畢文集----劇本

 <<對抗性滋擾>>

場數：1

時間：夜

景：公屋升降機前及走廊

人：麟、乙 (兩人為十一、二歲男孩)

  △ 兩人正在走廊踢波

  麟：喂，不如鬥射對方個屁股丫？你轉身丫。

  乙：吓？

  麟：轉啦，快D啦。

      △ 乙轉身

 麟(瞄著乙的屁股射)：去衝力射球。

       △麟射不中，乙轉身想交換位置。

 麟：咪郁住呀，我射中左先到你呀。

場數：2

時間：夜

景：公屋單位內

人：盈、儀 (兩姐妹)

      △門正關著，門外傳來很吵的踢波聲

      △儀在看電視，間或不耐煩地向門口張看。

       △突然砰一聲，發現球撞到自己家門上

        △盈放下手上書本，拉開鐵閘，走出去。

場數：3

時間：夜

景：走廊

人：盈、麟、乙、麟哥、施奶

      △施奶靠著鄰居的鐵閘，與鄰人閒談

      △盈怒氣沖沖走近，盯著四人，麟繼續玩，乙有點怕。

盈：你地知唔知成日畀人噪音滋擾，好易痴線架，痴線佬殺人唔使坐監架。

      △乙轉身走

麟：唔好理佢即，佢嚇人之嘛。

盈：你地要嘈，返屋企嘈你阿爸阿媽，又唔係我生你，仲乜要受你地氣。

施奶：係啦，你地唔好嘈住人啦，返去讀書做功課啦。

      △拉開鐵閘聲，麟兄走近。

麟兄：返來啦，作死咩，係都要畀人鬧，人地好巴弊架，唔嘈得架。

      △麟反抗，但被麟兄用力拉回去。

麟(瞄著乙的屁股射)：去衝力射球。

場數：4

時間：日

景：餐廳內

人：強、盈、美 (三人乃同學)

      △美與盈同桌。

      美：好心你啦，細路你都唔放過，由得佢地玩啦！

盈：晚晚咁嘈兩三個鐘，點忍呀？就係要趁佢地細個，

       先要教佢地唔好騷擾人； 係大人我就報警，係黑社會我就搬啦。

美：畀我就花時間諗下份功課——

       △強從遠處出現，視線落在美身上，美身穿緊身衣服，

          迎面而來，與兩人打招呼。

強：美，你身裁好左喎，係咪生乳癌呀？

     △美白了強一眼。

      美：死性不改，你以為你仲係死飛仔咩？

      △美遠去

盈：好心你啦，成日口花花，份功課做左未呀？

強：功課都使自己做的？借人地份黎抄咪得囉。

場數：5

時間：夜

景：大堂、升降機門前

人：盈、丙(十來歲男孩)

      △盈在升降機前等，一男孩手拍著籃球漸近，LIFT至，兩人進去。

場數：6

時間：夜

景：升降機內

人：盈、丙(十來歲男孩)

      △升降機內很髒，貼著一張紙，紙上寫著

你今日踩左未呀？

            小便怪俠

       △盈甚不滿，閉眼，口中默念：1, 2 , 3

盈(歇斯底里大叫)：啊！

      △丙抖顫，停止拍球

盈(快速大嚷)：如果你打波打到部LIFT停左，咁啱又火燭，

                          消防員又未到，焗死左我，係咪你賠番條命畀我？

△升降機停，開門，丙驚惶而逃

場數：7

時間：夜

景：走廊

人：盈、麟、阿B、施奶、麟兄

      △盈出升降機，麟和阿B在玩耍，盈不滿地盯著。

      △施奶手持飯碗，站在麟家門前與麟兄閒談。

施奶：唔係，外甥黎架，十二歲啦。佢爸爸媽媽去旅行，

           咪黎住日囉。(轉身向阿B)阿B，快D返去食飯啦，等你咋。

      △施奶繼續與麟兄閒談，阿B繼續玩。

      △盈開門，進內。

      △走廊上，麟與阿B玩無可玩，搖著鐵閘，扮鬼叫，狀甚興奮。

      △施奶仍與鄰居閒談。

      △盈(換了便服)拉開鐵閘，走近兩小孩

盈(陰森地說)：近鬼節，扮鬼叫，想引D鬼出黎呀？

      △盈轉身回家，兩人停止搖鐵閘，施奶憤怒轉身

施奶：細路仔玩下，關係咩事呀？

盈：晚晚咁嘈，人地唔使溫書咩？

施奶：公屋係咁架拉，有本事你就住私人樓！

盈：咁公屋販毒賣淫都得架啦！

施奶：係呀，公屋係咁架啦。層層都有細路玩架啦。

盈：咁層層都有強姦案發生，係咪你被人強姦係應該既，唔使理丫？

施奶：係呀，我係應該被人強姦架。

盈：咁就祝你早日被人強姦啦。

      △麟兄拉鐵閘出，怒氣沖沖。

麟兄：你讀壞書架你，D細路仔玩關你咩事呀，係度嘈喧巴閉。

盈：我讀壞書都好過你D孫唔讀書，你而家唔教，第時佢地打家劫舍呀。

麟兄：佢地做賊都唔關你事啦

盈：佢打劫打正我就關我事!惹埋D大耳窿殃及池魚就關我事。

施奶：唔知醜，你咩身世呀，打劫都唔會打劫你啦。

麟兄：你有本事咪報警囉，講咩即。

施奶：係呀，有本事就報警！

       △盈回家，關門。

場數：8

時間：夜

景：盈家內

人：盈、儀

      △儀扮專心看電視

      △盈憤而拿起電話，看看儀，放下電話。

場數：9A

時間：日

景：大學校園內

人：盈、強

      △盈、強並肩而下行

盈：你話丫，話自己畀人強姦係應該喎，仲點同佢講數丫？

強：鬧交係唔講道理既。

盈：唔係啦，今晚真係要報警，橫掂都面左左，唔爭在啦。

強：邊有用架，呢個世界鬥人多，靠嚇之嘛。

盈：我D屋企人都唔幫我手，淨係個勢都輸畀人啦。

強：咁啦，而家D靚仔好平既，一個人50蚊，已經包埋車費同道具費喇，一於請番十個八個。

△強幻想狀

場數：10A(幻想)

時間：夜

景：走廊

人：盈、麟兄、施奶、幾個飛仔

      △盈叉腰在前，作飛女狀。背後幾個飛仔手持武器作後盾。

      △施奶躲在麟兄後，麟兄手臂上的紋身公仔開始溶化。

盈：阿施奶，係咪恨被人強姦啊，出來啦？

      △飛仔退後，互相推讓狀。

施奶(低聲向麟兄)：好漢不吃眼前虧，你留低掩護我，我返去打電話報警。

      △施奶轉身離去。

場數：9B

時間：日

景：大學校園內

人：盈、強

盈(搖頭)：唔得，咁咪即係恐嚇。

強：呢個世界係咁架啦，以暴易暴先有效架！

盈：被警察捉到，咪人贓並獲囉！

強:咁不如…

場數：10B(幻想)

時間：夜

景：走廊

人：盈、麟兄、施奶、幾個飛仔、一個便衣探員

      △盈及身後的飛仔，飛仔手持武器，但武器皆在背，看不見實際手持物。

      △兩伙人對峙，互不相讓。

      △升降機門開聲，一警員手持証件走近

警：警察，你地做乜，我地收到投訴，話有人恐嚇。

      △飛仔紛紛拿出手持的不求人，在抓背

盈：阿SIR，在走廊集體抓背脊都犯法？

警：抓背脊返屋企抓嘛！

盈：大熱天時，入面咁熱。人地成班細路係走廊玩，嘈住晒都係咁啦。

警：我唔理，總唔之請你地所有人返屋企，唔好係走廊聚集，好易惹人誤會。

△各人散去

場數：9C

時間：日

景：大學校園內

人：盈、強

盈：都係唔得，有冇D唔冒險的方法啊？

強：不如你冒佢地個名，日日打電話去PIZZA HUT叫外賣，等佢地找數喇。

盈：可以諗下喎。

場數：11

時間：日

景：大廈外，大堂

人：盈、強、變態佬

      △盈與強並肩行，漸漸地在一路口上，停下來。

      △一男子在其身後，慢慢步入鏡頭。

強：係呀，尋晚我楝樓都有細路女被人係LIFT裡面非禮呀，你小心D呀。

盈：得啦，走啦。

     △兩人分道揚鑣，變態佬跟在盈身後。

變(怪裡怪氣，有點幽默效果)：小心D呀，因住被人咸濕呀!

     △盈加快步伐，變態佬緊隨。

變：小心D呀，好多風化案呀。

盈：為老不尊，教壞子孫呀！不過睇你咁衰，都應該絕子絕孫！

      △盈快速走進大廈內，變態佬緊隨。盈等LIFT，男子步至升降機前。

變(邊進LIFT邊說)：仲以為大家同一部LIFT，可以送你上樓添。

     △升降機始關門

盈：送你上西天啦。

場數：12

時間：晚

景：走廊(升降機外)

人：盈、麟、乙、阿B、施奶、麟兄等共四人

      △麟、乙、阿B在升降機外玩得興高采烈。

      △盈走出，向家走近

      △施奶拿著麻將，拍對面門，麟兄拿著麻將檯出。四人在升降機外開局

      △盈開門，馬上關門。

場數：13

時間：晚

景：盈家內

人：盈、儀

      △門緊閉，但清楚聽到外面麻將聲，並夾雜單打盈的說話。

      △儀專注看電視。

儀：家姐，今日D細路攞麥當奴D茄汁淋我地度鐵閘呀，我抹左咋。

盈：有無搞錯啊，咁即係恐嚇遮，下次唔好抹，留底罪証。

      △盈拿起電話。

電話另一方：警署

盈：唔該，我係愛民村愛鄰居樓十七樓住客，外面走廊好嘈，有人搞事，麻煩你派人上來睇睇丫。我唔介意上差館，出庭做証人架。

場數：14

時間：晚

景：升降機外

人：麟兄、施奶共四人，盈、警察、圍觀者若干

      △警察踏出升降機門

警：我地接到投訴，呢度係公眾地方，唔可以打麻將噃。

      △麟兄、施奶甫見警察，馬上收拾麻將，兩鄰居直接回家。施奶、麟兄快束回家，關門。

     △盈走出。

盈：警察先生，唔該，我有D法律問題想請教你。

警：好，你想問咩？

盈：D人咁樣打麻將算唔算犯法？

警：緊係犯法啦，下次有同樣情況，我地上黎証實左，然後會發告票，要佢地出庭，然後罰款。

      △施奶隱約開了的門縫馬上關上

      △開始聚集圍觀者

盈：咁會唔會留案底？

警：緊係要啦。

盈：咁D細路晚晚嘈兩三個鐘，D大人縱容，仲由D細路用茄汁恐嚇我，又點啊？

警：縱容即係教唆，D細路仔唔識性架嘛。大人要出庭之餘，D細路都要上兒童法庭。

      △圍觀者點頭。

警：下次有D咁既的情況，你即刻報警，我地非常樂意為你服務。仲有乜唔明？

盈：咁今次使唔使跟你返警局備案？

△施奶探頭，神色驚慌

警：備案，無備案架，一係就直接發告票。不過我地有紀錄，你放心。

      △警察進升降機，各人散去，細路又開始玩。

施奶：阿B，快D返黎訓！

阿B：咁早？

施奶：夜啦，唔好嘈住人啦。

各人紛紛關上大門，只餘空寂的走廊

場數：15

時間：晚

景：公屋樓梯內

人：施奶、變態佬、盈

      △施奶在行樓梯，變態佬忽然出現其背後，勒著她拖至梯間

      △變態佬欲非禮施奶

      △阿盈出現，喝止

     △變態佬馬上逃走

     △盈上前看坐在樓門的施奶

盈：你無事嘛？

施奶(受驚)：無事！好彩你經過咋！以前我咁待你，真係對唔住啦。

場數：16

時間：晚

景：屋村一隱蔽處

人：變態佬

變：八婆，睇住黎，下次就係你…

△變態佬變態地狂笑