"Nikaah" Upaniyaas ke lekhak Shaukat Thanvi ka haasyapooran aur vyangyaatmak saahitye mein apna vishishth sthaan hai! Prastut upanyaas ki kahaani batwaare ke baad ki hai jismein lekhak ne dukh aur aansoo.n mein bhi vyangye ka pehlu khoj nikaala. Ek hindustani naai Pakistan chala jaata hai. Wahan use ek hindu ka makaan aur bahoot-sa maal haath lag jaata hai. Ab weh wahan Nawaab Ajmat Ullah Khan ban kar apne bete Farhat Ullah aur beghum ke saath rehte hain. Weh baat baat mein swayam ko khaandaani siddh karte hain; Kyonki unhein is baat ka darr rehta hai ki kahin kisi ko unki asal jaati ka pata na chal jaaye aur nawaabi ka bhaanda beech chauraahe mein na phoot jaaye. Upar ki teep taap khoob banaaye rehte hain. Apni beghum ko padhaane va aadhunik banaane ke liye Miss Pal ko naukar rakhte hain. Phir bhi darr laga rehta hai ki unka raaz jab bhi khulega beghum ki zabaani hi khulega. Atah weh apni kothi ke aaspaas use pagal prasiddh kar dete hain. Unke padosi hain ek Khan Bahadur. Unki eklauti beti R.ana nawaab saahab ke bete Farhatullah ke sampark mein aa jaati hai. Weh sampark ishq mein badal jaata hai. Ant mein rishta tey ho jaata hai. Nawaab saahab ki ichcha hai ki dono ka nikaah chupchap ho jaaye. Baad mein bhed khul bhi gaya to koi fark nahin padhta. Beghum bete ki shaadi apni bhateeji Najjo se karna chaahti hai, jiska waada bahoot pehle hi apne bhai se kar chuki hai. Weh khat likhkar bhai-bhaawaj va Bhateeji ko bulwa leti hai. Khan Bahadur ki ladki R.ana ke rishte ko lekar saale behnoi mein jhagda badh jaata hai. Saale saahab Khan Bahadur ki kothi par jaakar saara raaz khol dete hain. Idhar Khan Bahadur swayam bhi kanmailiya the aur bhed khul jaane se darre rehte the ki kahin nawaab saahab ko unki asli jaati ka pata na lag jaaye. Magar dono ka raaz khul jaane se darr jaata rehta hai aur Farhatullah aur R.ana ka nikaah khushi khushi padha jaata hai.


Kushal upanyaaskaar Shaukat Thanvi ne "Nikaah" ke kathaanak ko badhi achchi tarah pesh kiya hai. Unhonein rochakta ko kahin bhi kam nahin hone diya hai. Khan Bahadur ke bhateeje Shibbu Miyan se to is upanyaas ki katha ko aur char chaand lag jaate hain. Is upanyaas ke ant tak Shaukat Thanvi ki shaili halki-phulki hai. Unhonein zindagi ki gehraayeeon mein jaakar bhi "Nikaah" ke kathaanak ko bojhil nahin hone diya hai.


"Nikaah" upanyaas mein muslim gharaane ka vataavaran hai, isliye anuvaad karte samay is baat ka khaas dhyaan rakha gaya hai ki bhaasha ka prayog bhi usi se sambandhit rahe aur hindi ke paathak use asaani se samajh bhi sakein. Asha hai ki pathak Shaukat Thanvi ke anye upanyaason ke samaan prastut upanyaas "Nikaah" ka bhi hridaye se swagaat karenge.