September2002

　　　　　　　　　　　　　　　　　　九月　SEPTEMBER

九月卅日　星期一　　　　　

好驚呀好驚呀...話說今日下午當我去o左聯合o既時候，忽然間電話響喎，咁我咪聽o羅，點知一聽之下有人話："我係...乜乜百萬富翁...albert，而家有條五十萬o既題目問我，曹植o個首七步詩係乜名？" 當時我重未知係乜，加上我本身對呢d又唔熟...(不過冇理由有人會搵我答呢d問題o架...?!) 我希望只係人地玩電話喇，若然係真就真係害o左人喇...sorry！BTW, 有邊個可以話我知個答案喇...???

今日真係難忘的一天呢，先有下午的"百萬富翁"，夜晚同'敏姐姐'出街去到左敦時，忽然間又諗到去山頂...咁o岩咁好彩'鄧生'又得閒喎，咪叫佢車我地去o羅... 點知，大家都唔係好識點去山頂，咪諗住去汀九橋睇o下喇．點知汀九橋十二點正又熄燈(Sorry呀'康爺'，我地最後都冇睇邊隻色係最後熄呢~)...最後唯有去o左一個我好耐都冇去過o既地方---龍翔道．記得細細過o個陣，老爸常常車我們一家大細去那裡看夜景呢...事隔多年，從那裡看香港夜景還是這麼迷人，而且那裡還是這麼多人...我地睇o左幾分鍾都唔好意思，諗住快d上返車走人喇...點知呢個時候竟然唔見o左'鄧生'& his family...等o左陣再打電話俾佢，原來佢之前話"走人"係真o架...最後我地唯有搭的士返返去ShumShuiPo，(正確o黎係好彩有順風車搭o羅！)之後行返去花虛傾偈...(尖咀等待之小插曲：話說同'敏姐姐'由魏'鄧生'到去到尖咀等緊估熄燈時，佢不停咁話有o野同我講，不過講講o下又停...勁想知又越o黎越驚...=P)

夜晚又收到個url，係"妖怪占卜"喎...玩玩無防~

九月廿九日　星期日:　　　　　

今日睇報紙睇到有段幾搞笑o既報導，實在有d過份呢！BTW，咁 o岩我最近有個presetation就係關於呢方面o既o野，哈哈~益晒我呢~~~=P

今日終於睇晒咁多套"百分百感覺"連續劇喇...真係好正好正~~~雖則個ending就交代得差dd，不過好好睇~ o係呢到就當然要多謝'鄧生'俾呢個"機會"我上now.com睇喇...hehee~不過睇完戲我又想再睇"Feel100%"漫畫，coz'我記得我以前睇過一本，覺得好好睇...最重要佢描寫o既感情問題好夠現實感，完全冇脫節o既感覺，所以就算冇睇套戲，都可以去睇返本漫畫補返，好值得一睇呢！

九月廿八日　星期六:　　　　　

今日做功課做了整個下午，但最後都只是做了一小部份...做到近17:30，無無聊聊睇電視時見到亞視播緊"遊戲王"，睇o左一陣...印象模糊，差不多連劇情也記不起來...不過我好記得我重未睇最新o個期"遊戲王"呢！

夜晚收睇到個有好多遊戲私網頁，唔洗download o架，試試看吧~

唔知個天係咪有心唔俾我出街呢？話說近日當我想出街的時候，出面就即刻落雨...中秋o個晚就係一個好例子，當我12點幾決定繼續出街就不停咁落...當晚重要落到超大...>.< 今晚又係，難得有朋友放工搵我出去吹水...我一落樓就即刻落雨！好彩我同我朋友都住得近，否則一得又變成"落湯雞"呢．

九月廿七日　星期五:　　　　　

嘩嘩... 原來我到而家都唔識用圖書館d電腦搵去搵書o架！話說我要借本中文書，點知搞 o左好耐都搵唔到本書o係邊...最後唯有放棄問人借．點知咁又帶出第二個問題，就係搵人幫手都真係好難o架！左搵右問最後都搵唔到人借本中文書...好彩最後都被我搵到人借...唉，失敗失敗！(我份功課星期三就到期喇，不過我要等到星期一先有得做，交唔切就冇得畢業呢！我星期一先開始做真係有d冒險呢~)

今日下午從聯合廣場返屋企，竟然見到好多好多人...係前所未有的多！原來附近有新樓盤推出，各代理都有派人兜客... 見到佢地咁落力，我又諗起兩個月前我都係咁...我重好想上去睇睇樓添...不過，最後我都冇去．(今日咋，聽日起唔敢包o架！等我悶悶地去睇o下樓都好~~~=P)

九月廿六日　星期四:　　　　　

今日下午同班新同學去打波，去到一個好少人打波o既籃球場，雖則係咁，但係o個到有好多蚊，而且係"蚊滋"，短短五分鍾，我已經發覺我雙腳被蚊子叮了近30口...起初以為只是被蚊子叮了幾口，一睇之下真的嚇了我一跳！...加上近日又有"登革熱"，真係有d驚...>.<

今日同了兩個好朋友傾電話，無獨有偶，兩個都係長途電話...好開心~~傾o左好耐，今次傾親都係d開心o野...加上今次個電話好清，所以大家都傾得好開心！

九月廿五日　星期三:　　　　　

今日又係要連續咁上七個小時的課...上完堂o既的我真係有d"行屍走肉"，只係拖住疲乏ｏ既身軀去食飯...相比起昨晚的Excel，今日的powerpoint真係有d悶，可能係因為我上星期才用了powerpoint做presentation喇...Anyway，始終都叫做學o左o野~

下午上CCIV堂，終於都被我搵返我個組員，大家都好似幾驚咁...因為大家都知道遲d要presentation，不過又未做過...(actually連題目都未知！)就係由於大家都知道時間緊迫，我地o個team人就開始發揮team-work，o係好短o既時間內決定晒所有o既o野~

今日收到幾個正game，個個都好抵死~~唔玩都要去睇o下~ 超好玩足球game，鍾意足球o既人一定唔可以錯過！！

Sony Game，幫手追返個女朋友~

超勁算命法，好準呀！

嘩嘩嘩...最後呢個唔係遊戲，而係人生十大祕密，好睇~不容錯失！

九月廿四日　星期二:　　　　　

今日上Management見到第二組present得好好，一方面戥人地高興，但另一方面覺得自己上次presntation好差，十分傷心... Q&A時自己又問得唔夠好...唉~搞到本來好想讀Management o既我忽然間有d猶豫添...

今日我共上了八個小時堂，其中五個鍾係由下午一直上到夜晚呢！不過夜晚上城大舉辦的電腦班又真係唔錯喎... 既有用又免費，我而家對excel應用熟o左好多呢，真是不錯，不錯~

原來唔去O-Camp真係有好多問題喇，至少我見得到的有識朋友已經難o左，(當然，而家o既我終算識到d人~)不過就冇去過O-Camp 個班人咁熟．第二樣o野係去O-Camp可以識到好多year 2 o既人，他日有事都有個"大哥哥/大姐姐"幫手呀~ 好可惜，我就係冇去...重要連今晚O-Night都沒去呢！

今日我又有網頁開張喇...Well，應該係話"重組"呢... 得閒可以去睇o下喇~

九月廿三日　星期一:　　　　　

今日難得'阿茄'o黎CityU，咁我又哄到佢同我食一個二人餐(<~~這是我一直都想試的套餐呢！) 當然走到收銀員姐姐詢問時，她卻說那個套餐已不存在了...唉，可惜~又試少樣好 o野喇...>.<

今日諗住要整返好個management report，點知改了又改，轉完又轉，搞o左一大倫之後...臨走前問阿sir得唔得，阿sir竟然話唔係佢想要o個d...搞到我又要從頭整過...T_T

話說最後都終於完成個report，準備走之際，迎而有人向我揮手...抬頭一看竟然係一個我估唔到o既人-- 一個我認為呢世都唔會同我打招乎o既人，(應該講差d就要去到避o個隻)難得人家罕有地同我打招乎，我便立即走前同佢寒暄一返~.~

夜晚又再一次要整動report，之後無聊間去了sina的星座運程，一睇之下，又幾準喎~~ 等等，大家唔好誤會，我只係講工作學業運咋！

九月廿二日　星期日:　　　　　決擇...

今日我print o左好多張決定我未來一年所讀的"concentrated study-plan"，一下子有近十多個選擇，而每一個選擇都可能會危害到我o既將來，(當然亦會為我帶來前程似錦o既未來喇~)不過，現在的我不知如何是好，因為我有興趣修讀的共有七個... 想了又想，諗完又諗都唔知揀邊個好... 點算好呢？

夜晚收到一個好正o既url，係玩記憶遊戲...好似機鋪中文手指指的"快速搜圖"，最後重有分析o架，大家一定要去玩玩呀！！

九月廿一日　星期六:　　　　　●中秋節快樂●

下午難得'魚文'叫我去"聯合"，咪順勢叫去佢Time Square行街...(因為我係好想去Time Square買衫褲~) 點知去到某某特賣場時...見到有廣告說名牌以開倉價發售，誰知特鋆場內是另一回事．名牌的只有少數...(還要舊款的呢！)雜牌，或甚至冒牌就多的是...我還見到Bikie呢！(<-- 我有朋友在上海見到的一個牌子，即Reebok + Nike)

夜晚去了"寶島"食飯，估唔到一年前食到我想嘔o既地方，一年後竟然食得落肚喎...大家唔好估錯，絕對唔係我d"忍耐力"勁o左...而係間食肆水準"自我增值"呢！不過這是當然的，否則"寶島"呢個名子就會絕跡飲食界~

昨晚見到著得靚靚+化了妝的'阿茄'，再一次証明了"女為悅己者容"的呢說話...不過化o左妝又真係"靚o左少少"喎...點解只係靚少少？可能係因為eye shadow唔得o羅...=P (做人老豆o個個，睇到唔好同個女講呀~.~)

九月廿日　星期五:　　　　　~失手，唔好意思~

今日放學就同邪邪去了荃灣"金星"睇佢玩12人版SF2, (超舊game)...不過原來超舊版都唔係咁難玩咋喎... coz'我都過到一關...=P

之後毫同'康康','阿德','老B','大佬','CK','高人'等人去買食物，準備今晚的BBQ...點知買晒o野食先收到電話話冇晒爐...唯有轉去'鄧生'鋪頭燒喇...哈哈~ 最後搞到成九點幾先開始食...跟住'阿茄'又過o左o黎見我地咁多位'細叔伯'喎，跟住就發生o左一件好瘀o既事：話說我地o係三樓燒緊o野食，臨近子夜十二時，'康康'同'大佬'去o左舊金星打高達．當我同'阿茄'出o左鋪頭正準備去"觀戰"時，發覺'阿茄'唔記得拎個佢個"bag bag"(<--抄自康爺的！) 咁我咪叫上面班人掉個袋落o黎喇，點知我見個袋跌得唔係太快，再加上我地係企o係大馬路中間接，咪諗住快d跳高接了便算...點知就是一秒之差，我跳得太早而令到個袋o係我身後"著地"...幸好入面冇乜易碎o野咋！

去完金星之後，我地諗住返返上去繼續燒過...點知o係鋪頭門口又見到'邪邪'，佢重有同成一班人一齊，"規模"重大過我地好多呢！食到成點幾，我地便開始清潔+玩...之後的五個小時都係不停的玩紙牌...分別玩了"鋤大D","啤牌版UNO---Last Card"同埋"潮式鋤大D"(後稱"打冷")直至凌晨六時有車才走~

九月十九日　星期四:　　　　　

今日我日記是我在星期六(即中秋節)才打的，加上星期五晚的通頂，搞到本人的記憶間歇性失去，基本上我也不知自己在打什麼...幸好見了某某人的日記，我終於"call-back"返少少記憶喇...=)

話說今日我可以不用上學的，因為今天只有一堂lecture，而且不上也沒所謂...但是在下最後亦上了．上完唯一的一堂後，我便如常的去食飯，但同樣地遇上同一問題---就是新同學在落堂的一刻已鳥獸散了... 於是我便找其他學系的朋友吃飯，誰知結果與上次的一樣，就是找不到！他們不是正在上堂，便是走了...可惡(好嬲)，可惡(嬲)...可惜(~唉~) 唔通我個人有問題？搞到冇人同我一齊食飯... 而我同班新同學唔夾嗎...天呀，給我一個答案吧！

九月十八日　星期三:　　　　　

今日可算是最折墮的一天了！我竟然有成５個鍾頭的break，都係拜今日o既天地堂所錫...由於有個咁長o既'小息'，本來plan好晒同d新同學仔去睇戲...點知後來又走晒，最後我去 o左電腦室，將我今個semester d notes print晒先去o左3個鍾頭...之後又去o左7樓做功課，最後要去6樓purple zone打機先捱晒呢5個鍾頭呢！不過都好，就係最後去o左sina打牌，咁先幫我升到334萬~

昨天說過要去看演唱會，我卻忘記了今,明兩天是林子祥Live, 我諗佢o既live都會幾值得聽喇... 話晒都已經'退隱'o左咁耐．不過冇用喇，而家去睇又搵唔切人，而且一定得返d垃圾位喇...>.<

今日下午真真正正上o左第一堂電腦堂，起初我以為教HTML的話我一定識，認為一定會好悶... 誰知我最後都學了一些新o野，就係學識更多'色彩'之道，第日我會有我學到o既o野 o黎修飾改善我呢個網頁o架喇！大家等著瞧吧~

夜晚同小師妹傾偈，得知佢有一個'小師弟'喇... 不過聽講好似唔多'正叻'呢...=P 本來今日真係悶到想走去太古搵大家食飯喇，(coz' 我連BU, HKU d朋友都搵埋！)不過最後都放棄此念頭... 得知小師妹為o左d感情事而煩惱，不過我又唔識作出適當的安慰... 搞到佢好似更加傷心咁...o係到講返句'對唔住'呀~~

九月十七日　星期二:　　　　　我要去睇+聽演唱會

終於都做完presetation喇！雖則今次只係第一次，而且只是個開始...不過當present完，有一種無形的舒暢感覺，好似無工一第輕咁~ 講真，今日o個present麻麻咋，因為有好多 o野都未能完全準備及掌握...不過怎樣也好，始終都是第一次呢！

今日終於o係學校見到一個我唔太想見到o既人，事關前排曾在ICQ被此人無緣無故地辱罵...既無奈又憤怒！經朋友勸導+深思後，認有可能是其他人盜用了他的ICQ吧...但今天由於我趕著我的第一個presentation，縱然我們相見，我亦只是聊了數句便'不太有禮貌地'叫他離開... 算喇，pls. forgive me...>.<

話想呢期無乜特別o野做... 好想搵o野玩，只可惜要好的知己都身在外地，還沒回來呢！(你地快d返o黎呀！) 忽然間又好想去睇演唱會喎... 不過睇演唱會真係幾貴o下，而且搵人一齊睇又係另一個問題！你知喇，我唔係睇Twins Live o個d人o黎o架...=P 不過我又真係好想去月8+聽演唱會喇~~~~~~~~~~點算？~~~~~~~~~

九月十六日　星期一:　　

近幾晚都訓得唔好，經常訓到五,六點就開始訓唔著...一直輾轉反側到起床，膦到我呢排都成日冇乜精神... 唔知發夢會唔會係同'早起'有關呢，因為我呢排又真係成日都有發夢喎... 雖然我都有發白日夢，不過我而家唔係講緊白日夢呀！

已經同某某人冇傾偈近兩個月了... 我是否應開心，或失落？我不知道應該用什麼去形容我現在的感覺...但我昨天收拾書本時，我拾到了一張字條，字條裏的一段說話是節錄自一名電台主持的，內容如下："我說過我不再愛你了，但離開你的每一分每一秒，我都不能阻止自己繼續想你！"...

今日收到朋友一個心理測驗，是測測大家對戀愛的心態的... 好玩o架~去玩o下喇~

今日返學諗住為聽日的presentation做一次rehersal，點知我個組其中一個組頭唔見o左隻碟...搞到佢負責的那部份不見了(幸好今天不是presentation的日子)...之後又不停咁傾偈+講笑，最後又要整埋聽日d演講詞... 希望聽日present得好好地喇！

九月十五日　星期日:　　

今日又收到一個好玩o既url，可能係小弟不才，或我個滑鼠太滑o既關係(藉口！)我次次都玩唔夠一分鐘就死o左...>.<

又收另一個url，係一個測試大家的懶蟲度o架~快d去睇o下自己係咪一條大懶虫喇~~~~

晚上走了去'聯合'同Ian以玩Guitar Freaks作餞行... 點知有人走o黎主動玩link play．唉，點知玩得一首歌就玩完！我都唔想o架... 鬼叫我唔識玩結他咩...=P 最後同Ian影o左兩張相...咁又走多個朋友喇(重要住得近o既朋友喎！)...真係不勝唏噓！

九月十四日　星期六:　　

縱然鬧鐘都是在七時半叫個不停，我的好兄弟又大清早勁播twins CDs...今早起床已是十二時了... 不過仍然覺得訓得好唔夠，皆因昨晚我整powerpoint整到成凌晨三時許，幸好都總算給我搞掂o左第一題... 有d諷刺係我臨訓前上sina，竟被我見到'康康'才精神奕奕咁上網打牌...哈哈~

近幾日睡覺都有發夢...而且d夢都好有真實感... 唔知會唔會'成真'呢？

九月十三日　星期五:　　

今日放學後去o左研究下星期的presentation，由於將會係第一次present的關係，我地都好似好認真咁討論...最後傾了三個多小時... 我們還要各自各回家做powerpoint呢．希望我地o既努力唔會係白費喇！

今日上IT堂，個阿sir開始教大家點整HTML喇... 忽然間我的老毛病又發作...就是我對已學會/識的東西沒興趣再聽...上堂變得冇心機...還不時東張西望呢！不過也不怪得得呢，因為阿sir今日先開始教我地HTML的tags... like '<' & '>'，對我o黎講真係有d悶呢... 因為我而家已經寫緊HTML喇，唔係大家又點睇到我o既日記呢...=P

九月十二日　星期四:　　

話說前晚得知昨天(即十一號)我沒有牛奶作早點，於是我便找'康康'飲茶... 原來'康康'已找了其他人飲茶，幸好我搵到個'細姪女'以威脅'康康'去飲茶，否則只有我一個人去飲茶...當然，'康康'可慘了，不但要一個早上飲次茶外，還要八時許便出門，真的名副其實的"飲早茶"呢...>.< 講返，我地去了近旺角街市的一間茶樓去嘆'一盅兩件'... 不過那裏選擇真的不多，真的可以用'一盅兩件'來形容我們吃了多少種類呢！加上味道也不太好，我同'康康'都同意下次去另一間呢！另一件事是...當我吃到九時五十分時才發覺，原來大中小點都是劃一收費的！而當時我們只點了小點與中點...最可惜的是當我知道'真相'時，我只餘下不到十分鍾的時間...'可怒也！'

話說今日上management, tutor把上次那份類似'心理測驗'的功課的答案開估...而我的分數有成80分...唉！原來我是這麼的差呢...(筆者註：這是相差分，分數越高，即死在沙漠的機會也越高．)

今日忽然間多了很多功課與報告... 時間也一下子變得不夠用...加上下午還要補課，(拜昨天的八號風球所錫)可以肯定的是這星期將會十分之忙... 我只希望的是能將重要的事情辦妥... 不要在第一次的presentation就失手！

九．一一　星期三:　　

相信大家都記得一年前o既今日發生o左d咩o野事喇... 猶想一年前的今晚，當我和成班朋友與某君餞行時(我重記得當時係食韓燒！)忽然間收到電話話'世貿冇o左'，當時我只以為係講笑... 甚至後來還以為係香港世貿呢！(真有夠傻呢~.~) 不過怎樣也好，事實終歸事實，我們都趁這刻為當日的不幸默哀...

講返d今日o既o野先... 話說今日我又約o左朋友餞行，所以都有d驚...(pls. refer the above paragraph if you don't know!) 點知由於今日下午縣掛了八號風球的關係，唯有把餞行取消... 突然多了半天假，於是乎我便到SOA搵'康康'，再聯同SOA一眾同事們返敏姐姐屋企打牌... 雖則房間面積極為有限，兼且家裏有電而沒有風扇，冷氣機等冷卻器材... 我們大伙唯有一路'焗桑拿'，一路'打牌'，哈哈~不過好好玩...

九月十日　星期二:　　

今日返學有成4個鍾頭空閒時間... 與'康康','大象'& Carrie姐姐食完飯還有成兩個小時的時間... 於是我們便決定上七樓的遊戲室休息...(途經男休息室時看見室入還是'長期訓滿晒人'，這証明了城大設立這'休息室'是對的！) 由於'康康'話唔玩的緣故，無聊下決定下中國象棋...最後與大象各贏了一局暗棋...然後各自各上堂．下午上Critical Thinking，tutor 叫我地即時上堂做功課... 起初tutor只叫我重複佢講o既問題，本想這是一份優差，(不用答問題，只是照讀返tutor 的問題而已！)誰知第三條問題卻問我，我以為答了便沒事...不過，tutor卻不停的追問落去，直至落堂為止... 真係好玩"即時應變力"呢...但係我好鍾意咁"玩"~~~

九月九日　星期一:　　

今日係Ellen 妹妹生日，o係到同妳講聲Happy Birhtday喇，今晚去食buffet，食得開心d喇~~^)^~~

恭喜呀恭喜呀~ 今日聽到我個小師妹終於開到單喇~~開心喇，所有憂慮都已經消除喇...(我係咪應該用暫時消除好呢，hehee~因為下個月開始要'交租'喇...=P) 希望妳可以好事成雙，後日考試及格！其實都唔係太難喇... 只要熟讀past paper就得架喇...=) 我都係冇乜點讀o架，只係多練past paper咋嘛~~~^^~~~

差d忘記了一件事...我上星期因得閒得滯走了去SDS, 點知俾我book 到band 房... 超正，唔洗錢o架！記得我上年同Eric,'費特'佢地一齊租Band 房都要成幾十蚊，(per hour basic) 而家一蚊都唔洗，真係正... 不過由於當日只得我一人，只有我一個人在打鼓，好似有點兒無聊... 幸好我有部MD機，入面重有隻Drumania III OST，我一路聽一路打，要自我陶醉先玩得開心d咋...Anyway，Eric，你返到o黎一定要試呀！！

九月八日　星期日:　　

今日下午被'康康','納爺'同'祐哥哥'去o左'長沙灣一日遊'，(基本上昨天才去完呢！)不過只差一天，我們昨天聯手簽名的photo hunt紀錄已被人超越... 不過我們今天又再接再厲，又再簽到名喇...不過今次係簽我地'納爺'o既大名上去...=P

哈哈...好耐都冇上sina打牌喇！(因為前排要返工~)今晚上去一玩，竟然就被我食到我從未食過o既大三元！！以前我只係食過小三元咋，實在太好運喇~~~

夜晚做份management功課，發覺好似o個d 心理測驗咁，好得意...我諗我應該會幾鍾意呢科...=)

九月七日　星期六:　　

話說今日一早去灣仔拎返張合格証明書... 之後Ellen忽然間打o黎，傾冇一兩句又話一陣搵我... 點知最後要我打返去搵佢，重唔食飯...搞到我要空著肚子由灣仔行到銅鑼灣...好彩被我發現到d好o野~~就係世貿中心的'PowerStone2' 只係$1/game, 超抵~

下午同'康康'由深水'土步'去到長沙灣... 買o左好多便宜o既文儀用品，又係好正...A4 紙只係$20咋，而且又唔係雜牌喎~~ 去到長沙灣當然去玩o下，打o下機喇... 真係估唔到我同'康康'二人玩都可以簽名，而且重係三玩三簽呢...=P

夜晚去了'意粉屋'食飯，食o左個二人餐．我們起初點了一個豬扒配香辣薯角，點知來了一個BBQ ribs with fried photoes，點知敏姐姐話唔鍾意食．但最後o黎返豬扒，敏姐姐又係話唔o岩食而冇食到...唉~本桃諗住去意粉屋食，順便去換取貴賓卡，誰知我忘記'儲單'呢！又浪費了一次機會...>.< 九月六日　星期五:　　

昨晚同'主席','小丘','康康'& Eric一齊去食韓燒，本應重有多幾個人出席o架...不過佢地最後都冇出現...不過少有少玩...我地重玩得好開心~最好笑係'康康'個女中途打o黎，而佢重大鬧我地"仆街"...引得我們"捧腹大笑"...點解一句"正仆街"可以搞到我地成班人大笑呢？想知道答案o既人可以問我呀~~~~=P

話說昨晚當大家玩得興o既時候...我個頭忽然間好痛，好辛苦...起初我沒有理會，只覺得只是'久唔久頭痛'，認為只屬'小意思'... 誰知過了很久，每當我說得激動時，頭部痛楚沒有減輕之餘，反而越來越痛及次數漸趨頻密...令我痛苦不已！剎那間令我想起某某朋友，因腦膜炎不幸逝世的悲劇...好驚，我當時只識得在驚恐下慢慢放鬆自己，平伏及盡量抑壓自己的心情，才令自己好過一點... 返到屋企反覆思量過後，我開始對自己的健康有所懷疑... 真的不願自己有了什麼毛病呢！

嘩嘩...好驚...兩日冇開icq, 竟然收到好多url...有好多重係好搞o野添...其中一個係新生Cookies，超勁~~另一個更加勁，真係估都估唔到，竟然o係呢個時候收到d咁o既o野...不過只限男仔入去，女仔唔好睇呀~~~~

九月五日　星期四:　　

悶...好悶！加上今日有孤獨的感覺...話說我諗住同我一個要好的朋友一起吃飯，誰知他卻說要回家拿東西，順便回家吃飯．沒辦法，只好找與我一起上課的同學'邪邪'食飯，點知落堂時佢又被好友'徵召'回荃灣... 如是者，'大象','魚文'等好友都不能陪我...到最後，我幾經考慮才找另一位朋友吃飯，誰知她說她今天要'直上五個小時的課堂！'... 當我聽到這句話後，我便對自己說...放棄吧！上天要我今天單獨一人呢...>.<

今日第一日上Science & Environment, 起初個阿sir不停咁講返呢個course係讀d乜...當大家都諗住好悶o既時候，阿sir又忽然間開始上堂，重教lecture notes...當佢話要lecture notes, 竟然係全世界都冇，百幾人唯獨我同幾個同學仔有咋．之後就有好多人望過o黎...好喇，初初開始講o既都係d 地理o野... 好似乜乜acid rain, rain belt, global warming...等等，搞到我地有讀過地理o既人覺得易...點知飛o左一陣notes之後，阿sir就講d 光學o既o野...當然我地文科o個班就由好易變做好難喇...(係好難明！) 阿sir 講埋d Watt, Luman...乜乜1 amgstorm = 10^-10M, 都冇乜人明...最重要係阿sir佢講得好快，一下子已經教到第二個lecture！希望我地會慢慢'掌握'到喇...

九月四日　星期三:　　

返o左幾日學，識到d新朋友，感覺好好...完全唔似前排返工咁日日都要好認真工作咁辛苦...好開心~終於知道d人成日講"讀書係好過返工"呢句話o既真正意思...=)

呢幾日開學已經要慢慢適應好多新事物，但好似有多o野發生喎... 尤其成日聽到鄧姓友人常說話我又有'緋聞'，上星期話我追兩個，昨晚又話我追第二個...到現時為止，已講o左三個人喇...我怕好似以前中四,五年代咁...不停咁講埋d咁o野，搞到我之餘，又搞到其他人，第日見到重要尷尷尬尬就重煩...極度憎厭！！

九月三日　星期二:　　

今日是我個好朋友仔康康個人網頁雪守封風之部屋的面世日，識得或有興趣o既朋友一定要去睇睇喇...入到去記住要去客房'坐坐'喎...=)

今日決定更改網頁，作了一個小轉變...這刻心情大家睇到呢到可以順便去睇睇呢...=)

今日上Econ. Lecture, 阿sir竟然上堂教notes, 而我係今日早上見到係powerpoint, 所以未有print... 最重要係阿sir一氣教兩課...好彩都唔係好難, 齋聽都得~ 今日識到好多新朋友仔~~ 今日上o左堂'Critical Thinking'，呢堂好似好易上咁，大家一齊傾o下偈，講o下笑就落堂...點知臨落堂前o個Miss竟然叫我地聽日上Lecture時要drop notes, 重話下次上tutorial問返我地添呢...>.<

夜晚收到一個url, 原來係心理測驗，有興趣可以去玩玩喇~ 九月二日　星期一:　　

前排雖然要返工，聽少o左好多歌... 不過有幾首歌我覺得好正，真係唔聽唔得！第一首就係'明年今日'，相信大家都有聽過呢首歌喇...因為而家好多電台都谷緊佢．不過Eason隻新碟又點只一隻好歌呢...第二首要介紹俾大家聽o既就係Eason最新大碟入面隻'1874'，呢隻都超好聽！隻歌係講一對戀人因時空交錯而出生於不同年代，因而無法結合，而隻歌就唱出o左呢種心情o既悲哀及作為戀人的想法...都係o個句：悲歌好聽~ 第三首係李克勤隻'高妹'，相信大家都可能聽過呢隻歌o架喇，不過基於我返工o既關係，到上兩個星期先d/l到呢隻歌...所以而家先講到佢,hehee~ 最後一首就係珀麗灣廣告o個隻歌，前幾日我o係日記到出過post尋此歌o架喇...不過最終都係要靠newsgroup班高人先幫到手．不過點都好，呢首歌名叫'What The World Needs Now Is Love'，this song is one of the many best Eng. songs in 70s! 講o左廣東歌同埋英文歌，o係時候講o下d國語歌喇...周杰倫前排係咪出o左隻碟叫'八度空間'喇？我自己就因返緊工而冇乜點聽喇，不過我知道有一首歌叫'最後的戰役'，因為日日返工都聽到巴士勁播...>.< 不過我唔係想講佢d歌，(佢o既fans唔好打我~~)因為我今次介紹係(我覺得)好過佢o既人---陶吉吉，佢最新大碟已經推出~入面d歌o既質數都好高...今次推介o既就係'Melody', '討厭紅樓夢'同Bonus Track的'Katrina(Demo)'，前兩隻都係陶吉吉一向都有的作品，而最後一隻Bonus Track就係佢本人的新嘗試．點解係新嘗試？因為佢係台灣人，而呢隻'Katrina'係全英文歌，唔係只得一兩個o個d．不過點講都好，陶古古佢就算唔唱，只係'la'出o黎都會好正... 呢首歌真係超超...超正~

九月一日　星期日:　　返學前一天

對唔住呀...搞到今日先有呢個九月o既日記.(相對於上月是一星期前已整妥)不過沒辦法喇，因為太忙的關係喇...昨天才正式辭工．講開又講，我覺得今個月o既back ground 幾正，雖則香港要到成十一/二月先感受到轉季(夏轉秋/冬)而話就話九/十月就係秋季，但係我見到呢個background就好有秋天紅葉片片落下o既感覺...好正~呢d就係所謂'好feel'喇唔知大家feel唔feel到呢...=)

今天不但是今個暑假最後的一天外，而且是我近兩個月來唯一一日的真正假期呢！雖然昨日玩通頂，不過我今日都冇乜點訓，勁精神呢...搞到我都有點擔心明天的開學日會否唔知醒而遲到呢...

　　　　　　　　　<---back　　我的資料　　簽個大名啦 !