Babasaen ya inaon ed Saray Gawgawa da ray Apostol

Nampaliwaway Pedro ed saray totoo: “Kabat yoy agawad intiron Judea, a ginmapod Galilea, kasumpal na binyag ya impupulong nen Juan.  Amta yo no panoy impangiter na Dios ed kinen Jesus a taga Nazaret na Ispiritu Santo tan say pakayari.  Nililiber ton amiy pasen, nanggagaway kamaungan tan nampapaabig ed saray papairapey dimonyo, ta say Dios walad sikato.  Tasi kamin amin ed saray ginagawa tod dalin da ray Judio tan diad Jerusalem.  Anggaman ontan, pinatey da diad impangipasak dad sikato ed krus.  Balet diad kumatlon agew, say Dios pinaoli tod bilay tan inabuloyan ton nampanengneng.  Balet ag nampanengneng ed amin a katoowan no ag ingen diad sikami labat a pinili lay Dios nen saman a tasi to.  Akirongo kamid sikato ya angan tan inminom, kasumpal na inkioli tod bilay.  Ingganggan to kamin mampulong ed saray katoowan, tan mamaneknek a say Dios et pinili ton sikatoy manintinsia ed saray mabilay tan saray inatey.  Amin da ray propita nansalita ra nipaakar ed sikato, tan inkuandan siopamay manisiad sikato et napirdona ray kasalanan to did panamegley na ngaran nen Jesus.”

Salmo

E. Sikato yay agew a ginawa na Katawan; manliket tan manggayaga tayo.  Alleluia.

Misalamat kayod Katawan, ta sikato et maung, tan andi-anggaan so panangaro to.  Ikuan komun na saray totood Israel, “Andi-anggaan so panangaro to.”  E.

Say pakayariy Katawan so angiter ed sikatayoy pananalo—say mabiskeg a pakayari tod bakal!  Ag ak ompatey, no ag ta mambilay ak tan ibawag ko ray ginagaway Katawan.  E

Say baton impasen ya andi-kakanaan na saray karpintiro nagmaliw lamlamang a sankakanaan a bato.  Ginawa ya na Katawan; makapakelkelaw a nengnengen!  E.

Kumadwan Babasaen

1 Cor. 5:6-8
Babasaen ya inaon ed ononan sulat nen Pablo ed saray taga Corinto

Maoges itan so panagpasirayew yo!  Ag yo ta amtay kabaliksan na sayan balikas, “Say daiset a libadura napaalsa toy masa?”  Nepeg yon ekaley daan a libadura, say kasalanan, pian magmaliw kayon petepeteg a malinis.  Diad ontan mipara kayod balon masa ya anggapoy libadura, ta talagan ontan kayo.  Ta nibagat lay Cristo a Kordiro tayon onkanad Paskua.  Kanyan pistaan tayoy Paskua, aliwan diad panamegley na tinapay ya anggapoy libadura, say tinapay na katooran tan katwaan.
 

Sikuinsia

Sikayo ran Cristiano, mangisaklang kayoy bagat na panangidayew ed Biktima na Paskua.
 Say Kordiro dinondon to ray karniro.  Si Cristo, ya anggapoy kasalanan, et pinapawil tod Ama iray makasalanan.
 Nanlaban so patey tan say bilay, diad nidoma-doman bakal.  Inatey so kapitan na bilay; natan manaari tan ag lan balut ompatey.
 Ibagam pad sikami, Maria, no antoy anengneng mod dalan.
 “Anengneng koy angipomponan ed kinen Criston mabilay natan.  Anengneng koy kagalangan nen Cristo ya inmolid bilay natan.
 “Anengneng ko ray anghil a nantasi; ontan met ya anengneng ko ray abel ya anakbung ed olo tan kabalgan to.
 “Inmolid bilay si Cristo ya ilalok.  Onaan ton onlad Galilea iray inaro to.”
 Amta tayo a tuan inmolid bilay si Cristo.  Kasian mo kami pa, sikan Mananalo tan Ari.  Amen.  Alleluia.

Alleluia 1 Cor. 5:7-8
E. Alleluia.  Si Cristo nagmaliw a bagat a para Paskua; mampista tayon magayaga ed Katawan.  E.  Alleluia.

Ibanghilyo Jn. 20:1-9

Babasaen ya inaon ed masanton ibanghilyo onung ed kinen Juan

Kabkabwasay Simba, nen ambilonget ni, linma lad lobuk si Maria Magdalena.  Anengneng ton nakal lay baton akasarad sangab na lobuk.  Binmatik a linmad kinen Simon Pedro tan say disipulon inararo nen Jesus.  Inkuantod sikara, “Inala rad lobuk so Katawan, tan ag mi amtay anginan dad sikato!”
 Kanyan pinmaway si Pedro tan samay asalitan disipulo, tan linma rad lobuk.  Binmatik iran dua tan alumbaan toy Pedro may asalitan disipulo, kanyan akaonan akasabid lobuk.  Yinmokon ninmengneng ed dalem na lobuk.  Anengneng to ray abel a sida ya akagaton diman, balet ag linmoob.  Tinmombuk a sinmabiy Simon Pedro tan linmoob ed lobuk.  Anengneng ton wadman iray sidan Abel.  Anengneng to met so abel ya impamalkut ed olo nen Jesus, balet alokut tan akabiig ed saray sidan abel.  Linmoob met la may akaonan sinmabi a disipulo; anengneng to tan anisia.  (Ag da ni atalusan so ibabagay Masanton Sulat a nakaukolan ya onolid bilay si Jesus.)