(Mensahe na Paskua a basaen manlapud pulpito diad Ingles odino Pangasinan diad amin da ra'y simbaan tan capilia diad okasion na pansilibra ed amin da ra'y misa ed ngarem na Sabado Santo, 22 Abril 2000, tan diad kabusan/ngarem na simba Paskua, 23 Abril 2000).

"Lapud inpatey to, si Kristo dineral to so dilin patey. Lapud inyuli to, si Kristo inpawil to so bilay tayo." (Prefacio Pascua I).

Pinablik iran agagi, pinablik iran katayakdang:

Maliket a Paskua:

Saya so pannanabangan a panangigalang ya ibabalikas tayo ed sakey tan sakey tan narerengel tayo manlalapud balang sinansakey. Sayan panangibano so matua tan lapag. Anggaman ontan araldalem so kabaliksan to onkana ed sikatayo ran Kristiano -- totoon ontutumbok ed si Kristo ya ontalineng ed si Sikato, manaral ed Sikato, ontulok ed Sikato.

Tan nia so aralem ya kabaliksan to: si Kristo so nantepel na ipapatey onkana'd sikatayo ta pian ilaban To itayo manlapud dilin andi-anggaan ya ipapatey tayo: Inmulin binmilay onkana'd sikatayo  pian iparaan Ton onkana'd sikatayo so Panariaan na maandon bilay:

Sayan kabaliksan so magmaliw a mas makabaliksan ed sayan niduma a panaon ya say Simabaan ed lapag a talba so mansisilibra ed Taon na Balieg a Jubileo na inkarundon tayo -- say kuma 2000 a tinaon ya pakanudnunutan ed inkilaban tayo ed ketket na kasalanan tan patey tan say arapen tayo ed Panaarian na grasya tan bilay. Tan saya so manepeg lapud inkianak tan impanbilay, say impanbangat, say inpanirap, say impatey tan inkioli'd bilay nen Kriston Katawan a Mananundon tayo.

Saya so sengegan na pangakanta tayo: "Anggapo la ra'y pader, anggapo la ra'y gulo-gulong, anggapo la'y siblet tan puertan nikapot, lapud wala tayo ed kagnapa'y panaon na Dios. Sikato'y panaon na Baleg a Jubileo."

Lamet: Maliket a Paskua! Bendisionnan kayon main na Dios!

Betang yon tuatua ed Inmuli a Kristo,

(Nanpirma) + OSCAR V. CRUZ, DD
                       Arsobispo
                       Paskua 2000