係最o岩我聽o既！分別有"一切從音樂開始"及"輕談淺唱不夜天"．重記得昨晚前者播o左一首由台正宵 & 周慧敏合唱o既"Sometimes when we touch"的合唱版，雖然都唔錯，只不過呢個唔夠原唱者Dan Hill o既演繹得咁"澎湃"及oldies feel~

今日下午去了九龍灣，做一樣我一直好想做但係我又冇時間做o既o野，就係打波喇... 哈哈~今日都算係咁喇，曾幾何時有我, 偕哥哥&斌哥仔一隊都可以贏住康爺, 納爺& 趙大爺佢地．若冇記錯，我重有一記漂亮o既假動作同時呃到兩個人呢...hehee~

下午時記得友人同我講過的一番話，大家都認為朋友好聽d o既定義係"互相幫助/扶持"，唔好聽就係"互相利用"．其實誰利用誰我倒也沒所謂，因為某些事情你認為在利用緊某人時，而某人覺得或都有意這樣做時，那就不再算是被利用了... 這只不過是假意進入"圈套"．　再講，若然我真係咁蠢，輕易地就被人利用了... 那麼我寧願被朋友利用總好過被唔識o既人利用喇~~"死"o係自己朋友手上總好過"死"在別人手上~~ 最後，誰正在利用誰，未到最後都係一個未知之數喇... =P

二月廿二日　星期六　　　　仔，哥，佬，爺

夜晚去睇朋友仔o既網頁，睇到一個可以測命o既連結．好奇o既我當然即刻走入去測o下喇~睇完結果又覺得幾準喎... 核睇o下自己條命係點就要去睇睇喇...=P

<無聊話一則> 何謂"仔，哥，佬，爺"呢？事緣某日我去同BB仔補習時，我o係佢屋企食件沙琪瑪(即馬仔)時，佢即刻話"唔好食我個朋友，馬仔！"(即係佢有個朋友叫馬仔)　之後我就諗，以前細過我就會叫同學仔做"乜仔"，好似"張仔"咁(<~~呢個係我細過叫阿Dave的花名)；到我大學時就會叫"乜佬"，"乜哥"... 再大d就可能叫"乜爺"好似"康爺"，哈哈~~ 唔知大家有冇發現呢個咁得意o既稱謂呢？^^　(以上只適用於男仔身上，因為本人小時候是讀男校的~)

黑暗係殺之不盡o架... 話說今日行經旺角某商場，縱然眼見已經冇晒翻版碟... 但係只要細心留意，就見到原來翻版活動依然存在．只不過係有人利用走火通道做掩護，將碟放在這重要地方，之後就搵人扮行人拎貨交易...

我始終都係有橫財運！當我加上邪邪，我就更加有橫財運~~呵呵~~ 話說我同邪邪準備離開時，竟然在大大間商場入面，幾百人行緊o既走廊到見到$$，對$$敏感o既我當然唔會睇漏眼喇... 計計o下，上次同今次加起上o黎已經係我所拾到o既最多... 希望邪邪兄聽日贏多d喇！

夜晚興起去了堅尼地城一趟，原來o個可以近距離睇星o架！感覺就好似好近天空一樣... 今晚重睇到成廿多粒星星呢~~~ 所以有時胡里胡塗都有新發現~~~ 基本上我一直都鍾意去新地方，只不過我還欠一個"藉口"然而，嘻嘻~~^o^

二月廿一日　星期五　　　　

一早就收到個game，都幾好玩喎~

有d o野技入o左就退唔返... 就例如今日睇<神兵>時，已經見到佢地o既"呃錢大計"．佢地正式話<神兵3>將會o係八月一號漫畫節首日發售，因為冇理由追到<神兵2>而唔睇<神兵3>o架嘛，係咪；又例如友情咁，當你朋友有難(唔係雞毛蒜皮這些小事)時，亦會第一時間飛身救助，因為話到尾都係自己d好朋友，冇至由見死不救o架嘛，係咪；感情亦是...

今日一連開了兩個會，足足四個鍾喇！雖然有一個唔係太成功... 由於我地準備不足，但幸好我地都有即刻補救．希望重"為時未晚"喇！~.~　夜晚返到屋企都有d"頭赤赤"，搞到我都冇晒心機做powerpoint...

夜晚有朋友仔send了張相俾我，話可以見到d特別o野... 點知我今日太累，竟然全不能集中精神... 不過最後有朋友仔話我知原來真係睇到o野架~~大家都去睇o下，試o下睇唔睇到~

有感近日為了交功課同開會... 多番推掉及忽略了朋友仔的聚會．不過我都冇法喇，實在太忙喇... 唯有希望你地能夠體諒我喇~~　Felix & 阿牛，在此講聲對唔住呀！

二月廿日　星期四　　　　

今早決定不搭車，試o下再用腳行返去CityU．又真係喎！o係寒冷o既天氣下行路係特別醒神d喎~~ 行到返去即刻精神晒... =)

放學又行返屋企，途中又收到一個電話，內面係有一把好老好老o既聲音... 呢次絕對唔係我朋友，而係我以前o既一個客！最估唔到o既係當我話佢知我已經冇做o既時候，佢冇即刻收線，重追問我去o左邊間．雖然呢d可能係禮貌上o既回應，但係我好似聽得出我無論去o左邊，佢都重想搵我"幫手"咁... 哈哈~ 估唔到半年有多後重有客搵返我！妙呀妙呀~

下午早到柴灣(其實係有計劃地早到~)，一於去多一次柴灣公園影相．一影又影o左成一個鍾喇~~ 不過今次都算收獲豐富！！　因為我影到d我一直想影o既o野~~呵呵，不過我都要冒著"空襲"同滿地"地雷"o既危機至影到~

夜晚同Rick.Choi去了食飯，一食就食o左近兩個鍾，當然主要係傾偈喇... 原來，嘻嘻哈哈咁過d時間係過得特別快喇！希望冇悶親蔡老兄喇~

二月十九日　星期三　　　　

回想起近兩星期幾常捱夜... 捱到成三, 四點先訓，諗起都有d殘忍．重記得上年返工o個時我晚晚都準時十二點休息，七點半就起身返工... 呢d先係正常o既生活！相反，而家返學竟然晚晚四點先訓，簡直係失常... 點解會咁o架？？>.<

昨晚竟然收到一個電話，但係把聲係有d陌生，令我猶豫... 點知一問原來係Rick. Choi，佢已經到o左香港．又有一個朋友返港！！哈哈~難怪阿媽又頭痛，昨晚先同朋友餞行，今日又有另一個朋友返港... 如是者又一小統計出現，單與從外國回來的朋友出街吃喝玩樂，一年中已佔了好幾十次呢... 呵呵~~ 下一個將會返港的應該係Ian哥，好掛住你... d漫畫 =P

今日先知道原來我以前o既補習老師搵過我... 打返電話傾o左一陣偈，哈哈~ 知道大家都"life goes on"~~ 不過最正係佢講o左一句："以前我補你，而家你補人地..." 忽然間又覺得時間真係過得好怏，轉眼間又過o左好多年！唔知好多年後我重會有邊幾位係我d知己呢？唔知重有幾位係我o既朋友呢...

二月十八日　星期二　　　　

唔知大家知唔知我最鍾意o既影星係邊個呢？　係！就係尼古拉斯基治(Nicolas Cage)．今日返學時，邪邪拎o左隻Nicolas主演o既8里米感官謀殺(8mm -- Eight Millimeter) 俾我，實在係太開心喇... 又有得睇佢d戲~~^^

今日下午同鄧生傾偈，發覺原來今年短短兩個月之間，我已經聽到好多"cases"，感覺就好似完全開正我o個瓣咁... 哈哈~ 聽多d除o左可以令我有"用武之地"外，又可以等我用返我所聽到o既案例幫助其他人．不過問題始終都係"能醫不自醫"，無用！>.<

下午去了柴灣公園，難得早到兼且有帶相機，當然要影返d相喇... 只可惜我影唔到十張就冇電... =(

下午同BB仔補習時，竟然發生了意外... BB仔忽然間流鼻血！！！　不過，不知怎樣的，我竟然出乎意料地冷靜，只縱容地叫佢用紙巾塞住就算~~哈哈，真不負責任呢~~

今晚同斌哥仔餞行... 當正苦惱於去那裡吃時，行行o下又去返"元禾"食．真係一係唔去，去親又玩返以前o既遊戲-- "殘酷遊戲"．真係即頭當o左呢到係我地o既專用猜枚場地咁...呵呵~~~ 不過今晚康爺強勢呀！！竟然一鋪都冇輸過喇...~.~ (記住！！只有康爺一個全勝，係冇其他人o架...=P)

夜晚收到Jeffery哥的一個forward url... 雖然我唔應該o係呢個多事之秋post出來，不過我實在覺得太好喇... 所以最後都決定post出o黎：


愛一個人,
你唔會擔心佢咩樣~
你唔會擔心佢有無錢~
你唔會擔心佢有無暗病~
只會擔心佢接唔接受你o既愛！

二月十七日　星期一　　　　

近排都好鍾意聽一個歌手o既歌... 簡直可以用聽完又聽o黎形容！而呢幾日聽得最多o既歌就係呢首，呢首歌本來係佢作曲作詞o架．不過唱o既唔係佢，之但係今次有機會聽到佢本人唱返呢首歌，而且重係以另一種方式o黎演繹．在色士風o既伴奏下簡直係呢一種味道，再加上中間有段純音樂solo好正，但係好短... 點都好~~呢首歌絕對係我近期首選必聽！！由於呢首歌太好聽喇，所以昨晚我便搵個歌詞出o黎睇睇... 點知一睇發現d歌詞可以"套"落近排一個朋友身上，最重要係fit到漏油~~ 其實重有<有人>, <接受我>等歌詞都可以逐一代表我身邊朋友的景況．

Lucky~~~ 今日下午無啦啦竟然收到一個好消息，就係可以去睇Eason Live！！　我當然"放棄一切"趕去一睇喇~~ 最重要係免費飛竟然係貴價飛，忽然間諗返起上個月睇學友時用o左成幾百蚊都唔及今晚一張免費飛咁好景~.~)

原來貴價飛真係好好多o架~~ 就連影相都靚好多~~ 勁滿意今晚影o個d相！！(遲d一定會upload上我相薄~)　

17-FEB-2003 睇o下連Eason都話d相正喇~~

又一小統計，今年度我已經一個月睇一次演唱會喇，唔知下個月會唔會再有演唱會睇呢？^o^

二月十六日　星期日　　　　

今日又upload了一大埋相上去，而家已經突破了500張呢個大關喇！！

今日睇心理學newsgroup睇到一個測試性格o既測驗，應該幾好玩架... 快d試下~

近日我發現o左一樣o野，就係我飲茶除了密o左之外，我同班朋友重越飲越"大"... 所謂大者，其實係我地所坐o既table．由此至終我都係係得4-6個人飲茶，之但係我地所坐o既地方就由四方的變成一張可坐一圍o既table！！(大家話誇唔誇呀~) 重有o既係我地有越食越多點心o既問題... 可能正正因為咁，所以我地而家連一張big round table都可以擺滿了點心，而且重要向高空發展呢！

夜晚同同學仔傾偈，睇其友的相薄先學會了一種新而酷的影相方法，名為"電筒寫字大法"... 超正，有機會一定要試下~~~~XDXD

前晚同友人傾偈時講到"每個人都在玩緣份遊戲"，我都好認同呢句說話... 不過有時緣份呢d o野真係話o黎就o黎... 好o既唔提(因為都會令兩個人開開心心咁大結局，冇o野好講)　相反，不好的叫做"孽緣"，這會給當事人經歷種種負面感覺如：尷尬，害怕，嚇壞等等... 有時真係想講句，可唔可以唔玩呢個"遊戲"呢？？　(忽然間感覺到一個人是多麼自版自在呢~~ 與冇拖友的人共勉之~.~)

深夜去睇睇我個組織BOB入面o既留言版．唔睇尤之可，一睇之下... 嘩嘩！不得了，不得了... 再一之証明了人言可畏(或可能係事實喇~)~~呵呵~~

二月十五日　星期六　　　　頹廢18小時

何為頹廢？我都唔知... 不過我知道我昨天又捱了一晚通頂了．(基本上寫這遍日記這刻亦昤呢一個通頂了，因為已是凌晨四時正了)

話說昨晚探完康爺同食完飯之後，我就走到觀塘會合唐哥哥，納爺，趙大爺&偕哥哥... 一大班仔就走去唱K，等o既途中重有菜蜜飲呢~就係咁就開始了我地一干人等o既<頹廢18小時> o既下半部... 唱K唱通頂！其中發現一樣好勁o既o野，原來偕哥哥係乜歌都識唱o既人喇！！

凌晨近五點時，由於我地只報了5個人頭而實際上有6個人(康爺後尾先o黎)，我地唯有搵d人落街走走... (<--勁鍾意呢個戰術，因為1)唱幾個鍾已經唔想再唱，2)可以慳返好多錢！)同康爺落街走走傾o左一陣，o係漆黑o既凌晨行街感覺好爽！大家都又可以無拘無束咁暢談一番．(雖則我地都傾得好大聲,sorry~) 之後再搵埋我地o既"老將"趙大爺傾傾"作戰計劃"... 最後重傾到不停哈哈大笑呢~(救人理論幾乎再次被肯定)

唱完K後大家都好似重未夠喉咁... 接著便去了做我們近排經常做o既o野-- 飲茶．差唔多一星期飲了五次之多！真係"見仔重多過見女"~.~　經過我地狂搶叫山竹牛肉後，我地附近o既食客竟然遲遲仍冇得嘆牛肉...XDXD　最好我地以高達DX作為我地今次頹廢18小時o既閉幕~~

夜晚upadte緊hp時糊里糊塗竟然有o野玩... 打o左場心理戰呢！足足打足成個鍾頭喇，但係呢一個鍾頭絕對值得！因為我可以由此肯定一d o野... 就係我將會趕唔切交功課喇...>.<

二月十四日　星期五　　　　Happy Valentine's Day!!

今日雖然係day-off，不過我都要返學校開會偯presentation．今次偯o左約兩個鍾，不過最勁係我地最後要借成廿多本書o黎做參考！呢個係我從未試諗過o既借書數目呢~

今日近黃昏時竟然收到好幾個電話，都係叫我出街... 唔通大家知道我今日冇街去，所以都搵我出街？？不過好可惜，今次佢地全部都估錯喇... 呵呵~~ 我今日係有約o架！(雖則唔係因拍拖而出街，不過總算唔洗咁悶呀...=P)

夜晚去o左一個好遠好遠的地方-- 鴨俐洲，本來諗住一心去探望o下康爺o既工作地點，點知我係去錯地方．不過因禍得福地我因此而行經鴨俐洲大橋，順便可以影埋相呢！同埋我估唔到我可以o係鴨俐洲行o黎行去，(忽然間搞到好熟o個到咁~)途中重被我發現一個好有格調o既公園呢~.~

二月十三日　星期四　　　　

今日又同康爺, 天祐, 納爺, 趙大爺等去飲茶... 今日經過狂食一輪後，埋單時出乎意料地平．由於近排經常去飲茶，搞到我好似愛上了吃點心似的...=)　

話說今日同朋友們飲茶時，納爺又成為我地o既虐待對象，先有"o急汁事件"，再送多個"男人最痛"俾佢.. 不過鬼咩，鬼叫佢埋咡時唔照我地計劃做，講"唔該幫我地埋o左張單佢喇~"　呵呵~

今日收到一個好正o既url，記得要輸入自己個大名先開始呀！！

拍拖好... 拍拖真的好嗎？夜晚問d已有男/女朋友o既朋友聽日點過，點知就有d話悶；有d就話灰；又有d話煩... 但係一個人過又真係有d眼冤喇，成街都係一對對咁，睇到真係既羨慕又妒忌．但係最慘可能係... ？？？

二月十二日　星期三　　　　

今日同一眾朋友仔食飯，有傾有講有笑，呢個先係我一直響往o既情景！當然最開心就係聽到同學仔的"好事近"，多謝妳杯凍茶喎...XDXD

下午食朋友仔俾o既朱古力，拆開錫紙入面竟然有張紙仔，入面寫著"Why use words when a kiss says it all?"　好，十分好！好係呢句寫得好；十分好係識得諗呢個方法o既人，果然有腦！

今日下午收到一個通知，話我拎唔到離職証明，雖然有d傷心... 但係我感覺上話我知，我今次贏o左d友誼~~ 因為我知道其他同事都有幫我~~

夜晚睇<笑傲江湖>時見到有一幕係聖姑坐o係一間房入面撫琴... 但最重要唔係呢個，而係成地都係黃色o既雞仔！一隻已經夠cute，而家直頭係成間房都係雞仔，呢個場面實在太得意喇~~~~~^.*

二月十一日　星期二　　　　

今日下午到了九龍灣飲茶，好耐都冇去過飲茶喇，難得重同埋班朋友一齊去...開心開心~另外今餐茶都意外地抵~

今日同細路仔補習，出乎意料地順利兼且進度奇快... 剎那間睇到原來一個人"生性"起來係可以有咁好o既效果．若果以後補習都可以保持住呢個順利氣氛下完成，我諗我輕鬆得多之餘，細路仔又開心，最重要係令父母放心呀嘛... 簡直係多贏局面！

夜晚多得Felix哥哥耐心地教我點開FTP，幾經嘗試先有d成績... 最後加上康爺o既一把，我終於開到FTP喇！！以後大家都有好日子過~~~~可以狂交換資源~~~~在下十分多謝兩位大人的幫助~~^^

二月十日　星期一　　　　

今日終於都整多個網頁連結，名為<我的朋友網頁/連結>．故名思意我係將我所識的朋友網頁連結在一起，好讓讀者了解我本人之外，更可以深入了解我的朋友...hehee~~有d朋友仔的網頁加了密碼，我不敢隨便公開，但若然有朋友想我張貼其網頁連結，"依貓"給我便可^^　(若張貼了閣下連結而不滿者，可與我聯絡，我必立即刪除其連結)

今日係semester B以來第一次presentation，表現尚算平平... 但最令我驚訝係我以為表現好好o既人原來比想像中差．不過可能係太耐冇present，或者太緊張喇~

二月九日　星期日　　　　"煩"忙之日

今日一早去幫人補習，臨走前我竟然講錯o左一句說話，搞到我好後悔... 已經係好幾個月冇咁失言過喇！而家唯有希望大家都時運高，聽唔到(聽唔明都得~~)．

下午被激請參與應對謀略，感覺就似四師會帥，獻策救君．被人認同真的好開心... =)

今日在完成presentation的途中，有好多好多事情發生... 平日想忙都冇得忙，而家想專心做一個功課竟然有好多其他事情煩著．不過煩o下都好，可以睇o下我在壓力下會唔會出錯... (<~~平時見工必備條件)　同埋亦可証明我在眾多位朋友中都有ｄ地位...=P

夜晚五條佬(or 4仔1佬)去o左花虛吹水，吹吹o下竟然可以將大家中學時d開心o野逐一咁講返出o黎笑~~~ 然而所有人都唔係讀埋同一間學校，但我地笑聲依然不絕．(例如：主場客場；受唔受讓；真假高潮；玩名之最... )

二月八日　星期六　　　　祝牛大哥生日快樂！！

今日飲完婆婆特別調較的特飲後，把聲果然好了很多！(多謝婆婆~~)

今日約了朋友去太古城食飯，我見比約定的時間還要早，咪決心一於到我以往的公司"聚舊"一番順便拜託寫返張離職証明喇，點知去到一行時又搵唔到我想搵o既人，要去另一間大行．去到竟然見到原來所有人都重新分配到不同的分行去... 閒談數句後，我終於都等到我想見o既人，重搞掂埋我想要o既o野．最意外係我又有利是收~唔通細過真係多d好處o架~~=P

為了不再殘虐我個喉嚨，我成功遊說朋友們今晚不吃Pizza Hut，改去睇戲-- <行運超人>，套戲都唔錯o架，但唔係超好睇o個隻．之不過睇完之後我地去食宵夜buffet，然而今次竟有炸洋蔥圈喎，於是乎我咪不停咁食... 最後又搞到我勁飽之餘重"傷患復發"，聲音又開始沙啞喇...>.<

今日超得意之相-- 勁細shopping車

二月七日　星期五　　　　

今日返學校傾E-commerce 的presentation，不過竟然連最簡單的definition of E-commerce 都唔識... ~.~ 開完會之後又同康爺去o左旺角找尋Digi Cam. CCD protector，幸好最後都被我地搵到，重要平過百老匯呢！

之後同康爺去o左"凱聲"做運動．今次玩返高達DX新版，頭兩次都係去到第四關就作戰失敗，但係第三次竟然去到第十二版，實在太好喇~~ 差一關就可以爆機了~~~^o^

傍晚正想做功課o既時侯竟然有收到電話，重要阿牛話去吹o下水，飲o下o野，只可惜我的喉嚨還是這麼的"良好"，試問我又怎敢奉陪呢．另一個電話好搞o野，又有人話我鍾意了某某人... 最可愛係當我問有何證據時，竟有說沒有... 那時又令我回想起月前的笑話．說了我喜歡的是那類型，但又不予相信，真拿她沒輒！

二月六日　星期四　　　　

今日繼續身體奇差，聲音啞，身體虛，又成日想訓喎... 於是咪決定今晚要早訓，夜晚九點開始就訓，訓到成十二點起身之後，竟然連續三個鍾都訓唔到... 最後又好似搞到捱o左半晚"通頂"咁... T_T　就係訓唔著呢段時間，忽然間諗起張學友o既一首歌...

失眠夜


還記得初次相約　手牽著手一起賞月
和妳渡過短短的一夜　盼望時間能多些
讓我擁有多一個夜　讓妳也能夠了解
我的心情　內心的世界　我的感覺

總是在一個失眠的夜　我就會盼望妳的出現
你有美麗溫柔的雙眼　我可以看見
就是在一個這樣的夜　我就會對妳特別思念
我願意拋開身邊　所有的一切　愛妳多些

還記得初次相約　肩並著肩一起談天
和妳共渡最美的感覺　盼望時間能慢些
讓我擁有每一個夜　不管是月圓月缺
只要是有妳就有一切　浪漫的夜

二月五日　星期三　　　　BOB之聯誼BBQ

係！係我錯... 天作孽，尤可算；自作孽，不可活！呢幾日連返挂夜夜訓，今日一起身便得到報應... 我把聲"拆"晒，好辛苦兼且喉嚨勁痛...>.<　另一個自作孽係今日去搭火車時，我竟然計算錯誤，本來我預6 分鍾遲到時間，原來係太... 太少喇！幸好我地最後都冇遲到... 哈哈~希望當事人唔介意喇~~~XDXD

今日我地成班人去o左大尾篤BBQ，呢次算係我地BOB第一次一大班人o既聯誼活動(以我加入後計起~)．難得有得去大尾篤呢d咁接近自然o既地方，當然就要影返d相做留念喇！今日我就影o左八仙嶺，同日落，原來個"咸蛋黃"真係好正o架！唔怪得咁多人話要睇日落喇~~~~

傍晚離開大尾篤後便到達大學-- 香港中文大學，搞到今日好似係遊山玩水咁(雖則係)...=P 之後就去o左canteen食晚飯，原來o係CU食焗飯晚餐係有甜品送架，加上d員工o既友善態度，再一次証明今時今日o既服務態度真係唔錯(真係多得華仔喇~)　食飽飽便到其中一個朋友仔屋企參觀，由於他家(宿舍)在山頂，可以睇晒成個夜景，影相癮大起的我當然又即刻影o左幾張喇！其後又有教授uncle 載我地返學校宿舍，再一次見到住大屋o既場面...~.~　當然，最可愛還是看見母女互相"雞同鴨講"的場面，hehee~~　最後又要麻煩auntie車返我地去火車站．(真係有d唔好意思，要教授做我地班人o既"柴可夫")

二月四日　星期二　　　　~我大個仔喇~

今日係我加冠之日，終於廿一歲仔喇... 寫今日o既日記時，我忽然間想入d廿一歲先可以入o既賭場，如雲頂高原賭場... 哈哈~ 雖然今年生日所得到的祝賀較去年少，但係都過得好開心... 因為今年生日係過緊年，而上年生日我係要返學o架~

夜晚又去尖咀影相...心想已經係第六次去尖咀喇！不禁令我有點麻木(無奈)，不竟我玩dc都只係4個月左右，但已經第六次去TST影相．不過原來Felix哥哥帶我地去o既地方唔係一般o既地方，而係一個好正o既地方... 如是者，今晚我地又"chop chop 聲"呾影o左好多相...嘻嘻~生日可以同屋企人&朋友一齊過已經好夠開心~~~

二月三日　星期一　　　　"立春天明亮　樂聲飄雲上"

真係唔明喇... 明明係聽日先生日，但係呢兩日已收多好多句"Happy Birthday!!"雖然我聽到祝賀都好開心，但係我後日先係生日喎... 咁早同我講又有惴o野用呢？(雖則大家都係睇ICQ notice先知...)

夜既被康爺"召喚"出o黎，點知走o左出o黎旺角佢竟然話想走人... (激死我喇！)　幸好我提出去玩手指指先將沈默o既氣氛打破，兼且令康人精神一振咋！不過最抵死，我地o係去機鋪o既途中，Betty竟然被"同性相吸"，重興奮得狂追上來呢...=P　送別各人後，我同康爺去玩高達．由於冇晒新版，我地只好玩舊版... 但係咁樣我反而玩第六關，都算唔錯喇~~~ (話晒都係personal best喇~) 臨送坎康爺前又接到電話，最後我同康爺竟然o係條街到傾足成半個鍾先走，重傾緊"兩男一女"o既問題添，嘻~嘻~(應該係反串"兩女一男"先o岩)... 不過唔知康爺係咪重繼續呢？XDXD

二月二日　星期日　　　　　反撲歸真

凌晨收到一個"讀者"o既來訊(ICQ)，話我今個月個background太花，好睇先難到...於是就意見接納，立即改革！就變成而家大家所睇到o既background喇．即係今日o既主題，反撲歸真．因為我霎時間我都唔知搵邊d相/background去代替呢...~.~

下午一時正到達親戚家裏食開年飯，食完開年飯就當然玩返兩手衛生麻雀...(其實只係大人打，但忽然間竟預埋俾我地後輩玩) 橫掂正悶得發荒，所以一定要玩，順便與表兄弟姊妹聯誼o下，因為實在太耐無同佢地一齊玩喇！(對上o個次係4/5年前)　一開始就以輸少當贏的心態去玩，因為我的表親實在太強喇．但係世界總是這麼可愛的！一開牌我竟然有成七隻么九牌，當時o既心情就好似玩sina時一樣--點都做十三么！點知在戰戰兢兢的心情下的食出人生第一鋪國士無雙，係玩真鋪喎！但係等叫糊時的心情我知道我自己係心跳加速舷好勁... 縱使我依然扮到若無其事咁~嘻嘻~　到後來我又為了人人高與，我又特登放槍俾人食，雖然有贏有輸，但感覺就好似操控自如咁... 我要贏就贏，想輸的亦得！感覺太好喇，呵呵~~~(註：筆者寫到這裡時已開心到極點，神智出現間歇性不清．始終筆者都是一個不太懂我國國術的人...=P)

下午告別海怡半島後，我便出發到灣仔，展開我今日人生第二場約會，搵納爺&阿茄~~ 由於帑爺遲到，所以我同阿茄去o左玩Photo Hunt．但係我叫住佢唔好玩"某d類型"時佢又唔聽... 竟然嚇到佢唔敢睇住玩．(唔睇又點玩到呢？)但最後我地依然可以簽名留念...^o^　夜晚去睇煙花，始終去灣仔睇唔洗同尖咀班人迫得咁辛苦，而且個位又超靚，跟上年睇煙花的感覺一樣咁正~~~ 只可惜我前面有個"媽咪"帶住個仔阻住我影相，搞到張張相都有佢個頭出鏡...>.<

去完Spaghetti House食飯，再會合康爺，之後又行落TST玩"打拳機"，睇o黎我已挑起佢地對呢部機o既癮喇...hehee~　雖然晚餐食得好遲兼且食得飽飽，但係我已約o左Felix哥哥食宵夜，唯有"照去馬"．真係唔行過唔知，原來一向過o左十二點就一片死寢o既旺角女人街一帶，今晚竟然可以變成一個跳蚤市場，各類食物及雜貨皆有，而且人流之多可比美日間的旺角呢！

二月一日　星期六　　　　　新年快樂！

o係呢到同大家講聲："新年快樂"先！喇喇... 今次我o係網到同大家講咋，而0係同特定o既人講o架...=P

凌晨冇o野做睇黃凱芹o既演唱會，除o左見到好多當年寶麗金時代o既姐仔之外，重發現了一首我一直認為係黎明唱o既歌，原來係黃荊芹唱架！呢首歌就係-- <情深緣淺>　講開又講喎，佢個live d氣氛又真係幾好喎~所以有時為o左睇演唱會真係貴貴都捨得o架...=)

今日可算次忙碌的一天，由於我昨晚凌晨四時已看了黃凱芹Live，看到六時才正式睡覺．今日一大早又起身，在家吃完開年飯後再到爺爺家吃開年飯...直到下午三時許才回家，會合外婆後便乘車到寶達-- 一個很遠很遠的地方．晚上又再次"應邀"到TST與康爺, 納爺, 祐哥哥& 斌哥仔"拜個年"，大家一齊"殺戮一番"(玩了WorldCombat)．最搞o野係有一次玩到得返我一個o個陣，我連續射o左幾排空彈先kill the stage boss~反之納爺係一槍一件，乾淨俐落！不過之後我地到"北京道"玩，納爺竟以遊戲勸阻的"危險動作"打拳，重要係慢動作仆菅部機到...>.< 最後當然以是日(的相信係後無來者o架喇~)最高重量0.567kg完成造拳...=P

夜晚，我最唔想的事情發生了... 我終於都同人"開拖"！不過幸好最終都冇o黎真...T_T

　　　　　　　　　<---back　我的資料　　簽個大名啦 !