عايش في دنيا من التعب
عايش ودوبني العذاب
أيام ما بين برد ولهب
مقفول في وشي كل باب
واسأل ياناس ايه السبب
ماسمعشي رد ولو عتاب
دي الخطوة عندي بتتحسب
واعمل لها الفين حساب
والكلمة عندي بالطلب
واقولها إن عز الخطاب
يبقى ياناس ايه السبب
عايز ياناس منكم جواب
وسألت واحد بالأدب
كان رده أعجب م العجاب
من غير ماذوق او كدب
أيامنا دي زي السراب
والكل خاسر ماكسب
والكل عايش في الضباب
والكدب عمله بتنطلب
والصدق مدفون في التراب
والعري أغلى من الدهب
حتى اسأل اولاد الكلا...
وان قلت تبقى ح تنضرب
ويسمعوك أوطى السباب
وان خوفت تبقى حتتغلب
ويقطعك ميت الف ناب
د الفقر متعبي ف قرب
والمال في ايد كل الذئاب
والناس بتغلي من الغضب
لو يبدءوا يهدوا الهضاب
وتقوللي ميت من التعب !
عايش مابين برد ولهب !
واياك بتسأل عن سبب !
ياسيدي حالك
أحلى من حال البشر
وتعالى شوف
قوم يالا دقق بالنظر
ح تشوف هنا
وتسمع هناك اسوأ خبر
ح تشوف بلاد
دلوقتي عاد مالهاش أثر
وتشوف غيطان
الزرع فيها بينطمر
وتشوف جبل
لانت صلابته وانصهر
وتشوف وطن
عايش ولاده في الخطر
وتشوف ولاد
شايلين سلاحهم م الحجر
وتشوف عيون
تبكي بدموع زي المطر
بصيت لكل الناس لاقيت
هموم كتير مالهاش عدد
منهم المدفون في بيت
واللي ضاع منه الولد
واللي ماشي يقول ياريت
كنت أنا وتحيا البلد
كنت أنا وتحيا البلد
كنت أنا وتحيا البلد
حسني جاد