ONONAN BABASAEN Gaw. 4:32-35

Babasaen ya inaon ed Saray Gawgawa da ray Apostol

Nankakasakey so kanunotan tan liknaan da ray amin a mananisia, tan anggapoy mangipapasen a kien ton bukor so kayaryan to, no ag ingen kien dan amin.  Intuloy na saray apostol so manggawa na saray milagro a pamaneknek da ed inkiolid bilay nen Jesus a Katawan. Inter na Dios ed sikaran amin so bindision ton ag nasabsabaan. Anggapod sikaray kinmulang ed pankaukolan, ta saray dalin o abung inlalako na saray akankien tan iniiter dad saray apostol so nanlalakoan da, tan nibunog so kuarta onung ed pankaukolay balang sakey ed sikara.

Salita na Katawan.

SALMO RESPONSORIO

Ebat: Misalamat kayod Katawan, ta sikato et maung, tan andi-anggaan so panangaro to.

1. Ikuan komun na saray totood Israel,  “Andi-anggaan so panangaro to.”  Ikuan komun na saray papari na Dios,  “Andi-anggaan so panangaro to.”  Ikuan komun na saray mangigagalang ed sikato,  “Andi-anggaan so panagaro to.” E.

2. Dinogpaan da ak, et ngalngali ak la atalo, balet tinulongan ak na Katawan.  Say Katawan iitdan to ak na pakayari tan biskeg; inlaban to ak.  Dengel yoy maliket iran eyag na impanalo diad katuldaan da ray totooy Dios. E.

3. Say baton impasen ya andi-kakanaan  na saray karpintiro nagmaliw lamlamang a sankakanaan a bato.  Ginawa ya na Katawan; makapakelkelaw a nengnengen!  Sikato yay agew na panangilaban na Katawan; manliket tan manggayaga tayo! E.

KUMADWAN BABASAEN 1 Jn. 5:1-6

Babasaen ya inaon ed ononan sulat nen Juan

Anak na Dios so toon manisia a si Jesus et sikatoy Cristo. Siopamay mangarod ama, aroen to met so anak na ama.  Diad panamegley na pangaaro tayod Dios tan pangoonur tayod saray ganggan to, naamtaan tayon aaroen tayo ray anak na Dios tan pangoonur tayod saray ganggan to, naamtaan tayon aaroen tayo ray anak na Dios. Ta say pangarod Dios kabaliksan toy pangonur tayod saray ganggan to.  Et aliwan mairap ya onuren iray ganggan to, ta balang sakey ya anak na Dios nayarian ton taloen so sankamundoan. Say panatalo tayod sankamundoan et say pananisia tayo. Siopay nayarin manalod sankamundoan?  Say toon manisia a si Jesus et Anak na Dios.

Si Jesu-Cristo so linma diad mundo, a sikatoy abinyagan ed danum tan angiterter na dala to diad impatey to. Linma dian ag labat abinyagan ed danum, no ag ingen interter to met so dala to. Say dilin Ispiritu so amaneknek a tua ya, ta say Ispiritu et Katwaan.

Salita na Katawan.

Alleluia
E. Alleluia.  Manisia kad siak,  Tomas, lapud  anengneng mo ak; maliket iray manisia anggaman ya ag da ak anengneng!  E.  Alleluia.

IBANGHILYO Jn. 20:19-31

Babasaen ya inaon ed masanton ibanghilyo onung ed kinen Juan

Diad labi  to man ya agew na Simba, nantitipon iray disipulo.  Akatalak iray puirtay abung a nantitiponan da, lapud takot dad saray Judio. Sinmabiy Jesus tan nanalagey ed pegley da  Inkuantod sikara,  “Say kareenan komun so walad sikayo!”  Kayari to yan imbaga, impanengneng tod sikara iray lima tan diking to. Malikeliket iray disipulo diad impakanengneng dad Katawan.  Inkuan lamet nen Jesus ed sikara,  “Say kareenen komun so walad sikayo! Imbaki ak na Ama, ontan met ya ibaki ta kayo.”  Kapangibaga tod  saya, iningasan to ra tan kuanto,  “Awat yoy Ispiritu Santo. Siopamay toon pirdonaen yo ray kasalanan to, napirdona ra; siopamay toon ag yo pirdonaen iray kasalanan to, ag ira napirdona.”

 Balet si Tomas apangaranay Siping, andid man nen pinmanengneng si Jesus. Kanyan inkuanda ray disipulo ed sikato, “Anengneng miy Katawan!”

 Lnkuanen Tomas ed sikara, “No ag ko nanengneng so bakat na pasak ed saray lima to, no ag ko nitobung so tamorok ed tinalus saray pasak, tan ag ko niseksek so limak ed diking to, ag ak manisia.”

 Kayariy waloy agew, nantitipon lamet ed loob na abung iray disipulo to. Kaiba ra lay Tomas. Akatalak iray puirta, balet linmoob si Jesus tan nanalagey eg pegley da. Inkuanto,  “Say kareenen komun so walad sikayo!” Insan to inkuan ed kinen Tomas, “Itobung mo dia tay tamorom tan nengneng mo ray  limak. Iyonat mo tay limam tan iseksek mod diking ko. Ag ka manduaduaruwa, no ag ingen manisia ka la!”

 Inkuanen Tomas ed sikato, “Katawan ko tan Dios Ko!”

 Inkuanen Jesus ed sikato, ”nisia ka lapud anengneng mo ak? Maliket iray manisia, anggaman ya ag da ak anengneng!”
 Dakel ni ray milagron ginagawa nen Jesus, a naimatunan da ray disipulo, ya ag nisulat ed sayan libro, Balet nisulat iray logan to yan libro,  pian manisia kayon si Jesus et sikatoy Cristo, say Anak na Dios, tan lapud sayan pananisia yo, nawalaan kayoy bilay ya andi-anggaan ed ngaran to.

Ibanghilyo na Katawan.