LA CAMPANILLÁ

La Quica y Hilipi
Se quien ahuntal;
Loh moduh aquellan
La campanillá.
El puebru ehtá ehcuru,
La nochi, enlutá;
En toah lah equinah,
Ay henti pará,
Goliendu, en 'a calli,
Lo que ba a pasal.
En 'ah bocahcallih
De la barriá,
Huntu a lah huguerah,
Ya meyu apagáh,
Se dan ehtrucionih
A la moceá:
- Tú, Tozú, no parih
Pol toitu el lugal,
Pa que toah lah hentih
Quein encerráh
Y toah lah huguerah
Quein farrungáh,
Y, cuantih me oyah
A mí zapeal,
Qu' empienci la huelga
Y la copleá.
¿M' entiendih, Tozú?
-¡Mu bien! ¡Bien ehtá!
- Harón, la Cagancha
Beh a 'n candilal.
Y tú, Peligotu,
Con una maná
De dieh campanilluh,
Tienih qu' acolpal
En 'a calli 'el Sapu,
Que son doh na máh.
Dah lah ehtrucionih,
Com' un bradu 'e mal,
A ocupal su sitiu
Se huerun ca cual.
Montonih de moduh,
A la ehperdigá,
Con hetah de bruhah
O armah empenáh
Sohtienin ehquinah
En toitu el lugal.
El campanilleru,
Un modu d'edá,
Con un campanillu
Com' una preñá,
Sona el achiperri;
Bertol y Coláh
Prencipian lah letrah
Loh doh, a enhebral:
-¿Ándi ehtán loh apelláuh?
- En argún sitiu ehtarán.
- Que salgan y moh combín
Y si no, campanillá.
Toh se quean muh
Un inti a 'hperal.
Aluegu, en 'a ehquina,
Se hecha un cantal:
"La nochi que s' ahuntarun,
Andaban d' acá p' allá:
Tíu HiIipi, con 'a manta;
Tia Quica, con 'a cayá".
Altoncih..., repica
La campanillá.
Alúu se vie,
Hechu 'n animal,
Sahurda a la heta
Del muestru Coláh
Con 'a cachicuerna
Bien ehtirahá
Y ihu a Gallonih:
- Haiti p' allá
Qu' a 'hti maricón,
Lo boy a 'hpenal,
Polque tie la curpa
De toa 'hta pringá.
- A 'hti lo derringu-
Moh idi Coláh.
Y, al pical Sahurda,
idu 'na pará,
Dánduli en un deu,
Una colmillá,
Que la cachicuerna,
Le hidu soltal
Dihpuesinu aprieta,
Comu pa runchal,
Hahta que lo pusu
Com' una cayá
Y lo tiró al lou.
Y tal habatá
Le dio con 'oh dientih
En 'a carrillá,
Qu' un peadu carni,
Ehcupió, Coláh.
Al beli la sangri,
En el harapal,
Le idi Puliqui:
- 'Htarbuh quietuh ya,
Que rahu al que pisi
Lah reglah dihtáh.
Y tú, zarrandrahu,
Cohi el facu ya
Y que no te bea
P' aquí raceal,
Que yo saharrahu
En ehti lugal,
Al que moh farati
La campanillá.
Y, cuandu Sahurda
Se hue a lebantal,
Un rondel de cheirah
D' ojah plateáh,
Tenía 'l reol,
Que la moceá
Dengún caganíu
Eha galleal,
Ehtandu hadiendu
La campanillá.
Suena un caracol
Y, al mehmu compáh,
To loh achiperrih
Qu' ay en el lugal.
-Paicía 'htal suelta
La mehma boyá.-
En toah lah ehquinah,
Se hecha un cantal.
Alúu, se toca
Y ba otra toná;
Alúu, se toca
Y, pol to 'l lugal,
Asina, se hadi,
La campanillá.