Huzoor, main ek muhaazir hoon aur asaliyat meri yeh hai ki jaati ka pata to khair walid saahab ko hoga lekin agar peshe ka koi sambandh jaati se samjha jaata hai, to mein arz karoon ki hizrat se pehle hum logon ka ek hair cutting saloon shaher ke sabse bade baazaar mein tha, jismein baal katwaane saadhaaran log nahin , balki weh bade log aaya karte the, jo baal katwaai ek rupye se kam khair dete hi na the, magar kabhi kabhi paanch rupye tak de jaate the. Bade bade motor waale humaare yahan aate the aur hum bhi baal banaane mein unke saath ajeeb ajeeb chonchle barta karte the. Bhanti bhanti ke bijli ke yantr laga rakhe the - geele baalon ko sukhane ka top, baalon mein ghunghgar paida karne ke vibhinn yantr aadi. Is silsile mein bade bade parivaaron ki beghmaat, sahizaadiyaan bhi aaya karti thi, balki bahoot si ladkiyaan to baal bhi kataati thi. Saaraansh yeh ki humaara hair cutting saloon khoob chal raha tha. Mujhko achchi tarah se yaad hai ki walid saahab kabhi kabhi ghar mein kaha karte the ki unhonein kaisi saadhaaran stithi se yeh unnati ki hai. Unhi se humko bhi maaloom hua ki dada jaan railway-station ke baahar apne ustre aur kainchiyaan ek chhote se teen ke sandookche par rakh kar baidha karte the. Graahakon ke liye do eentein jodhkar saamne rakh li thi. Unhi par aakar graahak baidh jaaya karte the aur dada jaan unki dadhi moondh diya karte the yaa sir par ustra pher diya karte the. Walid saahab ne unnati ki to pehle station ke platform par har aane waali train ke samay pahunch jaate the aur musaafiron ki shave banaaya karte the. Is kaam mein khuda ne itni barkat di ki kuch dino ke baad unhonein ek darwaaze waali dukaan kiraaye par lekar baal banaana shuroo kar diya. Is dukaan par unka kaam aisa chala ki aakhir shaher ke sab se bade baazaar mein ek badhiya hair cutting saloon kholkar do-teen naai naukar rakh liye. Walid saahab ko vyaapaar ki badhi achchi soojh boojh thi. Weh apni dukaan ki aamdani dukaan par hi lagaa diya karte the aur ghar mein chaahe jaise bhi rahein; Magar dukaan par sadaa patloon pahen kar jaate the aur jo naai naukar rakhe the, unko bhi badha faishonable banaaye rakhte the. Dheere dheere unhein yeh bhi mehsoos hone lagaa ki jis uchch warg se unko aaye din waasta padhta hai, uske liye yeh aavashyak hai ki weh yaa khud angrezi baat karein yaa koi angrezi jaanne waala unke saloon mein ho, isliye ki aksar saahab log bhi saloon mein aa jaaya karte the. Khair, kaam nikaalne bhar ki angrezi walid saahab bhi bol lete the, jaise- "yes sir" aur "no sir" magar musibat yeh thi ki angrez auraton se bhi "yes sir" aur "no sir" keh diya karte the aur weh muskuraaya karti thi. Kai baar weh saahab logon ke badhe badhe angrezi waakiyon par mahez atkal ke "yes sir" aur "no sir" kaha karte the. Unka vichaar yeh the ki unka yeh kaarobaar aur bhi chamak sakta tha basharte ki weh angrezi jaante hote. Is abhaav ki poorti ke liye walid saahab ne humein apne kaarobaar mein hissa lene ke alaawa school mein bharti kar rakha tha. Shaam ko hum apne hair cutting saloon mein chale jaate aur din-bhar school mein rehte the. Baal banaana aadi to khair aa hi chuka tha; magar padhne-likhne ke silsile mein bhi hum peechhe na rahe. Metric pass karne ke baad walid saahab ka iraada tha ki humein college mein dakhil kar dein, magar yeh fasaad hi shuroo ho gaya aur hum log sab kuch chhod-chhad kar idhar aa gaye.


Yahan aakar maaloom nahin walid saahab ne kya chaal chali ki humko turant ek band makaan par kabza mil gaya aur is band makaan mein humein aisi aisi cheezein haath lagi ki jinka anumaan bhi na tha. Zewar aur kapdha, furniture aur bartan. Ek bhara hua ghar, jismein ek uchch parivaar ki aavashyakta ki har cheez maujood thi aur to aur naqad rupya bhi itna mil gaya ki ab humaare liye hair cutting saloon kholne aur baal kaatkar pet paalne ki zaroorat baaqi na rahi, balki walid saahab ne hum sabko baar-baar taakid ki ki khabardaar, jo kisi se yeh kaha bhi ki hum log hajaamat banaaya karte the. Phalswaroop kuch hi dino mein walid saahab bajaaye Ajmat yaa Khalifa Ajmat ke Nawaab Ajmatullah Khan aur hum Saahabzaade Farhatullah Khan ke naam se mashhoor ho gaye. Walid saahab ne paas-padhos ke logon ko sahaj hi mein is baat ka yakeen dila diya ki hum badhi daulat chhodkar aaye hain. Dharti mein gadhe khazaane, sone ki eentein, bank ka rupya, ghar-baar, gaanw-giraanw, gaadi-motor, naukar-chaakar sab kuch chhodkar aana padha hai. Ghar mein jo laakh, sawa laakh rupya naqad tha, bas wahi saath aa saka. Muhalle waale unki shishta aur shaaleenta se sahaj hi mein prabhaavit ho gaye. Is udaarta se chande diye ki afsar bhi khush. Jo koi kuch sawaal lekar aa gaya, use prasann hi kar diya yahi baatein hua karti hai aur vyakti ko lokpriye banaane ke liye. Phir yeh ki aaye din unki daawatein, kabhi koi afsar chala aa raha hai, kabhi koi badha aadmi humaare ghar mein khaane par maujood hai aur haal yeh hai ki kabhi motor par sau-do-sau kambal lekar sharanaarthiyon ke camp par pahunch gaye aur afsaron dwaara bantwa diye. Kabhi apne halke ke dhaane mein khaana bhijwa diya ki camp mein bhijwa diya jaaye. Jab kabhi koi fund khola gaya, aap usmein pesh-pesh. Saat-aath sharanaarthiyon ko khud apne yahan le aaye aur unka sab kharch sehen karne lage. Saaraansh yeh ki ab har kisi ki zabaan par Nawaab Ajmatullah Khan ka naam tha.


Magar saahab, ek baat hai ki walid saahab agar zara bhi padhe-likhe hote to jaane kya karte, jabki anpadh hote hue unka yeh haal tha ki jis samay weh kisi vishay par baat shuroo kar dete the, apne saamne kisi ka chiraag na jalne dete the. Weh aakarshan tha unki bhaasha mein aur uchaaran bhi aisa shuddh ki kisi ko sandeh bhi nahin ho sakta tha ki yeh mahaashay kabhi naai bhi rahe honge. Aur yeh jo kuch ho raha hai yeh bhi to hajaamat hi ka dhang hai. Albatta ghar par aakar jab weh bheetar jaate to kabhi kabhi apna vaastavik roop prakat karte the, vishesh kar aisi stithi mein, jab koi paarivaarik samasya sammukh ho. Ateinw aaj bhi ek samasya saamne thi. Humaari varshgaandh har saal is prakaar hua karti thi ki biraadari ka khaana hota tha, jismein ek-se-ek Khalifa nazar aata tha auratein dholak par raat-bhar gaana subah karti thi. Subah yahi auratein gulgule aur chiraagi ke paise lekar masjid mein jaati aur taakbhar aati thi. Ateinw striyon ka is baar bhi yahi vichaar tha ki biraadari ka bhojan hoga aur ratjaga hoga; Magar walid saahab ne iska kadha virodh kiya aur ek moti si gaali walida saahiba ki shaan mein irshaad farmaane ke baad bole-" Wahi misaal ki naali ke keede ko sughandh ki dibiyon mein band kar do to uska phadh-phadha kar dam nikal jaayega. Ho na aakhir asal nasal ki naain! Tum bhala apna naaipan bhool sakti ho? Hazaar martba mana kiya ki ab koi aisi baat mat karo jismein apni asliyat ka pata chale. Hum yahan uchch jaati ke shareefzaade bane hue hain, koshish kar rahe hain ki kisi badhe parivaar mein launde ka byaah karke shareefon mein shaamil ho jaayein aur weh hain ki apni asliyat uchhaalti phirti hain. Ratjaga karengi! Dholak Dhumkaanyengi! Gaane gaayengi!"


Walida ne jalkar kaha-" Aye suna ki nahin? Tum bhool jaao apne baap-daadon ko, mujhse to yeh nahin ho sakta ki mein badhon ke riti-riwaaj bhool kar baidhi rahoon.To kya tumhaara yeh matlab hai ki varshgaandh hi na manaai jaaye?"


Walid saahab ne hukke ka kash lete hue farmaaya-" Yeh kaun keh raha hai magar ab varshgaandh hogi is tarah ki jis tarah badhe aadmiyon ki hoti hai. Daawat hogi thaathdaar! Badhe-badhe raees, haakim, waqeel, doctor, saudaagar, yeh log aayenge. Ab yeh thode hi ho sakta hai ki main naaiyon ko jamaa kar loon, doosre yahan apni biraadari ka hai kaun?"


Walida ne poochha-"Aur ratjaga?"


Walid saahab ne turant asliyat par aate hue kaha-" Tere dimaag mein to bhara hai bhoosa ratjaga ki bachchi! Ratjaga kahin shareef aadmiyon mein hota hai? Aisa hi gaane ka shauk hai to mujra kara lo."


Walida saahiba ne aashcharya se poochha-" Weh kya bala hai?"


Walid saahab ne kaha-" Randi ka naach! Ab samjhi? Naak mein dam kar diya hai is aurat ne! Mujhe yeh khabar hoti to naak kaatkar udhar hi chhod aata."


Walida sahiba is prakaar ke vyavahaar ki aadi ho chuki thi. Unke liye yeh koi bura maanne ki baat na thi. Albatta khij hoti thi humein ki hum metric paas karke apni aukaat se baahar ho chuke the. Magar kehte to kya kehte. Abhi do hazaar gaaliyaan humko bhi suna di jaati; Isliye aise awsaron par chup hi ho jaate the. Ab walida saahiba ko samjha rahe the-
"Tumhein kya maaloom ki main kis fikr mein hoon. Allah ne rupya diya hai, paisa diya hai, izzat di hai apni ek baat hai jo har jagah bani hui. Bas zaraa kami hai to yeh ki jaati ka maamla zara gadhbadh hai. So iska bhi upaay yeh hai ki launde ko kisi unche gharaane mein byaah denge to zaahir hai ki shareef hi ho sakta hai kisi shareef ka samdhi. Meri nazar mein hain Khan Bahadur saahab jo aksar aaya karte hain motor par - weh jo saamne waali safed kothi mein rehte hain na?"


Walida sahiba ne kaha-" Haan, haan, samajh gayi Ali Hussain Khan keh rahe ho na?"


Walid saahab kareeb khisak kar bole-" Haan, wahi. Lakhpati hai budha aur bada kharaa padaan hai. Ladki bhi uski aisi hai-chande aftab, chande mehtaab, dekho to nazar jam kar reh jaaye. Iklauti ladki hai aur isi ka sab kuch hai. Agar iske saath ho jaaye baatcheet pakki, to samjho ki ho gaye hum bhi hamesha ke liye shareef. Phir soorat ki achchi, bicycle par weh baidh le, motor weh chala le, paron waali gend ka khel to safaai se khelti hai ki wah! Ji wah!"


Walida sahiba ne kaha-" Haan, main dekh chuki hoon is ladki ko. Magar kahan weh, kahan hum!"


Walid saahab ne aankhein nikaal kar ghoorte hue kaha-" Yeh kya baat hui are bhai, yeh to humko maaloom hai ki hum bhi unche khaandaan ke khare padaan hain. Reh gaya dhan, to hum lakhpati na sahi magar yeh to un ko bhi maaloom hai ki khaate peete raees hain, hum bhi. Yeh kya tumne kaha ki kahan weh, kahan hum. Tumhein pata bhi hai ki main is zikr ko chhed bhi chuka hoon ab tum jaano, ladki waale ekdum se to "haan" kar nahin dete. Hanskar kehne lage ki dekha jaayega aur phir bole ki ab weh zamaana hai ki ladki aur ladke dono ki marzi bhi dekh leni chaahiye."


Walida sahiba ne kaha-" Lo, aur suno. To kya ab weh ladki se poochhenge?"


Walid saahab ne kaha-" Tum nahin jaanti, bade aadmiyon mein yahi hota hai, aur padhi-likhi ladkiyaan apni pasand ke bina shaadi hone hi nahin deti. Kahin humaari-tumhaari tarah thode hi hai ki na maine tumko dekha tha na tumne mujhko. Andha jua khela gaya tha aur jab pehle-pehel tumko dekha tha to dil dhadak raha tha kahin kaani-khatri hui to kya karoonga main? Maaloom nahin aankhein dono hain ki ek hai?"


Walida sahiba ne kaha-" Kahin bhi nahin. Tumhaare yahan se aayi to thi auratein mujhe dekhne."


Walid saahab ne kaha-" Ek to auratein is muaamle mein jhooth bola karti hain, doosre maare sharm se tumne aankhein bhi to band kar li thi. Ab kise khabar ki in band aankhon mein aankhein hain bhi yaa yeh ilaaka hi gaayab hai koi aisa. Matlab yeh ki uchch parivaar mein yeh baatein nahin hoti. Ab to ladka ladki ko achchi tarah dekh-bhaal sakta hai, ladki ladke ko balki maa, baap to baad mein shaadi karte rehte hain par kaul-karaar to pehle hi ho chuke hote hain aur mel-jol bhi pehle hi bada lete hain."


Walida sahiba ne kaha-" Bade aadmiyon ki badi hi baat. Magar main yeh poochhti hoon ki agar shaadi ke baad unko pata chala ki humaari asliyat kya hai to kya hoga?"


Walid saahab ne kaha-" Pata bhala kaise chal sakta hai? Yeh pate chala karte hain apni hi biraadari ke logon se yaa unse jo apni asliyat khud uchhaalte phirte ho. Ab tumhi bataao ki mujhe yaa Farhat ko dekhkar kaun keh sakta hai ki yeh naai hain. Albatta darr lagta hai. Mujhko tumse ki tum koi aisi baat na kar baidho, jisse yeh bhaanda phoot jaaye aur banaa-banaaya khel bigadh jaaye. Ab jo tum yeh ratjage aur taak bharne ki si baat karogi to nateeja yahi hoga ki humaari sharaafat ti taraf se logon ke shaq badhenge. Doosre apne yeh taur tareeke bhi badlo ki kadwa tel sir mein daalkar pattiyaan chipka li yaa kangi karne ja baihi to kangi ke dandaanon se joonyein nikaal nikaalkar maarna shuroo kar di."


Walida sahiba ne vismaye se kaha-" Uee! To kya joonye maarna bhi gunaah hai? Chaahe joonye mui sir mein hudhdangein maarti phirein."


Walid saahab ne kaha-" Bade aadmiyon ki beghumon ke sir mein joonyein padhti hi nahin hain. Weh is kadr ki safaai rakhti hain ki joonyein paida hi nahin hoti. Tumko chaahiye ki roz nahaao, achche se achcha tel istemaal karo, balki main to is phikr mein hoon ki tumhaare liye koi dhang ki ustaadni mil jaaye to rakh loon, jo tumko kuch aadmi banaaye. Philhaal to yeh maaloom hota hai ki na jaane kahan se pakadh kar lai ho gayi ho. Na main tumko kisi se mila sakta hoon, na kisi ko apne ghar bula sakta hoon. Achcha dekho, main jaldi hi kisi aurat ka ghar intezaam karta hoon, jo tumhaare jaise jaanwar ko bhi aadmi bana sake.


Aur waakai walid saahab ne gambheerta se ek aisi aurat ki khoj shuroo kar di, jo walida sahiba ko har prakaar se nikhaar aur sanwaar sake.


from the beginning

       

   

Home...