LA BRUHA

Probina l' Ahtasia,
Cuatru añuh casá
Y, treh chipiletih,
Bidu d' enterral.
La bruha loh ohuh,
Le pusu a un dagal;
Al otru, lah manuh;
Al otru, al besal,
Lo embruhó y perdierun
La salubriá.
Tamién el chiquinu
Maletinu, ehtá.
La bruha del puebru
Lo a güeltu a embruhal.
Biehah y comairih
Indiénduli, ehtán
Que hechi el harneru,
En beh d' ahinal
Al cura pa qu' ehi
Abiertu el misal;
Que hechi lah cartah,
La llabi, el metal,
Loh aruh, lah hachah,
Lo d' endibinal
O baiga a Buchana,
Que ponga el crihtal
O adeiti en' a copa
Y asina berá
L' afotu la bruha
Qu' ay en el lugal.
El biehu, a la lumbri,
Com' una cayá
Temblona, en 'a flama,
Tieni la mirá.
- ¡A, de lah presonah
Que beu raceal!
Creyentih o no,
Del huegu, sabrán
lah cosah que quien.
Él moh lah dirá.
Se lebanta alegu,
lah manuh alzáh,
Y idi, a la lumbri:
- ¡flama colorá,
Aburah la tierra
Y la eterniá;
Conodih secretuh
Del cielu y del mal,
Eha qu', en tuh luengah,
Bean la berdá!
¡Ludih, ehquiletuh.
Bodih, carcaháh,
Gañíuh, himplíuh,
Guerra, soleá
Acuil en 'a flama,
Ella falará!
Queó, un ratu, mu,
P' alúu, acontinal:
- Ahtasia, loh beu.
Beu el máh allá
Gomital defuntuh.
La bruha ahiná
Ripiti rihponsuh
De muertuh, Detráh.
Beu un cimenteriu.
Angora, a un dagal,
Ponzoña de cuácarra,
Pusiénduli ehtá;
Al otru, beleñu,
Solanu mortal.
Ara, a la dagala,
Un hongu, le da.
Ahuyi un potrihcu.
La bruha montá
Encima la flama,
En humu, se ba.
Ara, cohi cuerpu,
Se hadi animal.
Salilu, a la calli,
A perniquebral.
Quien llebi mañaa
La pata bendá,
Esa será bruha,
La bruha 'el lugal.