EL MIRAGRU

Po' la calli l' armita, abajandu,
Una hembra de hierru y de naca
Apregona loh úrtimuh quesuh
-¡Al güen quesu ' Cabra...!
Era hirulona,
Chuchurría, mansa,
De trihti gerol
Y de mirá lacia.
Com' una pachucha,
Toah lah mañanah,
Con 'a cehta de quesu al cuairil
Y en 'a molla mohina la cántara,
Arrecorri el puebru,
Apregona 'l arba
Suh pielih curtíah
Y su lechi branca.
Detráh, un rabín,
Qu', a ca na, se para,
Hadi bulra a loh chicuh del puebru,
Idi a lah dagalah:
-¿Quieh quesu, chica?
¿Quieh lechi, chacha?
Y, cuandu lah probih
Se l' abehinaban,
Le hadía bulra
Y la' horeaba.
De ruillah, loh bidi en el Crihtu.
Toah lah mañanah,
Cuelan en 'a armita,
Cuandu, al chodu, aballan.
Con 'oh ohuh poníuh en 'a imahin,
Él hadiendu comu que cuentaba
Loh doci anhelotih
Que la roeaban,
Ella, laguinosa,
Asina palraba:
-¡Santu Crihtu, ponélmilu güenu!
¿No lo veh mancornáu en 'a cama,
Endi el Resucitu
A la Candelaria?
Ba ya pa dieh mesih
Y no tieni tradah
De salil, pirongu,
A cudial lah cabrah.
¿No bih que no pueu
Aguantal, tantu tiempo, ehta brasa?
Semuh cincu, Señol, semuh cincu
Y naidi trabaha.
¿No me tíinih fe?
¿No me tíinih ansia?
Ya no aguantu, Señol, ya no pueu.
Y, se poni, el dagal, en boh alta:
- No se lo ripitah
Mía que s' enfaa
Anda, píili angora otra cosa.
Y ba y se lebanta
Pa idili al Crihtu,
Mentrih ella transía himplaba:
-¡Dalmuh perrah que ya moh ahogan
Muchu tiempu d' atráh lah mohatrah!
¡Dalmuh perrah, Señol, dalmuh perrah.-
Y, al sentil que s'abrieron lah cahah
De loh lampadariuh,
Dambuh dehmangahan.