LA LOBÁ

La tardi cahcaba en rosah.
En el colol, la mahá
Ehaba un halu de humu
De harah amelazáh
Que toítu lo hinchía
Del golol. El mayoral,
En el jondu ' la cohtana,
Hadía la corralá.
La mayorala, en 'a puerta
Del chiberu, una chiva,
Ía metel pa qu' el lobu
No le hidiera lobá.
Y mentrih eha, en el airi,
Rehundil una toná.
Huyin lah úrtimah ludih.
Lah manuh, amohináh
De lah sombrah, enllenaban
El reol d' ehcuriá.
Huera, coplean loh bichuh
Y cudian la corralá,
El Mohtagán, el Carichi,
El Caracol, el Pardal.
La Leona 'hta pariendu
Seih perrinuh tíini ya.
Drentu, al amol de la lumbri,
Mentrih hadi una tohtá,
Palra, a la muhel, el ombri,
Lah hechurah del rabán.
De repenti.
            -¡Cucha, chacha!
Ahuera, ay algu. ¡Dagal,
Échati ahuera! ¡bay, corri,
y péhcati la cayá!
De golpi, sali a la puerta
Y ya, loh perruh ehtán
Engancháuh con treh lobuh,
Mentrih qu' otruh cuatru dan
Un manotadu a una obeja;
A l' otra, una mordihcá;
A l' otra, la dehpellehan;
A l' otra, quean derringá.
- ¡Hala con elluh loh perruh!
¡Enga, Caracol! ¡Pardal,
Hala con 'a loba coha!
¡Arrempuha, Mohtagán!
¡Alantri, Carichí! ¡Toba!
¡Hala loh perruh! ¡Dagal,
Arrejunta lah obehah,
Lebanta la corralá!
¡Alantri, perruh, alantri!
¡Lobuh cabronih, atráh!-
Mentrih, el pahtol gañía,
Hartu 'e gahpaleal,
Y harreaba cacheraduh,
Briegandu con 'a maná,
Hahta hadeluh huyil
A toh a la ehperdigá.
La flama d' una chamuhca
Le daba lu pa cuental.
Bidu sieti manirrotah,
Deciséih ehpelleháh,
Benti muertah y, entri ellah,
La Mansa, la Resalá,
La Retozona, la Ehtrella,
La Biciosa, la Cansá.
Eharretáu, güelbi, un perru;
La leona, mordicá;
Atiehtaíta de sangri,
Tray la molla, el Mohtagán.
-¡Amuh, Caracol, Carichi,
Mih cohonúh, a runchal
Allí a la mehma guaría
Andi loh lobuh ehtán,
Qu', en el horcón de la choda,
Bo' loh tengu qu' ahorcal!

Al rayal el día llega;
Da en el chodu, a la arbolá.
Del hopu tray arrahtrandu
Un lobu y, en un cohtal,
Trayía cincu lobinuh
Qu', en el horcón, ba ' horcal.