SIGNIFICANT EVENTS AND UPCOMING SCHEDULES

JUBILEE 2000
ARCHDIOCESE OF LINGAYEN-DAGUPAN

Simba na 23-30 Abril 2000

Aderal so computer ya magter yon lingkur ed sayan sakey simba lawari. Maong labat ta sinmambot, anggaman akotit la!

Ipikasi tayo so ama nen agi tayon si Reb. Padre Manuel Bravo, Kura Paroko, na St, Vincent Ferrer Parish, Bayambang, Pangasinan, lapud sikara so nansakit na "aneurysm" nen Lunes, 24 Abril 2000. Natandaan ya sikara met so naoperaan la ed puso limay bulan la so linmabas.

Agawa tan asumpal so "Clergy Easter Outing" diad resthouse da di BokalAgerico Rosario dimad gilig na dayat na San Fabian, Pangasinan. Ay! Niduma-duman party iman! Lapud, sinmabi so nantutumbokan ya karol tan mansasnit ya kirmat! Inyoran to ni libog-libog (ag ko amta no apano so boyog!). Narep ni so kuryente! Kanian, wala'y panaon ya kurap-kurap so papari ya anggad in-lukas  so "generator" na saman ya abong.

Anggaman ontan iran sinmasabi, wala met ni ra so malikeliket ya dinmagop. Wadman si Fr. PMat ya ag ontondan mangansion. Balet, nen sinoblayan la nen Reb. Padre Joel Ynzon, et diman met la ginmapo so karol tan kirmat. Binmilonget ni ta lapud abalang so kuryente! Say amta'y karaklan lalaingen et agni inmolid-bilay si Jesus ta wala nid kabilongetan so talba! Kanian, no maminsan, bantayan yo lan maong si Padre Joel ta delikadon mangansion. Maliket met ira di Reb. Padre Doc Nicolas (mabeng nin siansia),Winston Estrada (Mataba nin siansia), Weng Escano (babaleg met ni nen si Winston), Roy Villamil (masiba nin siansia), Rolly Salosagcol (cute ni kuno ya siansia), tan arum nira. Ta no bitlaen ya amin et ompano ag la nasumpal! Wadman met manaya so Vicar General na ALD, si Msgr. Rafael S. Magno, Jr, tan say masyadon aktib ya "retired" si Padre Jose Estrada. Anggapo so Arsobispo ta lapdu walay emergency ya tawag da ed Manila.

Mananam so inparaan ya tinawag nen Reb. Padre Ric Macaraeg (Say angipangulo ed sayan party). Dakerakel so naakan.

Inpaway met nen Arsobispo tayo so circular letter to nipaakar ed saray balon Pastoral tan Administrative Assignments nen Biernes, 28 Abril 2000:
 

• Reb. Padre Renato P. Mayugba, Spiritual Director ed Immaculate Conception School of Theology, Vigan, Ilocos Sur. Sakey taon labat iyan termino.
• Reb. Padre Ferdinand V. Guiang, Dean of Studies, ed Mary Help of Christians College Seminary, Bonuan Guest, Dagupan City.
• Reb. Padre Hernan C. Caronongan, Parochial Vicar ed St. Vincent Ferrer Parish, Bayambang, Pangasinan.
• Reb. Padre Theodore de Leon, Parochial Vicar ed St. Vincent Ferrer Parish, Bayambang, Pangasinan.
• Reb. Padre Vicente Nacor, Parochial Vicar ed St. Ildephonse Parish, Malasiqui, Pangasinan.
• Reb. Padre Allen Romero, Parochial Vicar ed Sts. Peter and Paul Parish, Calasiao, Pangasinan.
• Reb. Padre Rolando Salosagcol, Parochial Vicar ed Our Lady of Purification Parish, Binmaley, Pangasinan.
• Reb. Padre Carlito V. Yden, Parochial Vicar ed St, John the Evangelist Parish, Dagupan City.

20 Abril 2000, Huwebes. Asumpal so silibrasyon na "Chrism Mass" na Arkidiosis na Lingayen-Dagupan dia ed St. John the Evangelist Parish, Dagupan City. Si Arsobispo Oscar V. Cruz, DD so angipangulo na saman a silibrasyon. Diad ed homilia na Arsobispo ed saray papari, inpaliwawa ra so sulat na Santo Papa Juan Pablo Segundo ed amin na saray obispo tan papari ed mundo. Inkuanda, " Say Eukaristia so sikayo. No agyo aroen so Eukaristia, agyo aaroen so inkapari yo.". Inkuan da ni nansimbawa," Kanian sirin pawil kayo ed pangaro yo ed Eukristia; pawil kayo ed masimsimon ya panagmisa; pawil kayo ya ibilay so Masanton Misa!"

Kasumpal na saman ya antikey ya homilia, agawa so pamasimbalo na sipan na saray papari. Tinepet na Arsobispo nipaalar ed say sipaparaan na papari ya iter day dedikasyon da ed si Kristo, ya mikasakey ed si Kristo tan magmaliw ya singa si Kristo diad maliket ya pansakrispisyo na saray ambisyon tan liket para say kareenan tan panangaro na saray agagi, ya magmaliw ya tuan maong a pastol a singa si Kristo diad pangibangat na Makristianon pananisia para say kamaungan na amin, aliwan say pankamaungan na pari, no ingen say totoon angibakian ya panlingkuran."

Agawa met ya tampol so "commissioning" tan "re-commissioning" na saray laikon Ministro na Altar: saray Lectors tan Commentators, Acolytes o Communion Helpers, Ushers tan Usherettes, Cantors".

Abindisionan met so lana na usaren ed say "Anointing of the Sick" tan say Chrism para binyag, compirmasyon tan ordinasyon.

Diad sampot, Si MSGR. RENE E. MENDOZA, Archdiocesan Missions Director, so inmalagey tan inpakabat to ed karaklan so saray makaawat na "Missions Awards". Saray onguendan so akawat na sarayan awards:

Winners based on Per Capita:

Parish Level
   1. Epiphany of the Lord Parish, Lingayen, Pangasinan
   2. St. Gabriel, the Arcangel Parish, Bonuan Boquig, Dagupan City
   3. Sts. Peter and Paul Parish, Calasiao, Pangasinan

School Level
    1. Dominican School of Dagupan City
    2. Mary Help of Christians High School Seminary, Binmaley, Pangasinan
    3. Mary Help of Christians College Seminary, Bonuan Gueset, Dagupan City

Parish Level
    1. Epiphany of the Lord Parish, Lingayen, Pangasinan
    2. Sts. Peter and Paul Parish, Calasiao, Pangasinan
    3. St. Gabriel the Archangel Parish, Bonuan Boquig, Dagupan City

School Level
    1. Dominican School of Dagupan City
    2. Mary Help of Christians High School Seminary
    3. Mary Help of Christians College Seminary

Parish Level: Epiphany of the Lord Parish, Lingayen, Pangasinan
School Level: Dominican School of Dagupan City

Abitla manaya nen Padre Rene ya mas maong no say itiwag tayo la ed saray EEM, odino Communion Helpers, odino LEM (Lay Eucharistic Ministers) et ACOLYTES la.  Very appropriate description, bibirbiren na simbaan, walay ni rito ya pangiletneg ed saya. Agawa so misa tan kompisar ed sampot ya agew.

Say Circular Letter nen OVC ya Mensahe ed Paskua so basaen ed amin a misa na Simba'y Inkioli tan no Bihilya na Inkioli.

14 Abril 2000, Biernes, National Day of Pilgrimage and Fasting, diad Parokia na Epifania na Katawan Tayo, Lingayen, Pangasinan. Asumpal ya sakey lamet ya agew ya ipansilibra na Jubileo 2000. Diad kabuasan, say Vicario 3 tan 4 so linmad Lingayen; diad ngarem say Vicario 1 tan 2. Lapud wala ak ed Vicario 1, say naibalitak labat ni et say agawa nen ngarem.

Ay, dakerakel so linma (balet mas dakel ni kuno nen kabuasan). Pasado ala-una la nen sinmabi kami ed Kapitolyo. Nan-tricycle kami la ta intilak mi la may luganan ed parokia. Sikami di Padre Roy Villamil, Allan Abuan tan Ferds Guiang. Ngal-ngali abalitduag imay tricycle ta ambelat ya maong iray linmogan! Si Padre Roy so linmugan ya kaabay na driver! Maong lanti ta ag apattak!

Kasabi mi et onpipikal lay libot! Si Padre Joe Carino so manaapiger na karaklan ya milibot. Hay! Masyadoy petang! Ngal-ngali la onngalab so kauloan mi. Ompano linmanok ingen so ulo ra di Padre PMat ta wadman met iran akilibot! Anggaman ontan akilibot kami ni. Ontan met nen Padre Winston Estrada, ya say kekerewen to ni ingen et mansali-sali kami ni kuno! Si Padre Roy ya mankitley et ingayogoy to lay sali to! Ag la pigan onabig la may larag na sali da! No ag kami ni onlad tawen ed saya, anggapo lay katunongan na amin!(ha!)

Peles na libot walay dasal na rosario, tan kansion met.

Dakerakel met so nan-konfesar. Kanian, tua ya sayan taon ya Jubileo et tuan panaon na grasya! Say grasya na Dios so ag nasabsabaan!Wala ray nankonfesar kasumpal na samploy taon la so apalabas. Jubilee Year ya tua!

Si Arsobispo Oscar Cruz so angipangulo na misa. Say nan-choir et saray choir na Annunciation of the Lord Parish, Bonuan Gueset. Kinansion so "Jubilee Song" met. Salamat ed say Team Ministry na Lingayen: Reb. Padre Alberto Arenos, Camilo Natividad tan Bobits Batecan!

Komon ed sayan inpansumpal na sayan Fasting tan Pilgrimage nagamoran tayo so taloran getma na sayan agew: say kareenan na mundo (laut la ed bansa tayo), say Indulgencia tan say iyagliwas na saray mairap bialy.

13 Abril 2000, birthday nen MSGR.LEON V. BITANGA. Linma kami met ya i-greet si Msgr. dimad Villa San Rafael ya kawalaan da natan. Ompano agyo ni amta so taon da la? Si Msgr. Bitanga et mantaon la na walomplo tan anem (86)! Dakel ya pansit (para long life!) Say Dios so walad sikayon lanang tan say grasya to mangiter na biskeg ed sikayo, Monsignor!

Asumpal so silibrasyon na Silber Jubilee da di Reb. Padre Arcadio Mejia, Jr. nen 2 Abril, Simba  diad ed Parokia na Sto. Domingo, San Carlos. Dakerakel ya linman akiliket ed sikara. Man-una ra di Msgr. Jesus A. Cabrera, DD, Obispo na Alaminos, tan sikara met so angiter na homily. Niduma-duma man ya homily lapud nagmaliw ya singa "Mel and Jay" ta lapud singa interview so agawa: si Monsignor so nantetepet tan mabulbolos da met ya inebatan di Fr. Agoy.

Si Fr. Agoy manaya et linmoob ed seminaryo lapud labay to labat so man-basketball! Kanian say grasyay Dios met lanti et mairap ya talusan! (Dakel ni so tepet di Msgr. tan ebat nen Fr. Agoy, balet say magter yon lingkur et agto la nangel ya amin ta lapud walay sibir-siber ya "paparazzi" ya ala lan ala na picture)!

Wadman met ira so ina tan agagi, kakanayon tan kakaaro nen Fr. Agoy! Saray agagin papari met so wadman ira, laut la ed si Fr. Tatum Mendoza tan si Msgr. Marlo Peralta, ya klasmit ira nen Fr. Agoy tan sikara met so Silver Jubilarians.

Mananam so panangan met! Tan, manlupwa so liket na amin! Salamat ed Dios a Katawan!

Si FR. FIDELIS B. LAYOG so nanbiyahe lan mamaarap ed Manila nen 9 Abril, Simba. Sikato la so manpaparaan ed say itekyab to ya onla ed Roma tan manaral diman. Sikato so manaral na Biblical Theology. Si Fr. Del so taloy taon ya wala ed Mary Help of Christians College Seminary, Bonuan Gueset, Dagupan City. Sikato so Dean of Students odino Prefect. Balbaleg ya pisasalamat ed sika Fr. Del ed amin. Komon mansiansia ka ed panangaro tan biskeg na Dios a Katawan.

Ontan met ed si FR. ALVIN PLATON, ya nanlapud ICST, Vigan. Sikato met la so manpaparaan na inkasikato sakbay ya onla met ed Roma. Sikaran dua so manaayam ed say Parokia na San Isidro Labrador. Si Fr. Frank Ungria so Kura Paroko diman. Ompano no sampot na Hulyo et ontekyab lara! Kalamor met lay Fr. Frank: duaran amkakabaleg ya totoo tan masisiba'y baaw so kaiba to natan!

Si FR. FERDINAND GUIANG so tampol ya nan-report met la ed College Seminary. Sikara so sinmabi ed College Seminary nen 10 Abril, Lunes, ed alas-kuatro ed ngarem. Si Fr. Ferds so sinmalat ed si Fr. Del. Awit da lan amin so kayaryan da!

Saray seminarista so onggapo lan man-summer Apostolate ed pigaran parokia ed sayan simba (9-15 Abril 2000). Agtayo ira komon paulyan; no ingen iter tayo ed sikara so supporta na dasal, pastoral care tan ministry tan say priestly guidance tayo.

8 April 2000, Saturday
8:30 AM-4:00 PM
RECOLLECTION OF OLD LAY MINISTERS (VICARIATE I)
dia ed Mary Help of Christians College Seminary, Bonuan Gueset, Dagupan City
(no walay tepeten yo, tawag kayo ed: 5234458/ 5152437. Anap yoy barats)

14 April 2000, Friday
DAY OF FASTING and PILGRIMAGE
Epiphany of our Lord Parish, Lingayen, Pangasinan
(click the above for the Circular Letter of OVC, in Pangasinan translation)

15 April 2000, Saturday
RECOLLECTION OF OLD LAY MINISTERS (VICARIATE II)
dia ed Mary Help of Christians High School Seminary, Binmaley, Pangasinan
(no walay tepeten yo, tawag kayo ed: 5426051 ed si Reb Padre Jose Carino)

17 April 2000, Monday
RECOLLECTION OF OLD LAY MINISTERS (VICARIATE III)
dia ed Most Holy Rosary Parish, Manaoag, Pangasinan
(walay registration na P80.00)
no walay tepet yo, tawag kayo ed si Reb. Padre Rene E. Menoza, Tel. 522-6487)

17 April 2000, Monday
RECOLLECTION OF OLD LAY MINISTERS (VICARIATE IV)
dia ed St. Vincent Parish, Bayambang, Pangasinan
(no walay tepeten yo, tawag kayo ed: 5922024 ed si Reb. Padre Manuel Bravo).

17 April 2000, Monday
SUMMER SCHOOL FOR CATECHISTS
Enrolment Starts
(no walay tepeten yo, tawag kayo ed: 517-5072, tan anap yo si Reb. Padre Anthony Layog)

18-19 April 2000, Holy Tuesday-Holy Wednesday
9:30 AM-4:00 PM
FORMATION SEMINAR OF NEW LAY ALTAR MINISTERS
dia ed Mary Help of Christians College Seminary, Bonuan Gueset, Dagupan City

20 April 2000, Holy Thursday
9:30 AM
CHRISM MASS and COMISSIONING OF LAY MINISTERS
dia ed St. John the Evangelist Parish, Dagupan City

28 April 2000, Friday
EASTER OUTING na CLERGY
dia ed San Fabian, Pangasinan