A PEDRO CAÑADA

Asina, comu machuh ayugáuh,
Ca cual a su gamella,
Rempuhandu rehuerti toh p' alantri,
Saldrá la Ehtremaúra de miseriah.
Moh hadin farta machuh,
loh machuh qu' otrah épocah,
Colarun loh océanuh,
Aballandu p' América,
Polque angora, loh machuh que tenemuh,
Trucarun loh cojonih pol güebera.
-¿Ándi ehtán, - idi el puebru,-
Cuandu tienin qu' efendel lah desihencia
Del campu que lah diña, dehcroháu,
Que moh se mueri apriesa,
Sin una hendiúra del aráu,
Sin 'a manu qu' echaba en él su huerda?
Ahita d' ehperal, Ehtremaúra
Ahita de promesah,
Ya no ahila p' alantri, se desangra:
Toa Ehpaña tie huélliga.
Y mentrih, loh rinconih y lah callih
Himplan ahoguh, hielih en 'ah biehah.
-¿Qué moh hadin loh hombrih dehcohíuh-
Idi el puebru- cuandu abemuh pobremah?
¿Ándi ehtaban metíuh en 'oh embarguh?
¿Ándi ehtán si, en 'ah contrah, s' enhuleran?
¿Quiciáh colandu trolah, sin medía,
O quiciáh rebimbandu de fachenda,
Gañendu comu cuácarrah cotrifah
El agua beniera?-
Menuh mal qu' ay un machuh.
Pedru el machu, le á puehtu, la tierra,
Polque pa na se dobla,
Dengunu lo cimblea.
Le idin el Llaneru Solitariu,
Pedru el claru, qu' a toh moh aclarea,
Que, polcima ' poltronah y partíuh,
Sempri ehtará la tierra.