Dit was ok geliek ut eerste optreen zonder Erik Sluuter en met Marjan van Ni-jkaamp op de bas. Ie begriept det wi-j Marjan met beide bene in 'n teiltje heb möt'n zett'n um ut angstzweet op te vang'n. Mar a gauw blek det ut publiek a zo heavig op e-warmt was, en doarmet ut ganze Klavier, det ut zweet verdaamp'n nog vuurdet ut de porien uut was ekröp'n! Ut ging d'r wier heavig oolderwets van.

Opeens ontdek'n Beeldman n'n bekend drummertie van een joar of tiene in ut publiek. Ja, wi-j hebt d'r wat meute vuur möt'n doon, mar toen hef Holmer mar effen plaatse e-maakt voor den jong (van Steun'nbarg?). Ut was bedoeld um effen n'n drumsolootje te geem, mar toen hij vief minuut'n later wier van ut podium ofstap'n, blek det wi-j n'n kompleet ni-j nummer, inclusief tekst, had'n e-spelt. Hef iemand det nog op e-nöm'n?! As dank vuur ut drum'n hef Steun'nbarg um nog gauw n'n beker van de trofeeënplanke van 't Klavier uut e-reikt. De stemming die zat d'r dus good in en ut publiek wörn op een gegeem moment zovölle bi-j de band betrökk'n, det wi-j verscheidene nummers gewoon kats e-improviseerd d'r bi-j bedach hebt. Ja, zo kom ie wa an dre-j uur speln!

En wier heb wi-j een primeur. Mog Beeldman joaren e-leane ut (later duur Jovink oaver e-nömn) crowd varen as variant op ut crowd surfen a heb'n e-introduceert, ut podium duken hef ok wier een ni-je betekenis d'r bi-j. In plaatsen van van ut podium of ut volk in spring'n, klim ie op ut biljart, zet good of en pleert met een sierlijke duuk op ut podium... A-j wies bint, doo-j det dus mar één keer! Ut zal nit zo gek wean det wi-j de volgende keer mar n'n EHBO-deuze (Eerste Hulp Bi-j Onbenul'n) kloarzet, want d'r bint d'r verschein dale smakt. Leu, verget toch nit steurig oen helm!

A-j nog nit genog hebt van det gelul, d'r is nog meer: Oold ni-js.

Vuur bookingen, vroagen, opmarkingen of donaties (woer blieft die donaties?!!!) ku-j terechte bi-j Aart Bieleman duur 0548-361493 te druk'n op oe telefoo of duur n'n meeltje te stuurn noar gedreagtoe@hotmail.com