畢文集----劇本

 <<這個夜晚很無聊>>

紅十字會成人義工隊AGV90

1999年與弱智人士探訪老人中心話劇

人物：李好蝦 (父)、蝦仔(子)、李氏亞嫲、大白沙(鄰居)、

            甲、乙、丙(好蝦朋友)、丁、戊、己(大耳窿)、警察數人

時間：晚上八時

△李好蝦、甲、乙、丙四人圍住張枱鋤大Dee

蝦仔(面向台下觀眾)：由朝到晚做功課，包你唔記得肚餓

△蝦仔蹲在地上，用摺凳盛著習作做功課

甲：啤Dee，三仔，畀錢畀錢！

△乙、丙、李好蝦無奈地掏錢。

△乙看看錶

乙：嘩！成八點幾拿！要返屋企食飯啦，唔鋤啦！

甲：我都唔鋤啦! ( △數住一大疊銀紙) 鋤左成日好攰呀！

李好蝦：鋤多陣啦！

丙：算啦，今日咁黑，鋤落去都係佢一個嬴，你個仔都要食飯啦！

△甲、乙、丙三人離去，李好蝦伸懶腰。

李好蝦：攰死人啦！蝦仔，幫老豆攞支益力多黎丫！

△蝦仔在凳底拿出唯一的益力多，遞給李好蝦，蝦仔盯著李好蝦手中

    的益力多，吞一口咽，極想喝狀

李好蝦：(唱)鋤得多，傷氣力，消耗一定要補充，病君咁樣點搵食

△李好蝦欲舉起一飲而盡，發現兒子貪婪的目光

李好蝦：你今日飲左未呀？

蝦仔：未呀

李好蝦：我鋤左成日dee，你都未做完功課，冇無飲！(△一飲而盡)

蝦仔：我有d功課唔識做呀！

李好蝦：唔識就過隔離問戴師奶個女嘛，順便食埋飯先返來！

                (△拿錢包欲走)老豆過澳門，星期一先返1，你睇住門口，

            有事就搵戴師奶，或者搵嫲嫲，知嘛？

蝦仔：又搵戴師奶！其實我係咪佢生架？

李好蝦：鬼叫佢同我咁有緣，做我鄰居咩！遠親不如近鄰嘛！佢應份架！

△李好蝦揮袖離去

司儀：停！(眾角色陷於停頓狀態)各位，呢個老豆做錯咩呀？

          (△司儀走近李好蝦) 不應獨留兒童在家！留個細路係屋企好危險架！

         好似我咁，有次出街唔記得帶埋隻龜，返到屋企先發現佢廁所時唔

        小心將自己沖落馬桶。唉！仲有，你個仔黎架，點可以要人幫你養架！

        咁爛賭，有無為你個仔諗下架？

李好蝦：我知錯啦！

司儀：咁就畀次機會你啦，時光倒流！

△甲乙丙退回門前：我地走啦！bye bye!

△行雷閃電聲

李好蝦：蝦仔，老豆冇用，又輸左錢，老豆以後唔賭錢啦。

蝦仔：真既？咁你以後咪有時間教我做功課羅？

△大白沙按門鈴，推門而進

大：嘩，你地唔閂門既？好危險架！

蝦仔：大白沙姐姐，呢個時間，你屋企應該食緊飯喎，點解過黎既？

大：冇，我見你咁夜都唔過黎問我功課，唔係幾放心，咪過來睇下羅。

李好蝦：啱啦，唔識做功課應該問大白沙姐姐，老豆而家落街買飯盒你食，

               大白沙，你幫忙教佢做功課，順便同我睇住佢丫！

大：下，乜今晚蝦仔唔過來食飯咩？我地煮左佢八碗飯o番，過來食啦，

       食飯盒無益架！

司儀：停！大白沙姐姐做錯乜野呀？

          今次大白沙冇做錯，而且仲做得好啱，我地要當眾表揚一下，

          出黎， (△大白沙出)你關心鄰居的健康，仲主動幫佢解決問題，

          實在係大家的好榜樣。而家我地送份禮物畀你，人黎！

           (△一人遞上雞毛掃)而家請大白沙繞場一周(△播港姐當選音樂)，

          講下得獎感受丫。

△大白沙拿著雞毛掃，正想繞場一周

李好蝦：喂，唔夠時間呀，下次先啦！

司儀：好啦，繼續下集。

△李好蝦拿錢包離場

大：好啦，你有咩功課唔識做呀？

△電話響，不見電話蹤影

蝦仔：等陣，我聽電話先

大：唔好呀，唔好聽陌生人的電話呀！

蝦仔：係喎！

△電話停響，門鈴響

大：等我黎！(△走近門前，探身問道)邊個？

嫲：蝦仔阿嫲呀！

大：有乜証據呀？蝦仔幾時出世？你老豆叫咩名？

嫲：你都唔知答案啦！你開門睇下我個樣咪知羅！

蝦仔：係阿嫲把聲呀！開門啦。

△大門開，嫲急步上前，呈焦急狀。

嫲：蝦仔，你冇事丫嘛？擔心死阿嫲咯。(△久別重逢般上前，蝦仔亦衝上鬥，

      正相擁而泣)

嫲：喀──吐！(△吐痰狀，擁抱停止)

蝦仔：阿嫲，你咁夜既？

嫲：必(放屁聲)，無，阿嫲路經此地，有D急，想借個廁所黎用啫，

      唔同你講啦，好急阿！(△衝入廁所)

△李好蝦入門，提著膠袋回來，袋中三個飯盒清晰可見。

李好蝦：有飯食啦！大白沙，你都留低食飯啦！

△阿嫲立即從廁所出來

嫲：有飯食拿？

李好蝦：媽，點解你係度既？

嫲：無，借廁所羅。有冇多盒飯呀？

李好蝦：你坐兩個鐘頭車來借廁所？

蝦仔：嫲嫲，你連手都唔洗就出黎？咁點得架，你上次來，

            又將呻完鼻涕既廁紙塞落我個書包度！攪到我執書時成手都係你D鼻涕！

司儀：停！呢個阿嫲真係罪大惡極，點解呢？

          係喇，須知道咁唔衛生，吐痰唔用紙巾，好容易傳染病菌，

          累己累人，形同殺人！去完廁所又唔沖廁，無手尾！

嫲：你點知架?

司儀：在座各位都知啦，根本聽唔到沖廁聲！要身體健康，除左做運動，

           仲要注意飲食均衡同衛生架！

嫲：知道啦，我即刻洗手食飯，飯凍左無益架。

△嫲轉身入廁所洗手。錄音帶播開水喉聲)

李好蝦(△突然緊急狀)：我肚痛，去廁所排長龍。媽，快D啦，好急呀！

嫲：等陣啦，搞衛生，要認真嘛。(△慢條斯理梳頭)

蝦仔(△手拿一盒上前)：老豆，不如食排毒美顏寶啦！

李好蝦：蝦仔，便秘先食架！

△嫲出，爸即進，關門

嫲：好啦，食飯啦！

蝦仔：唔等老豆拿？

嫲：睇你老豆個樣，好似長江缺堤，一瀉千里，有排都唔出來啦，

       況且得三個飯盒，先下口為強！

大：你地食啦，我返屋企啦。

嫲：咁唔阻你啦。

蝦仔：係呀，你食完飯，掃完地，洗完碗，再來教我做功課啦！

大：好丫！

嫲：咁麻煩人，不如咁啦，你攞埋蝦仔D功課去啦，洗碗握地時悶悶地，

       咪做下蝦仔D功課囉，做完再過來，咪唔會阻礙蝦仔的學業啦！

司儀：停！真係教極都唔聽，自己的事自己做丫嘛，點可以搵人代做功課呢？

           大白沙又有一點值得大家學習，係咩呀？

         係啦，我地應該幫下手做家務嫁！

大：我先走啦，蝦仔，你唔識做就過來啦。

△大白沙開門，剛好三個大惡人正欲按門鈴，於是衝進蝦家。

丁：李好蝦係唔係度？

蝦仔：你地咩人黎架？搵我老豆做咩呀？

戊：細路，我地黎追債，你老豆欠我地錢！

己：你老豆呢？

蝦仔：佢，佢去左啦！

丁：去左？

戊：畀人先我地一步？(△望一望嫲)你係邊個？

嫲：好話喇，我係李好蝦的娘親，即係李好蝦媽！

戊：咁啱喇，子債母還！

嫲：啱喇，母還，無得還！

丁：豈有此理！(△發現大白沙)無得還，就賣左你個孫女！大佬，

       將佢帶走即！

大：喂，我唔係佢個孫喎，我趕住去紅十字會捐血，你地自便啦。

△大白沙奪門而出，回家報警

己：豈有此理，既然你地無錢還，一於教訓下你地出氣！同我打！

△三人正欲打兩嫲孫

司儀：咪住，呢幾個人做錯咩呢？

           無錯，對老人家，我地應該尊重，對小朋友，我地應該愛護，

           點可以圍住打架，打邊爐咩？無錢還都有其它方法架嘛！

丁、戊、己：係，我地知錯啦！

△己發現枱面有三個飯盒

己：既然你地無錢還，咁我地就食你地D飯盒補數啦！(△三人一人拿一盒)

      李好蝦一日唔還錢，我地就派三個人來食飯，兩日唔還派三十個，

      三日唔還派三百個，直到條數扣晒為止！

警察：好算法！好算法！識得計3 X 10 = 30, 30 X 10 = 300，

         你地三個已經畀我地三十個警察包圍啦，快D放低手上的飯盒，

         跟我地返差館！

司儀：故事至此已完，大白沙又做左一次好事，係咩呀?

         無錯，見到罪案發生，應該盡快離開現場，去到安全的地方報警。