|
-Agur, pottoko -eta pot [1] gogatsu.
-Agur, Yann. Ontsa izan -estu besarkatuz.
-Hala entseiatuko.
-Postalñorik igorriko, ezta?
-Neskak biluzgorririk ageri diren horietakorik?
-Batto igorri eta hamaikatxo ekarriko.
-Ederki!
-Agur, maitea!
-Agur, Yann!
-Agur.
"Zorion guri! Hainbat jende oraino lanean eta gu hemen.
Hauxe bai hauxe pagotxa!" Hala pentsatu du Yannek luneta
ilunak erantziak. Gorri, osoki urdintasunez inguratua dute
ekia, zeinak bidaia osoan etenik gabeko izerdi-zurrusta
eragin baitie. Dena den, ez die inport bakantzatan kexatzea
arno onari gaseosaren isurtzea bezalakoa baita.
-Akanpatzerik badagoa alderdi honetan?
-Zer, bada?
-Han, kanpaina-denda altxatu dute.
-A, ez ziakinet.
-Baduna bistaluzerik?
-Hemen ez. Zertarako, baina?
-Auzokideak zein ditugun jakiteko.
-A, ez, ez dinat.
-Etxean?
-Ezta ere.
-Domaia!
-Bo, hemen gitun!
-Bai, onik eta osorik.
-Gero, etxean, Andere Dona Izorraneari otoitz eginen zionat
halako bidaiaren eskertzeko.
-Nihaurek ere bai, hirekin batean.
-Larrugorritu, alde banatan kokatu eta, zangoak bereiziak,
Andere Dona Izorrane makerari [2] otoitz.
-Eta oiloek txiza egin artio ez gitun lekutuko!
-Ez, bada!
-Ah-ah-ah! -biek.
-Hauxe, beraz? -bota du liluratua ate nagusia eskuko bidez
zabaldu, autoak muga iragan eta ohiko begi zoliez hirusta
multxo bat ohartu duelarik-. Jauretxea!
-Harat bertzea! Ez dun hainbertzerako eta.
-Pollita bai, ordea!
-Leku hau biziki preziatua dinat. Hemen arront laket nun,
ene gisa mendion artean, sosak ukan eta libroen sentitzen
dena bezalaxe. -Alai erraiten lioke lagunari, baina nekatua
da eta ez du alai ihardesteko gogo handirik. Halaz ere,
"laugarren urtemuga aurki ospatuko dinagu" bai
gaineratu.
Etxeak Promisioko lurraldea iduri du zinez gori baita.
Yannek harat baino lehen "Ea hango egonaldia ikasgarri
gertatzen zaidan! A ze goigoiñoaren [3] besta biok
ukanen duguna!" eta gisako ibili du gogoan. Zenbait egunez
egonen dira bertan, eginbidearen maitasuna egina.
A zer nolako egun urdin eguzkitsuen esperoan!
-Leire ez dagoa? Nehon ere ez dakusat eta.
-Egia! Ez dinat erran?
-Zertxo?
-Bihar etorriko dela.
-Bihar?
-Bai, ba.
-Ondikotz! Baninan gogoan errezibimendua: bikini motza
jantzia, gure esperoan eta prestatu freskagarri naturala
hozkailuan. Putza!
-Bada, halakorik ez dun izanen, Yann. Sentitzen.
-Nihaurek ere bai. Tamalez, ez hagokea txantxetan, ezta?
-Nahi niken, baiki! Delako freskagarria guk prestatu behar.
Baina bera hel dadinean, ezin hobeki izanen gitun! Ez dinat
uste lan handirik eginen duenik, baina haren eskasean ere
bapo janen dinagu eta bere adiskidantzaren baitan polliki
pasako.
-Ezagutzeko irrikitzen niagon!... Ez dun, beraz, gu bezalako
makera, ezta?
-Ez; alabaina, badun urdeme, baiki... Putaska xalo sotila
dun: aldizkari porno parrasta bat ekarriko bide din;
horretaz anitz ikusi-ikasia dinagu. Bere fantasia usuena
hainbat morroiren aldetiko masaiaren jasotzea dun, haiek
nolanahi ukitzea, alegia. Urdeme arraioa, Leire! Gostuko
ukanen dunala uste dinat. Horrela balitz! Onaldietan
hortzargiena dun; alabaina, haserretzen bada...
-Denok bezala: odoltxartu eta sumindu, ezta?
-Biziki, gainerat! A! Badun, ba, potret bat etxean! Egun dun
ezagutuko, Yann.
-Polliki!
Leire jatekoaz eta etxeko ikuzketaz arduratuko den neska da.
Hogoita sei urte dauka. Aspaldidanik langabezian denez, urte
oroz joaten da bankantzetxe horretarat: "Ederki pagatzen
zionagu ia fitsik ez egiteagatik. Gainerat, bere gisarat
ibil diaiteken, erran nahi baita, bikinia soinean ibili nahi
baldin bada, ba, dabilela, titi agerika nahi baldin bada,
ba, titi-agerika, edo biluzgorririk, edo jantzia, edo
nolanahi ere. Aurtengoa azkena izanen din kanpoan ikasteko
beka eskuratu baitu. Tamala."
-Igeri-lekua! Mon Dieu! Baina naitekea orai?
-Nahi dunanean, maitea. Ttottek atzo ikuzi zinan. Ez dinat
uste atzodanik sobera zikindu denik.
-Ez din inport.
Hortaz, alferraren leloari atxekiz Yannek lehenik biluzi eta
bainatzekoa jantzi behar du? Ezta pentsatu ere! Sartzeko
irrika biziaren asetzea ez du geroko utzi: horrat hor
larrugorritua eta hondo-hondoraino pulunp egina
lehenbailehen ur horren ukitua sentitu beharra
duelakotz.
-Zeinen pozik hagoen, e?
-Poz-pozik! Uaaa! Gau bakar batean sosak ausarki eskuratu
dituen putatzarrik tzar ederrenak bezala nun, no!
-Zer gisa ura?
-Ederki, no! Ene! Sar hadi heror ere!
-Ez, ez; orai, ez. Gauzak etxeratu eginen ditinat.-Ekarriko
duna karpeta?
-Orai berean?
-Bai. Benga, La!
-Non utzi dun?
-Konpresen gainean.
-Zein motxilatan?
-Urdinean.
-Luzaz xerkatu behar?
-Ez, guziaren gainean kokatu baititut.
-Fale.
-Ontsa. -Eta harahonakari hasi zaio osorik harrapatu duen
piszinari Larak bidaia luzean hainbertze orenez gidatu
izanagatik etsia eta lur joa bada ere bien ekipaia airos
hartu eta etxebarnerat daramalarik-. Ene, bada! Ene, bada!
-Bere gogara ari da, noiznahi luzean, noiznahi hondoan,
orotan desnekea sendituz. Hain zuzen ere, gurasoek urean
hazi eta hezi baitzuten sortzetik beretik-. Hemendik
jalgitzen banaiz, mirari hutsa izanen dun, baiki!
-Sorterrian behinola eskastu zelarik bezala ari da uraren
estimatzen-. Bai on paregabea!
-Sakonetik goiti berriz aterea.
Anartean, Larak haraino soinean eraman arropa erantzi eta
bainatzekoa jantzi du. Hondartzako begirale edo iduri bide
du ezen Yannek bertze muturretik "Oh-là-là!
Itoko naizela uste duna?" bota dio, barre-antzean bota
ere.
-Honat hemen Leire -portreta erakutsiz.
-Baniaen. -Dzuintaz da arribatu-. Ze polita! Hainbat
morroiren gostuko bai, ezta?
-Bai, eiki!
Zorioneko bake adeitsua dario Leireren begitarteari, batez
ere morroi ukigarririk arrimu-arrimuan duelarik. Orduan,
trankildu eta zirrika hasterat ausartatzen zaio, neska
ausarta baita. Ume-umetarik gisa horretan. Konparazione,
eskola-garaian, ikaskide bati komunetan zirri egitea eskatu
eta ikaskidea poz-pozik halako neskatila pollitak zirri egin
behar ziolakotz. Mutilak gero pasarte hura kontatu eta
gainerakoek sinetsi ez; haatik...
Morroien haztakatzea oraino ere du kuttun eta guzizko; nolaz
sala... morroien nahikara eta ahalkegabekiro haztakatzeak
maite-zoraturik dauka, hain zuzen ere arizale pornoen
larrutan ikusteak daukan era berean. "Nire irrika nagusia
honako gorputz honek -bereaz mintzo- hainbat morroiren
haztatzea dun, Lara! Onaldietan, biziki dinat gozatzen;
haatik, ilunaldietan ia ezin; baina, "ia" horrek kontsolatu
egiten nin."
|
-Karpeta?
-Koltxonetaren azpian utzi dinat. Ez haiz hirehala hasiko,
ezta?
-Eeez!
-Faxa ere jasoa dinat! -pozez eta irriñoz.
-Ze berri? -uretarik atera eta lagunaren ondo-ondoan jarria.
Beronen ziskuak tinko dira Yannen gorputz biluzi zipatuak
eragin zirraragatik.
-Ez duna xukadera jantziko?
-Ez. Honelaxe nahiago.
-Ontsa. Honat, beraz:
"Arreba maitea:
Zer gisa arribatu haiz bakantzetxerat? Arazorik bidean?
Deituko naun edo faxik igorriko didan igorria leitu ondoan?
Ea dena zuzen baino zuzenago ari izan zainan; hala espero
dinat.
Gu ontsa gitun. Zorionez, oker eta ustekabeko handirik gabe.
Sara astebeteko lan-bidaian dinat:
Hong-Kong alderat joan zaidan, zertarat eta Edward Sheriff
Curtisez [4] hainbat lizeotan mintzatzerat.
Horren karietarat, hilabete barne edo dun turnatuko. A, ze
gogoa! Ezen kanpai-jotze hutsarekin ez dut aski, ez.
Haurra ohi bezain pollita dinagu. Hi ageri haizen argazkia
erakusten diogun bakoitzean, "Mattantta Lada" erraiten din.
Erogarria!
Zer ari da Yann? Bidaide-gogaide duna? Ohiko
goigoiño-jotzaile dinat oraino? Bada, gisa horretako
baldin badinat pozgarri zaidan guziz gogoko dudan eta maiz
masturbatzen den bertze neska bat delakotz. Agian ez haizen,
Yann, sekulan odol-izoztuko!
Eva hautaproba-garaian denez, ia ia ez dinat ikusten:
Biblioteka Nagusian hetsia oren andana ederra emaiten din,
edo lagunekin zirrika ederki baino ederkiago.
Bo... ea zer ere... Oroit haiza Celestez, aireportuko
lagunaz? Bada, bera den taldeak osagarri-baliabideak,
haurrendako jakiak eta ikuztailuak Kuba alderat helarazi
ditine. Zinez, lan gaitza aireportuko langileok egiten ari
direna laguntza nasaiaren helarazteagatik! A, eta honat
Celesteren burutazio hau: "Hondartzaren batean larrugorritu,
argazki polita Kubaren aldeko argazkilariren batek egin, hor
barna saldu eta sosak Kubarendako. Nola deritzak?". Nik
polliki, baina... "Bai, motel! Heldu den udaldiko kontua."
Komentatu dien langileen aldetiko onespena ezezik,
goresmenak ere jaso omen ditin neskak. Zein daiteke kontra
Kubako iraultza-denbora honetan hainbertze jende
ezinbertzean egoki eta? Bada, zori on!
Bart Therèreserekin egon nindunan, afaltzen. Aurten
ez dun Kubarat joanen. "Laguntzaile agertu nahi badut, ez
diat zertan haraino joan: bertze lagun batzuekin batean
arabiar talde bati laguntzen ariko nuk: nihaurek ere jasoko
dinat uzta, baina alokairurik eskuratu gabe; zernahi gisaz,
xedea ez duk laguntzea izanen, baina ezagutzea bera. Hortaz,
aurten, modari ez. Egia erran, zinezko laguntzaile izan nahi
bagara, herrian gelditzearekin aski. Hemendik ateratzen
bagara Laguntza ezpainetan, ez duk Laguntzagatik, baina
abentura, ezagumenduagatik, jakinminagatik-eta; ederki
ziagok hori, baina ez aipatu, otoi, Laguntza: bai, ordea,
abentura, ezagumendua, jakinmina-eta... Zinez, aitzinakoiok
batzuetan zeinen garen xelebre, gerora ere bai! Halako
handikeriak eta, anartean, atso-agureak, elbarrituak,
gibeleratuak-eta guziz isolatuak ditiagu.
Laguntzaile gu? Bai, baina ingurukoek txalotuko digutenaren
arabera, argazkian ere agertu eta gainerateko aitzinakoiek
geure ikusteko... Bo, beharbada, gogor ari nuk, baina ene
ustez geure artean itxura handirik ere badela uste
dudalakotz duk: janzkera, jarrera, gogoaren baitako
kasetea... Egun, honen alde edo aurka egiten dinagu sasoikoa
delakotz, bertzenaz aitzinakoi oso ez ginatekeelakotz, "Zer
erraiten dute nitaz?", "Ez ote naiz koherente?", "neoliberal
bilakatzen ari ote naiz?", "Egokitzen ari ote naiz?"...,
erran nahi baita, mezua beti duk elkartasuna, berdintasuna,
askatasuna, edo, hobeki erran, berauek eskuindarrek berek
ere "defenditzen" dituztelakotz, zapaltzaileen aurka,
diskriminazionearen aurka, abortoaren alde, munduko
iraultzen alde eta abar eta abarren alde edo aurka. Halaz
ere, lehenxeago aipatu pertsonak, hala nola, atso-agureak,
gibeleratuak, elbarrituak-eta arras ditugu utziak sartu
diguten -edo guhaurek guhauren buruari- aitzinakoi-kasetean
ez direlakotz, haietaz interesatu edo-eta arduratu gabe
"aitzinakoi" ere garelakotz, eta, nonbait, berau omen duk
inportantena ibiltzen ohi garen jendartean." Hemendik goiti,
korapilatzerat hasi eta paseiatzerat joan gindunan...
Laura Indiako Tibet alderat joanen dun. Ez omen ziabilkigun
dirumurri eta Ladakah alderat dihoakigu, turista, "ea ze
berri duten khanpa tibetar errefuxiatuek".
Soulek "Gizonezkoak eta kontrazepzionea" idazlana bururatu
berri din! Badun garaia, ezta? Bada, eskuratu bezain fite
igorriko dinat. Ez dinat osoki leitu, baina apurño
bat, gizonezkoek hautatzen ohi dituzten metodoei dagokiena,
hain zuzen ere: Coitus interruptusa eta txapela, oroz
gainetik, no. Bahekien? Nik ez.
Dena den, basektomia-kasuak geroago eta ugariago omen
ditinagu. Eskuratu orduko dinat pasako.
Bo, laztana, ontsatto eta ohi ez bezalaxe balia
festa-egunak, eta aurki artio. Potak non-nahi hiretako eta
baita ere Yannendako arrimu-arrimuan baldin badun. Mua!
Albert.
Oharra: Sarak berriki deitu din: ezin hobeki ari dun. Badu
lagunik, erran nahi baita, ez ziagon bakarrik eta
ezustekorik ekarriko zigun (ez nun, ez, nehongo haurrez
ari)-hiri bertatik igorriko. Zertxo izanen ote da?
Bo, pot haboro, eta haboro, haboro, haboro...
Bertze oharño batto ttipi-ttipi baina agertu
beharrekoa (ziuraski, "Bai mailua!" ari haiz pentsatzen.
Bada, llabur izanen nun: horrat hor pot haboro, haboro eta
haboro... Ez, trufatzen ari nindunan. Ea. Aldamenekoa hire
harat joaiteaz jabetu eta harendako arroparik ekartzeko
galdatu zidan, ahal badun. Zera nahi din: bi bikini hori edo
horiska aski eskas, sandaliak, 38, pare bi, jateko
zerbaitto, bertako usaiakoa eta, hondarrean, ustekabekoa
harendako ere."
-Jatorra, Albert.
-Ene, bada!
-Ez dun hitaz ahantzi, e?
-Segur nun baduela bertan zeinetaz oroitua eta ez ordea
nitaz bereziki.
-Zer nahi dun erran?
-Faxa norbaitekin larrua jo ondotik helerazi digula.
-Bada, ez din iduri.
-Labea gorritu nahi zidan, baiki.
-Eta emaztea? Sara?
-A, ze putaska bertzea! Putaska? Gogoan larrutakoa baizik ez
duen putatzar karioa! Xoragarria dinat anaia, ezta?
-Xoragarri maltzurra dun anaia.
-Mmm, Yann! Lastima hil beharra!
-Halabehar zirtzila!
Lara hizkuntzalari da. Berriki Okzitaniar Ikasketen
Institutuko lehendakariarendako halako lan bat egin du D'Ok
hizkuntzarekiko gazte jendearen jarrera dela eta. Aipatu
lanean Institutuko lehendakariaren aburuarekin bat dator.
Beronen aburuz, musikaren baitan dateke D'Ok hizkuntzaren
geroa: "D' Okeraz kantatu rapa eta reggaea geroago eta
maizago plazan baldin bada, gazte jende gehiago erakarri eta
hizkuntzarekiko jarrera guziz aldatuko dateke". Biziki
zoriontsu sentituko litzateke frantses aginteak D'Ok
hizkuntzari ezagutza ofiziala emenen balio: "Bizirik
irauteko orai dituen arazo larriak ttipitzerat hasiko
lituzken". Iguazu aldetik lehengusina batek igorri berri
kezkagarriak jaso zituen bezalaxe penatuko litzateke
hizkuntza itzulezinezko bidean sartuko balute aginteak eta
bizilagunek; aranera, konparazione, Iguazu aldeko oihan ia
osoa ere galdu den bezalaxe galduko balitz. "Ez duguia,
beraz, han zuhaitzik ukanen 2020. urtean? Ez duguia
okzitanierarik ukanen? Frantsesa, ingelesa, espainola,
alemana, italiera-eta baizik ez, ala? Putza!"
aurrera segi
|