 |
 |
 |
 |
 |
 |
 |
 |
 |
畢文集----劇本 <<相親記>> |
||||||
|
場數：1 時間：日 地：餐廳 人：儀、玲、Fanny △儀、玲、Fanny在快餐店內，遠看知儀正喋喋不休地訴苦，
狀甚不滿，鏡頭漸近。 △玲與Fanny不耐煩狀 儀：…點知阿嬸一見到就發晒脾氣：咁麻煩架，明知佢地細個就睇實d啦， 下次你自己抹番呀。(△Fanny 向玲打眼色) 你話丫，請佢番黎淨係傾偈，
唔使做咩？ 玲(向儀)：咪郁(△撥亂儀頭髮)咩黎架？你快D去梳番個頭啦。 儀：吓呀？(△儀拿出梳，離座) Fanny：唔掂喎，佢一日講成廿次。 玲：鬼咩，佢係學校又無人呻，朋友又唔多。佢係屋企都係咁呀，
連阿媽都嫌佢煩，寧願出街。 Fanny：你快D幫佢搵番個男朋友啦，咁咪唔使煩我地囉。 玲：你識佢咁耐都知啦，咁多年連蚊滋都無隻。你諗吓，佢仲煩過阿媽，
邊有男仔想娶個阿媽返屋企，仲要同佢洞房？ Fanny：唔趁佢年輕幫佢搵，我驚跟住的五十年都被佢煩喎。唔係啦，
一於漁翁撒網，點都有個中掛？ △儀回座，兩人打眼色 場數：2 時間：日 景：校園內 人：儀、玲、Fanny、彪強 △彪強在前，三女在後傾談 Fanny：彪強好勁架，佢功課好好架，主修BBA之外，仲副修人類學同翻譯，
又係我地的系代表添。 彪強(沾沾自喜地)：咪以為係我背後講我，我就聽唔到噃。從前有個人好
鍾意係人背後講人，後來有一日，佢就死左啦！ 儀：佢點解死既？ 彪強：咁人就緊係會死架啦。 儀(有點仰慕狀)：你副修人類學架？人類學係咩黎架？ 彪強：咪研究下人的行為囉。(△詭異地轉頭看看Fanny，再望儀)例如你地
逃避我的眼神，行得咁開，從人類學角度黎講，其實即係勾引緊我囉。 △儀笑，有點會意似地行前，與彪強並排而行 △Fanny與玲相顧而笑，以為成功。 儀：你讀咁多科咪好忙囉？ 彪強：唔忙，仲得閒寫揮春！ 儀：揮春？ 彪強：我地宿舍個雪櫃公用架，好多人偷野食，我咪 (插鏡：低角度看見有人腳，開雪櫃，拿走什麼，關雪櫃，
鏡頭可見雪櫃上貼著一張揮春，寫著
「偷人腸仔，生仔無腸仔」) 儀：乜d大學生都咁衰架，咪同我學校d阿嬸差唔多… △四人漸漸走入劇院 場數：3 時間：日 景：車站 人：儀、玲、fanny、彪強 △四人在車站前分別 儀(含羞地望著彪強)：下次有呢d
show睇，記得叫埋我喎。 △特寫彪強滴汗，微笑點頭 彪強：一定，一定，我地個車站係個邊，我地走啦。 △四人道別，彪強與Fanny遠去。 場數：4 時間：日 景：車站 人：Fanny、彪強 △兩人在車站等車 Fanny：點呀，彪強，你覺得阿儀點呀？係咪好純品呢？ 彪強：唔掂喎！佢又煩又姣，個look成個夏蕙姨版小甜甜，
你上次個friend都無咁—— Fanny：好心你啦，成日嫌呢個，嫌o個個… 彪強(深情地望著Fanny)：我無嫌過你呀！ 場數：5 時間：日 景：餐廳 人：儀、玲、Fanny、何文軒 △儀、玲、Fanny在餐廳內 儀：彪強係咪唔知醒呀？不如我幫你call佢丫，(△拿出手機)佢幾號電話呀？ Fanny：我約的唔係彪強呀！佢呢排好忙，你知啦，佢讀咁多科—— △Fanny招手 △何文軒至，樣子頗英俊，瞪大眼看儀的誇張打扮 △儀眼前一亮 △何文軒無選擇地坐在儀旁 Fanny(介紹)：阿儀，阿儀家姐阿玲，文軒，佢讀中文系架。 △儀熱情地替文軒斟茶，文軒推卻，儀堅持，不慎斟瀉。
儀拿起餐巾替文軒抹手。 △插鏡：《甜蜜蜜》中黎明替張曼玉抹手 △儀沉醉於幻想，緊捉文軒之手 △文軒拼命抽回，向Fanny打眼色 文軒：我去一去廁所 △文軒離座 Fanny(△拿起紙巾)：我攞包紙巾畀佢。 △Fanny離席 場數：6 時間：日 景：餐廳廁所外 人：Fanny、何文軒 文軒：唔係呀？你又話咩純情李麗珍！我話直情係喉急白韻琴呀！
一黎到就毛手毛腳。 Fanny：佢率真遮。佢未拍過拖架，保正係玉潔冰清！佢識做家頭細務，
又識湊細路，好有內在美架！ 文軒：係遮，都唔使饑渴成咁呀？女仔點都應該有d矜持架！
仲帶埋個家姐黎，不如帶埋個阿媽黎？ Fanny：你體諒吓啦。佢二家姐十七歲畀人搞大左個肚結婚， 個細妹十八歲又有左結婚，而家已經有兩個仔啦； 佢細佬中二就女仔返屋企閂理房門，上年先搞大人地個肚又
結埋婚。所以咪心急d囉。壓力大嘛。 文軒：遺傳病黎架？你唔係想叫我搞大佢個肚同佢結婚嘛？
我唔贊成婚前性行為噃。 場數：7 時間：日 景：餐廳 人：儀、玲、Fanny、何文軒、解少文 △Fanny入座 儀：文軒呢？佢咁耐既？ Fanny：可能佢痾濕條褲呢！ 玲：佢咁
“四正”，無女朋友咩？咁得閒出黎同我地飲茶既？ Fanny：佢好傳統架，成日嫌d女仔暴露、隨便，叫我介紹d好女仔佢識喎。 儀：你地咁多事架。 △文軒入座 △各人你眼望我眼 △儀想開口，不知從何說起 △Fanny打眼色，文軒不肯發 △玲向Fanny打眼色 Fanny：考吓你地丫，有隻草蜢，平時最多一次跳一米，
但有一次，一切如常，佢一跳就跳到兩米，點解？ 儀：因為有風！ Fanny：都話一切如常咯。外在環境一d都無唔同，畀d貼士你地嘞，
同佢的生理變化有關的。 文軒：(△打手勢解釋)因為佢放屁！ Fanny：你聽過架？無可能識既！ 儀(△仰慕地)：你真係叻啦，一估就中！ △文軒發毛，遠見解少文至，如獲救兵。 △解少文行近 少文：文少，咁突然呀？ 文軒：少文，咁捧場呀？(△轉向各人介紹，拉少文坐在阿儀旁)呢個解少文， 我中學到而家的死黨，佢好叻架，乜野紫微斗數，掌相測字佢都識架。
(△Fanny目露凶光，得悉文軒奸計)
你搵佢幫你睇掌丫！ 少文：唔好聽佢講呀，我玩吓架咋。(△眼光四射，猜誰是目標人物) 文軒(介紹)：Fanny，BBA的。Fanny個朋友阿儀，阿儀家姐。 玲：叫我阿玲得啦。 文軒：阿儀教幼稚園架，佢好有愛心，好乖女架。 △解少文上下打量阿儀，知道目標是誰。 少文：你教幼稚園咪好好玩囉！同d細路唱吓歌、食吓茶點、訓吓覺又一日。 儀(興致勃勃)：如果淨係咁就好啦，d家長好煩架，成日—— Fanny(轉移話題)：係喎，你上次咪話D家長畀埋D細路睇D唔應該睇的野？ 儀：係呀，上次午睡果陣，張被郁黎郁去，我一掀開，見到個男仔除 左個女子條庫，兩人摸黎摸去，我叫佢地唔好，佢地問： 「點解呀？爸爸媽媽都係咁玩啦，好好玩架。」你話丫，
D家長咁都得…. △儀滔滔不絕 少文：唔使咁激氣喎，上次我去吧，坐左成晚，先釣到個靚女肯， 點知佢無地方，唯有跟我返宿舍啦。點知知做吓打蛇，
畀個舍監吊銷戶籍呀！ 儀：你…你玩一夜情架？ 文軒：係噃，上次係我房三人大戰，你留左件衫係我度，幾時攞返呀？ 少文：不如就而家啦！ 文軒：好呀。我地走先啦。 △兩人離去 △玲、Fanny對望：又失敗了 場數：8 時間：日 景：餐廳外 人：何文軒、解少文 △快鏡：兩人跑了很長一段路 文軒：高招喎，咁都諗到！ 少文：你都唔弱丫，識得順水推舟。不過下次有呢d兇宅樓盤唔好預我啦。 文軒：我都係中人計… 場數：9 時間：日 景：餐廳 人：儀、玲、Fanny、張偉杰 △玲與FANNY並排而坐，儀上了廁所，只見其手袋於座上。 Fanny：今次不容有失啦。 玲：佢越黎越自卑啦。今次好辛苦先拉到佢黎，希望張sir鍾意佢啦。 △儀與張偉杰先後而至。儀見張外表平凡，不大熱心。 玲(介紹)：我細妹阿儀、FANNY 張：Fanny？你知唔知Fanny即係屁股咁解呀？ Fanny：(半信半疑)係咪架？ 玲：你信張sir啦，佢d英文好掂架。 △儀上下再打量張 張：聽講你教幼稚園噃？你就好啦，我日日都畀校工玩，話要我出示 學生証先可以入去；隔離班d學生又成日過黎話睇中我班的女生，
問我點睇。 儀：我咪又成日畀校長、家長同阿嬸玩… △張細心聆聽 △鏡頭向著時鐘，時間過了個半小時 張：唔好咁炆啦，我講個笑話你聽丫。有個男人半夜返屋企， 推醒老婆話：「老婆，屋企有鬼呀！我頭先一開廁所門， 廁所即刻自動開燈呀！」個老婆話：「死佬，又飲醉酒係雪櫃痾尿，
第三次啦！」 △儀笑，欣賞地望著張 張：同你地出來真係開心啦，不如遲d一齊打波丫？ 儀：好呀！ 張：你幾號電話呀？ △儀拿紙筆，彼此交換電話 張( 向Fanny)：你呢？你都寫埋丫，下次一齊玩丫。(將紙推向Fanny)
我都想讀番個MBA，唔想教死一世書，不如你幫我係你學校攞資料丫？ Fanny：好呀。 張：咁我得閒打電話畀你丫。 場數：10 時間：日 景：餐廳 人：玲、Fanny、榮 △玲與Fanny同坐。 Fanny：今次我好有信心，我同以前暑期工間餐廳的大佬食飯，講起阿儀， 佢好鍾意。我話阿儀好煩，佢話佢日日對住個廚房，不知幾想有人 同佢講野。不過外表上阿儀可能會介意，所以今次要用隔離政策，
先培養佢地的感情，晚晚電話攻勢，等阿儀上左癮，再見面。 玲：佢好肥好醜架？ Fanny：唔係，不過佢做左成廿年廚房，油煙多，個樣比較成熟遮。 不過佢實際上得四十歲咋。同阿儀差十五年都可以接受丫，
都唔做得佢老豆。 玲：我驚阿儀介意喎，你知啦，佢成日幻想自己未來老公係黎明。 Fanny：靚仔邊可靠丫，你個妹錢都唔多儲，搵個有經濟基礎先得架。 △榮至，與Fanny、玲點頭，仍不坐。 △Fanny：呢個係阿儀家姐阿玲。
榮(誠懇地)：家姐。 玲：你…你叫我阿玲得啦。 榮(傻笑)：都一樣遮。 玲：聽講你做廚師噃？ 榮：唔止，間餐廳係我開架。我聽Fanny講，你個妹教幼稚園，
未拍過拖，簡直同我夢中老婆一模一樣，請你介紹我識啦。(△九十度躹躬) 玲：你坐低先啦。(△榮坐下)我驚你地溝通唔到噃，你咁成熟，我個妹咁幼稚。 榮：其實我都好幼稚架。咁丫，你而家即刻打電話畀佢，畀我同佢傾吓，
我會自己問佢攞電話，以後約佢、拍拖、結婚，我都會自己攪掂架。 Fanny：但係… 榮：我會等時機成熟先約佢出黎架。 △玲遲疑地拿起電話，說了幾句，交給榮。 榮：阿儀呀？你好呀，我係亞榮。咁既，我兒甥想讀幼稚園，想問吓你邊 間好遮…我都唔知佢想點喎，你介唔介意畀個電話號碼我， 我問左佢再搵你丫…(△拿筆抄下)…你真係有愛心啦，
d細路好難教架…嗯…嗯… △Fanny向玲打眼色，狀甚滿意 榮：唔該晒你喎，而家好少女仔咁肯幫人架。嗯…係啦… 場數：11 時間：日 景：幼稚園外 人：儀、MAY △儀與MAY返工途上 儀(含羞答答而自豪地)：佢開餐廳架，又係大廳，佢話有機會親自煮餐我食喎。 MAY(唔抵得)：咁溫馨啊！ 儀：佢尋晚仲唱左首歌畀我聽。唱完要我唱，我唔唱佢唔肯收線添，
攪到成三點先有得訓。 MAY：咁你有無唱丫？ 儀：咪唱左首飄零燕囉。 MAY：你地咁好傾，幾時約出來即？ 儀：佢話自己醜樣，驚嚇親我喎。 MAY：咁你想唔想見佢丫？ 儀：有D好奇啦，你知啦，我未試過同人咁好傾架。 MAY：不如去佢間餐廳睇吓咯！ △兩人入學校 場數：12 時間：日 景：幼稚園外 人：儀、MAY、榮 △榮在幼稚園外徘徊，衣著斯文，手抱Hello
Kitty公仔，非常緊張，抹汗。 榮(V.O)：死啦，呢兩晚打電話畀佢，佢敷衍兩句就收線，你幫我打聽吓丫。 Fanny(v.o)：你咁大意架，畀佢知道你間餐廳係邊。佢去過𥄫你呀。 佢個同事仲係隔離話：「如果係我，寧願一世唔嫁咯！」
你搞到佢無地自容呀！ △儀與MAY出 △榮緊張上前，奉上公仔 △MAY恥笑 △儀羞憤地快步遠走 場數：13 時間：日 景：儀房內 人：儀 △唱機播著陳百強的歌：等，寂寞到夜深…莫道你在選擇人，
人亦同選擇你… △儀非常傷心，回想：彪強滴汗，文軒掙脫其手 Fanny(VO)：你唔好以貌取人啦，除左佢個樣老D殘D，有咩你唔滿意丫？ 玲(VO)：呢個世界係有黎明，但係人地有舒淇、李嘉欣，點會揀你丫？ MAY(VO)：死啦，最近有個中學同學搵番我，話暗戀左我好多年， 好鬼煩。我又唔夠膽話畀男朋友聽，佢好容易呷醋架嘛。
你就好啦，乜都無，唔使煩。 張(VO)：其實Fanny有無男朋友架？你同佢咁好朋友，
知唔知佢鍾意咩類型的男仔呀 儀(VO)：Fanny呀，我真係唔介意以後一個人架，你以後唔好咁多事，
再介紹男仔我識啦。 場數：14 時間：日 景：餐廳 人：FANNY、榮 榮：佢真係好有氣質，我真係好鍾意佢，求吓你幫我啦！ Fanny：你都唔聽我指示去做既！佢真係唔想再見你呢。 榮：你幫我講好話啦！ Fanny：弊在你攪到佢畀人笑到面黃呢！我點講都無用啦。 △榮幻想二人耍盲雞的幸福模 榮：你同佢講，我係老左d，不過我真係想同佢結婚。我可以開間幼稚園畀佢架。 Fanny：你以為有錢大晒咩。 榮：唔係，不過我可以為佢做好多野，佢邊有更好的選擇噃！ Fanny：我知，你畀d時間佢啦，佢仲細，等佢卅幾都未發過市，
可能會考慮你呢！ 榮：等到佢卅幾？咁…你有無其他教幼稚園未拍過拖的朋友呀？ 場數：15 時間：日 景：公園 人：儀、萬先生 △儀在等待 △隱約聽到陳百強的歌聲：不斷默默地尋訪… △萬行至 萬：唔好意思呀林老師，張通告的時間都唔得，攪到要你額外出來。 儀：唔緊要，其實子良的事我都想同你傾吓，因為佢好似同其他小朋
友相處得唔係幾好。我想了解吓，係咪有家庭問題遮。 萬：我都覺得佢唔係幾合。其實…其實，佢媽咪離開左我地。 儀：唔怪得啦。佢一定好掛住媽咪啦。有時，佢甚至會叫我做媽咪。 萬：係呀。我有時都想同佢搵返個媽咪，但係要佢鍾意，又要錫佢， 唔容易搵架。子良好鍾意你架。佢成日同我講你講左咩故事佢聽呀，
教佢唱歌呀。其實，你個樣真係有d似佢媽咪。 △萬有點期望地看著儀 儀(害羞地)：其實，你地點解分開既？ 萬(未痊愈地)：我同佢媽咪細細個就拍拖，一畢業就結婚。 我以為初戀可以一生一世架。點知，佢出左黎社會做野， 就開始嫌我幼稚，又覺得佢上司成熟能幹，仰慕佢，
後來仲同左佢一齊。 儀：對唔住呀！(△拍萬肩膊)你一直等緊佢呀？ △歌聲徐徐響起：幻想的她已在傍，從前完美幻象… 萬：唔係，不過未搵到啱的。我唔係咁意鍾意一個人架。(△捉著儀手)
其實我留意左你好耐啦… 場數：16 時間：晚 景：街 人：儀、萬先生、MAY、榮 △萬與儀並肩而行 △儀看見MAY △MAY抱著HELLO
KITTY，與榮並肩而行 △MAY發現儀，轉入街口躲避
|
|||||||