Nikaah

Jin saahibzaadi ka walid saahab ne walida sahiba se zikr kiya tha, unke baare mein ab is se adhik hum aur kya arz kar sakte hain ki jab se hum yahan aaye hain humaari drishti sab or se simat kar sirf inhi saahibzaadi par jam gayi hai. Sanyog se humaari kothi ka jo bhaag vishesh roop se humaare adhikaar mein hai, uske bilkul saamne hai Khan saahab ki kothi ka weh bhaag, jiske saamne ke kamron mein yeh saahibzaadi rehti hain. Aur in kamron ke saamne hi kabhi badminton ka jaal lag jaata hai aur weh khel shuroo ho jaata hai, jis ko walid saahab paron waali gend ka khel keh rahe the. Kabhi cycle polo hone lagti hai, kabhi yonhi daud-dhoop shuroo ho jati hai, jis mein hirneeyon ki si kilolein shamil hoti hain aur humne apne kamre mein likhne ki mez aise kone mein laga li hai ki is mez ke kareeb baidh kar hum yeh sab kuch, jab tak dekh sakte hain dekha karte hain. Aur is likhne padhne ki mez par ek vichitr adhyayn na silsila jaari hai.

Sunehre rang ke resham ka ambaar sir par liye, apni baadaam jaisi aankhon mein chanchalta bhare patle patle gulaabi hothon par madhur muskaan ki lehron mein subah se shaam tak yeh ladki thapedhe khaaya karti hai. Kabhi kisi baat par khilkhilaakar hans di to vaataavaran mukhrit ho utha. Kabhi kisi saheli ko is prakaar aawaaz di ki humko aisa laga ki humaare seene mein dil nahin balki ek bada kaan hai, jo dhadak raha hai, athwa is aawaaz ko bharne ki recording machine hai jo chal rahi hai, kabhi weh apne lawn par bada sa chhaata gaadh kar uske neeche padhti hai aur chashma lagaaye hue ek mem saahab usko padha rahi hain. Aur to aur ek aadh martaba to usko humse baat karne ki bhi aavashyakta aa padhi. Misaal ke liye uska wahin paron waala gend chidhiya ki bhaanti udh kar humaare compound ke kisi pedh par aa gaya aur usko vivash kehna padha. Humko dekhkar-" Aye, janaab, maine kaha- Mister humaara shuttle cock aa gaya hai udhar."

Aur hum is prakaar maano bada paropkaar kar rahe ho, angoor ki bel hilaakar yaa agar kisi pedh par chadhne ki zaroorat hui to chadhkar shuttle cock utaar diya aur usne madhur muskuraahat ke saath kaha-" Thankyou." Yahi ek shabd humaare mann aur mashtishk mein maano gunj kar reh gaya."

Baat yeh hai ki is prakaar ka jab aamna saamna ho to manushye, humaara matlab hai us manushye se hai, jo humaare sadrishye uchch varg ka na ho ajeeb ajeeb chhichhorpan kiya karta hai. Jaise tehel rahe hain, khaahamkhaah kabhi apni chaal mein alhadhpan paida karke, kabhi bade bade kalaakaar bante, baal kuch uljhaaye, kameez ka collar kuch khole hue aur tie kuch dheeli baandhe hue. Kabhi vichitr dhang se cigarette pi rahe hain, kabhi dhuein se chhale bana rahe hain, to kabhi is prakaar ke kash le rahe hain, jaise mahaan vichaarak kisi antarraashtriye samasya ko suljha raha ho. Kabhi cigarette ke bajaay pipe sulgha liya hai aur samajh rahe hain ki jo aajkal ki ladkiyaan hoti hain pipe dekhkar to apne dil par weh kabu rakh hi nahin sakti. Kabhi poora suit pehne hue apni chhavi dikha rahe hain to kabhi sirf kameez aur patloon mein shareer aur vastr dono ka pradarshan ho raha hai kabhi reshmi dress-gown mein sirf sleeper pehne tehel rahe hain to kabhi jaalidaar baniyaan par tanzeb ka bareek kurta hai, dheela payjaama hai, jaypuri joota hai; haath mein ek pustak hai aur tehel tehelkar maano padh rahe hain, halanki maksad sirf yeh hai ki apne ko dikhaaye aur unko dekhein, aur kabhi udhar se ek aadh raseed bhi mil jaaye phir to qayaamat hi samajhiye. Ateinw kuch is prakaar ki qayaamat gujar chuki thi.

Hua yeh ki ek din hum kuch apne ko bada kalaakar banaaye hue baal bikhre, dheeli kashmiri payjaama aur nihaayat nafees malmal ka kadha hua lakhnavi kurta pehne ek pustak haath mein liye tehel rahe the ki sehsa kaano mein jaise jal-tarang baj utha. Nazar uthakar jo dekhte hain to weh akeli na thi balki apni bahoot si humjoliyon ke saath apne lawn par maujood thi. Aur humko aisa mehsoos hua ki humaare nazar uthaate hi un sabne hanskar nazrein chura li. Warna weh isi or dekh rahi thi aur ab unki hansi kuch aur badh gayi thi. Hum phir maano pustak padhne mein magn ho gaye.

Tabhi ek aawaaz aayi.
"Vanaspati shaastr ke vidhyaarthi aamtaur par baagh hi mein padha karte hain."

Aur uske baad sab hans di. Zaahir hai ki yeh vyangye humi par tha, jiska pramaan yeh hai ki humaara dil tezi se dhadakane laga, magar abhi is vaakye ki gunj khatm nahin hui thi ki doosri aawaaz aayi.
"Ise padhne ka tehelna kehte hain."

Sab ki hansi mein ek maheen si aawaaz aayi-" Yeh kya kar rahi ho Jameela?"

Ab humne tehelna chhodkar, ek pedh ke neeche baidhkar padhna shuroo kar diya is beech mein kuch hansi ki aawaazein aati rahi aur kankhiyon se humne dekha ki humaari padosan hansne waaliyon ko aankh ke ishaare se manaa kar rahi hai, magar uske manaa karne ke baawajood ek aawaaz aayi-
"Hum jahan baidh le wahin college ban jaaye."

Aur is par weh thahaaka laga ki hum uthkar andar chale aaye aur wahan apni safalta ka jashn badi dhoom dhaam se manaaya gaya, jisko humne usi mez se dekha jo isi kaam ke liye us rukh par lagaai gayi thi. Magar iske saath humne yeh bhi dekha ki humaari padosin ke tewaron se yeh baat baras rahi thi ki maano usko yeh dhang pasand nahin aaya hai. Ek ladki ne, jo sabse kuroop thi magar sabse adhik chahek rahi thi humaari padosin ke kareeb aakar kaha, "Bhai R.ana, humko afsos hai ki humne tumhaare padosi ko naaraaz kar diya."

Maaloom hua ki shubh naam R.ana hai. Is shubh naam par abhi hum jhoom hi rahe the ki R.ana ki aawaaz aayi-" Baat yeh hai ki aaj tak is prakaar ki chhed-chhad kabhi idhar se hui na udhar se."

Ek nevle ke shakl ki, magar badi faishonable ladki ne kaha-" Yeh aap safaai pesh kar rahi hain, to humko pehle hi kab shubaah tha?"

Ek doublerotinuma ladki ne kaha-" Magar aadmi bechaara shareef hai, chupke se chala gaya."

R.ana ne kaha-" Khair shareef to weh hai hi. Itne dino se hum log padosi hain aur aaj tak kabhi aisi baat nahin ki ki jis par koi aitraaz kiya jaa sake."

Sharaafat ki yeh sanad milte hi humaari aankhon ke saamne apna Hair cutting saloon ghoom gaya, jismein hum ek haath mein kainchi aur ek haath mein kanga lekar kach-kach kach-kach kiya karte the. Is vichaar ke saath hi hum ekdum sehem kar reh gaye ki khuda na khaasta agar in logon ko maaloom ho jaaye ki hum log kaun hain to kya ho? Is khyaal mein hum aise khoye ki ab jo nazar uthakar dekhte hain to wahan badminton khelne ki taiyaariyaan ho rahi thi. Jaal lagaaya ja chuka tha, balle sambhaale ja chuke the. Ek taraf R.ana aur weh nevle ke munh waali faishonable ladki thi, doosri or weh sabse kuroop ladki aur ek aur ladki thi jo allah miyaan ki nahin balki Abdul Rehman Chugtaai ki kriti maaloom hoti thi weh doublerotinuma ladki court ke baahar ek aur ladki ke saath khadi hui baatein kar rahi thi.

Zara himaakat to dekhiye apni hansi udhwaakar aaye the aur phir baahar jaane ko ji chaahne laga. Jaldi se munh dhoya, chehre par snow ragdhi, dhoop ka chashma lagaaya aur badi shaan se tehelte hue us stage par aa gaye, jahan abhi hooting karaakar gaye the. Wahan khel poori tezi se jaari tha ki humaare pahunchte hi phir ek aawaaz aayi-
"Aye aamdanat baayse aawaadi ma."
(Tera aana humaare liye prasannta ka kaaran hai.)

Aur R.ana ne daanta-" Yeh kya waahiyaat hai?"

Us kuroop ladki me kaha-" Isiliye to hum farsi mein keh rahe hain ki koi samajhe nahin."

Doubleroti boli-" Haan, aur kya warna weh na kehte ki-"
"In kaali ainak waalon se zara bach kar rehna ji."

R.ana ekdum cheekh padhi-" Oh kambakht, achcha thaher to zara."

Ekdum weh chidhiya saamne aa giri; Isliye ki us chugtaai ki kriti ne jaanboojhkar haath hi aisa maara tha.

R.ana ne lagbhag ro dene ke andaz se kaha-" Bhai, yeh kya kar rahi ho. Tum log ab bataao, bhala shuttle cock kaise aayega?"

Bahoot ehsaan tha ki hum shuttle cock us or phenk dete; Magar humne bhi kaha ki humko kya garz hai"

Nevle ki shakl ki ladki ne kaha-" Maang lo na jaakar R.ana!"

R.ana ne kaha-" Hargiz nahin main to kabhi na maangoongi, wah! Yeh bhi koi baat hai."

Weh kuroop ladki bhi boli-" Mere khyaal mein khud phenk denge idhar."

Aur humne dil mein kaha-" Kabhi jo hum phenkein to kaum ka naai na kehna."

Doubleroti ne kaha-" Achca dekho, main jaati hoon, shuttle cock lene."

R.ana ne kaha-" Khuda ke liye bakhshiye" Main aap khud maang leti hoon." Aur R.ana ko apni or aate dekhkar hum tehelte hue do kadam aur badh gaye.

R.ana ne apni seema tak aate hue kaha-" Suniye, maine kaha mister, dekhiye zaraa!"

Humne maano chaunk kar kaha-" Ji, mujhse kaha?"

R.ana boli-" Ji haan, humaara shuttle cock aa gaya hai idhar."

Humne kaha-" Bahoot achcha, abhi leejiye."
Aur humne shuttle cock utaakar udhar bajaaye uchhaalne ke, liye hue khud R.ana ke paas jaakar kaha-" Aaj to aapke yahan badhi chehel pehel hai!"

R.ana boli-" Ji haan meri kuch saheliyaan aayi hui hain."

Shuttle cock dete hue humne kaha-" Mere baare mein aapki saheliyon ne jo shaayari farmaayi hai, uska meri or se shukriya adaa kar deejiye."

R.ana ne kaha-" Ji nahin, muaaf keejiye, aap to khud vidhyaarthi honge aur jaante honge ki school aur college ke vidhyaarthi isi prakaar ki baatein karte hain, khair unki or se main muaafi maangti hoon."

Humne hanskar kaha-" Main bura nahin maanta hoon balki daad de raha hoon. Unke chubhte vaakyon ki, aur khaas taur par is misre ki-"
"Hum jahan baidh ke padh lein wahin college ban jaaye."

R.ana ne muskura kar kaha-" Ji haan, yeh Sarvar thi, badi shaayar bani phirti hain."

Aur weh shuttle cock lekar udhar aayi aur hum jaan-boojhkar andar chale aaye taaki is vaartaalaap par inki saheliyon ka tamaasha dekh sakein. R.ana ke lautte hi sab ne usko gher liya.

Doubleroti ne kaha-" To yeh kahiye ki badi tafseeli gooftagoo hua karti hai, khuda mubarik kare."

R.ana ne kaha-" Aap logon ki wajah se yeh naubat sirf aaj aayi hai."

Kuroop ladki boli-" Kya main poochh sakti hoon janaab se ki un se kya baat ho rahi thi?"

R.ana ne kaha-" Baat ka vishye aapka misra tha."
"Hum jahan baidh ke padh lein wahin college ban jaaye."

Usne aur bhi kuroopta se kaha-" Main kis qaabil hoon? Unki zarraanawaazi hai."

R.ana boli-" Shukriya ada kar rahe the aur keh rahe the ki mere baare mein jo kuch kaha gaya hai uska shukrguzaar hoon."

Chugtaai ki kriti boli-" Such?"

Maaloom nahin iska R.ana ne kya uttar diya jo faasle ke kaaran hum spasht sun na sake; Magar is baatcheet ka nateeja yeh hua ki badminton khatm, aur sab ladkiyan kamre mein chali gayi. Albatta hum isi intezaar mein der tak mez par baidhe rahe ki shaayad unka rukh phir idhar ho jaaye; Magar humaari asha poori na hui.

Yeh thi weh apni baatcheet jiske baad ab yeh hone lagaa ki jab kabhi unka saamna ho jaata to hum poochh liya karte the ki kahiye aaj kya ho raha hai? Aur udhar se iska rasmi jawaab mil jaaya karta tha. Ek aadh baar humne jaan-boojhkar akhbaar maang liya. Phir kisi kitaab ki unse sifaarish kar di ki main padh raha hoon aap bhi zaroor padhiye. Nateeja yeh hua ki kitaabon ka len den shuroo ho gaya. Aur iske baad in kitaabon par vichaar vinamye hone lagaa. Weh kabhi kabhi tehelti hui idhar aa jaati aur kabhi hum koi bahaana dhoondkar aur unke bhayankar kutte se, jo ghoda bante bante jaane kyon kutta bankar reh gaya tha, darrte hue unki or chale jaate the. Magar ab tak koi niyamit mel-jol na tha, aur is mel-jol mein unki moti-si nihaayat khushk walida sahiba baadha thi.