<EnJoY LiFe 97> - 2009 Count Down
2008 年最後一日，好想去睇 IFC 嘅倒數煙花，啲人講到好似好正咁，
搞到我都好想去睇。於是搵左幾個兄弟：政傑，嘉城同樹棠陪我去睇，
哈哈，其他人拍緊拖，我哋費事阻住佢地二人世界所以無搵到。
( 後尾發現原來 Belinda 都好想去睇架！ )
我最早放工，四點走得，政傑就六點，嘉城同樹棠都要夜啲先得。
我一放工就過左上環等政傑，我哋兩條友坐船過尖沙咀行下先。
又黎到海運影相，終於影到架火車喇！
周圍完全無晒人, 任影都得, 好彩平安夜個日無迫入去影咋。
之後，我地行左陣街，就去左 CitySuper Food Court 食飯，
我食左個 Burger ，一碗仔石頭鍋飯同埋大半包薯條，好幸福呀！
(其實我真係唔駛食咁多野架，大家唔駛驚我唔夠飽啊！)
食完野見到啲咁可愛嘅半咩咩當然要影相啦！^_^
十點幾終於匯合左樹棠同埋佢兩個朋友，而嘉城就黎唔到喇！
我哋已經太遲喇......星光大道已經封左，上左新世界對面嘅平台花園睇，
好彩都睇到可以清楚睇到 IFC ~
十...九...八...七...六...五...四...三...二...一...Yeah! Happy New Year!
啲煙花真係好靚呀，圍住成幢 IFC 咁發放，超正呀！好彩有出到黎睇！^_^
諗番 2008 年，其實都過得幾開心，由年中開始心情就愈來愈開心！
2008 年，對自己嘅認識多左，學識左同別人分享自己，
唔會成日將啲野收埋係個心度，個人開心左！
2008 年，好開心可以識左好多新朋友：
有個隔離 team 嘅同事走左，先開始識佢，返工個陣成日同佢 MSN；
去遊船河識左小炭頭同埋嗚哥，成日約埋佢啲 FD 一齊周圍去玩同影相；
星期五晚係李 sir 個社跳舞，成班舞友成日有講有笑，跳得好開心，
因為我比較年輕，阿sir，miss，同其他舞友都好鍚我；
最後年尾係 Eunice 嘅婚禮，認識左一班好好嘅兄弟姊妹。
2008 年，出左好多次海，年尾仲去左兩次旅行，玩得好開心呢！^_^
2009 年，希望繼續開開心心，可以識多啲朋友，可以去多幾次旅行！
新一年，希望大家都開開心心，最重要係身體健康呀！
 |
That's my life! =D VienneTTa 1-January-2009 |
-------------------------------------------------------------------------------