koth9

Dy Gwener 8/2/02: An Governans dhe Westminster yn-dann an asrann DETR re dhifennas devnydh an baner Sen Piran war platow niver kerri. Kummyas yw res dhe'n banerow Albanek, Kembrek, Sowsnek ha baner an Unyans. Yma esel and senedh Westminster rag Porthia, Andrew George, yn unn assaya kavoes treylyans-u war an mater ma wosa an menyster, ha MP Aberplymm-Porth Dewnans David Jamieson dhe ri dhodho an nowodhow tewl ma. An kamm war-dhe-lergh ma a holl an vysyt an seythun ma dhiworth Nick Raynsford MP. Yth esa ev omma yn Kernow yn unn vires orth kas an Ducheth rag omwovernans ha Senedh Kernow. Nyns eus gorthyb dhiworto hwath, mes Andrew George a leveris ev dhe dhegemmeres an argyans yn ta.
Dy Yow 7/2/02: Lemmyn yw an seson rag konselyow a-hys an pow dhe settya aga thollow konsel. Hedhyw, Konsel Kernow re leveris bos an toll owth yskynna dre 8.5%. Ny vydh sertan mars yw henna an kansranneth ewn bys pan dho oll an eselli warbarth rag votya diwettha y'n mis ma. Herwydh dyllans gwask an konsel, res yw settya miver mar ughel rag selwel lies gwasonieth.
Dy Meurth 5/2/02: Igerys yw hwithrans poblek hedhyw a-dro dhe dowl stroell an konsel. Hemm a holl an dewis de gans 'Cornwall Environmental Services' dhe worra dhe-ves an towl rag loskva yn Kernow kres. Matthew Taylor MP a wolkommas an movyans gans C.E.S.
Dy Lun 4/2/02: Nevra nyns yw res leverel bos an arvor Kernow fest dheantell awos bos godhevys yn ta. Byttegyns, gorhel 'Kodima' a dheuth ha bos yn kudynnow bras an bennseythun yw passys (Dy Sul). Kargys veu gans prenn, mes henna yw stroellys lemmyn a-hys an trethow ogas dhe Borthwikkel. An kriw Rusek veu selwys gans tro-eskelli RNAS, ha selwyoryon gorholyon yma lemmyn ow mires orth an kas dhe weles mar hallsens y dhasneuvya.
Dy Yow 31/1/02: Kowethas ayrennow diger Iwerdhonek, Ryanair, re leveris i dhe dhalleth gwasonieth ayr ynter Tewynn Pleustri ha Stanstead rag marnas Ł39 unnfordh. Hemma a dhalleth 4a mis Ebryl. Yma an diwysygneth tornysi ha negys owth wolkomma an hyns-ayr nowydh ma awos bos an golow hudel hwythrys gans Kernow rag termyn hir. Ryanair a vynn gweles fatell yw degemmerys. Mars yw degemmerys yn ta, yma chons bras an kowethas ma dalleth ken hynsyow-ayr dhe dylleryow erell yn Ewrop. Kekeffrys ha henna, i re levereis bos chons a dreghi kost an tokyn pella hwath. Martesen, y hwelsyn kyns es pell tokynyow mos ha dos rag Ł60.
Dy Yow 31/1/02: Bagas kanasow dhiworth kaskyrgh Senedh Kernow a wra metya gans Mick Raynsford (menyster governans leel) pan dhei dhe Gernow 4a mis Hwevrer. An kaskyrgh ha Bert Biscoe a vynn profya dhodho an skila prag yth yw digressenans an gwella hyns rag Kernow y'n le a senedh 'soth west'

Dy Sul 18/2/02: Carlton TV a davethlas towlenn verr an dohajydh ma a-dro dhe'n taves. Dulcie Gallagher a viras orth an kaskyrgh rag kavoes Kernewek a-vel yeth aswonnys gans an governans Westminster yn-dann an Chartour Europek a Yethow Nebes Kewsys. Y'n dowlenn yth esa Jori Ansell, Rod Lyon, Ray Chubb ha Matthew Clarke.
Dy Sadorn 17/2/02: Onan an hendrevow an moyha a-vri yn Kernow neb yw de-vil bloedh hy oes, a vydh der an bellwolok nos a-vorow. 'Time Team', hembrenkys gans Tony Robinson, eth warlyna dhe'n Lysardh dhe vires orth An Ger ha Kervallek ogas dhe Hellys. I eth dhe chi tiek leun a daklow an oes horn ha hwythra an tyller rag moy. Kansow a fleghes eth yn unn vires orth an bagas hag i ow kul an dowlenn. Y'n termyn yw passys, drog re beu leverys erbynn an dowlenn drefenn na wrons i hwythra tylleryow Keltek yn fenowgh lowr. An dowlenn yw tavethlys der Ganel 4, nos Sul dhe 5:35. Settyewgh an gwydheo!
Dy Sadorn 17/2/02: Yma govenek dhe dus selwel gorholyon a awel teg lowr hedhyw rag dasneuvya an Kodima. An gorhel stoffys ma, 6000 tonnas y boester a dheuth ha bos stag war dreth ogas dhe Borthwikkel ha skoellya milyow a blynkenn prenn. Mars yw da lowr an gewer, ha dasneuvys an gorhel, tennys vydh dhe Aberfal le may fydh chekkys rag damaj. An berghennoryon a garsa dasusya an Kodima.
Dy Mergher 13/2/02: British Airways a avisyas bos an kowethas ow treghi milyow a oberow ha gwasoniethow ynwedh wosa koll arghansek a Ł6 milvilvil. Awos hemma, yth esa own yn Kernow rag tenkys an hynsyow BA dhe Dewynn Pleustri hag Aberplymm. Hedhyw, yn lavar dhe Pirate FM102, lavarwas BA City Express a leveris na vydh troghow gwrys dhe'n gwasoniethow ma. Kynth esa an geryow toemm ma, hwath yma eselli senedh Westminster yn unn assaya kavoes surheansow.

Dy Yow 21/2/02: 'Virgin Cross Country' a lanchyas aga thren nowydh hedhyw dhe Bennsans. An jynn yw henwys der Gernewek "Vyajer Kernewek". Byttegyns... ha'n kroglennow igerys yn unn henwel a'n tren... esel senedh Westminster Porthia, Andrew George a welas bos kammlytherennans war an plat-hanow. Yn le a "Vyajer Kernewek"... yth esa "Vyajer Kerewek". Lywydhyon Virgin re ambosas i dhe ewnhe an kamm ma yn uskis. A-dar henna, an jynn nowydh ma yw nowodhow da rag an gwasonieth hyns-horn yn Kernow ha dynnerghys veu gans peub.
Dy Meurth 19/2/02: Konsel Kernow re settyas an bojet hedhyw rag an vlydhen nessa erbysek. Awos kostow ughella a witha gwasoniethow kepar ha Gwasonieth Sosiel, Godhyskans, Tanlu ha Kreslu, res o kressya an amont tyllys y'n toll konsel. Hemma a gress lemmyn dre eth kansrann ha hanter. Henn yw unn peuns ha seyth diner war ji bond-D ha hwetek diner ha peswar ugens rag chi bond-Ch. A-vorow, konsel Pennwydh a sett y rann an toll konsel. Govenek yma bos an isella yn Kernow.
Dy Lun 18/2/02: An pymp merther metrek, ha dew anedha dhiworth Kernow, re gollas aga has y'n Lys Ughel Loundres hedhyw. Dew vreusyas a ros aga breus war an kas neb yw gelwys gansa an 'brassa aval-dor toemm a-ban dibennys veu Karlo an Kynsa 1649. Yth esens i ow krodhvolas erbynn lagha Europek neb a leveris y vos kamm gwertha stoffys yn peunsow heb ken. Soweth, an Lys a erviras bos lagha Europek moy ughel es lagha Sowsnek ha res yw dhe wikoryon gwertha dre veneges an system metrek. Yn mysk an pymp esa Julian Harman ha John Dover dhiworth Ryskammel. Lemmyn, res yw dhedha i oll kavoes kans mil peuns rag kostow an lys. Byttegyns, i re leveris bos hwans dhedha pesya yn unn assaya fedha an nerth Europek.
Dy Sul 17/2/02: Wosa diw seythun stagys war an treth Porth Tewasgwynn, yth esa aswa yn hager awel hir lowr hedhyw rag pompya milyow gallon a dhowr dhiworth an gorhel-stoffys 'Kodima'. Hi a omdrethas 2a mis Hwevrer yn unn skoellya milyow a blynkenn a brenn. An dasneuvyans de o sewen bras, ha dres an nos, tennys veu dhe Aberfal. An Kodima a dhrehedhas an porth na hedhyw-vyttin. Yma hi lemmyn ow kortos hwythrans dhe weles mars yw possybyl y ewnhe.

Dy Yow 29/2/02: Baseresult Ltd neb a byw Hwel Krofti Dheghow re leveris hedhyw bos mal dhedha dynnerghi havysi y'n bal rag kavoes moy arghans. Hemma a ylli dalleth mis Metheven. Ny styr hemma bos pareusyansow rag gwaynya sten ow hedhi. Hwath yma peswarthek stenor yn unn oberi war tu ha dastalleth askorra sten. Byttegyns, yma tus erell neb a vynn usya an tir rag displegyans hwath gans govenek prena an bal yn-dann worhemmyn laghyl.
Dy Lun 25/2/02: Yma pareusyansow ran Kernow-PanKeltek ow mos war-rag yn ta. Nessa dy Sul y fydh kesstriv rag an rannow Kernewek y'n Ostel 'Great Western' Tewynn Pleustri dhe eth eur gorthugherweyth. Dewgh rag goslowes orth an naw profyans, y'ga mysk: Ahanan, Naked Feet, Outlaw, Skwardya, Kescana.