COSAH DE MATACANIH


El otru día, Agallonih
Me se presentó en 'a ehcuela
Y me ihu:
             - Señol Maehtru,
Que mu güena' uhté lah tenga.
No m' ehó rehpondel
Y siguió:
              - De carrilera,
Me lo é teníu qu' aprendel
Y dánduli con pacencia.
Asina eh que no me pari,
Polque alúu, la mollera...
¿No be? Ya se farrungó
La rihtri 'e cosah güenah
Qu' ía a idili pa mí.
¡Mecáchisih en 'a mal,
ehta mollera ehtá güera!
Güenu, bengu a si m' aprendi
De númiruh y pobremah,
De tonáh en 'a guitarra
Y d' esu qu' idin la hebra;
Peru, que na de retólica,
Na de hografía ni letrah,
Que no m' entran lah roangah
Ni lah langaruchah mehmah.
Namah conozu la ce,
Polque idin que cigarru
S' empienza a ehcribil con ella,
Pero qu' en na, se paicin
Un cigarru y esa letra.
En fin, d' ehcritura, na;
Polque m' entra una cansera,
Cuantih ehcribu, en el pulsu,
Comu arrancandu regonih
Pa la lumbri, pa la hesa,
Y m' entran unuh sorih,
Polque to me s' abalsera
Aquí entru en el celebru
Y toitu me s' enrea...
Que no puéu risihtil
Loh borronih de lah letrah.
Se me hadi un rebuhón...,
Que m' entumin la sesera,
Y un ñu con 'oh ringurranguh
Ehcribíuh en 'ah bereah
Del cuaernu, que no pueu
Esenreal la mollera.
Angora, si eh la guitarra...,
Ésu sí; pa mí, lah cuerdah
No tienin dengún secretu:
Na máh tócala... y suenan.
Peru la Solfa...,¡A, la Solfa!
¡Baya una derringaera
La d' esuh garabatinuh
Con 'ah cachiporrah negrah!
En fin, que yo d' esu na;
Polque ésu no m' entra.
Yo na máh sonih, cantarih
Y númiruh y pobremah,
Pa que puea idil la henti
¡Baya un tíu! ¡Qué mollera!
Alúu, si me pregunta
Tíu Harutu po' la cuenta
Que hadi de l' adituna,
Del trigu o de lah cirgüelah,
Cuandu ehté bien empapáu
De esu que llaman la Hebra,
Pusiéndumi enteresanti,
Le igu: ¡Alfa máh beta!
Y se queará tirulentu
Y idirá:  ¡Lo qu' eh la cencia!